The Prodigal Son [Ang Usikan nga Anak], ni Liz Lemon Swindle

Mayo 1–7

Lucas 12–17; Juan 11

“Maglipay Kita kay Akong Nakaplagan ang Nawala Kong Karnero”

Basaha sa mainampoong paagi ang Lucas 12–17 ug Juan 11, nga magtinguha kon unsaon nimo sa pagtabang ang mga bata nga imong gitudloan nga makasabot sa mga kamatuoran niini nga mga kapitulo ug mobati sa gugma sa Langitnong Amahan.

Dapita ang Pagpaambit

Pahinumdomi ang mga bata sa pipila ka sambingay ug mga istorya nga makita diha sa Lucas 12–17 ug Juan 11, ug dapita sila sa pagpaambit sa unsay ilang nahibaloan mahitungod niini nga mga istorya.

Itudlo ang Doktrina: Mas Gagmay nga mga Bata

Lucas 15

Gusto sa Langitnong Amahan nga ang tanan Niyang mga anak makabalik ngadto Kaniya.

Paghunahuna mahitungod sa mga bata sa imong klase, lakip niadtong dili kanunay nga makatambong. Unsaon nimo sila pagtabang nga mobati sa gugma sa Langitnong Amahan? Unsaon nimo pagdasig ang ubang mga bata sa pagtabang kanimo nga moabiabi kanila nga inubanan sa gugma?

Posible nga mga Kalihokan

• Hatagi ang usa ka bata og usa ka sensilyo, ang laing bata usa ka hulagway sa usa ka karnero, ug ang laing bata usa ka hulagway sa usikan nga anak (tan-awa sa ChurchofJesusChrist.org o sa pahina sa kalihokan niini nga semana). Isaysay ang tulo ka sambingay nga makita diha sa Lucas 15 ug dapita ang mga bata sa pagpataas sa ilang sensilyo o hulagway kon imo kining mahisgotan. Mahimo nimong dapiton ang mga bata sa pagsaysay og usab sa mga sambingay ngadto sa usag usa gamit ang ilang kaugalingong mga pulong.

• Hangyoa ang mga bata sa pagpaambit og higayon nga nawad-an sila og usa ka butang. Giunsa nila sa pagpangita niini? Ipasabot nga ang mga tawo mahimong mawala sa espirituhanon nga paagi kon dili sila mosunod sa Langitnong Amahan. Pagpamatuod nga gusto sa Dios nga moduol Kaniya ang nahisalaag nga mga tawo, ug kita makatabang kanila.

• Dapita ang mga bata sa paghunahuna sa ubang mga bata nga wala motambong sa Primary. Tabangi sila sa pagkolor o paghimo og mugbo nga mga sulat nga nagdapit niini nga mga bata sa pagtambong sa Primary o sa usa ka kalihokan sa Primary. Sa unsa pa nga mga paagi nga atong matabangan kini nga mga bata nga mobati sa gugma sa Langitnong Amahan alang kanila?

Lucas 17:11–19

Makapakita ako sa akong gugma alang sa Langitnong Amahan pinaagi sa pagkamapasalamaton alang sa akong mga panalangin.

Sa unsang paagi nga ang istorya sa napulo ka sanlahon makadasig sa mga bata nga magmapasalamaton?

Posible nga mga Kalihokan

• Isaysay ang istorya sa napulo ka sanlahon nga giayo ni Jesus. Ipakita ang hulagway diha sa latid niini nga semana sa Dali, Sunod Kanako—Alang sa mga Indibidwal ug mga Pamilya ug dapita ang mga bata sa pag-ihap hangtod sa napulo gamit ang ilang mga tudlo. Dayon hangyoa sila sa paghipos sa siyam ka tudlo aron mapakita ang usa ka sanlahon nga nagpasalamat kang Jesus. Tabangi ang mga bata nga maghunahuna og tawo nga ilang mapasalamatan alang sa usa ka mabination o matinabangon nga aksiyon.

• Dapita ang matag bata sa pagdrama-drama sa usa ka butang nga mapasalamaton siya, ug ipatag-an sa nahabilin nga mga bata kon unsa kini. Hangyoa ang mga bata sa pagpaambit og mga paagi nga atong mapakita sa Langitnong Amahan nga mapasalamaton kita alang sa atong mga panalangin.

Juan 11:1–46

Nagtuo kita nga si Jesus mao ang Anak sa Dios.

Si Marta, kinsa igsoon ni Lazaro, miingon ni Jesus: “Mituo ako nga ikaw ang [Kristo], ang Anak sa Dios” (Juan 11:27). Ang istorya ni Maria, Marta, ug Lazaro makapalig-on sa mga pagpamatuod sa mga bata kabahin ni Jesukristo.

Posible nga mga Kalihokan

• I-summarize ang istorya ni Jesus nga mibuhi ni Lazaro gikan sa patay (tan-awa usab sa “Kapitulo 43: Gibuhi og Balik ni Jesus si Lazaro,” diha sa Mga Istorya sa Bag-ong Tugon, 107–9). Ipakita sa mga bata ang usa ka patay nga sanga ug ang usa ka buhi nga tanom, ug pangutan-a sila kon hain ang patay ug hain ang buhi. Ipakigbahin ang imong pagpamatuod nga tungod sa gahom ni Jesukristo, ang mga tawo nga patay mabanhaw ug mabuhi hangtod sa kahangtoran.

• Tabangi ang mga bata sa pagsag-ulo sa pulongan nga gisulti ni Jesus kang Marta: Ako mao ang pagkabanhaw ug ang kinabuhi” (Juan 11:25). Ipasabot nga tungod sa Pagkabanhaw sa Manluluwas, atong makita pag-usab ang atong mga minahal nga namatay na.

Itudlo ang Doktrina: Mas Magulang nga mga Bata

Lucas 15

Makatabang ako ni Jesus sa pagpangita sa Iyang nawala nga karnero.

Kitang tanan nakaila og usa ka tawo nga sa pipila ka paagi sama sa nawala nga karnero, sa nawala nga sensilyo, o sa usikan nga anak diha sa mga sambingay sa Manluluwas. Hunahunaa kon unsaon nimo pagdasig ang mga bata nga motabang inubanan sa gugma ngadto niini nga mga tawo.

Posible nga mga Kalihokan

• Tabangi ang mga bata sa pagbasa sa sambingay sa nawala nga karnero o sa sambingay sa nawala nga sensilyo, nga makita diha sa Lucas 15:1–10, ug sa pagpaambit sa unsay ilang nakat-onan.

• Isulat kini nga mga ngalan diha sa pisara: amahan, magulang nga anak nga lalaki, ug manghod nga anak nga lalaki. Unsay bation sa Langitnong Amahan ug ni Jesus mahitungod niadtong mga nakasala?

• Hangyoa ang usa ka bata sa pagbiya sa lawak samtang ang ubang mga bata motago og usa ka sensilyo o papel nga karnero. Pabalika ang bata ug papangitaa sa sensilyo o karnero. Unsa ang pipila ka paagi nga ang mga tawo mobati nga “nawala” sama sa sensilyo o sa karnero? Dapita ang mga bata sa pagsugyot og mga paagi nga sila makatabang kanila. Kantaha uban sa mga bata ang may kalabotan nga awit, sama sa “Gimahal sa Magbalantay” (Mga Himno, nu. 134), ug pagpamatuod bahin sa hingpit nga kalipay nga moabot kon ang mga tawo mobalik ngadto sa Dios.

• Ipasabot nga si Jesus migamit sa nawala nga karnero, sa nawala nga sensilyo, ug sa usikan nga anak sa pagrepresentar sa mga tawo nga “nawala” tungod kay wala sila makaangkon sa mga panalangin sa ebanghelyo. Dapita ang mga bata sa paghunahuna og mga tawo nga ilang kaila nga wala niini nga mga panalangin sa ilang mga kinabuhi. Unsa ang ilang mabuhat aron sa pagtabang niini nga mga tawo nga mobati sa gugma sa Langitnong Amahan alang kanila?

Gentle Shepherd [Maaghop nga Magbalantay sa Karnero], ni Yongsung Kim

Lucas 17:11–19

Makapakita ako sa akong gugma alang sa Langitnong Amahan pinaagi sa pagkamapasalamaton alang sa akong mga panalangin.

Ang istorya sa napulo ka sanlahon tingali usa ka maayo nga paagi sa pagdasig sa mga bata sa pagpahayag og pasalamat sa Langitnong Amahan alang sa ilang mga panalangin.

Posible nga mga Kalihokan

• Basaha og dungan ang istorya sa napulo ka sanlahon. Sa unsang paagi ang sanlahon nga nagpasalamat napanalanginan sa iyang kamapasalamaton? Nganong importante man nga magpasalamat sa Dios alang sa atong mga panalangin?

• Dapita ang mga bata sa paglista sa mga butang nga mapasalamaton sila nga magsugod sa matag titik sa ilang ngalan.

• Hangyoa ang mga bata sa pagsulat og mugbo nga mga sulat-pasalamat ngadto sa Langitnong Amahan alang sa mga panalangin nga Iyang gihatag kanila. Mahimo nilang ibitay ang mugbo nga mga sulat dapit sa ilang higdaanan aron sa pagpahinumdom kanila nga mopahayag og pasalamat kon sila mag-ampo.

Juan 11:1–46

Nagtuo kita nga si Jesus mao ang Anak sa Dios.

Unsaon nimo paggamit ang istorya ni Maria, Marta, ug Lazaro sa pagtabang sa mga bata nga masayod, sama kang Marta, nga si Jesus mao “ang [Kristo], ang Anak sa Dios”? (Juan 11:27).

Posible nga mga Kalihokan

• Isulat diha sa pisara ang pipila sa mga pamahayag nga gipamulong sa mga tawo diha sa Juan 11. Hangyoa ang mga bata sa pag-ila kon kinsa ang misulti sa matag pamahayag, ug dapita sila sa pagsiksik sa Juan 11 aron masuta kon sakto ba ang ilang mga tubag. Unsa kaha ang ilang bation kon sila mao si Jesus, Marta, Maria, o Lazaro? Sa unsang paagi ang pagtuo kang Jesus makatabang kanato kon kita naguol o nahadlok?

• Basaha ang pagpamatuod ni Marta, nga makita diha sa Juan 11:20–27. Hangyoa ang mga bata sa pagpangita sa mga pulong ug mga pulongan nga nagpakita nga si Marta adunay hugot nga pagtuo kang Jesukristo. Unsa man ang atong mahimo aron makabaton og hugot nga pagtuo Kaniya?

• Tabangi ang mga bata nga makasag-ulo sa Juan 11:25. Ipasabot nga ang tanan mabanhaw, apan ang matarong lamang ang makadawat og kinabuhing dayon ug makapuyo og balik uban sa Langitnong Amahan ug ni Jesukristo.

Awhaga ang Pagkat-on diha sa Panimalay

Hatagi ang mga bata og pipila ka papel nga magamit nila sa pagsulat o pagdrowing sa mga butang nga mapasalamaton sila sa tibuok semana.

Pagpalambo sa Atong Pagtudlo

Ang pagbalik-balik usa ka yawe sa pagkat-on. Ang mga bata makabenepisyo nga makadungog sa usa ka baroganan sa ebanghelyo o sa paghimo sa usa ka kalihokan og sobra sa kausa. Sulayi ang pagbalik-balik sa mga kalihokan sa lainlaing paagi.