“Mayo 8–14. Mateo 19–20; Marcos 10; Lucas 18: ‘Unsa Pa May Akong Kulang?’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 (2022)
“Mayo 8–14. Mateo 19–20; Marcos 10; Lucas 18,” Dali, Sunod Kanako—Alang sa mga Indibidwal ug mga Pamilya: 2023
Mayo 8–14
Mateo 19–20; Marcos 10; Lucas 18
“Unsa Pa May Akong Kulang?”
Basaha ug palandonga ang Mateo 19–20; Marcos 10; ug Lucas 18, paghatag og pagtagad sa mga pag-aghat nga imong madawat. Timan-i kadto nga mga pag-aghat, ug tinoa unsaon nimo sa pagbuhat niini.
I-rekord ang Imong mga Panghunahuna
Kon ikaw adunay oportunidad sa pagpangutana sa Manluluwas, unsa kaha kini? Sa dihang ang usa ka adunahang batan-on nga lalaki nakahimamat sa Manluluwas sa unang higayon, nangutana siya, “Unsa bay maayong buhaton ko aron makapanag-iya ako sa kinabuhing dayon?” (Mateo 19:16). Ang tubag sa Manluluwas nagpakita sa pagpasalamat alang sa maayong mga butang nga nahimo na sa batan-on nga lalaki ug mahigugmaong pag-awhag sa pagbuhat og dugang pa. Kon mamalandong kita sa posibilidad sa kinabuhing dayon, sa samang paagi maghunahuna kita kon aduna pa bay angay natong buhaton. Kon kita mangutana, sa atong kaugalingong paagi, “Unsa pa may akong kulang?” (Mateo 19:20), ang Ginoo makahatag kanato og tubag nga sama lamang ka personal sa Iyang tubag ngadto sa adunahang batan-on nga lalaki. Bisan unsay isugo sa Ginoo nga atong buhaton, ang pagsunod sa Iyang tubag magkinahanglan kanunay nga kita mosalig Kaniya labaw kay sa atong kaugalingong pagkamatarong (tan-awa sa Lucas 18:9–14) ug nga kita “modawat sa gingharian sa Dios maingon sa dinawatan sa gamayng bata” (Lucas 18:17; tan-awa usab sa 3 Nephi 9:22).
Mga Ideya alang sa Personal nga Pagtuon sa Kasulatan
Ang kaminyoon tali sa usa ka lalaki ug babaye gi-orden sa Dios.
Kining panagsultihanay tali sa Manluluwas ug sa mga Pariseo mao ang usa sa pipila ka narekord nga mga higayon diin ang Manluluwas mitudlo sa piho mahitungod sa kaminyoon. Human mabasa ang Mateo 19:3–9 ug Marcos 10:2–12, paghimo og lista sa pipila ka mga pamahayag nga sa imong pagbati nag-summarize sa panan-aw sa Ginoo sa kaminyoon. Giunsa sa imong kahibalo bahin sa plano sa Amahan sa kaluwasan nag-apekto sa paagi nga ikaw naghunahuna ug mibati mahitungod sa kaminyoon?
Gitudlo ba ni Jesus nga ang diborsyo dili gayod madawat o nga ang nagdiborsyo nga mga tawo kinahanglan nga dili magminyo pag-usab?
Sa usa ka pakigpulong bahin sa diborsyo, si Presidente Dallin H. Oaks mitudlo nga tuyo sa Langitnong Amahan nga ang relasyon sa kaminyoon mahimong mahangturon. Hinoon, ang Dios nakasabot usab nga ang diborsyo usahay kinahanglan. Si Presidente Oaks mipasabot nga ang Ginoo “mitugot sa diborsyado nga tawo sa pagminyo pag-usab nga walay mansa sa pagkamakasasala nga gihisgutan sa kinatas-an nga balaod. Gawas kon ang usa ka diborsyado nga miyembro nakabuhat og seryoso nga mga kalapasan, malalaki o mababaye mahimong takos alang sa usa ka rekomend sa templo ubos sa mao gihapong sumbanan sa katakos nga magamit sa ubang mga miyembro” (“Diborsyo,” Liahona, Mayo 2007, 70).
Mateo 19:16–22; Marcos 10:17–22; Lucas 18:18–23
Kon mangutana ako sa Ginoo, Siya motudlo kanako unsa ang kinahanglan kong buhaton sa pagpanunod sa kinabuhing dayon.
Ang istorya sa adunahang batan-on nga lalaki makahatag og pagduha-duha bisan ngadto sa matinud-anon, tibuok nga kinabuhi nga disipulo. Samtang ikaw magbasa sa Marcos 10:17–22, unsa nga ebidensya ang imong nakita sa pagkamatinud-anon ug pagkasinsero sa batan-on nga lalaki? Unsa ang gibati sa Ginoo ngadto niining batan-ong lalaki?
Kini nga istorya mahimong moaghat kanimo sa pagpangutana, “Unsa pa may akong kulang?” (Mateo 19:20). Unsaon sa Ginoo pagtabang kanato sa paghulip alang sa unsay atong kulang? (tan-awa sa Ether 12:27). Unsa ang atong mabuhat sa pag-andam sa atong mga kaugalingon sa pagdawat sa Iyang pagtul-id ug sa pagtabang kanato samtang kita naninguha sa paglambo?
Tan-awa usab sa Larry R. Lawrence, “Unsa Pa May Akong Kulang?,” Liahona, Nob 2015, 33–35; S. Mark Palmer, “Ug si Jesus, sa Nagsud-ong Siya Kaniya, Nahigugma Kaniya,” Liahona, Mayo 2017, 114–16.
Ang tanan makadawat sa panalangin sa kinabuhing dayon, bisan kanus-a sila modawat sa ebanghelyo.
Makaagid-agid ka ba sa kasinatian ni bisan kinsa nga mga mamumuo diha sa parasan? Unsa nga mga leksiyon ang imong nakita alang sa imong kaugalingon niini nga tudling? Ang mensahe ni Elder Jeffrey R. Holland sa “Mga Mamumuo sa Ubasan” (Liahona, Mayo 2012, 31–33) mahimong makatabang kanimo nga makakita og bag-ong mga paagi sa paggamit niini nga sambingay. Unsa ang dugang nga mga pag-aghat ang gihatag sa Espiritu nganha kanimo?
The Repentant Publican and the Self-Righteous Pharisee in the Temple [Ang Mahinulsulon nga Maniningil og Buhis ug ang Nagpakaarong-ingnon nga Matarong sa Kaugalingon nga Pariseo diha sa Templo], ni Frank Adams
Kinahanglan akong mosalig sa kalooy sa Dios, dili sa akong kaugalingong pagkamatarong.
Unsaon nimo sa pag-summarize ang kalainan tali sa duha ka pag-ampo dinhi niini nga sambingay? Palandonga kon unsa ang imong kinahanglang buhaton nga mahimong mas mahisama sa maniningil sa buhis dinhi niini nga istorya ug dili kaayo mahisama sa Pariseo.
Tan-awa usab sa Mga Taga-Filipos 4:11–13; Alma 31:12–23; 32:12–16.
Mga Ideya alang sa Pamilya nga Pagtuon sa Kasulatan ug Home Evening
-
Marcos 10:13–16; Lucas 18:15–17.Sa pagtabang sa mga sakop sa pamilya sa pagpalandong sa asoy dinhi niini nga mga bersikulo, kamo makakanta og dungan sa usa ka may kalabotan nga awit, sama sa “Samtang Nagbasa Anang Sugilanong Matahom” (Songbook sa mga Bata, 35). Unsa kaha kini sama nga mahimong usa sa mga bata nga gipanalanginan ni Jesus? Unsa kaha ang kahulogan niini nga “magadawat sa gingharian sa Dios ingon sa dinawatan sa gamayng bata”? (Marcos 10:15).
-
Marcos 10:23–27.Unsa ang kalainan tali sa pagbaton og mga katigayonan ug pagsalig sa mga katigayonan? (tan-awa sa Marcos 10:23–24). Samtang ikaw magbasa sa bersikulo 27, mahimo nimong ipasabot ang Hubad ni Joseph Smith: “Sa mga tawo nga misalig sa katigayonan, dili gayod kini mahimo; apan mahimo sa mga tawo nga misalig sa Dios ug gitugyan kanako ang tanan, kay sa Dios kining mga butanga mahimo” (Hubad ni Joseph Smith, Marcos 10:26 [sa Marcos 10:27, footnote a]). Isip usa ka pamilya, giunsa nato sa pagpakita nga kita nagsalig sa Ginoo labaw kay sa materyal nga mga butang?
-
Mateo 20:1–16.Sa paghulagway sa mga baroganan sa Mateo 20:1–16, makahimo ka og yanong kompetisyon, sama sa mubo nga lumba. Human makakompleto ang tanan sa kompetisyon, hatagi og sama nga premyo ang tanan, magsugod sa tawo kinsa kataposan nga nahuman ug taposon sa tawo kinsa nahuman og una. Unsa ang gitudlo niini kanato mahitungod kon kinsa ang nagdawat sa mga panalangin sa kinabuhing dayon sa plano sa Langitnong Amahan?
-
Mateo 20:25–28; Marcos 10:42–45.Unsa ang kahulogan sa hugpong sa mga pulong “bisan kinsay gustong maghawod kaninyo, kinahanglan ma-inyo siyang ulipon”? (Mateo 20:27). Sa unsa nga paagi gipanig-ingnan ni Jesukristo kini nga baroganan? Unsaon nato pagsunod sa Iyang ehemplo diha sa atong pamilya, sa atong ward o branch, ug sa atong kasilinganan?
-
Lucas 18:1–14.Unsa ang atong nakat-onan mahitungod sa pag-ampo gikan sa duha ka mga sambingay niini nga mga bersikulo?
Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.
Gisugyot nga awit: “Pinalangga nga mga Anak, ang Dios Duol Kaninyo,” Mga Himno, nu. 50.
Pagpalambo sa Personal nga Pagtuon
Pangita og oras nga maayo alang kanimo. Kasagaran labing sayon ang pagkat-on kon makatuon ka sa mga kasulatan nga dili masamok. Pangita og oras nga maayo alang kanimo, ug buhata ang imong labing maayo sa pagpadayon sa pagtuon niana nga oras sa matag adlaw.
Christ and the Rich Young Ruler [Kristo ug ang Adunahan nga Batan-ong Magmamando], ni Heinrich Hofmann