O Paulo o loo tusia se tusi

7–13 Aokuso

Roma 1–6

“O Le Mana Lava Lea o le Atua e Ola Ai”

O le tusifaamaumauina o musumusuga o le a fesoasoani e te manatua ai mea o loo a‘oa‘oina ai oe e le Agaga. Mafaufau foi e tusi ou lagona e uiga i nei musumusuga.

Tusifaamaumau Ou Lagona Uunai

E oo ane i le taimi sa tusi ai e Paulo le Tusi i tagata o le Ekalesia i Roma, o e sa o se vaega matua‘i eseese lava o tagata Iutaia ma Nuuese, ua matua‘i faatupula‘ia le Ekalesia a Iesu Keriso mai se vaega to‘alaiti o tagata faatuatua mai Kalilaia. Pe a ma le 20 tausaga talu ona mavae le Toetu o le Faaola, sa i ai aulotu Kerisiano i le toetoe o mea uma sa mafai ona femalagaai ai le au Aposetolo—e aofia ai Roma, le laumua o se malo tele lava. Ae, a faatusatusa i le tele o le malo o Roma, sa laitiiti lava le Ekalesia ma sa masani ona fai ma autu o sauaga. I tulaga faapena, atonu e lagona ai e ni isi le “ma i le talalelei a Keriso”—ae, o le mea sa’o, sa le faapena Paulo. Sa ia iloa ma molimau atu o le mana moni, “o le mana lava lea o le Atua e ola ai,” e maua i le talalelei a Iesu Keriso (Roma 1:16).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

O a Tusi, ma o faapefea ona faatulagaina i latou?

O Tusi o tusi ia sa tusia e taitai o le Ekalesia i le Au Paia i vaega eseese o le lalolagi. Sa tusia e le Aposetolo o Paulo le tele o tusi i le Feagaiga Fou—e amata i le Roma ae faaiu i le Eperu. O ana tusi ua faatulagaina i le uumi, vagana ai le Eperu (tagai Bible Dictionary, “Pauline Epistles”). E ui o le [tusi] a Roma o le tusi muamua i le Feagaiga Fou, ae o le mea moni sa tusia i le latalata i le faaiuga o malaga faafaifeautalai a Paulo.

Roma 1–6

“E ola le tagata amiotonu i le faatuatua.”

O faauigaga nei e mafai ona fesoasoani ia e malamalama lelei ai i le Tusi i Roma:

O le tulafono.Ina ua tusi Paulo e uiga “i le tulafono,” sa ia faatatau atu i le tulafono a Mose. O le upu “galuega” i tusitusiga a Paulo e faatatau i faatinoga i fafo e o faatasi ma le tulafono a Mose. Mafaufau pe faapefea ona ese le tulafono a Mose ma galuega na manaomia ai mai “le tulafono o le faatuatua” o loo faamatalaina i le Roma 3:23–31.

Peritomeina, le peritomeina.I aso anamua, o le peritomeina sa o se faailoga po o se faatusa o le feagaiga na osia e le Atua ma Aperaamo. Sa faaaoga e Paulo le upu “peritomeina” e faatatau atu ai i tagata Iutaia (o tagata o le feagaiga) ma le “le peritomeina” e faatatau ai i tagata o Nuuese. Mafaufau loloto i mea ua aoao mai i le Roma 2:25–29 e faatatau i le uiga moni o le avea ma tagata o le feagaiga a le Atua. Ia maitau, ua le toe avea le peritomeina ma se faailoga o le feagaiga a le Atua ma Lona nuu (tagai Galuega 15:23–29).

Tauamiotonuina, Tauamiotonu.O upu nei e faasino i le faamagaloina po o le faamagaloga o agasala. Pe a tauamiotonuina i tatou, ua faamagaloina i tatou, folafola atu le le sala, ma faasaoloto mai faasalaga e faavavau mo a tatou agasala. A e vaai i nei upu, ia maitau mea na aoao atu e Paulo i le mea e mafaia ai le tauamiotonuina (tagai foi Taiala i Tusitusiga Paia, “Tauamiotonuina, Tauamiotonu,” scriptures.ChurchofJesusChrist.org; D.Todd Christofferson, “Justification and Sanctification,” Ensign, Iuni 2001, 18–25). I le Roma, o upu e pei o le “amiotonu” ma le “amiosao” e mafai ona vaaia o ni upu uiga tutusa mo upu e pei o le “tonu” ma le “tauamiotonuina”.

AlofatunoaO le alofa tunoa o le “fesoasoani po o le malosi faalelagi, e tuuina mai e ala i le alofa mutimutivale ma le alofa tele o Iesu Keriso.” E ala mai i le alofa tunoa, o le a toetutu ai tagata uma ma maua le tino ola pea. E faapena foi, o le “alofatunoa, o se mana gafatia lea e mafai ai e alii ma tamaitai ona maua le ola e faavavau ma le faaeaga pe a uma ona faia a latou lava taumafaiga silisili.” Tatou te le maua le alofa tunoa e ala i a tatou taumafaiga; nai lo o lena, o le alofa tunoa lea e aumaia ia i tatou le “malosi ma le fesoasoani e fai ai galuega lelei lea semanu [tatou] te le mafai ona faatumauina” (Bible Dictionary, “Grace”; tagai foi 2 Nifae 25:23; Dieter F. Uchtdorf, “O Le Meaalofa o le Alofatunoa,” Liahona, Me 2015, 107–10; Brad Wilcox, “Ua Lava Lona Alofatunoa,” Liahona, Sete. 2013, 43–45). A o e faitau i le Roma, mafaufau e tusifaamaumau mea ua e iloa e uiga i le alofatunoa.

Roma 2:17–29

O a’u faatinoga e tatau ona atagia ai ma faateleina ai lo’u liua.

O nisi o tagata Kerisiano Iutaia i Roma sa talitonu pea o sauniga ma faatulagaga o le tulafono a Mose e aumai ai le olataga. E foliga mai o lenei mea o se faafitauli e le o toe faatatau i ai talu ai tatou te le o ola i le tulafono a Mose. Ae a o e faitau i tusitusiga a Paulo, ae maise lava i le Roma 2:17–29, mafaufau i a oe lava taumafaiga e ola i le talalelei. Pe o au faatinoga i fafo, e pei o le tagofia o le faamanatuga po o le auai i le malumalu, o faalolotoina ai lou liua ma faamalosia ai o lou faatuatua ia Keriso? (tagai Alema 25:15–16). E i ai se mea e tatau ona e suia ina ia taitai atu ai au faatinoga i fafo i se suiga o le loto?

Tagai foi Dallin H. Oaks, “O Le Luitau ia Avea ma se Tasi,” Ensign, Nov. 2000, 32–34.

Roma 3:10–31; 5

E mafai ona faamagaloina a’u i a’u agasala e ala ia Iesu Keriso.

E mafai ona lagona e nisi o tagata le lotovaivai i le tautinoga lototoa a Paulo e faapea “e leai se amiotonu, e leai lava se tasi” (Roma 3:10). Ae o loo i ai foi savali o le faamoemoe i le Roma. Vaavaai mo ia [savali] i le mataupu 3 ma le5, ma mafaufau pe aisea ua avea ai le “ua agasala tagata uma lava, ma ua le oo i le viiga mai le Atua” (Roma 3:23) o se laasaga taua agai atu i le aoao ia “mitamita … ma le faamoemoe” e ala ia Iesu Keriso (Roma 5:2).

Roma 6

Ua valaaulia a’u e Iesu Keriso ia “savali i le ola toefuataiina.”

Na aoao mai Paulo o le talalelei a Iesu Keriso e tatau ona suia le auala o tatou ola ai. O a ni faamatalaga i le Roma 6 o faamatalaina ai le ala na fesoasoani ai le mulimuli i le Faaola ia e “savali i le ola toefuataiina”? (fuaiupu 4).

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Roma 1:16–17.E mafai faapefea ona tatou faaalia tatou te “le ma i le talalelei ia Keriso”?

Roma 3:23–28.A o e faitau i nei fuaiupu , atonu tou te talanoaina le eseesega i le va o le “manumalo” i le alofatunoa o le Atua, lea e le mafai ona tatou faia, ma le mauaina, lea e ao ona tatou faia. O le a se taimi na tatou lagonaina ai le alofatunoa o le Atua? E mafai faapefea ona tatou mauaina atoa?

Roma 5:3–5.O a ni puapuaga ua tatou oo i ai? O faapefea ona fesoasoani nei puapuaga ia tatou atinae ai le onosai, potomasani, ma le faamoemoe?

Roma 6:3–6.O le a le tala a Paulo i nei fuaiupu e uiga i le faafaatusa o le papatisoga? Atonu e mafai ona fuafua lou aiga e auai i se papatisoga o loo loma. Pe e mafai e se tagata o lou aiga ona faasoa mai ni ata po o ni mea e manatua mai lona papatisoga. E faapefea ona fesoasoani le osia ma le tausia o a tatou feagaiga o le papatisoga ia tatou “savali i le ola toefuataina”?

o se alii o loo papatisoina le isi alii i se vaituloto

O le papatisoga ua faatusa i le amataga o se olaga fou o se soo o Keriso.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Pe A Ou Papatiso” Tusipese a Tamaiti, 53.

Faaleleia o Suesuega Faaletagata Lava ia

Fai fesili a o e suesue. A o e suesue i mau, e mafai ona oo atu fesili i lou mafaufau. Manatunatu loloto i nei fesili ma vaavaai mo tali. Mo se faataitaiga, i le Roma 1–6 e mafai ona e vaavaai mo tali i le fesili “O le a le alofatunoa?”

Keriso o loo siia’e se teineitiiti mai se alia

Ia Aua le Fefe, saunia e Greg K. Olsen