4–10 Septemba. Fas Korin 14–16: ‘From we God I No Stamba blong Fasin Ya we Olgeta Samting Oli Paspas, Hem I Stamba blong Pis,’” Kam Folem Mi—Blong Wanwan Man, Woman mo Famli: Niu Testeman 2023 (2022)
“4–10 Septemba. Fas Korin 14–16,” Kam Folem Mi—Blong Wanwan Man, Woman mo Famli: 2023
4–10 Septemba
Fas Korin 14–16
“From we God I No Stamba blong Fasin Ya we Olgeta Samting Oli Paspas, Hem I Stamba blong Pis”
Raetemdaon ol filing mo ol tingting blong yu taem yu stap ridim 1 Korin 14–16. Prea abaot wanem we Spirit i bin tijim yu long hem, mo askem Papa long Heven sapos i gat moa samting we Hem i wantem yu yu lanem.
Raetemdaon Ol Filing mo Tingting blong Yu
From se Jos mo ol doktrin blong hem oli niu long olgeta long Korin, hem i stret blong luk se Ol Sent long Korin oli konfius smol. Pol i bin tijim olgeta bifo stamba trutok blong gospel ia: “Kraes i ded blong tekemaot ol sin blong yumi, … Olgeta oli berem hem. Mo long nambatri dei blong hem, hem i laef bakegen” (1 Korin 15:3–4). Be i no longtaem afta, sam memba oli stat blong tijim se “ol dedman oli no save laef bakegen” (1 Korin 15:12). Pol i plis long olgeta blong oli tingbaot ol trutok we oli bin tijim long olgeta (1 Korin 15:2). Taem we yumi fesem ol defren kaen tingting we oli no agri long saed blong ol trutok blong gospel, hem i gud blong tingbaot se “God i no stamba blong fasin ya we olgeta samting oli paspas, hem i stamba blong pis” (1 Korin 14:33). Taem yumi stap lisin long ol wokman blong Lod we Hem i jusum olgeta, mo taem yumi stap holemtaet ol simpol trutok we oli stap ripit blong tij, bae oli save helpem yumi blong faenem pis, mo “stanap strong long bilif” (1 Korin 16:13).
Sam Aedia blong Skripja Stadi blong Yuwan
Mi save lukaotem presen ia we blong talem profesi.
?Wanem hem i presen ia blong talem profesi? ?Hem i jes blong save talem wanem bae i kam long fiuja? ?Hem i blong ol profet nomo? ?O eniwan nomo i save kasem presen ia?
Tingting hevi long ol kwestin ia taem yu stap stadi long 1 Korin 14:3, 31, 39–40. Mo tu, yu save ridim Revelesen 19:10 mo “Profesi, Talem Profesi” insaed long Gaed long Ol Skripja (olskripja.ChurchofJesusChrist.org). Folem wanem we yu lanem, ?bae yu talem se presen ia blong talem profesi, hem i olsem wanem”? ?Wanem nao Pol i minim taem hem i invaetem Ol Man Korin blong “putum tingting blong [olgeta] i stap long paoa ya blong talemaot ol tok we God i givim”? (1 Korin 14:39). ?Olsem wanem nao yu save akseptem invitesen ia?
Luk tu long Joel 2:28–29; Alma 17:3; Doktrin mo Ol Kavenan 11:23–28.
?Olsem wanem toktok ia abaot ol woman, insaed long ol ves ia, i blong yusum tu tedei?
Long taem blong Pol, nara tingting i stap long wei we ol woman oli tekpat long sosaeti, mo tu, insaed long ol miting blong Jos. Nomata wanem nao mining blong ol tijing we oli stap long 1 Korin 14:34–35 long taem blong Pol, yumi no mas andastanem se ol woman oli no save toktok mo no save lidim wok insaed long Jos tedei (luk long Joseph Smith Translation, [insaed long 1 Corinthians 14:34, futnot b]). Presiden Russell M. Nelson i bin talem long ol woman blong Jos tedei: “Mifala i nidim paoa, jenis blong hat, strong tingting, mo paoa blong save lidim man, waes tingting mo voes blong yufala. Kingdom blong God i no, mo i no save fulwan sapos i no gat ol woman we oli mekem ol tabu kavenan, mo afta, stap kipim olgeta; !ol woman we oli save toktok wetem paoa mo atoriti blong God! “Mi Plis long Ol Sista blong Mi,” Jeneral Konfrens, Oktoba 2015, ChurchofJesusChrist.org/general-conference/conferences?lang=bis.
Jisas Kraes i kasem viktri mo i winim ded.
Laef Bakegen long Ded blong Jisas Kraes, i stamba blong Kristin fasin, mo wan i save talem se, sapos i no gat hemia, nao i no gat Kristin fasin—blong yusum ol toktok blong Pol: “hemia i min se mifala i stap talemaot gud nius ya, be blong nating nomo, mo yufala i stap bilif, be blong nating nomo tu” (1 Korin 15:14). Be yet, sam long Ol Sent long Korin oli bin stap tijim se bae “ol dedman oli no save laef bakegen” (1 Korin 15:12). Taem yu stap ridim ansa long Pol long 1 Korin 15, tekem wan smol taem blong tingting se, bae laef blong yu bae i defren long wanem wei sapos yu no biliv long Laef Bakegen long Ded (luk long 2 Nifae 9:6–19; Alma 40:19–23; Doktrin mo Ol Kavenan 93:33–34). Sentens ia: “Mo sapos hem i no laef bakegen, hemia i min se yufala i bilif blong nating,” ?hem i minim wanem long yu? (ves 17).
Hem i gud tu blong teknot se Pol i tokbaot baptaes long bihaf blong ol dedman olsem wan pruf se fasin blong laef bakegen long ded, i wan tru samting (luk long 1 Korin 15:29). ?Olsem wanem nao tempol mo famli histri wok i mekem fet blong yu long doktrin ia blong fasin blong laef bakegen long ded, i kam strong moa?
Luk tu long Doktrin mo Ol Kavenan 138:11–37.
Ol bodi we oli laef bakegen long ded oli defren long ol bodi we oli save ded.
?Yu yu askem yuwan finis se wan bodi we i laef bakegen long ded i luk olsem wanem? Folem wanem we i stap long 1 Korin 15:35, sam long Ol Man Korin oli bin stap askem sem samting long olgetawan bakegen. Ridim ansa blong Pol long ol ves 36–54, mo raetemdaon ol toktok mo ol sentens we oli tokbaot ol samting we oli defren bitwin ol bodi we oli save ded mo ol bodi we oli laef bakegen long ded. Taem yu stap mekem olsem, yu save komperem ol ves 40–42 wetem Doktrin mo Ol Kavenan 76:50–112. ?Wanem moa andastaning nao revelesen ia we i go long Profet Josef Smit i givim long yu? (luk tu long Joseph Smith Translation, 1 Corinthians 15:40 [insaed long 1 Corinthians 15:40, footnote a]). ?From wanem ol trutok ia oli impoten tumas long yu?
Luk tu long Luk 24:39; Alma 11:43–45; Doktrin mo Ol Kavenan 88:14–33.
I gat wan glori blong san nomo (1 Korin 15:41).
Ol Aedia blong Famli Skripja Stadi mo Haos Naet
-
1 Korin 15:29.Yumi lanem aot long ves 29 se Ol Kristin Man bifo oli bin tekpat long ol baptaes long bihaf blong ol dedman, semmak olsem we yumi stap mekem tedei. ?Olsem wanem nao yumi stap eksplenem long ol narawan from wanem yumi kasem baptaes long bihaf blong ol bubu blong yumi? (luk long “What Are Baptisms for the Dead?,” [vidio], ChurchofJesusChrist.org). ?Wanem nao yumi stap mekem olsem wan famli blong givim ol tempol odinens long ol bubu blong yumi we oli ded finis, we oli nidim ol odinens ia? Yu save faenem moa risos long saed blong topik ia, long Inglis, long atikol ia anda long Gospel Topics, “Baptisms for the Dead” (topics.ChurchofJesusChrist.org) mo long FamilySearch.org.
-
1 Korin 15:35–54.?Wanem samting o pikja nao yu save soem blong helpem famli blong yu i andastanem sam long ol toktok ia we Pol i yusum blong tokbaot ol bodi we oli save ded, se oli defren long ol bodi we oli laef bakegen long ded? Eksampol, blong soem wanem i defren bitwin i save ded mo nomo ded (luk long ol ves 52–54) yu save soem wan aean we i rosta, mo wan aean we i no save rosta. O, yu yu save komperem wan samting we i no strong long wan samting we i gat paoa (luk long ves 43).
-
1 Korin 15:55–57.Sapos yufala i gat wan toktok storian abaot ol ves ia, bae i gat mining sapos famli blong yu i save wan we i ded finis. Ol memba blong famli oli save serem testemoni blong olgeta long wei we Jisas Kraes i tekemaot paoa blong ded (ves 56).
-
1 Korin 16:13.Blong helpem ol memba blong famli oli luksave olgeta insaed long ves ia, yu save droem wan sekol long graon, mo talem long wanwan memba blong famli blong “stanap strong” insaed long sekol ia, mo semtaem i sarem ol ae blong hem. Nao ol narawan oli save traem blong pusum o pulum hem i kam aotsaed long sekol ia. ?Wanem samting i defren taem wan insaed long sekol i openem ae blong hem i stap, mo i save “lukaot”? ?Wanem nao yumi save mekem blong “stanap strong” taem yumi fesem temtesen blong mekem ol nogud joes? (luk tu long “Stay in the Boat and Hold On!,” [vidio], ChurchofJesusChrist.org).
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “He Is Risen!,” Hymns, namba 199.
Stap Kam Antap long Stadi blong Yuwan
Lukaotem sam paten we i stap. Long ol skripja, yumi faenem ol paten we i soem olsem wanem Lod i stap mekem wok blong Hem. ?Wanem paten nao yu yu faenem insaed long 1 Korin 14 we i helpem yumi blong andastanem olsem wanem blong leftemap wanwan long yumi?
From Wanem Nao Yu Yu Krae, © Simon Dewey 2021. Oli yusum wetem raet we i kam long Altus Fine Art/www.altusfineart.com