Mayo 8–14

Mateo 19–20; Marcos 10; Lucas 18

“Unsa Pa May Kinahanglan Kong Buhaton?”

Basaha ang Mateo 19–20; Marcos 10; ug Lucas 18, nga maghunahuna sa mga bata nga imong gitudloan. Irekord ang bisan unsang pag-aghat nga imong madawat. Ang imong pagpangandam makatabang nimo sa pagtudlo sa mga bata sa unsay kinahanglan nilang masayran gikan niini nga mga kapitulo.

Dapita ang Pagpaambit

Dapita ang mga bata sa pagpaambit og bisan unsa nga ilang nahinumdoman gikan sa leksiyon sa miaging semana. Pagpakita og mga hulagway aron sa pagtabang kanila nga makahinumdom.

Itudlo ang Doktrina: Mas Gagmay nga mga Bata

Marcos 10:6–8

Gusto sa Langitnong Amahan nga maminyo kita sa templo ug makabaton og mahangtoron nga mga pamilya.

Sa unsang paagi nga ang mga bata nga imong gitudloan makabenepisyo sa pagkat-on mahitungod sa doktrina sa mahangtorong kaminyoon? Mahimong makatabang kanimo ang pagrebyo sa mga kamatuoran mahitungod sa kaminyoon diha sa “Ang Pamilya: Usa ka Pamahayag ngadto sa Kalib[o]tan” (ChurchofJesusChrist.org).

Posible nga mga Kalihokan

• Basaha ang Marcos 10:6–8 ngadto sa mga bata, ug ipakita ang litrato sa usa ka magtiayon. Hangyoa ang mga bata nga motudlo ngadto sa lalaki ug sa babaye kon makadungog sila nimo nga mobasa sa mga pulong nga lalaki ug babaye. Ipasabot nga tuyo sa Langitnong Amahan nga ang lalaki ug babaye magminyo sa usag usa (tan-awa sa Genesis 1:27–28).

• Ipakita ang mga hulagway sa usa ka pamilya ug sa usa ka templo. Dapita ang mga bata sa paghisgot mahitungod sa unsay ilang nakita diha sa mga hulagway. Ipasabot nga gusto sa Langitnong Amahan nga masilyo kita ngadto sa atong mga pamilya diha sa templo aron mahimo nato silang ikauban sa kahangtoran. Pagmahimong sensitibo sa mga bata kansang mga ginikanan wala pa masilyo.

• Kantaha ang usa ka awit mahitungod sa mga pamilya, sama sa “Malipayon ang Pamilya” (Songbook sa mga Bata, 104). Ikonsiderar ang pagkanta sa awit sa pipila ka higayon. Dapita ang mga bata sa pagpaambit og makalingaw nga mga butang nga ilang nabuhat uban sa ilang mga pamilya. Nganong mapasalamaton man sila alang sa ilang mga pamilya?

• Kantaha ang usa ka awit mahitungod sa templo, sama sa “Gusto Ko nga Makita ang Templo” o “Mga Pamilya Mahimong Manag-uban sa Hangt[o]d” (Songbook sa mga Bata, 99, 98). Pakupta ang mga bata og mga litrato sa mga templo o mga pamilya, ug dapita sila sa pagpataas sa ilang mga litrato kon mokanta sila og “templo” o “pamilya.” Tabangi ang mga bata sa paghunahuna og mga rason kon nganong importante nga maminyo sa templo.

Nahigugma si Jesus sa mga bata, kay “ang Gingharian sa Dios ila sa mga sama niining mga bata” (Marcos 10:14).

Marcos 10:13–16

Gusto ni Jesus nga moduol Kaniya ang gagmayng mga bata aron makapanalangin Siya kanila.

Kini nga istorya naghatag og oportunidad sa pagtabang sa mga bata nga mobati kon unsa sila ka mahal ni Jesus.

Posible nga mga Kalihokan

• Sa imong kaugalingong mga pulong, ipaambit ang istorya diha sa Marcos 10:13–16. Tabangi ang mga bata sa paghunahuna og mga panahon sa dihang gibati nila ang gugma ni Jesus alang kanila. Ipakigbahin ang imong pagpamatuod ngadto sa mga bata nga si Jesus nahigugma kanila ug gustong mopanalangin kanila.

• Ipakita ang litrato nga Kristo ug ang mga Bata (Libro sa mga Hulagway sa Ebanghelyo, nu. 47). Tabangi ang mga bata sa paghanduraw kon sa unsa kaha sama nga mahimong usa sa mga bata nga naglingkod tupad ni Jesus diha sa hulagway. Dapita ang mga bata sa pagpaambit kon unsay ilang gibati mahitungod ni Jesus.

• Padrowinga ang mga bata og mga hulagway sa ilang kaugalingon nga gipanalanginan ni Jesus (tan-awa sa Marcos 10:16 ug sa pahina sa kalihokan niini nga semana).

Marcos 10:17–22

Kon mosunod ako sa mga sugo, makadawat ako og kinabuhing dayon.

Gitudloan ni Jesus ang adunahan nga batan-ong lalaki nga aron makaangkon og kinabuhing dayon—usa ka kinabuhi nga sama sa Langitnong Amahan—kinahanglan siyang mosunod sa mga sugo.

Posible nga mga Kalihokan

• Isaysay ang istorya bahin sa adunahan nga batan-ong lalaki diha sa Marcos 10:17–22 ngadto sa mga bata. (Tan-awa usab sa “Kapitulo 42: Ang Batan-ong Tawo nga Adunahan,” diha sa Mga Istorya sa Bag-ong Tugon, 105–6.) Hangyoa sila sa pagpaminaw kon unsay gisulti ni Jesus nga buhaton sa batan-ong lalaki ug sa unsang paagi mitubag ang batan-ong lalaki.

• Pagsulti og usa o daghan pa nga mga istorya mahitungod sa mga bata kinsa nangayo og tambag o direksiyon gikan sa ilang mga ginikanan apan wala mosunod o motuman. Unsa ang pipila ka butang nga gipabuhat sa Langitnong Amahan kanato? Unsa ang atong bation kon motuman kita sa Iyang mga sugo?

• Pagpaambit og mga kasinatian sa dihang nakadawat ka og personal nga mga pag-aghat sa pagbuhat og butang aron mahimong mas maayo.

Itudlo ang Doktrina: Mas Magulang nga mga Bata

Marcos 10:6–8

Gusto sa Langitnong Amahan nga maminyo kita sa templo ug makabaton og mahangtoron nga mga pamilya.

Ang mga butang nga gitudlo ni Jesus mahitungod sa kaminyoon makatabang sa mga bata nga mahimong mahinamon sa pagminyo sa templo ug sa pag-amuma og mahangtorong pamilya.

Posible nga mga Kalihokan

• Hangyoa ang usa sa mga bata sa pagbasa og kusog sa Marcos 10:6–8. Ipasabot nga ang makighiusa nagpasabot nga “mounong” o “kusganong mohupot” sa usa ka butang. Nganong importante man nga ang mga bana ug asawa magtinabangay, maghigugmaay sa usag usa, ug magtambayayong isip managpares?

• Hangyoa ang mga bata sa pagtabang kanimo sa paghunahuna og mga tubag sa mga pangutana nga sama sa “Nganong importante man ang mga pamilya diha sa Simbahan?” o “Nganong importante man nga magminyo ka diha sa templo?” Tabangi sila sa pagpangita og mga tubag diha sa mga kapanguhaan nga sama sa Marcos 10:6–8; 1 Mga Taga-Corinto 11:11; Doktrina ug mga Pakigsaad 42:22; 131:1–4; Moises 3:18, 21–24; ug “Ang Pamilya: Usa ka Pamahayag ngadto sa Kalib[o]tan.”

• Kantaha og dungan ang usa ka awit mahitungod sa mga pamilya, sama sa “Mga Pamilya Mahimong Manag-uban sa Hangt[o]d” (Songbook sa mga Bata, 98). Ipaambit ang imong pagpamatuod mahitungod sa mahangtorong kaminyoon ug pamilya ngadto sa mga bata. Dapita sila sa pagpaambit usab sa ilang mga pagpamatuod.

Marcos 10:17–22

Makatabang si Jesus kanako nga masayod kon unsay kinahanglan nakong buhaton aron mouswag.

Ang adunahan nga batan-ong lalaki nangita ni Jesus ug nakadawat og piho nga instruksiyon nga gituyo alang gayod kaniya. Unsaon nimo pagdasig ang mga bata nga magtinguha og sama nga giya diha sa ilang kaugalingon nga mga kinabuhi?

Posible nga mga Kalihokan

• Hangyoa ang mga bata sa pagpangita og usa ka bersikulo diha sa Marcos 10:17–22 nga naglarawan sa hulagway diha sa latid niini nga semana sa Dali, Sunod Kanako—Alang sa mga Indibidwal ug mga Pamilya. Ipasabot nga personal ang tambag nga gihatag ni Jesus ngadto sa batan-ong lalaki, ug kitang tanan makadawat og personal nga direksiyon gikan sa Ginoo pinaagi sa Espiritu.

• Basaha og dungan ang Marcos 10:17–22. Dapita ang mga bata sa pagsulat diha sa pisara sa mga sugo nga gisulti sa Manluluwas nga angayng tumanon sa adunahan nga batan-ong lalaki (tan-awa sa bersikulo 19). Unsa pa ang gihangyo ni Jesus nga iyang buhaton? (tan-awa sa bersikulo 21). Awhaga ang mga bata sa paghunahuna mahitungod sa mga butang nga tingali kinahanglan nilang sugdan sa pagbuhat o hunongon sa pagbuhat aron mas makasunod ni Jesus. Unsa ang pipila ka paagi nga atong mahibaloan kon unsa ang gusto ni Jesus nga atong buhaton?

Awhaga ang Pagkat-on diha sa Panimalay

Dapita ang mga bata sa pagpakita sa ilang mga pamilya nga sila nahigugma kanila, tingali pinaagi sa pagsulat og mubo nga sulat o paghimo og mabination nga buhat sa pagserbisyo.

Pagpalambo sa Atong Pagtudlo

Hatagi gayod og pagtagad ang mga bata. Unsa man ang reaksiyon sa mga bata sa imong klase ngadto sa mga kalihokan sa pagkat-on? Kon daw wala kaayo sila moapil, panahon na siguro nga mosulay og laing kalihokan o mohimo og mubo, matinahoron nga paglakaw. Sa laing bahin, kon nakamatikod ka nga miapil ang mga bata ug nagkat-on gikan sa usa ka bahin sa leksiyon, ayaw batia nga kinahanglang mopadayon aron lang masiguro nga nahurot nimo ang tanang materyal sa leksiyon.