Zacchaeus in the Sycamore Tree [Si Zaqueo diha sa Kahoy nga Sikomoro], ni James Tissot

Mayo 15–21

Mateo 21–23; Marcos 11; Lucas 19–20; Juan 12

“Tan-awa, Ang Imong Hari Nagaanhi”

Sa dili pa basahon ang mga ideya dinhi niini nga latid, basaha ang Mateo 21–23; Marcos 11; Lucas 19–20; ug Juan 12. I-rekord ang mga panghunahuna nga imong ipakigbahin sa imong pamilya o sa imong mga klase sa Simbahan.

I-rekord ang Imong mga Panghunahuna

Ang Manluluwas gigutom human mobiyahe gikan sa Betania ngadto sa Jerusalem, ug usa ka kahoy nga igira nga may gilay-on ingon og usa ka tinubdan sa pagkaon. Apan sa nagkaduol si Jesus sa kahoy, nakita Niya nga kini walay bunga (tan-awa sa Mateo 21:17–20; Marcos 11:12–14, 20). Sa samang paagi, ang kahoy nga igira sama sa maot nga relihiyosong mga lider sa Jerusalem: ang walay kahulogan nilang mga pagtulon-an ug ang dayag nga pagpakita sa pagkabalaan wala maghatag og espirituhanong pag-amuma. Ang mga Pariseo ug ang mga escriba mipakita nga nagsunod og daghang mga sugo apan wala mituman sa duha ka labing dako nga mga sugo: sa paghigugma sa Dios ug sa paghigugma sa imong silingan sama sa imong kaugalingon (tan-awa sa Mateo 22:34–40; 23:23).

Sa pagtandi, daghang mga tawo ang misugod sa pagkakita sa maayong bunga sa mga pagtulon-an ni Jesus. Sa dihang miabot Siya sa Jerusalem, giabi-abi nila Siya uban sa mga sanga nga giputol gikan sa mga kahoy aron ibutang sa Iyang agianan, nagmaya nga sa kataposan, ang usa ka karaang panagna miingon, “Ang Imong Hari nagaanhi” (Zacarias 9:9). Samtang ikaw magbasa niini nga semana, hunahunaa ang bahin sa mga bunga sa mga pagtulon-an sa Manluluwas ug sa maulaong sakripisyo sa imong kinabuhi ug sa unsa nga paagi ikaw “mamunga kinig daghan” (Juan 12:24).

Mga Ideya alang sa Personal nga Pagtuon sa Kasulatan

Lucas 19:1–10

Ang Ginoo maghukom dili pinaagi sa makita sa gawas apan pinaagi sa mga tinguha sa kasingkasing.

Sa panahon ni Jesus, daghang mga tawo nagtuo nga ang mga publikano, o maniningil og buhis, dili matinuoron ug nangawat gikan sa katawhan. Tungod nga si Zaqueo, ang punoang publikano, adunahan, tingali mas gidudahan pa siya. Apan si Jesus mitan-aw sa kasingkasing ni Zaqueo. Unsa ang gipadayag sa Lucas 19:1–10 mahitungod sa kasingkasing ni Zaqueo? Mahimo nimong isulat ang mga pulong niini nga mga bersikulo nga naghulagway unsay gibuhat ni Zaqueo sa pagpakita sa iyang debosyon ngadto sa Manluluwas. Unsa ang mga tinguha sa imong kasingkasing? Unsa ang imong gibuhat sa pagpangita sa Manluluwas, sama sa gibuhat ni Zaqueo?

Tan-awa usab sa Doktrina ug mga Pakigsaad 137:9.

Mateo 23; Lucas 20:45–47

Si Jesus nanghimaraot sa pagpakaaron-ingnon.

Ang pagpakigsulti sa Manluluwas uban sa mga escriba ug sa mga Pariseo adunay makapaikag nga kalainan ngadto sa iyang pagpakigsulti ni Zaqueo. Sama sa gipasabot ni Presidente Dieter F. Uchtdorf, “si [Jesus] mibarog sa tukmang pagkasuko batok sa mga tigpakaaron-ingnon sama sa mga escriba, mga Pariseo, ug mga Saducio—kadtong misulay sa pagpatuong matarong aron makuha ang pagdayeg, impluwensya ug bahandi sa kalib[o]utan, sa samang higayon midaog-daog sa mga tawo nga angay unta nilang panalanginan” (“Sa Pagkahimong Matuod,” Liahona, Mayo 2015, 81).

Diha sa Mateo 23, migamit ang Manluluwas og pipila ka mga pag-agid-agid sa paghulagway sa pagpakaaron-ingnon. Hunahunaa ang pagmarka o paglista niini nga pag-agid-agid ug sa pagtimaan unsay gitudlo niini mahitungod sa pagpakaaron-ingnon. Unsa ang kalainan tali sa pagpakaaron -ingnon ug sa tawhanong mga kahuyang nga kitang tanan nagtagad samtang kita naningkamot sa pagpuyo sa ebanghelyo? Unsa ang nakapadasig nimo nga buhaton nga lahi tungod sa mga pagtulon-an sa Manluluwas?

Tan-awa usab sa Bible Dictionary, “Hypocrite.”

Mateo 21:1–11; Marcos 11:1–11; Lucas 19:29–44; Juan 12: 1–8, 12–16

Si Jesukristo mao ang akong Hari.

Sa dihang miabot si Jesus sa Jerusalem mga adlaw lamang sa wala pa Niya matuman ang Iyang Pag-ula, kadtong kinsa nakaila kaniya isip ilang Hari mipakita sa ilang debosyon pinaagi sa pagdihog Kaniya, pagbutang og mga sapot ug mga sanga sa palmera sa daplin sa Iyang dalan ngadto sa Jerusalem, ug nagasinggit og mga pagdayeg. Hunahunaa kon giunsa sa mosunod nga mga kapangohaan pagpalig-on sa imong pagsabot sa mga panghitabo nga misugod sa kataposang semana sa kinabuhi sa Manluluwas.

• Usa ka karaang ehemplo sa pagdihog sa usa ka hari: 2 Mga Hari 9:1–6, 13

• Usa ka karaan nga panagna sa madaugong pagsulod: Zacarias 9:9

• Ang kahulogan sa pulong hosanna: “Hosanna” sa Giya ngadto sa mga Kasulatan (scriptures.ChurchofJesusChrist.org)

• Mga panagna mahitungod kon sa unsa nga paagi ang Manluluwas moanhi pag-usab: Pagpadayag 7:9–12

Unsaon nimo pagpasidungog ug pagdawat ang Manluluwas isip imong Ginoo ug Hari?

Tan-awa usab sa Gerrit W. Gong, “Hosana ug Aleluya—Ang Buhi nga si Jesukristo: Ang Pinakaimportanting Bahin sa Pagpahiuli ug Pasko sa Pagkabanhaw,” Liahona, Mayo 2020, 52–55.

Mateo 22:34–40

Ang duha ka dagkong mga sugo mao ang paghigugma sa Dios ug sa paghigugma sa uban sama sa akong kaugalingon.

Kon gibati nimo nga nabug-atan samtang ikaw naningkamot sa pagsunod ni Jesukristo, ang mga pulong sa Manluluwas ngadto sa batid sa kasugoan sa Mateo 22 makatabang kanimo sa pagpayano ug pagtutok sa imong pagkadisipulo. Aniay usa ka paagi sa paghimo niini: Paghimo og lista sa pipila ka mga sugo sa Ginoo. Sa unsa nga paagi nga ang matag aytem sa imong lista may kalabotan sa duha ka dagkong mga sugo? Sa unsa nga paagi nga ang pagtutok diha sa duha ka dagkong mga sugo makatabang kanimo sa pagsunod sa uban?

Mga Ideya alang sa Pamilya nga Pagtuon sa Kasulatan ug Home Evening

Mateo 21:12–14.Giunsa sa mga pulong ug mga lihok ni Jesus diha sa Mateo 21:12–14 pagpakita kon unsay iyang gibati mahitungod sa templo? Unsaon nato sa pagpakita kon unsa ang atong gibati mahitungod sa templo? Unsa ang atong “giabog sa gowa” (bersikulo 12) sa atong mga kinabuhi sa paghimo sa atong panimalay nga mas sama sa templo? Hunahunaa ang pagkanta og dungan sa usa ka awit mahitungod sa templo, sama sa “Gusto Ko nga Makita ang Templo” (Songbook sa mga Bata, 99).

Mateo 21:28–32.Unsa nga mga leksiyon gikan sa sambingay sa tawo nga adunay duha ka anak nga mga lalaki mahimong makatabang sa imong pamilya? Sama pananglit, ikaw makagamit sa istorya sa paghisgot sa ka-importante sa sinsero nga pagkamasulundon ug paghinulsol. Tingali ang imong pamilya makasulat og script sa pagdrama sa sambingay ug sa pagpuli-puli sa pagdala sa lain-lain nga mga papel.

Mateo 22:15–22; Lucas 20:21–26.Ang mga bata mahimong malingaw sa paghimo og dulaan nga mga sinsilyo nga si Jesus adunay “imahe ug sinulat” diha niini. Sila makasulat diha sa mga luyo sa mga sinsilyo og pipila sa “mga butang nga iya sa Dios” (Mateo 22:21) nga kita makahatag Kaniya. Mahimo usab nga ikaw mohisgot mahitungod kon unsa ang kahulogan niini sa pagbutang sa “imahe ug sulat” diha kanato (Mateo 22:20; tan-awa usab sa Mosiah 5:8; Alma 5:14).

Juan 12:1–8.Giunsa pagpakita ni Maria ang iyang gugma alang sa Manluluwas? Unsaon nato pagpakita sa atong gugma alang Kaniya?

Washing Jesus’s Feet [Paghugas sa mga Tiil ni Jesus], ni Brian Call

Juan 12:42–43.Unsa ang sosyal nga mga sangputanan nga usahay makapawala sa atong kadasig sa pagpadayag o pagpanalipod sa atong pagtuo ni Kristo? Mga ehemplo sa mga tawo kinsa dili mosunod sa sosyal nga pagpamugos, tan-awa sa Daniel 1:3–20; 3; 6; Juan 7:45–53; 9:1–38; ug Mosiah 17:1–4. Unsaon nato sa pagpakita og pagtahod sa uban samtang sila nagpadayag o nagpanalipod sa ilang relihiyoso nga mga pagtuo?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga himno: “Paglipay, ang Ginoo Hari!,” Mga Himno, nu. 33.

Pagpalambo sa Atong Pagtudlo

Gamit og art sa pagpaapil sa mga sakop sa pamilya. “Ang Libro sa mga Hulagway sa Ebanghelyo ug ang Gospel Media Library sa ChurchofJesusChrist.org naglangkob og daghang mga imahe ug mga video nga makatabang sa [imong pamilya] sa paghanduraw og mga konsepto o mga panghitabo” (Pagtudlo sumala sa Pamaagi sa Manluluwas, 22).

Triumphal Entry [Madaugong Pagsulod], ni Walter Rane