6–12 Maj

Matiu 9–10; Mak 5; Luk 9

“Jisas I Sanemaot Ol Twelef Man Ya Oli Go”

Taem yu ridim Matiu 9–10; Mak 5; mo Luk 9, yu save kasem ol kwaet toktok we i kam long Tabu Spirit. Ol kwaet toktok ia i go wetem Kam Folem Mi—Blong Wanwan Man, Woman mo Famli mo aotlaen ia, i save helpem yu blong rere blong tij.

Invaetem Ol Memba blong Serem Wanem Oli Gat

Invaetem ol pikinini blong serem wan samting we oli bin mekem blong helpem wan long wik ia. ?Wanem nao Sevya i mekem blong helpem ol narafala man?

Tijim Doktrin: Ol Smol Pikinini

Matiu 9:18–30; Mak 5:22–43

Jisas i gat paoa blong hilim mi.

Sevya i ripripitim blong soem paoa blong Hem blong hilim olgeta we oli bin gat fet long Hem. Yu save helpem ol pikinini we yu tijim blong bildimap fet blong olgeta long paoa blong Hem blong hilim man.

Samfala Aktiviti we Yu Save Mekem

• Talem stori blong gel blong Jaeras long ol pikinini (luk long Mak 5:22–23, 35–43). Long stret ples insaed long stori, ridim ol toktok blong Jisas: “Mi mi talem long yu, yu stanap” (ves 41), mo askem ol pikinini blong stanap. Helpem ol pikinini blong andastanem se Jisas i gat paoa blong hilim ol pipol blong givim laef we i no save finis long yumi.

• Soem pikja blong stori long Matiu 9:20–22 taem yu stap ridim ol ves ia. Helpem ol pikinini blong lanem baehat “bilif blong yu i mekem yu yu gud bakegen” (ves 22). Blong mekem hemia, yu save asaenem wan toktok long wanwan pikinini mo afta mekem ol pikinini ol talem ol toktok blong olgeta long oda plante taem. ?Long wanem wei woman ia i soem se hem i gat fet long Jisas Kraes? ?Wanem nao yumi save mekem blong soem se yumi gat fet long Kraes?

• Askem ol pikinini blong klosem ae blong olgeta mo lisin taem yu rid long Matiu 9:27–30. Taem yu rid abaot ol blaen man we Jisas i mekem olgeta oli save lukluk, invaetem ol pikinini blong openem ae blong olgeta. Invaetem ol pikinini blong tokbaot se, bae oli filim olsem wanem sapos Jisas i bin hilim olgeta.

• Yusum aktiviti pej blong wik ia blong helpem ol pikinini blong lanem stori blong Sevya we i resemap gel blong Jaeras long ded.

Gat Tras long Lod, i kam long Liz Lemon Swindle

Matiu 10:1–10

Jisas i singaotem Olgeta Twelef Aposol mo i bin givim paoa long olgeta blong mekem wok blong Hem.

Ol pikinini we yu tijim, ?oli save se yumi gat Olgeta Twelef Aposol tedei? ?Olsem wanem yu save yusum ol ves ia blong tijim olgeta abaot from wanem i impoten blong gat Ol Aposol long taem blong yumi tedei mo wanem nao wok we oli singaotem olgeta blong mekem?

Samfala Aktiviti we Yu Save Mekem

• Talem long sot toktok Matiu 10:1–10 long ol simpol wei. Eksplenem se Jisas i singaotem Ol Aposol blong helpem Hem blong bildimap Jos blong Hem. Askem ol pikinini blong kaontem Ol Aposol long pikja Kraes I Stap Odenem Ol Aposol (Gospel Art Buk, namba 38) mo long wan pikja blong Kworom blong Olgeta Twelef Aposol blong tedei (luk long ChurchofJesusChrist.org o wan jeneral konfrens namba blong Liahona). Eksplenem se yumi gat Ol Aposol tedei, semmak olsem taem blong Jisas. Serem testemoni blong yu abaot Ol Aposol blong Lod mo abaot wan samting we oli jes tijim i no longtaem o pas.

• Haedem pikja blong Ol Aposol blong tedei raon long rum (blong karem ol pikja, luk long wan jeneral konfrens namba long Liahona). Askem ol pikinini blong faenem ol pikinini mo tokbaot smol wanwan long Ol Aposol (luk long “Meet Today’s Prophets and Apostles” long ChurchofJesusChrist.org).

• Invaetem wan pikinini blong leftemap wan pikja blong Fas Presidensi mo wan pikja blong Kworom blong Olgeta Twelef Aposol. Askem pikinini ia blong lidim ol narafala pikinini raon long rum i go long wan pikja blong Jisas. Testifae se ol profet mo ol aposol oli lidim yumi i go long Jisas Kraes.

Tijim Doktrin: Ol Bigfala Pikinini

Matiu 9:18–30; Mak 5:22–43

Jisas i gat paoa blong hilim mi.

Blong stap ridim ol stori blong Sevya we i stap hilim ol pipol, i save helpem ol pikinini we yu tijim blong bildimap fet blong olgeta long Hem. Ol stori ia oli save helpem olgeta tu blong filim sore mo lav blong Hem.

Samfala Aktiviti we Yu Save Mekem

• Ridim tugeta ol stori blong Jisas we i stap hilim ol pipol, we yu save faenem long Matiu 9:20–22, 27–30 mo Mak 5:22–23, 35–43 (o soem ol vidio blong “Jesus Heals a Woman of Faith” mo “Jesus Raises the Daughter of Jairus” long ChurchofJesusChrist.org). ?Long wanem wei nao ol pipol insaed long stori ia oli soem fet blong olgeta long Jisas Kraes? ?Wanem nao yumi lanem abaot Sevya long ol stori ia?

• Invaetem ol pikinini blong serem ol eksperiens blong olgeta taem olgeta o wan we oli save, i bin kasem prishud blesing we i blong hilim wan sik. ?Olsem wanem nao oli kam oraet o kasem blesing? Eksplenem se samtaem i no tingting blong Lod blong mekem wan bigfala merikel, be yet, yu save kasem blesing mo kamfot blong Hem.

Matiu 10:1–10

Olgeta Twelef Aposol oli save tijim mi abaot Jisas.

?Olsem wanem nao, taem oli stap lanem abaot Olgeta Twelef Aposol long dei blong Kraes, i helpem ol pikinini blong andastanem moa gud wanem Olgeta Twelef Aposol blong tedei oli stap mekem?

Samfala Aktiviti we Yu Save Mekem

• Soem ol pikja blong Ol Aposol long taem blong Jisas, mo long taem blong yumi (luk long Kraes I Stap Odenem Ol Aposol [Gospel Art Buk, namba 38] mo wan konfrens we i jes pas we oli putumaot long Liahona). Askem ol pikinini blong ridim Matiu 10:7 blong faenemaot wanem Ol Aposol oli mekem (luk tu Luk 9:1–2, 6; Doktrin mo Ol Kavenan 107:23).

• Invaetem ol pikinini blong raetem nem blong hamas fasfala Aposol we oli save tingbaot, long bod. Afta, askem olgeta blong mekem lis blong hamas Aposol we oli stap laef tedei, olsem we oli save tingbaot. Askem olgeta blong jekem lis blong olgeta wetem Matiu 10:2–4 mo wan konfrens toktok we i jes pas long Liahona. Yu save plei wan gem blong majem samting, we ol pikinini oli save majem nem blong Ol Aposol we oli stap laef wetem ol pikja blong olgeta. Yu save karem ol pikja long ChurchofJesusChrist.org.

• Sam dei bifo long klas, invaetem sam pikinini blong rere long wan stori we wan Aposol i bin tokbaot, mo blong serem stori ia long klas (luk long ol toktok long Liahona blong kasem ol aedia). ?Long wanem wei nao Aposol ia i yusum stori blong givim insperesen long yumi blong kam moa olsem Sevya?

• Serem sam eksampol blong ol testemoni blong Ol Aposol abaot Kraes long dei tedei, wetem ol pikinini “Kraes we I Laef: Testemoni blong Olgeta Aposol” [https://www.churchofjesuschrist.org/study?lang=bis]).

• Helpem ol pikinini blong lanem baehat mo andastanem Ol Toktok blong Bilif 1:6.

Luk 9:23–25

Blong stap folem Jisas Kraes i nidim blong mekem sakrifaes.

?Olsem wanem nao bae yu helpem ol pikinini blong andastanem wanem i minim blong “lusum” laef blong olgeta taem oli folem Sevya.

Samfala Aktiviti we Yu Save Mekem

• Talem long ol pikinini abaot wan taem we yu givap long wan samting blong mekem se yu save kasem wan samting we i moa gud. Invaetem ol pikinini blong serem ol eksampol blong olgetawan. Afta, ridim tugeta Luk 9:23–25. Eksplenem se Jisas i wantem yumi blong stap wantem blong givap eni samting blong folem Hem. From se Hem bae i no save talem stret long yumi blong givim laef blong yumi long wok blong Hem, ?wanem nao Hem i askem yumi blong mekem (luk long Josef Smit Translesen, Matiu 16:26 [long Matiu 16:24, futnot e]).

• Raetem sam long ol kwaliti olsem hemia blong Kraes long ol pisis blong pepa mo raetem ol oposit blong ol kwaliti ia long ol narafala pisis blong pepa, (olsem lav mo fasin blong stap griri, fasin blong gat tingting we i stap daon mo fasin blong gat hae tingting, mo sam moa). Raetem ol toktok ia sevem mo lusum olsem ol taetol long bod mo askem ol pikinini blong putum ol kwaliti ia andanit long ol stret taetol. Givim sam taem long ol pikinini blong tingting hevi long ol kwaliti olsem hemia blong Kraes long bod mo jusum wan blong stap wok fulwan from.

Stap Leftemap Tingting blong Lanem Samting long Hom

Invaetem ol pikinini blong yusum aktiviti pej blong wik ia blong serem wetem ol famli blong olgeta abaot Jisas we i hilim gel blong Jaeras.

Stap Kam Antap long Fasin blong Yumi blong Stap Tij

Leftemap tingting blong gat fasin blong stap kwaet. Helpem ol pikinini blong andastanem se wan impoten pat blong stap kwaet, hem i blong stap tingting long Papa long Heven mo Jisas Kraes. Maet yu save rimaenem ol pikinini blong stap revren mo singsing kwaet o mekem saon blong wan singsing o soem wan pikja blong Jisas.