“Hunyo 12–18. Lucas 22; John 18: ‘Dili ang Akong Pagbuot Maoy Matuman, kondili ang Imo,’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 (2022)

“Hunyo 12–18. Lucas 22; Juan 18,” Dali, Sunod Kanako—Alang sa mga Indibidwal ug mga Pamilya: 2023

Imahe

Kristo ug ang mga disipulo diha sa Getsemani

Gethsemane Grove [Kakahoyan sa Getsemani], ni Derek Hegsted

Hunyo 12–18

Lucas 22; Juan 18

“Dili ang Akong Pagbuot Maoy Matuman, kondili ang Imo”

Ayaw pagdali sa imong pagbasa sa Lucas 22 ug sa Juan 18 niini nga semana. Palandonga ug pag-ampo mahitungod sa unsay imong gibasa. Ang pagbuhat niini makahatag sa Espiritu og oportunidad sa pagpamatuod diha sa imong kasingkasing nga ang mga kasulatan tinuod.

I-rekord ang Imong mga Panghunahuna

Dihay tulo lamang ka mortal nga mga saksi sa pag-antos ni Jesukristo sa Tanaman sa Getsemani—ug nangatulog sila kasagaran niini. Diha niana nga tanaman ug dayon sa krus, gidala ni Jesus diha sa Iyang Kaugalingon ang mga sala, mga kasakit, ug mga pag-antos sa matag tawo kinsa sukad nabuhi, bisan tuod hapit walay usa nga buhi niana nga higayon ang nahibalo kon unsa ang nahitabo. Ang labing importanting mga panghitabo sa kahangtoran sa kasagaran nanglabay nga walay pagtagad sa kalibotan. Apan ang Dios nga Amahan nahibalo. Nadungog Niya ang pangamuyo sa Iyang matinud-anong Anak: “Amahan, kon buot ka, kuhaa kining kopa gikan kanako; hinoon dili ang akong pagbuot, maoy matuman, kondili ang imo. Ug dihay anghel nga mitungha kaniya gikan sa langit sa pagpalig-on kaniya” (Lucas 22:42–43). Bisan wala kita didto sa pagsaksi niining dili hinakog ug manunuton nga buhat, kita mga saksi sa Pag-ula ni Jesukristo. Matag higayon nga kita maghinulsol ug magdawat og kapasayloan sa atong mga sala, matag higayon nga mobati kita sa makalig-on nga gahom sa Manluluwas makapamatuod kita sa pagkatinuod sa unsay nahitabo diha sa Tanaman sa Getsemani.

Imahe

icon sa personal nga pagtuon

Mga Ideya alang sa Personal nga Pagtuon sa Kasulatan

Lucas 22:31–34, 54–62; Juan 18:17–27

Ang pagkakabig usa ka nagpadayon nga proseso.

Hunahunaa ang mga kasinatian ni Pedro uban sa Manluluwas—ang mga milagro nga iyang nasaksihan ug ang doktrina nga iyang nakat-onan. Nganong niana miingon ang Manluluwas ngadto ni Pedro, “Ug sa mahibalik na ikaw, lig-ona ang imong mga igsoon”? (Lucas 22:32). Samtang ikaw mamalandong niini, kini mahimong makatabang sa paghunahuna kon unsa ang gitudlo ni Elder David A. Bednar mahitungod sa kalainan tali sa pagbaton og pagpamatuod ug sa tinud-anay nga nakabig (tan-awa sa “Nakabig ngadto sa Ginoo,” Liahona, Nob. 2012, 106–9).

Samtang ikaw nagbasa mahitungod sa mga kasinatian ni Pedro diha sa Lucas 22:31–34, 54–62 (tan-awa usab sa Juan 18:17–27), hunahunaa ang imong kaugalingong pagkakabig. Mibati ka ba sukad og hilabihan nga pasalig nga, sama ni Pedro, ikaw “andam sa pag-unong [sa Manluluwas], sa bilangoan ug sa kamatayon”? (Lucas 22:33). Nganong kadto nga mga pagbati usahay molubad? Adunay inadlaw nga mga oportunidad sa paglimod o sa pagsaksi sa Manluluwas; unsa ang imong buhaton nga mahimong matag adlaw nga saksi Kaniya? Unsa ang ubang mga leksiyon ang imong makat-onan gikan sa kasinatian ni Pedro?

Samtang ikaw nagpadayon sa pagbasa sa Bag-ong Tugon, pagbantay alang sa ebidensya sa nagpadayong pagkakabig ni Pedro. Bantayi usab ang mga paagi nga siya midawat sa sugo sa Ginoo sa “paglig-on sa imong mga igsoon” (Lucas 22:32; tan-awa sa Mga Buhat 3–4).

Tan-awa usab sa Marcos 14:27–31.

Lucas 22:39–46

Ang Manluluwas miantos alang kanako didto sa Getsemani.

Si Presidente Russell M. Nelson midapit kanato nga “mopundar og panahon sa pagkat-on mahitungod sa Manluluwas ug sa Iyang maulaong sakripisyo” (“Pagdawat sa Gahom ni Jesukristo diha sa Atong Kinabuhi,” Liahona, Mayo 2017, 40).

Hunahunaa kon unsa ang imong buhaton sa pagdawat sa pagdapit ni Presidente Nelson. Mahimong sugdan nimo pinaagi sa mainampoong pagpalandong sa pag-antos sa Manluluwas didto sa Getsemani, ingon nga gihulagway niini nga mga bersikulo, ug sa pagsulat sa mga panghunahuna ug mga pangutana nga moabot sa hunahuna.

Alang sa mas lig-on nga pagtuon bahin sa Manluluwas ug sa Iyang Pag-ula, sulayi ang pagsiksik sa ubang mga kasulatan alang sa mga tubag sa mga pangutana sama niini:

Nganong gikinahanglan ang Pag-ula sa Manluluwas? (Tan-awa sa 2 Nephi 2:5–10, 17–26; 9:5–26; Alma 34:8–16; 42:9–26.)
Unsa ang nasinati sa Manluluwas samtang Siya nag-antos? (Tan-awa sa Isaias 53:3–5; Mosiah 3:7; Alma 7:11–13; Doktrina ug mga Pakigsaad 19:16–19.)
Sa unsa nga paagi nga ang pag-antos ni Kristo nag-apekto sa akong kinabuhi? (Tan-awa sa Juan 10:10–11; Mga Hebreohanon 4:14–16; 1 Juan 1:7; Alma 34:31; Moroni 10:32–33; Dallin H. Oaks, “Nalig- on pinaagi sa Pag- ula ni Jesukristo,” Liahona, Nob. 2015, 61–64.)
Ubang mga pangutana nga ako aduna:

Samtang ikaw nagkat-on mahitungod sa unsa ang nahitabo sa Getsemani, kini mahimong makapaikag nga mahibaloan nga ang Getsemani usa ka tanaman sa mga kahoy nga olibo ug naglakip og pug-anan sa olibo, gamiton sa pagdugmok sa mga olibo ug sa pagkuha og lana nga gamiton alang sa suga ug pagkaon ingon man usab alang sa pagpang-ayo (tan-awa sa Lucas 10:34). Sa unsang paagi nga ang proseso sa pagkuha og lana sa olibo nagsimbolo sa unsay gibuhat sa Manluluwas alang kanato didto sa Getsemani? Alang sa pipila ka mga ideya, tan-awa sa mensahe ni Elder D. Todd Christofferson sa “Magpabilin Kamo sa Akong Gugma” (Liahona, Nob. 2016, 50-51).

Tan-awa usab sa Mateo 26:36–46; Marcos 14:32–42.

Juan 18:28–38

Ang sa Manluluwas nga “pagkahari dili iya niining kalibotana.”

Isip politikal nga lider, si Pontio Pilato pamilyar sa gahom ug mga gingharian niini nga kalibotan. Apan si Jesus namulong kabahin sa usa ka lahi kaayo nga matang sa gingharian. Maghunahuna sa unsay imong nabasa mahitungod sa kinabuhi sa Manluluwas, unsa nga ebidensiya ang imong nakita nga ang Iyang “pagkahari dili iya niining kalibotana”? (Juan 18:36). Nganong importante alang kanimo nga masayod niini? Unsa pa ang importante kanimo mahitungod sa mga pulong ni Jesus ngadto ni Pilato?

Imahe

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Lucas 22:31–32.Unsa kaha ang gibati ni Pedro nga mahibalo nga si Jesus nag-ampo alang kaniya ug sa iyang hugot nga pagtuo? Kinsa ang atong mahimong i-ampo aron, “nga unta dili makabsan ang [ilang] pasalig”? (bersikulo 32).

Lucas 22:39–46.Ang pagkat-on mahitungod sa pag-antos sa Manluluwas didto sa Getsemani mahimong usa ka sagrado nga kasinatian alang sa imong pamilya. Hunahunaa kon unsa ang imong mahimo sa pagmugna og usa ka balaang pagtahod ug mainampoong espiritu samtang ikaw nagtuon sa Lucas 22:39–46. Mahimo kamong magdula o magkanta og dungan sa pipila sa mga kinaham nga mga himno sa imong pamilya o mga awit sa mga bata mahitungod sa Manluluwas. Mahimo ka nga makatan-aw og artwork o makatan-aw og video sama sa “The Savior Suffers in Getsemani” (ChurchofJesusChrist.org). Samtang ikaw magbasa sa mga bersikulo, ang mga sakop sa pamilya makahimo sa pakigbahin og mga tudling nga ilabi ka makahuluganon ngadto kanila––tingali usa ka tudling nga nagtabang kanila sa pagbati sa gugma sa Manluluwas (tan-awa usab sa Mateo 26:36–46; Marcos 14:32–42). Mahimo usab nimong dapiton sila sa pagpakigbahin sa ilang mga pagpamatuod ni Jesukristo ug sa Iyang Pag-ula.

Lucas 22:42.Ang mga sakop sa pamilya mahimong makigbahin og mga kasinatian kon sila nakakat-on sa pagsulti, “Dili ang akong pagbuot, maoy matuman kondili, ang imo.”

Lucas 22:50–51; Juan 18:10–11.Unsa ang atong makat-onan mahitungod ni Jesus gikan niini nga mga bersikulo?

Suffer Ye Thus Far [Nag-antos Ka sa Ingon ka Dugay], ni Walter Rane

Juan 18:37–38.Unsaon nato pagtubag ang pangutana ni Pilato “Kay unsa bay kamatuoran?” (bersikulo 38). Alang sa pipila ka mga ideya, tan-awa sa Juan 8:32; Doktrina ug mga Pakigsaad 84:45; 93:23–28; ug “Sulti, Unsa ang Kamatuoran?,” Mga Himno, nu. 170.

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Ako Nagpabilin nga Natingala,” Mga Himno,, nu. 114.

Pagpalambo sa Personal nga Pagtuon

Tun-i ang mga pulong sa mga propeta ug apostoles sa ulahing mga adlaw. Basaha unsay gitudlo sa mga propeta ug apostoles sa ulahing mga adlaw mahitungod sa mga kamatuoran nga imong makaplagan diha sa mga kasulatan. Pananglit, sa labing bag-ong isyu sa kinatibuk-ang komperensiya sa Liahona, mahimo kang magsiksik sa indeks sa hisgotanan alang sa “Pag-ula” (tan-awa sa Pagtudlo sumala sa Pamaagi sa Manluluwas, 21).