The Prodigal Son [Ang Nawala nga Anak], ni Liz Lemon Swindle

Mayo 1–7

Lucas 12–17; Juan 11

“Pangalipay Kamo uban Kanako; kay Hingkaplagan Ko ang Akong Karnero nga Nawala”

Samtang magbasa ka sa Lucas 12–17 ug Juan 11, tinguhaa sa mainampoon nga paagi unsay gusto sa Langitnong Amahan nga imong mahibaloan ug buhaton. Ang imong pagtuon niini nga mga kapitulo makaabli sa imong kasingkasing ngadto sa mga mensahe nga alang lamang gayod kanimo.

I-rekord ang Imong mga Panghunahuna

Sa kasagaran nga mga sitwasyon, 99 sa 100 isipon nga labing maayo —apan dili kini mao kon ang maong gidaghanon nagrepresentar sa minahal nga mga anak sa Dios (tan-awa sa Doktrina ug mga Pakigsaad 18:10). Niana nga sitwasyon, bisan usa ka kalag angay sa detalyado, mabalak-on nga pagpangita “hangtud [atong] nga hikaplagan kini” (Lucas 15:4), sama sa gitudlo sa Manluluwas sa sambingay sa karnero nga nawala. Dayon ang paglipay makasugod, kay “may labi pang kalipay unya didto sa langit tungod sa usa ka makasasala nga magahinulsol kay sa tungod sa kasiyaman ug siyam ka mga tawong wala magkinahanglan sa paghinulsol” (Lucas 15:7). Kon kana ingon og dili makiangayon, makatabang nga hinumduman nga, sa tinuod, walay usa nga “wala magkinahanglan og paghinulsol.” Kitang tanan nagkinahanglan og pagluwas. Ug kitang tanan makaapil sa pagluwas, mag-uban sa paglipay sa matag kalag kinsa naluwas (tan-awa sa Doktrina ug mga Pakigsaad 18:15–16).

Mga Ideya alang sa Personal nga Pagtuon sa Kasulatan

Lucas 12; 14–16

Ako mapanalanginan samtang ako nagbutang sa akong kasingkasing diha sa mahangturong mga butang.

Ngano nga ang Dios moingon “Oy boang” ngadto sa mapaningkamuton, malampusong tawo kinsa mitukod og dagkong mga bodega ug mipuno niini sa mga bunga sa iyang mga paghago? (tan-awa sa Lucas 12:16–21). Niini nga mga kapitulo sa Lucas, ang Manluluwas nagtudlo og daghang mga sambingay nga makatabang kanato sa pagpataas sa atong mga panan-aw lapas sa kalibotanon ngadto sa mahangturon. Ang pipila niini nga mga sambingay gilista dinhi. Unsaon nimo pag-summarize sa mensahe sa matag usa? Unsa kaha ang gisulti sa Ginoo kanimo?

• Ang dato nga boangboang (Lucas 12:13–21)

• Ang dakong kombira (Lucas 14:12–24)

• Ang anak nga nawala (Lucas 15:11–32)

• Ang piniyalan nga malimbungon (Lucas 16:1–12)

• Ang dato ug si Lazaro (Lucas 16:19–31)

Tan-awa usab sa Mateo 6:19–34; 2 Nephi 9:30; Doktrina ug mga Pakigsaad 25:10.

Lucas 15

Malipay ang Langitnong Amahan kon kadtong nawala makit-an.

Samtang ikaw magbasa sa mga sambingay nga gitudlo ni Jesus sa Lucas 15, unsa ang imong nakat-onan mahitungod kon unsa ang gibati sa Langitnong Amahan mahitungod niadtong kinsa nakasala o sa laing paagi “nawala”? Kinahanglan unsaon sa usa ka espirituhanong lider––o bisan hain kanato––pagbati ngadto kanila? Hunahunaa kon unsaon unta sa mga Pariseo ug mga escriba ang pagtubag niini nga mga pangutana (tan-awa sa Lucas 15:1–2). Ang tubag ni Jesus makaplagan sa tulo ka sambingay sa Lucas 15. Samtang ikaw magbasa, paghunahuna mahitungod kon unsa ang gitudlo ni Jesus sa mga escriba ug mga Pariseo niini nga mga sambingay.

Mahimo usab nimo nga hunahunaon ang paghimo og usa ka lista sa mga pagkasama ug mga pagkalahi tali sa mga sambingay. Sama pananglit, mahimo nimong ilhon unsa ang nawala sa matag sambingay ug ngano nga kini nawala, giunsa sa pagkakaplag niini, ug unsa ang reaksyon sa mga tawo sa dihang nakit-an kini. Unsa nga mga mensahe aduna si Jesus alang niadtong kinsa “nawala”—lakip niadtong kinsa wala maghunahuna nga sila nawala? Unsa nga mga mensahe ang Iyang gihatag alang niadtong mga tawo kinsa nangita niadtong kinsa nawala?

Tan-awa usab sa Doktrina ug mga Pakigsaad 18:10–16.

The Lost Piece of Silver [Ang Drakma nga Nawala], ni James Tissot

Lucas 16:1–12

Unsa ang gitudlo ni Kristo sa sambingay sa piniyalan nga malimbungon?

Si Elder James E. Talmage mipasabot og usa ka leksiyon nga atong makat-onan gikan sa sambingay: “Pagmakugihon; kay ang adlaw nga magamit nimo ang imong yutan-ong katigayonan molabay sa dili madugay. Pagkat-on bisan gikan sa malimbungon ug sa dautan; kon sila mabinantayon kaayo sa pagsangkap alang sa bugtong nga umaabot nga ilang gihunahuna, unsa pa kaha kamo, kinsa nagtuo sa mahangturong umaabot, busa pangandam! Kon wala ka makakat-on og kaalam ug pagkamabinantayon sa paggamit sa ‘malimbungon nga bahandi,’ sa unsa nga paagi ikaw masaligan sa mas malahutayong mga katigayonan?” (Jesus the Christ, [1916], 464). Unsa ang uban nga mga leksiyon ang makita nimo niini nga sambingay?

Lucas 17:11–19

Ang pagka-mapasalamaton sa akong mga panalangin modala kanako nga mas duol ngadto sa Dios.

Kon ikaw usa sa napulo ka sanlahon, mobalik kaha ka aron sa pagpasalamat sa Manluluwas? Unsa nga dugang nga mga panalangin ang nadawat sa mapasalamaton nga sanlahon tungod kay nagpasalamat siya?

Mahimo ka usab nga mamalandong sa mga pulong sa Manluluwas, “Ang imong pagsalig nakapaayo kanimo” (bersikulo 19). Sa imong opinyon, sa unsang paagi ang pagka-mapasalamaton ug pagsalig magkalabot? Sa unsa nga paagi ang duha nagtabang kanato nga mahimong mamaayo? Ang video nga “President Russell M. Nelson on the Healing Power of Gratitude” (ChurchofJesusChrist.org) makatabang kanimo sa pagpalandong niini nga mga pangutana.

Tan-awa usab sa Dale G. Renlund, “Hunahunaa ang Pagkamaayo ug Pagkahalangdon sa Dios,” Liahona, Mayo 2020, 41–44.

Juan 11:1–46

Si Jesukristo mao ang Pagkabanhaw ug ang Kinabuhi.

Ang milagro sa pagbanhaw ni Lazaro gikan sa patay usa ka gamhanan ug dili malalis nga pagpamatuod nga si Jesus mao ang tinuod nga Anak sa Dios ug ang gisaad nga Mesiyas. Unsa nga mga pulong, o hugpong sa mga pulong, o mga detalye diha sa Juan 11:1–46 ang naglig-on sa imong hugot nga pagtuo nga si Jesukristo mao “ang pagkabanhaw, ug ang kinabuhi”? Unsa ang kahulogan niini nganha kanimo nga si Jesus mao “ang pagkabanhaw, ug ang kinabuhi”?

Mga Ideya alang sa Pamilya nga Pagtuon sa Kasulatan ug Home Evening

Lucas 15:1–10.Nakasabot ba ang mga sakop sa imong pamilya unsay bation nga mawad-an og usa kabutang—o mawala? Ang paghisgot mahitungod sa ilang mga kasinatian makasugod og panaghisgotan mahitungod sa mga sambingay sa karnero nga nawala ug drakma nga nawala. O makadula kamo og usa ka dula diin ang usa ka tawo motago ug ang ubang mga sakop sa pamilya mosulay sa pagpangita kaniya. Sa unsa nga paagi kini nga kalihokan nagtabang kanato sa pagsabot niini nga mga sambingay?

Lucas 15:11–32.Sa unsa nga paagi kita sama sa amahan niini nga istorya kon kita adunay mga minahal nga nawala? Unsa ang atong makat-onan sa kasinatian sa mas magulang nga anak nga makatabang kanato nga mas mahimong sama ni Kristo? Sa unsa nga paagi nga ang amahan niini nga sambingay sama sa atong Langitnong Amahan?

Lucas 17:11–19.Aron matabangan ang mga sakop sa pamilya nga gamiton ang istorya sa napulo ka sanlahon, makadapit ka nila sa pagbilin og sekreto nga mga sulat sa pagka-mapasalamaton alang sa usag usa. Mahimo usab nga manganta kamo og dungan sa “Ipha ang Inyong mga Panalangin” (Mga Himno, nu.148) ug ipha ang mga panalangin nga nadawat sa imong pamilya.

Juan 11:1–46.Ang mga sakop sa pamilya mahimong motan-aw sa video nga “Lazarus Is Raised from the Dead” (ChurchofJesusChrist.org) ug ipakigbahin ang ilang mga pagpamatuod ni Jesukristo.

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga himno: “Gimahal sa Magbalantay,” Mga Himno, nu. 134.

Pagpalambo sa Atong Pagtudlo

Paggamit og mga istorya ug mga ehemplo sa pagtudlo sa mga baroganan sa ebanghelyo. Ang Manluluwas sa kasagaran nagtudlo mahitungod sa mga baroganan sa ebanghelyo pinaagi sa paggamit sa mga istorya ug mga sambingay. Paghunahuna og mga ehemplo ug mga istorya gikan sa imong kaugalingong kinabuhi nga makapahimo og usa ka baroganan sa ebanghelyo nga buhi alang sa imong pamilya (tan-awa sa Pagtudlo sumala sa Pamaagi sa Manluluwas, 22).

Where Are the Nine [Hain ang Siyam], ni Liz Lemon Swindle