Kraes we Bodi blong Hem I Jenis, i kam long Carl Heinrich Bloch

10–16 Epril

Matiu 15–17; Mak 7–9

“Yu Yu Mesaea Ya”

Taem yu stap tingting hevi long Matiu 15–17 mo Mak 7–9, lisin gud long ol kwaet toktok blong spirit we i save helpem yu blong save wanem ol pikinini long klas blong yu oli nidim.

Invaetem Ol Pikinini blong Serem Wanem Oli Gat

Invaetem ol pikinini tokbaot se, from wanem oli tangkyu from ol lida insaed long Jos, wetem ol profet mo ol aposol mo ol lokol lida. ?Wanem nao yumi harem long olgeta, we oli tijim i no longtaem i pas?

Tijim Doktrin: Ol Smol Pikinini

Matiu 16:13–17

Mi save kasem wan testemoni se Jisas Kraes i Pikinini blong God.

Tingting long wei we yu save yusum ol testemoni blong Pita mo ansa blong Jisas, blong tijim ol pikinini long wanem i wan testemoni mo givim insperesen long olgeta blong eksperiens ia blong tijim ol pikinini long wanem hem i fet.

Samfala Aktiviti we Yu Save Mekem

• Askem ol pikinini blong lisin long wanem we Pita i talem, taem yu ridim Matiu 16:15–17. (Luk tu long “Japta 32: Pita i Testifae abaot Kraes,” long Ol Niu Testeman Stori, 76–77, o vidio we i go wetem ChurchofJesusChrist.org.) Eksplenem se Pita i stap serem testemoni blong hem abaot Jisas Kraes Ridim ol ves bakegen. (O soem vidio bakegen.) Naoia, askem ol pikinini blong lisin long huia we i talem long Pita se Jisas Kraes i Pikinini blong God.

• Serem testemoni blong yu abaot Jisas Kraes mo eksplenem olsem yu kasem testemoni ia. Invaetem ol pikinini blong lukaotem testemoni blong olgetawan long Papa long Heven.

Matiu 16:15–19

Jisas Kraes i givim ol ki blong prishud long ol profet mo ol aposol blong lidim Jos blong Hem.

Sevya i komperem revelesen olsem wan ston mo prishud olsem ol ki. ?Olsem wanem yu save yusum simbol ia blong helpem ol pikinini blong gat fet long olgeta we oli stap lidim Jos?

Samfala Aktiviti we Yu Save Mekem

• Soem wan ston long ol pikinini taem yu ridim Matiu 16:18 wetem olgeta. Ripitim toktok ia wetem olgeta “antap long strong ston ia, bae mi bildim jos blong mi,” ademap ol aksen we i go wetem ol toktok ia. Eksperiens se Jos i ia oli bildimap long “strong ston” blong revelesen.

• Soem sam ki long ol pikinini, mo askem wanem nao yumi stap mekem wetem ol ki. Eksplenem se Pita mo narafala Aposol oli bin kasem ol prishud long Jisas. Ol ki ia oli “karemaot lok” long ol blesing we i blong yumi mo oli openem rod i go long heven. Eksampol. Ol ki blong prishud oli letem yumi blong kasem baptaes mo tekem sakramen. Givim ol pepa ki long ol pikinini mo mekem oli raetem sam blesing we ol ki blong prishud i bin “karemaot lok” long ol.

• Soem wan pikja blong Presiden blong Jos, mo serem testemoni blong yu se hem i holem ol ki blong prishud tedei, olsem Pita.

Ol ki blong prishud oli atoriti ia blong daerektem yus blong prishud.

Matiu 17:19–20

Fet blong mi i save mekem ol merikel.

Taem yu ridim promes blong Jisas se, fet i olsem wan sid blong nambangga i save muvum wan maonten, ?wanem nao ol filing mo tingting we yu kasem, abaot ol pikinini we yu tijim?

Samfala Aktiviti we Yu Save Mekem

• Ridim Matiu 17:19–20 wetem ol pikinini. Invaetem olgeta blong gat janis blong dro wan bigfala maonten mo wan smol sid, wan afta wan, long bod. Eksplenem se, ol maonten oli olsem ol samting we oli had blong mekem. ?Wanem sam samting we i olsem ol maonten long yumi? Yusum aktiviti pej ia blong helpem ol pikinini, blong tingbaot olsem wanem fet i save helpem olgeta blong mekem ol samting, we God i wantem olgeta blong mekem.

• Putum wan pikja blong wan maonten long wan saed blong rum. Askem ol pikinini blong talem nem blong sam samting we, oli save mekem blong bildimap moa fet long Jisas Kraes. Letem wanwan pikinini we i talem wan samting, blong i muvum maonten i go moa kolosap long narasaed blong rum. Ridim Matiu 17:19–20, mo testifae abaot paoa blong fet long laef blong yu.

• Singsing tugeta long wan singsing abaot fet, olsem “Faith” (Children’s Songbook, 96–97). Givim wan long evri pikinini blong karem i go long haos. Invaetem olgeta blong planem sid mo putum long wan ples we bae oli save stap wajem i gro, blong helpem olgeta blong tingbaot fet long Papa long Heven mo Jisas Kraes.

Tijim Doktrin: Ol Bigfala Pikinini

Matiu 16:13–17

Wan testemoni long Jisas Kraes, i kam tru long revelesen.

?Olsem wanem nao testemoni blong Pita long Matiu 16:13–17 i helpem ol pikinini taem oli stap bildimap testemoni blong olgeta?

Samfala Aktiviti we Yu Save Mekem

• Askem ol pikinini se, wanem nao bae oli talem long wan man we i askem olgeta se, “?Huia i Jisas?” Invaetem ol pikinini blong ridim Matiu 16:13–17 blong faenemaot olsem wanem Pita i bin ansarem ol kwestin ia. ?Olsem wanem nao hem i kasem testemoni blong hem long Jisas? ?Wanem nao yumi save mekem blong gat wan strong testemoni?

• Helpem ol pikinini blong komperem ol wei we yumi save ol trutok long saed blong spirit, wetem ol wei we yumi save ol narafala trutok. Eksampol: ?Olsem wanem nao bae yumi save longfala blong wan man o weta i olsem wanem? ?Olsem wanem nao yumi save se Jisas Kraes i pikinini blong? Talem long pikinini olsem wanem Tabu Spirit i bin testifae long yu abaot Sevya.

• Serem testemoni blong yu abaot Jisas Kraes, mo givim jalenj long ol pikinini blong kasem o mekem testemoni blong olgeta i kam moa strong long Hem.

Matiu 16:15–19

Olgeta we oli gat prishud ki nao oli lidim Jos blong Jisas Kraes.

Sapos yu stadi long Matiu 16:15–19 bae i save bildimap fet blong ol pikinini se, Jos Ia blong Jisas Kraes blong Ol Lata-dei Sent, i restoresen blong semmak Jos we Jisas i bin stanemap taem Hem i bin stap laef long wol ia.

Samfala Aktiviti we Yu Save Mekem

• Raetem Matiu 16:19 long bod, mo no raetem sam toktok, olsem toktok ia, “ol ki.” Askem ol pikinini blong faenem ol toktok we oli nogat.

• Soem wan vidio blong “Where Are the Keys?” (ChurchofJesusChrist.org), o luklukbak long “Ki blong Prishud, Ol” insaed long Gaed long Ol Skripja (olskripja.ChurchofJesusChrist.org). ?Wanem nao oli ol prishud ki? ?Olsem nao ol ki blong prishud oli olsem ol ol ki we yumi stap yusum?

• Helpem ol pikinini blong raetem nem blong sam pipol we oli gat ol prishud ki, long bod. “Ki blong Prishud, Ol” long Gaed long Ol Skripja (olskripja.ChurchofJesusChrist.org) i gat wan lis we i save helpem olgeta. Invaetem wan long wod blong yu we i gat ol ki blong prishud, blong serem smol wetem klas, from wanem ol ki ia oli impoten.

• Haedem sam ki (o ol pikja blong ol ki) raon long rum, mo askem ol pikinini blong lukaotem olgeta. Taem we oli faenem wanwan ki, helpem ol pikinini blong tingting long ol blesing we yumi glad long olgeta, from ol ki blong prishud (eksampol, famli we i no save finis, baptaes mo sakramen).

Matiu 17:1–9

Jisas Kraes i Pikinini blong God.

Ol ves ia oli tokbaot wan long ol samfala taem, long ol skripja, taem we voes blong God Papa, oli bin harem we i stap testifae abaot Pikinini blong Hem we i lavem tumas. Taem yu stap stadi long stori ia wetem ol pikinini, i save bildimap fet blong olgeta long Jisas Kraes.

Samfala Aktiviti we Yu Save Mekem

• Invaetem ol pikinini blong dro ol pikja blong ol samting we Matiu 17:1–9 i stap tokbaot. Askem olgeta blong eksplenem ol pikja blong olgeta long olgeta wanwan. (Luk long “Japta 33: Jisas I Kamaot long Glori blong Hem: Bodi blong Hem I Jenis,” long Ol Niu Testeman Stori, 78–79, o vidio we i go wetem ChurchofJesusChrist.org.)

• Givim taem long ol pikinini blong tingting hevi long stori long Matiu 17:1–9 we i stap tijim olgeta abaot Jisas Kraes. Invaetem olgeta blong raetem ol tingting blong olgeta long bod. Invaetem ol pikinini blong serem olsem wanem oli save se Jisas Kraes i Pikinini blong God.

Stap Leftemap Tingting blong Lanem Samting long Hom

Invaetem ol pikinini blong askem ol papa mo mama olgeta o ol narafala memba blong famli se, olsem wanem nao oli kasem testemoni blong olgeta abaot Jisas Kraes.

Stap Kam Antap long Fasin blong Yumi blong Stap Tij

Yusum miusik. Ol singsing blong Praemeri mo ol hym oli save helpem ol pikinini blong ol defren yia blong oli andastanem mo tingbaot ol trutok blong gospel. Singsing tu i save kipim ol pikinini oli stap bisi blong stap lanem samting. (Luk long Teaching in the Savior’s Way, 22.)