Հուլիսի 31-ից օգոստոսի 6-ը:

Գործք Առաքելոց 22-28

«Պաշտոնեա և վկա»

Տպավորությունները Սուրբ Հոգուց հաճախ հանգիստ են, իսկ երբեմն՝ սրընթաց: Գրի առնելով ձեր տպավորությունները՝ հնարավորություն կունենաք ավելի խորը մտածել դրանց մասին:: Երբ կարդաք Գործք Առաքելոց 22–28-ը, գրի առեք ձեր մտքերն ու զգացմունքները և ժամանակ հատկացրեք՝ դրանց մասին խորհելու համար:

Գրի առեք ձեր տպավորությունները

«Երբ մենք Տիրոջ հանձնարարությունն ենք կատարում,- խոստացել է Նախագահ Թոմաս Ս. Մոնսոնը, - մենք Տիրոջ օգնության իրավունքն ունենք» («Սովորել, կատարել, լինել» Լիահոնա, նոյեմբեր 2008, 62): Այնուամենայնիվ, մենք հարթ ճանապարհի և հաջողությունների անվերջ հոսքի իրավունք չունենք: Ասվածի համար մենք պետք է ապացույցներ փնտրենք ոչ այլ տեղ, քան Պողոս առաքյալից: Փրկիչը նրան հանձնարարել էր. «[Իր] անունը տանել հեթանոսների, թագաւորների՝ եւ Իսրայէլի որդկանց առաջին» (Գործք Առաքելոց 9.15): Գործք Առաքելոց 22–28-րդ գլուխներում մենք տեսնում ենք, որ Պողոսը կատարում է այդ հանձնարարությունը և մեծ ընդդիմության հանդիպում՝ շղթաներ, բանտարկություն, ֆիզիկական բռնություն, նավաբեկություն և նույնիսկ՝ օձի հարձակում: Բայց նաև տեսնում ենք, որ Հիսուսը «կանգնեց նորա մօտ եւ ասեց. Քաջացիր, Պօղոս» (Գործք Առաքելոց 23.11): Պողոսի փորձառությունները ոգեշնչող հիշեցում են, որ Տիրոջ կանչը՝ «հայտարարել [Իր] ավետարանը ցնծության հնչումով», գալիս է հետևյալ խոստումի հետ. «Բարձրացրեք ձեր սրտերը և ուրախացեք, քանզի ես ձեր մեջ եմ» (Վարդապետություն և Ուխտեր 29.4–5, տես նաև Մատթեոս 28.19–20):

Գաղափարներ սուրբ գրությունների անհատական ուսումնասիրության համար

Գործք 22.1–21, 26.1–29

Հիսուս Քրիստոսի աշակերտները համարձակորեն կիսվում են իրենց վկայություններով

Երբ Պողոսը հայտնեց այն հզոր վկայությունները, որոնք գրված են Գործք Առաքելոց 22 և 26-ում, նրան բանտարկեցին հռոմեացի զինվորները: Մարդիկ, ում հետ նա խոսեց, իշխանություն ունեին նրան մահվան դատապարտելու: Սակայն նա որոշեց համարձակորեն վկայություն բերել Հիսուս Քրիստոսի և իր ստացած «երկնային տեսիլքի» մասին (Գործք Առաքելոց 26.19): Ի՞նչն է ոգեշնչում ձեզ նրա խոսքերում: Մտածեք այն հնարավորությունների մասին, որոնք դուք ունեք ձեր վկայությամբ կիսվելու համար: Օրինակ՝ ձեր ընկերները գիտե՞ն, թե դուք ինչպես եք վերաբերվում Հիսուս Քրիստոսին: Կամ օրինակ, երբ եք վերջին անգամ պատմել ձեր ընտանիքին կամ մյուսներին այն մասին, թե ինչպես եք ստացել ձեր վկայությունն ավետարանի մասին:

Երբ երիտասարդ Ջոզեֆ Սմիթին ծաղրում էին իր Առաջին Տեսիլքի մասին պատմելու համար, նա ոգեշնչվեց այն բանից, թե ինչպես էր Պողոսը վկայում իր տեսիլքի մասին (տես Ջոզեֆ Սմիթ-Պատմություն 1.24–25): Ինչպե՞ս կամփոփեք այն, ինչ Ջոզեֆ Սմիթը սովորեց Պողոսից: Ի՞նչ եք սովորում Հիսուս Քրիստոսի այս երկու վկաներից:

Տես նաև Նիլ Լ. Անդերսեն, «Մենք խոսում ենք Քրիստոսի մասին», Լիահոնա, նոյեմբեր 2020, 88–91:

Գործք Առաքելոց 23.10–11, 27.13–25, 40–44

Տերը կանգնում է նրանց կողքին, ովքեր ձգտում են ծառայել Իրեն

Ինչպես Պողոսի ծառայությունն է հստակ ցույց տալիս, դժվարությունները մեր կյանքում չեն նշանակում, որ Աստված հավանություն չի տալիս այն աշխատանքին, որը մենք կատարում ենք: Փաստորեն, երբեմն դժվարությունների ժամանակ է, երբ մենք Նրա աջակցությունն ամենաշատն ենք զգում: Հետաքրքիր կլինի վերանայել այն, ինչ վերջերս կարդացել եք Պողոսի ծառայության մասին և թվել մի քանի բաներ, որոնց նա դիմացավ (տես օրինակ՝ Գործք Առաքելոց 14.19–20, 16.19–27, 21.31–34, 23.10–11, 27.13–25, 40–44): Տերը ինչպե՞ս կանգնեց նրա կողքին: Ինչպե՞ս է Նա կանգնել ձեր կողքին:

Գործք Առաքելոց 24.24-27, 26․1-3, 24-29, 27

Աստծո ծառաների խոսքերին ականջ դնելով՝ մենք ձեռք ենք բերում ապահովություն և խաղաղություն

Իր ամբողջ ծառայության ընթացքում Պողոսը հզոր վկայություն բերեց Հիսուս Քրիստոսի և Նրա ավետարանի մասին։ Շատ մարդիկ ընդունեցին նրա վկայությունը, բայց ոչ բոլորն արեցին դա: Երբ կարդաք Գործք Առաքելոց 24.24–27 և Գործք Առաքելոց 26.1–3, 24–29-ը, գտեք խոսքեր և արտահայտություններ, որոնք ցույց են տալիս, թե ինչպես հռոմեացի հետևյալ կառավարիչները Հուդայում արձագանքեցին Պողոսի ուսմունքներին.

• Փելիքս

• Փեստոս

• Ագրիպպաս թագավոր

Կայսեր կողմից դատվելու համար դեպի Հռոմ նավարկելիս Պողոսը մարգարեացավ, որ այն «նեղութիւնով և շատ վնասով է լինելու» նավի և ուղևորների համար (Գործք Առաքելոց 27.10): Կարդացեք գլուխ 27-ը՝ պարզելով, թե Պողոսի նավակիցներն ինչպես արձագանքեցին նրա նախազգուշացմանը: Նրանց փորձառության մեջ արդյո՞ք գտաք որևէ դաս ձեզ համար:

Արդյո՞ք երբևէ արձագանքել եք այդ մարդկանցից որևէ մեկի նման, երբ լսել եք Եկեղեցու առաջնորդների ուսուցումները: Որո՞նք են այս ձևով արձագանքելու մի քանի հնարավոր հետևանքները: Ի՞նչ եք սովորում Իր ծառաների միջոցով տրված Տիրոջ խորհրդին ականջ դնելու պատմություններից:

Տես նաև 2 Նեփի 33.1–2, Դ. Թոդ Քրիստոֆերսոն, «Նախազգուշացնող ձայնը», Լիահոնա, մայիս 2017, 108–11, «Հետևեք ապրող մարգարեին», Եկեղեցու նախագահների ուսմունքները. Էզրա Թավտ Բենսոն (2014), 147–55:

Գաղափարներ սուրբ գրությունների ընտանեկան ուսումնասիրության և ընտանեկան երեկոյի համար

Գործք Առաքելոց 24.16Նախքան իր դարձը, Պողոսը Աստծո հանդեպ հանցանքների երկար պատմություն ուներ: Բայց քանի որ նա կամենում էր ապաշխարել, կարողացավ ասել. «Հենց սորա համար ինքս ջանք եմ անում, որ ամեն ժամ [հանցանքներից] մաքուր խղճմտանք ունենամ Աստուծոյ առաջին եւ մարդկանց առաջին» (տես նաև Վարդապետություն և Ուխտեր 135.4-5): Ինչպե՞ս կարող ենք մեր խիղճը զերծ պահել Աստծո և մյուսների հանդեպ հանցանքներից:

Գործք Առաքելոց 26.16–18Այս հատվածներում Տերն ինչի՞ համար կանչեց Պողոսին: Մենք ի՞նչ հնարավորություններ ունենք նմանատիպ գործեր կատարելու համար:

Գործք Առաքելոց 28.1–9Ձեր ընտանիքից որևէ մեկը սիրո՞ւմ է օձեր: Խնդրեք նրան կամ ընտանիքի որևէ այլ անդամի պատմել պատմությունները, որոնք գտնվում են Գործք Առաքելոց 28.1–9-ում: Ձեր երեխաները կարող են բավականություն ստանալ՝ նկարելով այս պատմությունները կամ դերակատարելով դրանք: Ի՞նչ դասեր կարող ենք սովորել այդ պատմություններից: Դրանցից մեկը կարող է լինել այն, որ Տերը կատարում է Իր ծառաներին տված խոստումները: Օրինակ՝ դուք կարող եք համեմատել Մարկոս 16.18-ում տրված խոստումները՝ Պողոսի փորձառություններում դրանց իրականացման հետ: Դուք գուցե նաև գտնեք վերջին գերագույն համաժողովի որևէ ելույթ՝ մի խոստում, որը տվել է Տիրոջ ծառաներից մեկը, և որը հավանաբար իմաստալի է ձեր ընտանիքի համար, և ցուցադրեք այն ձեր տանը: Ինչպե՞ս կարող ենք ցույց տալ մեր հավատքը առ այն, որ այդ խոստումը կկատարվի:

Աստված պաշտպանեց Պողոսին, երբ թունավոր օձը խայթեց նրան:

Գործք Առաքելոց 28.22–24.Ինչպես Եկեղեցին Պողոսի օրերում (կոչվում էր «աղանդ» հատված 22), այսօր ևս Եկեղեցուն հաճախ «դեմ են խոսում»: Ինչպե՞ս արձագանքեց Պողոսը, երբ մարդիկ դեմ խոսեցին Փրկիչին և Նրա Եկեղեցուն: Ի՞նչ կարող ենք սովորել Պողոսի փորձառությունից:

Երեխաներին ուսուցանելու լրացուցիչ գաղափարների համար տես այս շաբաթվա համառոտ շարադրանքը Եկ, հետևիր ինձ. Երեխաների միության համար բաժնից:

Առաջարկվող երգ. «Գիտեմ, ապրում է Փրկիչն իմ», Հիմներ և մանկական երգեր, հմր. 38։

Բարելավենք մեր ուսուցումը

Կենտրոնացեք սկզբունքների վրա, որոնք կօրհնեն ձեր ընտանիքը: Սուրբ գրություններն ուսումնասիրելիս հարցրեք ինքներդ ձեզ. «Ի՞նչ կա այստեղ, որը հատկապես իմաստալի կլինի իմ ընտանիքի համար»: (Տես «Ուսուցանել Փրկիչի ձևով», 17:)

Պողոսը Ագրիպպաս թագավորի առջև: Քաջարի լինենք Հիսուս Քրիստոսի վկայության մեջ, Դանիել Ա. Լյուիս