Kataposang Panihapon

In Remembrance of Me [Agi og Handumanan Kanako], ni Walter Rane

Mayo 29–Hunyo 4

Mateo 26; Marcos 14; Juan 13

“Agi og Handumanan”

Samtang ikaw nagbasa mahitungod sa mga panghitabo nga gihulagway diha sa Mateo 26; Marcos 14; ug sa Juan 13, hatagi og pagtagad ang bisan unsang mga panghunahuna nga imong nadawat, ilabi na niadtong mga panghunahuna nga naglig-on sa imong hugot nga pagtuo diha ni Jesukristo ug sa imong pasalig ngadto Kaniya.

I-rekord ang Imong mga Panghunahuna

Sa adlaw nga wala pa Siya mamatay, mihatag si Jesus sa Iyang mga disipulo og usa ka butang nga handumanan Kaniya. Siya “mikuhag tinapay, ug sa nakapanalangin na siya niini, kini iyang gipikaspikas, ug ngadto sa mga tinun-an, gihatag niya nga nag-ingon, Kumuha, ug kumaon kamo; kini mao ang akong lawas. Ug gikuha niya ang kopa, ug sa nakapasalamat na siya, kanila gihatag kini niya nga nag-ingon, Uminom kamo niini; kamong tanan kay kini mao ang akong dugo” (Mateo 26:26–28).

Kana nahitabo mga 2,000 ka tuig ang milabay, sa usa ka dapit nga ang kadaghanan kanato dili gayod makakita, sa usa ka pinulongan nga pipila kanato ang makasabot. Apan karon, sa matag Dominggo sa atong kaugalingong mga dapit nga mitinganan, ang mga tighupot sa pagkapari, gihatagan og katungod sa paglihok diha sa ngalan ni Jesukristo, sa pagbuhat unsay sa makausa Iyang gibuhat. Sila nagkuhag pan ug tubig, nagpanalangin niini, ug naghatag niini ngadto sa matag usa kanato, Iyang mga disipulo. Kini usa ka yanong lihok––aduna pa bay mas yano, mas labing mahinungdanon, kay sa pagkaon sa pan ug sa pag-inom sa tubig? Apan kana nga pan ug tubig mga sagrado ngari kanato tungod kay kini nagtabang kanato sa paghinumdom Kaniya. Kini ang atong paagi sa pagsulti, “Dili gayod ako makalimot Kaniya”––dili lamang, “Dili gayod ako makalimot sa unsay akong nabasa mahitungod sa Iyang mga pagtulon-an ug sa Iyang kinabuhi.” Hinoon, kita mag-ingon, “Dili gayod ako makalimot sa unsay gibuhat Niya kanako.” “Dili gayod ako makalimot giunsa Niya ako pagluwas sa dihang ako misinggit alang sa panabang.” Ug “Dili gayod ako makalimot sa Iyang pasalig ngari kanako ug sa akong pasalig ngadto Kaniya––ang pakigsaad nga atong gihimo.”

icon sa personal nga pagtuon

Mga Ideya alang sa Personal nga Pagtuon sa Kasulatan

Mateo 26:6–13; Marcos 14:3–9

“Siya mianhi … sa pagbu-bo niining pahumot dinhi sa akong lawas sa pag-andam sa paglubong.”

Tungod sa mapainubsanong lihok sa pagbayaw, ang babaye nga gihulagway niini nga mga bersikulo mipakita nga siya nakaila kinsa si Jesus ug unsa ang Iyang hapit na pagabuhaton (tan-awa sa Mateo 26:12). Ngano kaha nga ang iyang mga lihok hilabihan sa pagka-makahuluganon ngadto sa Manluluwas? (tan-awa sa bersikulo 13). Unsa ang nakapadani kanimo mahitungod sa babaye ug sa iyang hugot nga pagtuo? Palandonga kon unsaon nimo nga makasunod sa iyang ehemplo.

Tan-awa usab sa Juan 12:1–8.

Mateo 26:20–22; Marcos 14:17–19

“Ako ba, Ginoo?”

Unsa ang imong nakat-onan mahitungod sa mga disipulo gikan sa ilang mga pangutana ngadto sa Ginoo niini nga mga bersikulo? Ngano kaha sila nangutana niini? Hunahunaa kon unsaon kaha nimo sa pagpangutana ang Ginoo, “Ako ba?”

Tan-awa usab sa Dieter F. Uchtdorf, “Ako Ba, Ginoo?,” Liahona, Nob. 2014, 56–59.

Mateo 26:26–29; Marcos 14:22–25

Ang sakramento usa ka oportunidad sa paghinumdom sa Manluluwas.

Sa dihang ang Manluluwas mipaila sa sakramento ngadto sa Iyang mga disipulo, unsa nga mga hunahuna ug mga pagbati ang imong gihanduraw nga sila aduna? Paghunahuna mahitungod niini samtang ikaw nagbasa mahitungod sa ilang kasinatian diha sa Mateo 26:26–29 ug sa Marcos 14:22–25. Ngano kaha nga gipili ni Jesus kini nga paagi alang kanato sa paghinumdom Kaniya? Mahimo usab nimong palandongon ang mga kasinatian nga ikaw aduna sa panahon sa sakramento. Ikaw aduna bay bisan unsa nga mabuhat sa paghimo sa imong kasinatian nga mas sagrado ug makahuluganon?

Human mabasa ug mapamalandong kini nga mga bersikulo, mahimo nimong isulat ang pipila sa butang nga imong gibati nga nadasig sa paghinumdom mahitungod sa Manluluwas. Mahimo kang makarebyo niini nga mga butang sa sunod nga higayon nga ikaw nag-ambit sa sakramento. Makahimo ka usab sa pagrebyo niini sa ubang mga higayon, isip usa ka paagi sa “kanunay mahinumdom kaniya” (Moroni 4:3).

Tan-awa usab sa Lucas 22:7–39; 3 Nephi 18:1–13; Doktrina ug mga Pakigsaad 20:76–79.

Juan 13:1–17

Ang Manluluwas mao ang atong ehemplo sa mapainubsanong pagserbisyo sa uban.

Sa panahon ni Jesus, ang paghugas sa mga tiil sa tawo maoy usa ka buhat alang sa mga sulugoon, dili sa mga lider. Apan gusto ni Jesus sa Iyang mga disipulo nga maghunahuna og lahi mahitungod sa unsa ang kahulogan sa pagpangulo ug sa pagserbisyo. Unsa nga mga mensahe ang imong makaplagan diha sa mga pulong ug mga lihok sa Manluluwas sa Juan 13:1–17? Sa imong kultura, ang paghugas sa mga tiil sa uban mahimong dili naandan nga paagi sa pagserbisyo. Apan hunahunaa unsa ang imong mahimo sa pagsunod sa ehemplo sa Manluluwas sa mapainubsanong serbisyo.

Mahimo usab kini nga makapa-interes sa pagmatikod sa mga butang nga nahibalo ug gibati ni Jesus atol niining sagrado nga panahon uban sa Iyang mga Apostoles (tan-awa sa mga bersikulo 1 ug 3). Unsa ang gitabang niini nga mga panabot kanimo sa pagsabot mahitungod sa Manluluwas?

Tan-awa usab sa Lucas 22:24–27.

Juan 13:34–35

Ang akong gugma alang sa uban maoy usa ka timailhan nga ako usa ka tinuod nga disipulo ni Jesukristo.

Sa mas una, si Jesus mihatag og usa ka sugo nga “higugmaa ang imong silingan sama sa imong kaugalingon” (Mateo 22:39). Karon mihatag Siya og “usa ka bag-ong sugo.” Unsa kaha ang kahulogan sa paghigugma sa uban sama nga si Jesus nahigugma kanimo? (tan-awa sa Juan 13:34).

Mahimo usab nga imong pamalandungon kon giunsa sa ubang mga tawo pagkahibalo nga ikaw usa ka disipulo ni Jesukristo. Unsaon nimo sa pagsiguro nga ang gugma mao ang tinuod nimo nga kinaiya isip usa ka Kristiyano?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Mateo 26:26–29; Marcos 14:22–25.Sama sa unsa ang kasinatian sa imong pamilya sa panahon sa sakramento matag semana? Ang pagbasa mahitungod sa unang sakramento makapadasig og panaghisgot mahitungod sa kaimportante sa sakramento ug sa mga paagi sa pagpalambo sa imong kasinatian. Hunahunaa ang pagpakita sa hulagway sa Pagpaambit sa Sakramento (Libro sa mga Hulagway sa Ebanghelyo, nu. 108) ug sa pagpakigbahin og mga ideya mahitungod sa unsay imong mahimo sa dili pa, sa panahon sa, ug sa pagkahuman sa sakramento.

babaye nag-ambit sa sakramento

Ang sakramento nagtabang kanato sa paghinumdom ni Jesukristo.

Mateo 26:30.Hunahunaa ang pagkanta og usa ka himno, sama sa gibuhat ni Jesus ug sa Iyang mga Apostoles––tingali usa ka himno sa sakramento. Unsaon kaha nga ang pagkanta og usa ka himno mahimong usa ka panalangin ngadto ni Jesus ug sa Iyang mga Apostoles niana nga higayon? Sa unsang paagi nga ang mga himno usa ka panalangin ngari kanato?

Juan 13:1–17.Mahimo nimong ipakita sa imong pamilya ang hulagway sa kataposan niini nga latid samtang ikaw magbasa niini nga mga bersikulo. Unsa nga mga kamatuoran ang gitudlo sa Manluluwas pinaagi sa Iyang mga lihok? Unsa nga mga detalye diha sa hulagway ang nagtabang kanato sa pagsabot niini nga mga kamatuoran? Tingali ang mga sakop sa pamilya makahimo sa pagpakigbahin kon giunsa ang pagpuyo niini nga mga kamatuoran midala kanila og kalipay (tan-awa sa Juan 13:17).

Juan 13:34–35.Human mabasa kini nga mga bersikulo, mahimo kamong magsinultihanay mahitungod kon unsaon sa ubang mga tawo pagkahibalo nga kamo mga disipulo ni Jesukristo. Sa unsa nga paagi gusto sa Manluluwas mailhan ang Iyang mga sumusunod? Mahimo nimong hangyoon ang mga sakop sa pamilya sa pag-istorya mahitungod sa mga tawo kansang gugma alang sa uban nagpakita nga sila tinuod nga mga disipulo ni Jesukristo. Mahimo usab kamong maghisgot og mga paagi nga kamo makapakita og dugang pa nga gugma isip usa ka pamilya.

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Maghigugmaay,” Songbook sa mga Bata, 196.

Pagpalambo sa Personal nga Pagtuon

Pamalandong. Ang mga kasulatan adunay espirituhanong mga kahulogan nga tingali atong malaktawan kon magbasa kita nga walay pagbantay, ingon man sa ubang materyal nga basahon. Ayaw pagdali sa paghuman og usa ka kapitulo. Paggahin og panahon sa paghunahuna og lawom mahitungod sa unsay inyong gibasa.

Jesus naghugas sa mga tiil sa mga disipulo

Greatest in the Kingdom [Labing Halangdon diha sa Gingharian, ni J. Kirk Richards