Zacchaeus in the Sycamore Tree [Si Saqueo nga naa sa Kahoyng Sikomoro], ni James Tissot

Mayo 15–21

Mateo 21–23; Marcos 11; Lucas 19–20; Juan 12

“Karon Moanhi Kanimo Ang Imong Hari”

Samtang imong basahon ang Mateo 21–23; Marcos 11; Lucas 19–20; ug Juan 12, hatagig pagtagad ang mga impresyon nga imong madawat gikan sa Espiritu Santo. Tan-awa ang “Pagtubag sa mga Panginahanglan sa Mas Gagmay nga mga Bata” sa sinugdanan niini nga kapanguhaan alang sa mga butang nga hinumdoman samtang imong itudlo kini nga mga baroganan.

Dapita ang Pagpaambit

Ipakita ang hulagway gikan sa latid niini nga semana diha sa Dali, Sunod Kanako—Alang sa mga Indibidwal ug mga Pamilya, ug dapita ang mga bata sa pagpaambit sa unsay ilang nahibaloan mahitungod sa unsay nahitabo diha sa hulagway.

Itudlo ang Doktrina: Mas Gagmay nga mga Bata

Lucas 19:1–10

Ang Langitnong Amahan ug si Jesus nakaila sa akong ngalan.

Samtang basahon nimo ang mahitungod sa inter-aksiyon sa Manluluwas kang Saqueo, unsa nga mga mensahe ang imong nakita nga mahimong mopanalangin sa mga bata nga imong gitudloan?

Posible nga mga Kalihokan

• Ipakita ang hulagway nga Si Saqueo nga naa sa Kahoyng Sikomoro (dinhi niini nga latid o sa ChurchofJesusChrist.org). Tabangi ang mga bata sa pagpangita ni Saqueo ug sa pagsulti sa iyang ngalan. Paghimo og mga aksiyon nga buhaton sa mga bata samtang imong isaysay ang istorya bahin ni Saqueo ug ni Jesus—sama pananglit, mokinto aron makakita ibabaw sa pundok sa mga tawo o magpakaaron-ingnon nga mokatkat og kahoy. Ipasabot nga ang Manluluwas nakakita ni Saqueo ug mitawag kaniya sa iyang ngalan. Ipamatuod nga ang Manluluwas nakaila usab sa matag bata ug sa ilang mga ngalan.

• Pagdala og walay sulod nga picture frame sa klase, o paghimo og picture frame gamit ang papel. Dapita ang matag bata nga magpuli-puli sa paggunit sa frame nga ipasentro ang iyang nawong niini samtang ang mga kauban sa klase moingon, “Ang Langitnong Amahan ug si Jesus nakaila ni [ngalan sa bata].”

• Kantaha og dungan ang usa ka awit mahitungod sa gugma sa Langitnong Amahan, sama sa “Ako Anak sa Dios” (Songbook sa mga Bata, 2–3). Tabangi ang mga bata sa pagpaminaw sa mga butang nga makatabang kanila nga mahibalo nga ang Langitnong Amahan nahigugma kanila.

Mateo 21:12–14

Ang templo usa ka sagrado nga dapit.

Ang balaang pagtahod ni Jesus alang sa templo, sama sa gihulagway niini nga mga bersikulo, makatabang sa mga bata nga imong gitudloan nga makasabot nga ang templo usa ka sagrado nga dapit.

Posible nga mga Kalihokan

• Ipakita ang hulagway nga Jesus Naghinlo sa Templo (Libro sa mga Hulagway sa Ebanghelyo, nu. 51), ug isaysay ang istorya nga narekord diha sa Mateo 21:12–14. Tabangi ang mga bata sa pagpangita og kwarta ug mga hayop diha sa hulagway. Dayon hisgoti kon nganong gusto sa Manluluwas nga mopahawa sa templo ang mga tigpangilis og kwarta ug ang mga tawo nga namaligya og mga hayop.

• Pagpakita og mga hulagway sa mga templo (alang sa mga ehemplo, tan-awa sa Libro sa mga Hulagway sa Ebanghelyo, nu. 117–19), ug hangyoa ang mga bata sa pagpaambit kon unsay ilang bation kon makakita sila og templo. Mahimo nimong ipasabot nga ang templo mao ang usa ka dapit kon asa kita moadto aron mohimo og mga saad sa Dios, magtinguha og mga tubag sa mga pag-ampo, ug mobati nga duol sa Dios. Tabangi ang mga bata sa pag-ila og mga pagbati gikan sa Espiritu Santo nga nagsulti kanila nga ang templo usa ka espesyal nga dapit. Hangyoa ang mga bata sa paglihok nga sama nga anaa sila sulod sa templo. Sama pananglit, mohunghong sila kon mag-istorya ug molingkod nga may balaang pagtahod.

• Kantaha og dungan ang usa ka awit mahitungod sa templo, sama sa “Gusto Ko nga Makita ang Templo” (Songbook sa mga Bata, 99), ug dapita ang mga bata sa paghimo og tumong nga mosulod sa templo ugma damlag.

Ang templo mao ang balay sa Ginoo.

Mateo 21:28–32

Mahimo kong magmasulundon.

Gusto sa Langitnong Amahan nga magmasulundon kita. Ang sambingay sa duha ka anak usa ka oportunidad sa pagtudlo kabahin sa kaimportante sa pagkamasulundon.

Posible nga mga Kalihokan

• Pagdrowing og hulagway sa duha ka anak nga lalaki diha sa pisara, ug gamita ang mga drowing samtang imong isaysay ang sambingay sa Mateo 21:28–32. Hain nga anak ang mibuhat sa husto nga butang sa kataposan? Hangyoa ang mga bata sa pagngalan og mga butang nga ilang mabuhat aron magmasulundon diha sa panimalay. Padrowinga sila og mga hulagway sa ilang mga kaugalingon nga nagbuhat sa usa niini nga mga butang.

• Dapita ang mga bata sa pagpaambit og mga kasinatian nga ilang nasinati bahin sa pagkahimong masulundon sa ilang mga ginikanan. Sa unsang paagi sila napanalanginan tungod sa pagkamasulundon?

Itudlo ang Doktrina: Mas Magulang nga mga Bata

Lucas 19:1–10

Kon mangita ako sa Manluluwas, ako makakaplag Kaniya.

Mahimo nimong gamiton ang istorya ni Saqueo sa pagtabang sa mga bata nga maghunahuna og mga butang nga ilang mahimo aron mas maduol sa Manluluwas.

Posible nga mga Kalihokan

• Basaha ang Lucas 19:1–10, nga mohunong human sa matag pipila ka bersikulo aron sa paghisgot kon unsa ang gibutyag sa mga bersikulo mahitungod ni Saqueo. Unsa ang gibuhat ni Saqueo aron makakita siya ni Jesus? Unsa ang iyang gibuhat sa dihang gipakanaog siya ni Jesus gikan sa kahoy? Hangyoa ang matag bata sa pagpaambit og usa ka rason kon nganong gusto sila nga makakita kang Jesus. Kon ang Manluluwas moanhi sa atong siyudad, unsa man ang atong buhaton aron makapangandam?

• Dapita ang mga bata sa paghunahuna og mga tawo nga ilang kaila kinsa, sama ni Saqueo, tingali nangita sa Manluluwas. Pangutan-a ang mga bata kon unsay ilang mabuhat aron sa pagtabang sa usa ka tawo nga makakat-on mahitungod sa Manluluwas.

• Dapita ang mga bata sa pagpaambit og mga kasinatian sa dihang gibati nila nga ang Langitnong Amahan ug si Jesukristo nakaila kanila ug nahigugma kanila.

Mateo 21:12–14

Ang templo usa ka sagrado nga dapit nga kinahanglan nakong tahoron.

Sa unsang paagi nga ang istorya bahin sa Manluluwas nga naglimpyo sa templo makatabang kanimo sa pagtudlo sa mga bata mahitungod sa kasagrado sa mga templo?

Posible nga mga Kalihokan

• Dapita ang mga bata sa pagbasa sa Mateo 21:12–14. Ipakita ang hulagway nga Jesus Naghinlo sa Templo (Libro sa mga Hulagway sa Ebanghelyo, nu. 51), ug pangutan-a sila hain nga bersikulo ang gipakita sa hulagway.

• Dapita ang mga bata sa pagpaambit sa ilang gibati sa dihang misulod sila sa templo, mibisita sa nataran sa templo, o mitan-aw og mga hulagway sa mga templo. Unsa ang nakatabang kanila nga masayod nga ang templo usa ka sagrado nga dapit? Mahimo nimong ipaambit sa mga bata kon nganong gimahal nimo ang templo. Nganong sagrado kini alang kanimo?

• Dapita ang usa o daghan pa nga mga batan-on sa pagtambong sa klase ug sa paghisgot kon giunsa nila sa pagpangandam sa pagsulod sa templo. Kon nakasulod na sila sa templo, hangyoa sila sa paghisgot kon unsa ang ilang gibati samtang didto sila.

• Paggunting og hulagway sa templo aron mahimong mga piraso sa puzzle, ug hatagi ang matag bata og usa ka piraso. Hangyoa ang mga bata sa pagsulat diha sa luyo sa ilang piraso sa puzzle og usa ka butang nga ilang mahimo aron mangandam sa pagsulod sa templo. Samtang ang matag bata mopaambit og ideya, idugang ang iyang piraso ngadto sa puzzle.

• Diha sa pisara, isulat ang mosunod: Ang makatabang kanako nga makapangandam nga moserbisyo diha sa templo. Dapita ang mga bata sa pagsugyot og mga paagi sa pagkompleto niini nga kapahayag. Pipila ka ideya mahimong maglakip sa “Pagtuman sa akong mga pakigsaad sa bunyag” o “Ang Espiritu Santo.”

Mateo 23:25–28

Gusto ni Jesus nga mahimo akong matarong sa akong mga lihok ug sa akong mga tinguha.

Si Jesus mitudlo sa mga escriba ug mga Pariseo mahitungod sa kaimportante sa tinud-anay nga pagsunod sa ebanghelyo—dili lamang sa pagpakaaron-ingnon nga matarong. Unsa ang makatabang sa mga bata nga makasabot niini nga kamatuoran?

Posible nga mga Kalihokan

• Samtang imong basahon ang Mateo 23:25–28 ngadto sa mga bata, ikonsiderar ang pagpaambit niini nga kahulogan sa tigpakaaron-ingnon gikan sa Bible Dictionary [Diksyonaryo sa Biblia]: “Usa ka tawo nga nagpakaaron-ingnon nga relihiyoso bisan dili.” Nganong dili man maayo nga mahimong tigpakaaron-ingnon?

• Pakit-a ang mga bata og tasa nga limpyo sa gawas apan hugaw sa sulod aron makatabang sa paghulagway sa pasumbingay diha sa Mateo 23:25. Unsaon man nato sa pagseguro nga limpyo ug putli kita sa sulod?

Awhaga ang Pagkat-on diha sa Panimalay

Tabangi ang mga bata sa paghunahuna og usa ka butang nga ilang nakat-onan diha sa klase nga ilang mapaambit sa ilang mga pamilya sa panimalay.

Pagpalambo sa Atong Pagtudlo

Suportahi ang mga ginikanan sa mga bata. “Ang mga ginikanan maoy labing importanting mga magtutudlo sa ebanghelyo sa ilang mga anak—anaa kanila ang labing dako nga responsibilidad ug ang labing dako nga gah[o]m sa pag-impluwens[i]ya sa ilang mga anak (tan-awa sa Deuteronomio 6:6–7). Samtang magtudlo ka sa mga bata sa simbahan, pagmainamp[o]on nga motinguha og mga paagi sa pagsuporta sa ilang mga ginikanan sa ilang mahinungdanong tahas” (Pagtudlo sumala sa Pamaagi sa Manluluwas, 25).