28 Ogis–3 Septemba

Fas Korin 8–13

“Yufala I Bodi blong Kraes”

Taem yu stap prea mo rid long 1 Korin 8–13, bae Tabu Spirit i save toktok long yu long ol spesel kwaet wei (luk long 1 King 19:11–12). Taem yu stap raetemdaon ol filing mo tingting blong yu, bae i helpem yu blong tingbaot bakegen ol filing mo ol tingting we yu bin gat long taem blong stadi blong yu.

Raetemdaon Ol Filing mo Tingting blong Yu

Long taem blong Pol, Korin i kam wan rij ples blong mekem bisnis wetem ol man we oli kam long evri ples we Rom i rul long hem. Wetem plante defren kalja mo relijin long taon, ol memba blong Jos long Korin oli bin gat hadtaem blong holemtaet yuniti, mekem se Pol i askem blong helpem olgeta blong oli faenem yuniti long bilif blong olgeta long Kraes. Yuniti ia, i moa bitim blong jes gat pis tugeta; Pol i no bin stap askem olgeta blong akseptem nomo ol samting we oli defren bitwin olgeta. Be, hem i tijim se, taem yu joenem Jos Ia blong Jisas Kraes, yu baptaes, yu “olsem wan bodi nomo,” mo oli nidim evri pat blong bodi (1 Korin 12:13). Taem wan memba i lus, i olsem blong lusum wan pat blong bodi, mo bodi i no strong tumas long en. Taem wan memba i safa, yumi evriwan i sapos blong filim hemia, mo mas mekem pat blong yumi blong givhan. Wetem kaen yuniti ia, ol samting we oli defren long yumi, bae yumi jes no luksave nomo, be tu, yumi holemtaet, from se, sapos i no gat ol memba we oli kam wetem ol defren presen mo save blong mekem samting, bae bodi ia i no save mekem tumas samting. Mekem se, i nomata se yu filim se yu stap long hom insaed long Jos, o yu faenem we yu stap askem yuwan se, i tru se yu yu pat, nao mesej blong Pol long yu i we yuniti i no minim se yumi semsemmak. Yu nidim ol nara Sent, mo ol nara Sent oli nidim yu.

Sam Aedia blong Skripja Stadi blong Yuwan

1 Korin 10:1–13

God i givim wan wei blong ronwe long temtesen.

Ol eksperiens, long saed blong spirit, iven olgeta we oli ol merikel, oli no mekem se bae yumi no save kasem temtesen we oli “semmak nomo long ol samting we oli stap traem ol narafala man” (1 Korin 10:13). Maet hemia i wan risen from wanem Pol i bin raet abaot wei we Ol Man Isrel, long taem blong Moses, oli bin gat hadtaem wetem temtesen, iven we oli bin witnesem ol bigfala merikel (luk long Eksodas 13:21; 14:13–31). Taem yu stap ridim 1 Korin 10:1–13, ?wanem woning nao, long ol eksperiens blong Ol Man Isrel, i blong yu tu? ?Wanem rod blong “ronwe” long ol temtesen nao, Papa long Heven i givim long yu? (luk tu long Alma 13:27–30; 3 Nifae 18:18–19).

1 Korin 10:16–17; 11:16–30

Sakramen i stap yunaetem yumi, olsem memba blong Jos Ia blong Kraes.

Nomata we, insaed long sakramen, wanwan i mas mekem wan komitmen wetem Lod, hem i wan eksperiens tu blong serem wetem ol narawan. Plante taem, yumi stap tugeta mo tekem mo kaekae sakramen; yumi mekem hemia olsem wan bodi blong Ol Sent. Ridim wanem we Pol i bin tijim abaot sakramen, mo tingbaot olsem wanem tabu odinens ia i save helpem plante blong kam wan long Kraes (1 Korin 10:17). ?Olsem wanem nao, blong stap tekem mo kaekae sakramen, i helpem yu blong filim kolosap moa long Kraes mo ol nara man we oli biliv? ?Olsem wanem nao ol ves ia oli lidim ol tingting blong yu abaot sakramen, mo wei we yu stap rere from?

1 Korin 11:11

Long plan ia blong God, ol man mo ol woman oli nidim wanwan long olgeta.

Long 1 Korin 11:4–15, Pol i bin tokbaot ol kastom blong ol kalja we yumi no stap folem tedei. Be, Pol i tijim tu wan impoten trutok we i stap wetem yumi blong taem we i no save finis, we i stap long ves 11. Long tingting blong yu, ?ves ia i minim wanem, mo from wanem nao hem i impoten? Elda David A. Bednar i tijim: “Man mo woman, tufala i stap blong tufala i lanlanem samting aot long tufala, blong tufala i mekmekem tufala i kam strong moa, blong tufala i blesblesem wanwan long tufala, mo tufala i komplitim tufala” (“Mifala I Biliv blong Stap Klin,” Jeneral Konfrens, Mei 2013, ChurchofJesusChrist.org/general-conference/conferences?lang=bis). ?Olsem wanem nao trutok ia i sapos blong lidim wan mared laef? ?Olsem wanem nao bae i jenisim wei we yumi givim seves insaed long Jos?

Luk tu long Jean B. Bingham, “Yumi Wan blong Mekem Wok blong God I Kamtru,” Liahona, Mei 2020, 60–63.

1 Korin 12–13

Oli givim oli ol presen long saed blong spirit blong gud blong evriwan long ol pikinini blong Papa long Heven.

Lis blong ol presen long saed blong spirit we i stap long 1 Korin 12–13 i no finis long ples ia. Be, hem i wan gudfala ples blong stat wetem taem yu stap faenemaot mo tingting hevi long ol presen long saed blong spirit we Papa long Heven i bin givim long yu. Atikol ia long Inglis, we i stap long “Spiritual Gifts” insaed long Gospel Topics (topics.ChurchofJesusChrist.org) i save helpem yu blong andastanem ol presen ia long wan moa gud wei. Taem yu stap ridim lis blong ol presen we Pol i raetem, maet bae yu ademap sam we yu luk long ol narawan, long yuwan, o long ol pipol insaed long ol skripja. Sapos yu bin kasem petriakel blesing blong yu, maet bae i tokbaot sam long ol presen blong yu long saed blong spirit. ?Olsem wanem ol presen ia oli helpem yu blong blesem ol narawan? Tingting long wanem wei nao, bae yu save kasem “ol paoa ya we oli gudfala moa” (1 Korin 12:31).

Luk tu long 1 Korin 14; Moronae 10:8–21, 30; Doktrin mo Ol Kavenan 46:8–26; Ol Toktok blong Bilif 1:7.

Ol Aedia blong Famli Skripja Stadi mo Haos Naet

1 Korin 9:24–27.From se Pol i bin komperem fasin blong stap laef folem gospel long fasin blong stap resis, yu save mekem wan famli i resis blong i soemaot poen ia. Givim wan hat blong king long evriwan we i finisim resis ia, mo toktok raon long wei we evriwan we oli wok strong wetem strong tingting blong stap folem Jisas Kraes long laef ia, bae oli winim praes ia we i “no save lus samtaem” (1 Korin 9:25; luk tu long 2 Timoti 4:7–8). ?Wanem nao wan man blong resis i mekem blong i rere blong resis? ?Wanem nao yumi save mekem blong rere blong gobak long Papa long Heven?

Pol i komperem fasin blong stap laef folem gospel long fasin blong ron long wan resis.

1 Korin 12:1–11.Afta we yufala i ridim ol ves ia tugeta, tingting blong givim wan pis pepa long evriwan, wetem nem blong wan nara memba blong famli i stap long top. Askem evriwan blong mekem wan lis blong ol presen long saed blong spirit we oli luk se man o woman ia i gat. Afta, yu save pasem ol pepa ia long wan sekol, kasem taem we evriwan i gat wan jenis blong raet abaot presen blong wanwan memba blong famli.

1 Korin 12:3.?From wanem i nid blong gat Tabu Spirit blong kasem wan testemoni abaot Jisas Kraes? ?Wanem nao yumi save mekem blong invaetem Tabu Spirit blong i mekem testemoni blong yumi abaot Hem i kam strong moa?

1 Korin 12:12–27.Analoji blong Pol, bae i wan gudfala wei blong toktok raon long yuniti blong famli. Eksampol: ol memba blong famli oli save traem blong droem wan bodi we oli mekem wetem ae o sora (luk long ves 17). ?Wanem nao ol ves ia oli stap talem abaot hao yumi sapos blong tritim olsem ol memba blong famli?

1 Korin 13:4–8.Mining blong Pol abaot jareti i save givim wan moto we i gat insperesen, blong famli blong yufala. Yu save givim wok long wanwan blong famli blong stadi long wan sentens insaed long ol ves 4–8 mo tijim nara haf blong famli long wanem nao i minim blong yusum ol mining, ol eksampol, mo ol eksperiens we i blong yumi nomo. ?Olsem wanem nao Sevya i eksampol blong ol kwaliti ia? Yu save mekem ol posta tugeta, blong wanwan long ol ples ia !Krietem niu samting!

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Love Is Spoken Here,” Children’s Songbook, 190–91.

Stap Kam Antap long Fasin blong Yumi blong Stap Tij

Hangem wan skripja i stap. Jusum wan ves we yu luk se i gat mining long yu, mo raetem mo hangem long wan ples we ol memba blong famli bae oli luk plante taem. Invaetem ol nara memba blong famli blong oli gat wanwan taem blong jusum wan skripja blong hangem.

“Bred we yumi tekem, i no komuniong ia, o yumi no joen wetem bodi ia blong Kraes? “Oltaem yumi tekem wan bred nomo, mo yumi evriwan i kakae bred ia, mo from samting ya, nating we yumi plante, be yumi evriwan i olsem wan bodi nomo.” (1 Korin 10:16–17).