“Hunyo 5–11. Juan 14–17: ‘Pabilin Kamo diha sa Akong Gugma,’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 (2022)
“Hunyo 5–11. Juan 14–17,” Dali, Sunod Kanako—Alang sa mga Indibidwal ug mga Pamilya: 2023
The Last Supper [Ang Kataposang Panihapon], ni William Henry Margetson
Hunyo 5–11
Juan 14–17
“Pabilin Kamo diha sa Akong Gugma”
Samtang magbasa ka sa mga pagtulon-an sa Manluluwas sa Juan 14–17, ang Espiritu Santo motabang kanimo sa pag-ila sa mga mensahe alang kanimo. I-rekord ang mga panghunahuna nga imong madawat.
I-rekord ang Imong mga Panghunahuna
Karon tawagon nato kini nga ang “Kataposang Panihapon,” apan wala kita masayod kon ang mga tinun-an hingpit ba nga nakaamgo, sa dihang nagpundok sila alang sa tinuig nga kasaulogan sa Pagpalabay, nga kini mao ang ilang kataposang pagpangaon uban sa ilang Agalon sa dili pa ang Iyang kamatayon. Hinoon, si Jesus, “nahibalo nga miabot na ang takna” (Juan 13:1). Sa dili madugay atubangon na Niya ang pag-antos sa Getsemani, ang pagbudhi ug paglimod sa Iyang labing suod nga mga higala, ug ang panghingutas nga kamatayon diha sa krus. Apan bisan pa niining motunga diha sa Iyang atubangan, ang pagtutok ni Jesus wala diha sa Iyang Kaugalingon apan sa Iyang mga tinun-an. Unsa ang kinahanglan nilang mahibaloan sa mga adlaw ug mga tuig nga moabot? Ang malumo nga mga pagtulon-an ni Jesus sa Juan 14–17 nagpadayag kon unsa ang Iyang gibati mahitungod sa Iyang mga disipulo, kaniadto ug karon. Taliwala sa daghang makahupay nga mga kamatuoran nga Iyang gipakigbahin mao ang pagpaniguro og usab nga, sa usa ka bahin, Siya dili gayod mobiya kanato. “Kon tumanon ninyo ang akong mga sugo, ” Siya misaad, “magapabilin kamo sa akong gugma” (Juan 15:10).
Mga Ideya alang sa Personal nga Pagtuon sa Kasulatan
Ako nagpakita sa akong gugma alang ni Jesukristo pinaagi sa pagsunod sa Iyang mga sugo.
Samtang ikaw magbasa sa Juan 14–15, mahimo nimong timan-an o markahan ang matag gamit sa pulong nga gugma. Tingali makamatikod ka sa pulong mga sugo nga gibalik-balik kanunay uban sa pulong nga gugma niini nga mga kapitulo. Unsay imong makat-onan mahitungod sa relasyon tali sa gugma ug mga sugo gikan sa mga pagtulon-an sa Manluluwas? Unsa ang ubang mga pulong ug mga hugpong sa mga pulong ang imong makaplagan nga gikauban sa gugma niini nga mga kapitulo?
Pamalandonga kon giunsa sa gugma sa Manluluwas pag-impluwensiya kanimo.
Tan-awa usab sa Juan 13:34–35; D. Todd Christofferson, “Magpabilin Kamo sa Akong Gugma,” Liahona, Nob. 2016, 48–51.
The Last Supper [Ang Kataposang Panihapon], ni Clark Kelley Price
Ang Espiritu Santo nagtabang kanako sa pagtuman sa akong katuyoan isip tinun-an ni Jesukristo.
Kini tingali gayod sobra nga makaguol alang sa mga tinun-an sa pagkadungog nga ang ilang panahon uban sa Manluluwas hapit na mahuman. Tingali sila usab naguol mahitungod kon unsaon nila pagsinabtanay nga wala Siya. Samtang ikaw magbasa sa Juan 14–16, pangitaa unsa ang gisulti sa Manluluwas sa pagpasalig og usab kanila. Sa piho, timan-i kon unsay Iyang gitudlo kanila mahitungod sa Espiritu Santo. Unsay imong nakat-onan mahitungod sa Espiritu Santo gikan sa mga pulong sa Manluluwas sa mosunod nga mga bersikulo?
Ngano nga ang mga tinun-an nagkinahanglan niini nga matang sa tabang gikan sa Espiritu Santo? Sa unsa nga paagi ang Espiritu Santo mituman niini nga mga tahas alang kanimo? Hunahunaa kon unsa ang imong mahimo aron ang Iyang impluwensiya mahimong mas lig-on diha sa imong kinabuhi.
Tan-awa usab sa 3 Nephi 19:9; 27:20; Doktrina ug mga Pakigsaad 11:12–14; Moises 6:61; Michelle D. Craig, “Espirituhanong Kapasidad,” Liahona, Nob. 2019, 19–21.
Samtang magpabilin ako diha ni Kristo, makapamunga ako og maayong bunga.
Unsa kaha ang gipasabot sa “pabilin diha kang [Kristo]”? (Juan 15:4). Unsa ang imong “bunga” nga nagpakita nga ikaw nakasumpay ngadto sa sanga, nga nagrepresentar ni Jesukristo?
Nangamuyo si Jesukristo alang sa Iyang mga disipulo.
Ang mga pulong ni Jesus nga gi-rekord sa Juan 17 nailhan isip ang Pangamuyo nga Pag-ampo. Niini nga pag-ampo, nag-ampo si Jesus alang sa Iyang Apostoles ug “alang usab sa mga mosalig [Kaniya] pinaagi sa ilang pulong” (Juan 17:20). Nagpasabot kini nga Siya nag-ampo alang kanimo. Unsa ang gihangyo ni Jesus gikan sa Iyang Amahan alang kanimo ug sa tanang mga tumutuo? Unsa ang gitudlo niini kanimo mahitungod sa Iyang gugma alang kanimo?
Kini nga pag-ampo nagtudlo usab og tulugkaron, mahangturong mga kamatuoran. Unsa nga mga kamatuoran ang imong nakaplagan? Samtang ikaw nagbasa niini nga kapitulo, hunahunaa ang pagrekord kon unsay imong nakat-onan mahitungod sa mosunod:
-
Pag-ampo
-
Ang relasyon sa Manluluwas ngadto sa Iyang Amahan
-
Ang relasyon sa Manluluwas ngadto sa Iyang mga disipulo
-
Unsaon sa mga disipulo nga mahimong lahi gikan sa kalibotan
-
Uban nga mga kamatuoran nga importante kanimo
Ang Langitnong Amahan ug si Jesukristo hingpit nga nagkahiusa.
Diha sa Iyang pag-ampo sa Juan 17, gihatagan og gibug-aton ni Jesus ang iyang pagkahiusa sa Amahan. Sa unsang mga paagi ang Amahan ug ang Anak “usa”? (Juan 17:11, 21–23). Timan-i nga ang Manluluwas nag-ampo nga ang Iyang mga disipulo unta mahiusa “maingon nga kita usa”—o sa samang paagi nga—Siya ug ang Iyang Amahan usa ra (Juan 17:22). Unsay gipasabot niana alang kanimo? Paghunahuna mahitungod sa imong mga relasyon––sama pananglit, uban sa imong kapikas o sa ubang sakop sa pamilya, sa mga miyembro sa ward, ug sa isig ka mga Kristiyano. Unsaon nimo sa pagbuhat ngadto sa matang sa panaghiusa nga si Jesus aduna uban sa iyang Amahan?
Tan-awa usab sa Quentin L. Cook, “Mga Kasingkasing Nabugkos diha sa Pagkamatarong ug Pagkahiusa,” Liahona, Nob. 2020, 18–22; Sharon Eubank, “Pinaagi sa Panaghiusa sa Pagbati Kita Makaangkon og Gahom sa Dios,” Liahona, Nob. 2020, 55–57.
Mga Ideya alang sa Pamilya nga Pagtuon sa Kasulatan ug Home Evening
-
Juan 14:5–6.Ang mga sakop sa pamilya mahimong malingaw sa pagpuli-puli sa pagpangulo sa imong pamilya sa usa ka lakaw subay sa usa ka dalan. Sa unsa nga paagi si Jesus “ang dalan”? Asa Siya naggiya kanato?
-
Juan 14:26–27.Sa unsa nga paagi ang kalinaw ni Jesus lahi gikan sa matang “nga hinatagan sa kalibotan”? Ang mga sakop sa pamilya makahimo sa pagpakigbahin og mga paagi nga sila nakakaplag og kalinaw ug kahamugaway pinaagi sa Espiritu Santo.
-
Juan 15:1–8.Tingali makalingaw ang pagbasa niini nga mga bersikulo sa gawas tupad sa usa ka sanga, usa ka kahoy, o laing tanom. Unsa ang mahitabo sa usa ka sanga kon kini putlon gikan sa tanom? Mahimo kang maghisgot mahitungod kon sa unsang paagi kita sama sa mga sanga ug unsa ang gipasabot sa “magpabilin” diha sa Manluluwas ug “mamunga og prutas.”
-
Juan 15:17–27; 16:1–7.Ngano kaha nga si Jesukristo mipasidaan sa Iyang mga tinun-an kabahin sa pagpanglutos? Sa unsa nga paagi nga ang mga tinun-an ni Kristo gilutos karon? Sa unsa nga paagi nga ang tambag sa Manluluwas niini nga mga bersikulo makatabang kanato kon mag-atubang kita og pagpanggukod?
-
Juan 16:33.Sa unsa nga paagi nabuntog ni Kristo ang kalibotan? Giunsa sa Iyang Pag-ula pagdala kanato og kalinaw ug kalipay? (tan-awa usab sa Doktrina ug Pakigsaad 68:6).
-
Juan 17:21–23.Unsa ang motabang sa imong pamilya sa pagkat-on kon unsaon nga mas magkahiusa sama ni Jesukristo ug sa Langitnong Amahan? Tingali mahimo kang mohisgot mahitungod sa usa ka kinaham nga team sa sport ug kon giunsa nila sa pag-uban og trabaho ngadto sa usa ka magkasamang katuyoan. O ikaw makapaminaw sa usa ka choir o orkestra ug maghisgot kon giunsa sa mga musikero paghiusa sa pagmugna og nindot nga musika.
Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.
Gisugyot nga awit: “Ang Espiritu Santo,” Songbook sa mga Bata, 56.
Pagpalambo sa Atong Pagtudlo
Gamit og audio nga mga rekording. Samtang tudloan nimo ang imong pamilya sa mga kasulatan, hunahunaa ang pagpaminaw sa audio nga bersiyon sa mga kasulatan, nga makaplagan diha sa ChurchofJesusChrist.org o diha sa Gospel Library nga app. Ang pagpaminaw sa Juan 14–17 mahimong piho ka gamhanan tungod kay kini nga mga kapitulo naglangkob og daghan kaayo nga mga pulong sa Manluluwas.
Mitudlo si Jesus, “Ako mao ang tanom nga paras, kamo mao ang mga sanga” (Juan 15:5).