20–26 Maj

Matiu 13; Luk 8; 13

“Man we I Gat Sora, Hem I Mas Lisin Gud long Tok Ya”

Ol parabol oli ol simpol stori we i save pulum tingting blong ol pikinini. Aotlaen ia mo Kam Folem Mi—Blong Wanwan Man, Woman mo Famli i save helpem yu blong yusum ol parabol blong Sevya, blong tijim ol trutok we oli impoten.

Invaetem Ol Pikinini blong Serem Wanem Oli Gat

Karem sam samting i kam we i save helpem ol pikinini blong tingbaot sam long ol parabol long Matiu 13, olsem wan sid, wan perel o wan tresa bokis. Invaetem ol pikinini blong serem wanem oli tingbaot abaot ol parabol.

Tijim Doktrin: Ol Smol Pikinini

Matiu 13:1–23

Mi nidim blong rere blong lanem ol tijing blong Jisas.

Ol smosmol pikinini maet oli no save andastanem evri saen long ol parabol blong man blong planem sid, be oli save lanem ol simpol trutok blong gospel we i stap tijim. ?Olsem wanem nao yu save helpem olgeta blong andastanem moa, wanem parabol ia i minim long olgeta?

Samfala Aktiviti we Yu Save Mekem

• Soem ol defdefren kaen graon (o ol pikja blong ol graon) taem yu stap tokbaot long sot toktok, Matiu 13:3–8. Givim long wanwan pikinini wan sid, mo askem wanem nao oli save mekem blong helpem sid ia i gro. Eksplenem se testemoni blong yumi i olsem ol sid. ?Olsem wanem yumi helpem testemoni blong yumi “sid” i gro?

• Yusum aktiviti pej blong wik ia blong helpem ol pikinini andastanem wanem kaen graon nao oli stap tokbaot long Matiu 13 we i stap tijim abaot hat blong yumi. Askem ol pikinini wanem kaen hat nao Jisas i wantem olgeta blong gat, blong mekem se oli save lanem ol tijing blong Hem.

• Ridim Matiu 13:9, 15, mo askem ol pikinini blong poenem ol defdefren pat blong bodi blong olgeta taem oli harem yu talemaot. ?Olsem wanem nao yumi save yusum ol pat blong bodi ia blong lanem ol tijing blong Jisas?

Matiu 13:24–30, 36–43, 47–48

Papa long Heven i wantem mi blong jusum raet.

Sam long ol parabol blong Jisas oli tijim se long las dei, bae God i seperetem ol nogud pipol aot long ol stret mo gud pipol. ?Olsem wanem nao yumi save yusum ol parabol blong givim insperesen long ol pikinini blong oli jusum raet?

Samfala Aktiviti we Yu Save Mekem

• Askem ol pikinini blong aktem parabol blong gudfala sid mo ol rabis gras (luk long Matiu 13:24–30). Eksplenem se gudfala sid i ripresentem ol pipol we oli mekem ol joes we i stret mo gud mo ol rabis gras (ol gras we i gat nidel)oli ripresentem olgeta we oli no olsem. Wan dei, Papa long Heven bae i karem i kam tugeta ol pipol we oli stret mo gud blong stap laef wetem Hem.

• Givim sam eksampol long ol pikinini, abaot ol joes we oli raet mo rong. Askem ol pikinini blong talem “joes blong gudfala sid” taem yu tokbaot wan raet joes mo “joes blong rabis gras” taem yu tokbaot wan rong joes.

• Karem ol pikja blong ol rop blong gudfala sid i kam, mo askem ol pikinini blong dro long ol pikja ia, sam long ol wei we oli save gat fasin blong stap stret mo gud.

Matiu 13:44–46

Membasip blong mi long Jos Ia blong Jisas Kraes blong Ol Lata-dei Sent i wan tresa.

?Olsem wanem nao yu save yusum pikja blong tresa mo ol gudgudfala perel blong helpem ol pikinini blong andastanem valiu blong stap pat blong Jos Ia blong Kraes?

Samfala Aktiviti we Yu Save Mekem

• Haedem ol pikja blong wan bokis blong tresa mo wan perel insaed long rum, mo askem ol pikinini blong lukaotem olgeta. Yusum ol pikja blong tij abaot ol parabol long Matiu 13:44–46. Tokbaot from wanem wan i save givap long evri samting we i gat, from wan naesfala perel o tresa long wan fil. Eksplenem se samtaem yumi givap long wan samting we i gud from wan samting we i moa gud moa. Talem long ol pikinini from wanem gospel i gat bigfala valiu long yu.

• Putum sam samting insaed long wan bokis blong mane o ol pikja we i ripresentem “tresa” insaed long Jos Ia blong Jisas Kraes blong Ol Lata-dei Sent, olsem Sevya, ol tempol o ol Buk blong Momon. Askem wanwan pikinini blong jusum wan samting o wan pikja mo tokbaot from wanem hem i wan tresa.

• Singsing tugeta “The Church of Jesus Christ” (Children’s Songbook, 77), mo askem ol pikinini blong tokbaot ol risen from wanem oli tangkyu from Jos blong Sevya. Testifae abaot ol blesing we yu bin eksperiensem from membasip blong yu insaed long Jos.

Tijim Doktrin: Ol Bigfala Pikinini

Matiu 13:1–23

Mi nidim blong mekem rere hat blong mi blong kasem ol tijing blong Jisas.

?Olsem wanem nao yu save helpem ol pikinini blong oli luksave from wanem hem i impoten blong gat wan sofsof hat mo wan hat we i wantem blong mekem samting, mekem se Jisas i save tijim olgeta?

Samfala Aktiviti we Yu Save Mekem

• Asaenem wanwan pikinini blong rid abaot wan aot long fofala kaen graon long Matiu 13:4–8. Invaetem olgeta blong lukaotem mo serem wanem i hapen long ol sid long wanem kaen graon we oli stap ridim. ?Olsem wanem nao hat blong yumi i save kam olsem ol defren kaen graon? (Luk long Matiu 13:19–23).

• Soem wan pikja blong wan garen long ol pikinini. ?Wanem nao graon i nidim blong mekem se ol plan i save gro long hem? Soem wan pikja blong graon we i gat fulap ston mo nidel gras long hem. ?From wanem bae ol plan i fesem hadtaem blong stap gro long kaen graon olsem? ?Wanem nao yumi save mekem blong meksua se hat blong yumi oli olsem ol gudfala graon, mekem se yumi save kasem ol tijing blong Sevya?

• Invaetem ol pikinini blong ridim Matiu 13:15–17. Droem wan ae, sora mo wan hat long bod. ?Olsem wanem nao yumi save jusum wanwan long ol samting ia blong lanem ol tijing blong Jisas?

Matiu 13:24–30, 36–43

Mi save jusum raet iven taem olgeta we oli stap raonem mi oli no mekem.

Taem yu stap ridim ol ves ia mo tingting long ol pikinini long maen blong yu, ?wanem nao ol filing mo tingting we i kam long yu?

Samfala Aktiviti we Yu Save Mekem

• Invaetem ol pikinini blong droem defdefren pat aot long parabol blong gudfala sid mo rabis gras, we i stap long Matiu 13:24–30, mo tokbaot ol droing blong olgeta long klas. Askem olgeta blong makem ol droing blong olgeta i go wetem mining blong parabol we i stap long Matiu 13:36–43. Maet bae yu nid blong eksplenem se ol rabis gras oli ol ol gras we i save givim kil long olgeta.

• Sapos i posibol, soem wan pikja blong gudfala sid mo ol rabis gras. Eksplenem se ol gudfala sid mo ol rabis gras bae oli gro tugeta kasem we oli raep (en blong wol). Hemia i tijim yumi se yumi stap laef tugeta wetem gud mo ivel raonem yumi, mo yumi mas lukaot gud blong jusum raet. Askem ol pikinini blong serem olsem wanem oli save luksave gud mo ivel.

Matiu 13:44–46

Membasip blong mi long Jos Ia blong Jisas Kraes blong Ol Lata-dei Sent i wan tresa.

Ol pikinini we yu stap tijim, ?oli luk membasip blong olgeta long Jos olsem wan tresa we i gat valiu? Ating taem oli stap toktokraon long ol parabol long Matiu 13:44–46 i save helpem olgeta blong serem ol filing blong olgeta abaot Jos blong Sevya.

Samfala Aktiviti we Yu Save Mekem

• Invaetem ol pikinini blong ridim Matiu 13:44–46 long olgeta wanwan mo tokbaot ol parabol long ol toktok blong olgetawan wetem wan narafala memba blong klas.

• Katemaot sam sekol blong ripresentem ol koen, mo putum olgeta long wan bokis blong tresa. Invaetem ol pikinini blong jusum wan koen mo dro o raetem wan samting long hem, we oli laekem tumas we i mekem se oli save stap olsem wan memba blong Jos. Askem ol pikinini blong serem wanem oli raetem o droem long koen blong olgeta.

• Invaetem wan memba long wod blong serem wetem ol pikinini, stori blong hem abaot olsem wanem hem i jenisim laef blong hem mo talem wanem hem i sakrifaesem, mekem se hem i save joenem Jos Ia blong Jisas Kraes blong Ol Lata-dei Sent. O askem ol pikinini blong tokbaot ol sakrifaes we oli mekem blong Lod mo Jos blong Hem.

Stap Leftemap Tingting blong Lanem Samting long Hom

Invaetem ol pikinini blong tijim ol famli blong olgeta abaot wan long olgeta parabol we oli lanem long Praemeri.

Stap Kam Antap long Fasin blong Yumi Blong Stap Tij

Ol pikinini oli laekem blong serem wanem we oli stap lanem. I nomata se oli yang, ol pikinini oli save mekem ol memba blong famli blong olgeta oli kam strong moa. Leftemap tingting blong olgeta blong serem wetem ol famli blong olgeta ol samting we oli stap lanem long Praemeri. (Luk long Teaching in the Savior’s Way, 30.)