Ikaduhang Pag-anhi

The Second Coming [Ang Ikaduhang Pag-anhi], ni Harry Anderson

Mayo 22–28

Joseph Smith—Mateo 1; Mateo 24–25; Marcos 12–13; Lucas 21

“Ang Pag-abot sa Anak sa Tawo”

Samtang ikaw magbasa sa Joseph Smith—Mateo 1; Mateo 24–25; Marcos 12–13; ug Lucas 21, tingali mangutana ka, “Unsa nga mga mensahe ang anaa niini nga mga kapitulo alang kanako? alang sa akong pamilya? alang sa akong calling?”

I-rekord ang Imong mga Panghunahuna

Natingala tingali ang mga tinun-an ni Jesus sa Iyang panagna: nga ang dakong templo sa Jerusalem, ang espirituhanon ug kultural nga sentro sa mga katawhang Judeo, pagalaglagon sa hingpit nga “walay [mahimong] mahibilin dinhi … nga usa ka bato nga nagtung-tong.” Dayag lamang nga ang mga disipulo gusto nga makahibalo pa og dugang. “Kanus-a kini nga mga butang mahinabo?” nangutana sila. “Ug unsa ang mga timailhan sa imong pag-abot?” (Joseph Smith—Mateo 1:2–4). Ang mga tubag sa Manluluwas nagpadayag nga ang dakong kalaglagan nga moabot sa Jerusalem—usa ka panagna nga natuman sa AD 70—gamay kon itandi ngadto sa mga timailhan sa Iyang pag-anhi sa katapusang mga adlaw. Ang mga butang nga mas lig-on pa kay sa templo sa Jerusalem makita nga temporaryo—ang adlaw, ang bulan, ang mga bitoon, ang mga nasod, ug ang dagat. Bisan “ang mga gah[o]m sa langit mauyog” (Joseph Smith—Mateo 1:33). Kon kita makaamgo niini sa espirituhanong paagi, kini nga kaguliyang makatudlo kanato sa pagbutang sa atong pagsalig sa usa ka butang nga sa tinuod permanente. Ingon sa gisaad ni Jesus, “Ang langit ug ang yuta mahanaw, apan ang akong mga pulong dili mahanaw. … Ug kinsa kadto nga magmahal sa akong pulong, dili malingla” (Joseph Smith—Mateo 1:35, 37).

icon sa personal nga pagtuon

Mga Ideya alang sa Personal nga Pagtuon sa Kasulatan

Unsa ang Joseph Smith—Mateo?

Ang Joseph Smith––Mateo, nga anaa sa Perlas nga Labing Bililhon, mao ang Hubad ni Joseph Smith sa kataposang bersikulo sa Mateo 23 ug sa tanan sa Mateo 24. Ang dinasig nga bersyon ni Joseph Smith nagpahiuli sa bililhong mga kamatuoran nga nawala. Ang mga bersikulo 12–21 nagpasabot sa kalaglagan sa Jerusalem sa karaan; mga bersikulo 21–55 naglakip sa mga panagna mahitungod sa kataposang mga adlaw.

Joseph Smith—Mateo 1:21–37; Marcos 13:21–37; Lucas 21:25–38

Mga panagna mahitungod sa Ikaduhang Pag-anhi sa Manluluwas makatabang kanako sa pag-atubang sa umaabot uban sa hugot pagtuo.

Makapakuyaw ang pagbasa mahitungod sa mga panghitabo nga nagpaingon ngadto sa Ikaduhang Pag-anhi ni Jesukristo. Apan sa dihang nanagna si Jesus niini nga mga panghitabo, misulti Siya sa Iyang mga disipulo nga “dili masamok” (Joseph Smith—Mateo 1:23). Unsaon nimo nga “dili masamok” samtang makadungog ka mahitungod sa mga linog, mga gubat, mga panglimbong, ug mga kagutom? Hunahunaa kini nga mga pangutana samtang magbasa ka niini nga mga bersikulo. Markahi o timan-i ang bisan unsa nga giusab nga pasalig sa tambag nga imong makaplagan.

Tan-awa usab sa Gospel Topics, “Second Coming of Jesus Christ,” topics.ChurchofJesusChrist.org.

Joseph Smith—Mateo 1:26–27, 38–55; Mateo 25:1–13; Lucas 21:29–36

Kinahanglan gayod nga andam ako kanunay alang sa Ikaduhang Pag-anhi sa Manluluwas.

Ang Dios wala mopadayag “sa adlaw ni sa takna nga moabot ang Anak sa tawo” (Mateo 25:13). Apan dili Siya gusto nga moabot kana nga adlaw kanato nga “wala dahuma” (Lucas 21:34), busa mihatag Siya kanato og tambag mahitungod kon unsaon sa pagpangandam.

Samtang ikaw magbasa niini nga mga bersikulo, ilha ang mga sambingay ug ubang mga pagtandi nga gigamit sa Manluluwas sa pagtudlo kanato sa pagpangandam kanunay alang sa Iyang Ikaduhang Pag-anhi. Unsa ang imong nakat-onan gikan niini? Unsa ang nakapadasig nimo nga buhaton?

Mahimo usab nimong hunahunaon kon unsa ka gusto sa Manluluwas kanimo nga motabang og pag-andam sa kalibotan alang sa Iyang Ikaduhang Pag-anhi. Unsa ang imong gibati sa kahulogan nga maandam sa pagdawat sa Manluluwas kon Siya moanhi? Ang mensahe ni Elder D. Todd Christofferson nga “Pagpangandam alang sa Pagbalik sa Ginoo” (Liahona, Mayo 2019, 81–84) makatabang kanimo sa pagpamalandong niini.

Tan-awa usab sa Russell M. Nelson, “Hangupon ang Umaabot uban sa Hugot nga Pagtuo,” Liahona,, Nob. 2020, 73–76.

Mateo 25:14–30

Nagpaabot ang Langitnong Amahan kanako sa paggamit sa Iyang mga gasa sa maalamong paagi.

Sa sambingay sa Manluluwas, ang “talanton” [talent] nagpasabot og kwarta. Apan ang sambingay sa mga talanton makapaaghat kanato sa pagpamalandong kon giunsa nato sa paggamit ang bisan hain sa atong mga panalangin, dili lamang ang kwarta. Human mabasa kini nga sambingay, mahimong maglista ka og pipila sa mga panalangin ug mga responsibilidad nga gisalig sa Langitnong Amahan nganha kanimo. Unsa ang Iyang gipaabot kanimo nga buhaton niini nga mga panalangin? Sa unsa nga paagi ikaw makagamit niini nga mga gasa sa mas maalamon nga paagi?

Mateo 25:31–46

Kon ako mag-alagad sa uban, ako nag-alagad sa Dios.

Kon ikaw naghunahuna kon unsaon sa Ginoo sa paghukom sa imong kinabuhi, basaha ang sambingay sa karnero ug sa mga kanding. Ngano kaha nga ang pag-amuma alang niadtong nanginahanglan motabang kanimo sa pag-andam sa “pagpanunod sa gingharian” sa Dios?

Sa unsa nga paagi kini nga sambingay susama ngadto sa laing duha sa Mateo 25? Unsa nga mga mensahe kining tulo aduna nga parehas?

Tan-awa usab sa Mosiah 2:17; 5:13.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Joseph Smith—Mateo.Sa pagtabang sa imong pamilya nga mosuhid niini nga kapitulo, dapita sila sa pagpangita sa mga pagtulon-an sa Manluluwas mahitungod kon unsaon nga kita maandam alang sa Iyang Ikaduhang Pag-anhi (tan-awa, sama pananglit sa, mga bersikulo 22–23, 29–30, 37, 46–48). Unsa ang atong mahimo sa pagsunod niini nga tambag? Ang imong pamilya tingali malingaw sa pagkanta sa “Kon Siya Moanhi Pag-usab” (Songbook sa mga Bata, 146) ug sa pagdrowing og mga hulagway kon sama sa unsa ang ilang paghanduraw sa Ikaduhang Pag-anhi sa Manluluwas.

Joseph Smith—Mateo 1:22, 37.Unsay gipasabot sa pagmahal sa pulong sa Dios? Unsaon nato sa paghimo niini sa personal ug isip usa ka pamilya? Sa unsa nga paagi nga ang pagbuhat sa ingon nagtabang kanato sa paglikay nga malimbongan?

Mateo 25:1–13.Makagamit ka sa hulagway sa napulo ka birhen nga nag-uban niini nga latid sa paghisgot sa Mateo 25:1–13. Unsa nga mga detalye ang atong makita diha sa hulagway nga gihulagway niini nga mga bersikulo?

Mahimo kang makagunting og papel nga porma og mga tinulo sa lana ug tapigi ang mga tinulo libot sa inyong panimalay. Mahimo nimong ikapapilit ang mga tinulo ngadto sa mga butang sama sa mga kasulatan o sa usa ka hulagway sa templo. Kon makit-an sa mga sakop sa pamilya ang mga tinulo, makahisgot kamo kon giunsa niini nga butang sa pagtabang kanato nga maandam alang sa Ikaduhang Pag-anhi.

Marcos 12:38–44; Lucas 21:1–4.Unsa ang gitudlo niini nga mga bersikulo mahitungod kon unsaon sa Manluluwas pagtan-aw sa atong mga halad? Pakit-a ang imong pamilya kon unsaon pagbayad og ikapulo ug mga halad sa puasa ngadto sa Ginoo. Sa unsa nga paagi kini nga mga halad nagtabang pagtukod sa gingharian sa Dios? Unsa ang ubang pipila ka paagi kita makahalad sa “tanan nga [kita aduna]” ngadto sa Ginoo? (Marcos 12:44).

babaye nagbutang og sinsilyo sa kahon

Widow’s Mite [Ang Diyot sa Biyuda], ni Sandra Rast

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Kon Siya Moanhi Pag-usab,” Songbook sa mga Bata, 146.

Pagpalambo sa Personal nga Pagtuon

Andama ang imong mga palibot. “Ang atong mga palibot makaapekto kaayo sa atong abilidad sa pagkat-on ug pagbati sa kamatuoran” (Pagtudlo sumala sa Pamaagi sa Manluluwas, 15). Paningkamuti ang pagpangita og dapit sa pagtuon sa mga kasulatan nga modapit sa impluwensya sa Espiritu Santo. Ang makabayaw nga musika ug mga hulagway makadapit usab sa Espiritu.

mga babaye nga naggunit og mga lampara

Five of Them Were Wise [Lima Kanila Mga Maalamon], ni Walter Rane