“13–19 Maj. Matiu 11–12; Luk 11: ‘Bae Mi Mekem we Yufala I Spel Gud,’” Kam Folem Mi—Blong Praemeri: Niu Testeman 2023 (2022)
“13–19 Maj. Matiu 11–12; Luk 11,” Kam Folem Mi—Blong Praemeri: 2023
Yu No Stap Fraet, i kam long Michael Malm
13–19 Maj
Matiu 11–12; Luk 11
“Bae Mi Mekem we Yufala I Spel Gud”
Ol aedia blong tij long aotlaen ia, oli minim blong helpem yuwan blong kasem insperesen blong mekem samting i moa interesting. Yu save jenisim folem nid blong ol pikinini we yu tijim.
Invaetem Ol Pikinini blong Serem Wanem Oli Gat
Leftemap tingting blong ol pikinini blong serem wanem oli save mekem blong wosipim Lod long Sabat dei.
Tijim Doktrin: Ol Smol Pikinini
Jisas bae i helpem mi taem mi kam long Hem.
Ol pikinini oli save filim kamfot taem oli save se Jisas bae i helpem olgeta wetem ol hevi samting long laef ia, taem oli kam long Hem.
Samfala Aktiviti we Yu Save Mekem
-
Ridim Matiu 11:28–30, mo soem pikja blong ol buluk we i pulum kat long aotlaen blong wik ia long Kam Folem Mi—Blong Wanwan Man, Woman mo Famli. Askem ol pikinini blong poenem ol buk mo kat blong pulum. Eksplenem se ol buluk mo kat ia i save pulum moa hevi samting tugeta bitim we wanwan buluk i save tekem hemwan. Testifae se taem yumi harem nogud, wari o fraet, yumi save lukaotem Jisas mo Hem bae i helpem yumi.
-
Askem wan pikinini blong leftemap wan hevi samting. Taem we hem i stap traehad blong leftemap, askem blong helpem hem. ?Olsem wanem nao Jisas i helpem yumi blong mekem ol had samting? Serem wan eksperiens abaot taem we yu bin filim Jisas i helpem yu blong mekem wan had samting, mo askem ol pikinini blong serem ol eksperiens blong olgetawan.
Mi save obei long Sabat dei i Tabu.
?Wanem sam wei blong mekem ol pikinini oli glad long taem we yu save tijim ol pikinini abaot Sabat dei mo from wanem yumi obei long hem i tabu?
Samfala Aktiviti we Yu Save Mekem
-
Ridim laod Matiu 12:10–13 . Invaetem ol pikinini blong stanap mo sidaon evri taem yu talem “Sabat,” mo ripriptim sentens wetem olgeta “From samting ya i stret nomo long Loa, blong yumi mekem ol wok blong givhan long man long Sabat dei” (Matiu 12:12). ?Wanem nao oli ting se hemia i minim?
-
Soem wan kalenda long ol pikinini, mo haelaetem Sabat dei blong olgeta. ?Wanem nao yumi mekem long ol narafala dei blong wik? ?Wanem nao yumi save mekem long Sabat, blong mekem i defren long ol narafala dei? (luk long Aesea 58:13–14).
-
Askem ol pikinini blong droem ol gudfala samting we oli save mekem long Sabat dei (luk long aktiviti pej blong wik ia).
-
Invaetem ol pikinini blong tingting long ol aksen we oli save helpem olgeta blong tingbaot ol wei we yumi stap rere from Sabat, taem bae oli singsing long singsing ia “Saturday” (Children’s Songbook, 196).
-
Droem ol ae, sora, wan maot mo ol han long blak bod. Askem ol pikinini blong talem long yu, wanem nao wanwan pat blong bodi blong yumi ia i save mekem blong obei long Sabat dei i tabu.
Papa long Heven i stap givim ol gudfala presen long yumi.
Tijing blong Sevya long Luk 11:11–13 i save helpem ol pikinini we yu tijim, blong oli andastanem se Papa long Heven i lavem olgeta mo Hem i wantem blong blesem olgeta.
Samfala Aktiviti we Yu Save Mekem
-
Yusum wan samting blong tijim lesen, blong soem ol tijing blong Sevya long Luk 11:11–13. Eksampol. Yu save putum wan ston insaed long wan plastik blong bred o putum wan pikja blong skopion insaed long wan katen blong eg. Askem ol pikinini blong gesem wanem i stap insaed, afta soem long olgeta. Invaetem olgeta blong riplesem ston mo pikja ia wetem wan pis bred mo eg. Ridim Luk 11:11–13, mo serem testemoni blong yu se Papa long Heven i lavem yumi, mo givim plante blesing long yumi tru long Spirit blong Hem.
-
Singsing tugeta wan singsing abaot lav blong God olsem “My Heavenly Father Loves Me” (Children’s Songbook, 228–29). ?Wanem sam gudfala presen we Hem i bin givim long yumi? Askem ol pikinini blong droem ol pikja blong ol blesing we i kam long Papa long Heven we oli tangkyu from.
Tijim Doktrin: Ol Bigfala Pikinini
Jisas bae i helpem mi taem mi kam long Hem.
?Olsem wanem yu save helpem ol pikinini blong andastanem se, Sevya bae i givim spel long olgeta taem oli kam long Hem?
Samfala Aktiviti we Yu Save Mekem
-
Invaetem ol pikinini blong serem wan taem we oli bin wari o fraet abaot wan samting. Invaetem olgeta blong lukaotem long Matiu 11:28–30 abaot ol kaonsel we i save helpem olgeta long ol kaen situesen olsem. Olsem wanem nao Sevya i “givim spel long [yumi] ”? (ves 28).
-
Invaetem ol pikinini blong droem pikja blong ol samting we oli stap mekem blong kam long Jisas mo lanem abaot Hem.
-
Helpem ol pikinini blong lanem baehat namba fo toktok blong bilif. Toktok long olgeta abaot olsem wanem wanwan long ol fas prinsipol mo ol odinens blong gospel oli helpem yumi blong akseptem invitesen blong Jisas, “Kam long mi” (Matiu 11:28).
Sabat hem i wan dei blong mekem ol gudfala samting, we i mekem mi kam moa kolosap long God.
Ol pikinini we yu tijim bae oli kam moa strong taem bae yu tokbaot bigwan ol stamba tingting mo ol blesing, taem oli stap obei long Sabat dei i tabu.
Samfala Aktiviti we Yu Save Mekem
-
Invaetem wan pikinini blong mekem olsem se hem i man ia we han blong hem Sevya i hilim (luk long Matiu 12:10–13). Wan narafala pikinini i save askem sam kwestin long hem abaot eksperiens ia.
-
Ridim tugeta Matiu 12:12. ?Wanem sam gudfala samting we yumi save mekem long Sabat? Askem ol pikinini blong droem ol aedia blong olgeta long aktiviti pej blong wik ia, katemaot ol pisis, mo stap putum tugeta ol pasel blong olgeta wanwan.
-
Haedem sam long ol pikja blong ol pipol we oli stap mekem ol samting we i soem lav long Papa long Heven, long Sabat dei. Askem ol pikinini blong faenem ol pikja mo serem olsem wanem taem yumi mekem ol samting long ol pikja ia, i soem lav blong yumi long God.
Ol Disaepol Oli Kakae Flaoa long Sabat, i kam long James Tissot
Tugeta ol aksen mo hat blong mi, oli mas klin gud.
Sevya i bin tijim se, hem i no inaf blong stap stret mo gud long fes blong ol narafala man. Ol tingting, filing mo ol praevet aksen blong yumi tu oli mas klin gud.
Samfala Aktiviti we Yu Save Mekem
-
Blong ol ves ia moa klia, soem wan kap o wanem kontena we i klin aotsaed be i toti long insaed. Helpem olgeta blong tingbaot wanem “aotsaed blong kap” i ripresentem. ?Wanem nao “insaed pat blong kap” i ripresentem? ?From wanem hem i impoten blong klinim tugeta insaed mo aotsaed?
-
Ridim tugeta sam long ol narafala skripja we oli tokbaot bigwan fasin blong stap stret mo gud, long tugeta hat mo ol aksen blong yumi—eksampol, Ol Sam 24:3–5; Matiu 15:7–8; Moronae 7:6–9. Tokbaot from wanem Sevya i wantem hat mo praevet aksen blong yumi i stap klin long saed blong spirit.
Stap Leftemap Tingting blong Lanem Samting long Hom
Invaetem ol pikinini blong serem wetem famli blong olgeta, ol aedia blong stap obei long Sabat dei i tabu.
Kam Antap long Fasin blong Yumi blong Stap Tij
Stap askem ol kwestin. “Wan kwestin we i stap invaetem olgeta we oli stap lan blong oli talemaot wan gospel prinsipol long toktok blong olgetawan—speseli taem bae oli askem long taem we klas i stat—i helpem yu blong yusum hamas taem yu nidim blong stap stadi long prinsipol ia long klas” (Teaching in the Savior’s Way, 32).