“24–30 Epril. Jon 7–10 ‘Mi Nao, Mi Olsem Gudfala Man Ya blong Lukaot Long Sipsip,’” Kam Folem Mi—Blong Wanwan Man, Woman mo Famli: Niu Testeman 2023 (2022)
“24–30 Epril. Jon 7–10,” Kam Folem Mi—Blong Wanwan Man, Woman mo Famli: 2023
Mi Tu Mi No Panisim Yu, i kam long Eva Koleva Timothy
24–30 Epril
Jon 7–10
“Mi Nao, Mi Olsem Gudfala Man Ya blong Lukaot Long Sipsip”
Taem yu stap ridim Jon 7–10, maet bae yu kasem ol tingting mo filing we oli kam long Tabu Spirit abaot ol doktrin prinsipol long ol japta ia. Taem yu stap raetemdaon ol tingting mo ol filing ia, yu save help blong mekem wan plan blong tekem aksen folem.
Raetemdaon Ol Filing mo Tingting blong Yu
Nomata we Jisas Kraes i kam blong karem pis mo gud wok i go long ol man (Luk 2:14), nao “ol man ya oli seraot from Jisas” (Jon 7:43). Ol pipol we oli bin witnesem ol sem taem ia, oli mekem defren tingting blong olgeta abaot huia hem i Jisas. Sam oli talem se “Hem i wan gudfala man,” ol narawan oli talem se “Hem i stap giaman nomo long ol man” (Jon 7:12). Taem we Hem i hilim wan blaen man long Sabat, sam oli strong se “Man ya i no kamaot long God, from we hem i no obei long loa blong Sabat dei,” mo sam narawan oli askem: “?Be olsem wanem man we i man blong mekem sin, i save mekem ol merikel olsem?” (Jon 9:16). Yet nomata we ol tingting oli fasfas, olgeta we oli bin lukaotem trutok, oli bin luksave paoa insaed long ol toktok blong Hem, from oli talem se: “!No, be i no gat man we i save tok olsem man ya samtaem!” (Jon 7:46). Taem we Ol Man Jiu oli bin askem Jisas blong talem klia long olgeta se Hem, Hem i Kraes, Hem i talemaot wan prinsipol tru long revelesen, we i save helpem yumi blong faenemaot wanem i trutok, mo wanem i giaman tok: “Ol sipsip blong mi oli save harem voes blong mi. Mi mi savegud olgeta, mo olgeta oli save biaen long mi” (Jon 10:24, 27).
Sam Aedia blong Skripja Stadi blong Yuwan
Taem mi stap laef folem ol trutok we Jisas Kraes i bin tijim mi, bae mi kam blong save se oli tru.
Ol Man Jiu oli bin sapraes se Jisas i bin save plante samting, be Hem i no skul gud (luk long ves 15)—hemia, long ol wei we olgeta oli save long hem. Long ansa blong Jisas, Hem i tijim wan defren wei blong save trutok we i blong evriwan, i nomata long wanem edukesen oli gat, o nomata bakgraon blong olgeta. Folem wanem we i stap long Jon 7:14–17, ?olsem wanem yu save kam blong save se doktrin we Jisas i bin tijim i tru? ?Olsem wanem rod ia i bin helpem yu blong developem testemoni blong yu abaot gospel?
Sore blong Sevya i stap blong evriwan.
Taem oli stap toktok abaot storian blong Sevya wetem woman ia we oli faenem hem i mekem adaltri, Elda Dale G. Renlund i talem: “I tru, Sevya i no akseptem adaltri ia. Be, Hem i no bin panisim woman ia. Hem i leftemap tingting blong woman ia blong mekembak wan niu laef. Woman ia i gat strong tingting blong jenis, from Sevya i bin soem lav mo sore, mo bigfala sore long hem. Josef Smit Translesen blong Baebol, i talem gud se woman ia i wantem kam disaepol; mo woman ia i givim glori long God stat long tetaem ia i go, mo i bin biliv long nem blong Sevya [long Inglis, luk long Jon 8:11, futnot c]” (“Our Good Shepherd,” Liahona, May 2017, 30).
?Wetaem nao yu bin filim olsem woman ia, we yu kasem sore be i no panismen we i kam long Sevya? ?Wetaem nao yu bin filim olsem ol tija blong loa mo Ol Farisi, we yu poenem fingga o stap jajem ol narawan iven taem yu no gat sin? (luk long Jon 8:7). ?Wanem moa yu save lanem aot long wei we Sevya i bin toktok wetem ol tija blong loa mo Ol Farisi, mo woman ia we i mekem adaltri? ?Wanem nao yu lanem abaot fogivnes blong Sevya taem yu stap ridim ol ves ia?
Luk long “Go and Sin No More” (vidio), ChurchofJesusChrist.org.
Sapos yumi gat fet, God i save soemaot Hemwan long taem blong ol hadtaem blong yumi.
?Wanem nao Jon 9:1–3 i stap tijim yu abaot ol jalenj mo ol hadtaem blong laef? Taem yu stap ridim Jon 9, tingting hevi long wei we ol wok blong God oli kamkamaot long laef blong man ia we i bon i kam long wol ia, be hem i blaen. ?Olsem wanem ol wok ia oli bin kamkamaot long laef blong yu—mo tu, tru long ol hadtaem blong yu?
Jisas Kraes I Gudfala Man blong Lukaot long Sipsip.
Iven sapos yu no savegud ol sipsip mo wok blong lukaot long ol sipsip, sapos yu ridim Jon 10, long ples ia we Sevya i talem se: “Mi nao, gudfala man ya blong lukaot long sipsip,” bae i save tijim yu ol impoten trutok abaot Hem. Blong faenem ol trutok ia, lukaotem ol sentens we oli tokbaot wanem i wan gudfala man blong lukaot long ol sipsip, mo afta, tingting long wei we ol sentens ia oli blong Sevya. Hemia samfala eksampol:
-
Ves 3: “Oltaem hem i stap singaot ol sipsip blong hem wanwan long nem blong olgeta, nao i lidim olgeta i go afsaed.”
-
Ves 11: “Gudfala man ya blong lukaot long sipsip, hem i glad nomo blong i ded blong sevem ol sipsip blong hem.
-
Ves 16: “Mo mi gat ol narafala sipsip bakegen we oli no blong yad ya. Bambae mi mas tekem olgeta tu oli kam.”
Hemia sam moa kwestin blong helpem yu tingting hevi long japta ia. ?Olsem wanem Jisas i olsem wan doa ol ves 7–9). ?Olsem wanem Hem i mekem “laef ya blong [yu] i save fulap gud long evri samting”? (ves 10). ?Wetaem nao yu yu filim se Hem i save gud yu? (luk long ves 14). ?Olsem wanem yu yu haremsave voes blong Gudfala Man blong Lukaot long Sipsip? (luk long ves 27).
Luk tu long Ol Sam 23; Esikel 34; Alma 5:37–39; 3 Nifae 15:21–16:5; Gerrit W. Gong, “Gudfala Man blong Lukaot long Sipsip, Smol Sipsip blong God,” Liahona, Mei 2019, 97–101.
Ol Aedia blong Famli Skripja Stadi mo Haos Naet
-
Jon 7:24.Blong helpem famli blong yu i andastanem gud tijing blong Jisas long Jon 7:24, maet bae yu soem wan samting we i luk wan wei long aotsaed, be i defren smol long insaed. O ol memba blong famli oli save serem ol eksperiens we i tijim olgeta blong no jajem wei we yumi luk. Mo tu, yufala i save mekem wan lis blong ol kwaliti blong wanwan memba blong famli, we ae i no save luk (luk tu long 1 Samuel 16:7; Thomas S. Monson, “See Others as They May Become,” Liahona, Nov. 2012, 68–71).
-
Jon 8:31–36.?Hem i minim wanem blong stap wan wokman blong sin? (luk tu long Moronae 7:11). ?Wanem trutok nao we Jisas i bin tijim, i save mekem yumi kam fri?
Stap Hilim Blaen Man, i kam long Carl Heinrich Bloch
-
Jon 9.?Olsem wanem nao yu yu save helpem famli blong yu blong i luksave stori blong Jisas we i stap hilim blaen man long John 9? Yu save aktem stori ia tugeta, o yu save soem vidio ia: “Jesus Heals a Man Born Blind” (ChurchofJesusChrist.org). Stopem stori wanwan taem blong mekem se ol memba blog Famli oli save ridim ol ves ia we oli go wetem, we oli kamaot long Jon 9. Invaetem olgeta blong teknot long eni lesen we oli lanem aot long stori ia, olsem mining blong kam konvet long gospel blong Jisas Kraes.
-
Jon 10:1–18, 27–29.Blong mekem se ol memba blong famli oli tekpat blong lanem samting aot long parabol blong gudfala man blong lukaot long sipsip, askem wanwan long olgeta blong droem wan pikja blong wan long olgeta samting ia: wan stilman, wan doa, wan man blong lukaot long sipsip, wan wokman we oli pem hem, wan waeldog, mo wan sipsip. Invaetem olgeta blong ridim Jon 10:1–18, 27–29, mo afta toktok raon long hemia olsem wan famli abaot wanem Sevya i bin tijim abaot ol samting we oli bin droem.
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Lord Is My Shepherd,” Hymns, namba 108.
Stap Kam Antap long Stadi blong Yuwan
Lukaotem ol toktok mo ol sentens we oli givim insperesen. Taem yu stap rid i go, Spirit bae i tekem samfala toktok o sentens i kam long maen blong yu, we bae i givim insperesen mo pusum yu, o yu luk se oli raetem ol toktok ia i blong yu stret. Tingting blong raetem not blong eni toktok o sentens we i givim insperesen long yu long Jon 7–10.
I Nomo Lus, i kam long Greg K. Olsen