“21–27 Ogis, Fas Korin 1–7: ‘Yufala I Mas Joen Gud we Yufala I Gat Wan Tingting Nomo, mo we Fasin blong Yufala I Wan Nomo,’” Kam Folem Mi—Blong Wanwan Man, Woman mo Famli: Niu Testeman 2023 (2022)
“21–27 Ogis, Fas Korin 1–7,” Kam Folem Mi—Blong Wanwan Man, Woman mo Famli: 2023
Korin, Saot Gris, Forom mo Sivik Senta, peinting we i kam long Balage Balogh/www.ArchaeologyIllustrated.com
21–27 Ogis
Fas Korin 1–7
“Yufala I Mas Joen Gud we Yufala I Gat Wan Tingting Nomo, mo we Fasin blong Yufala I Wan Nomo”
Raetemdaon ol filing mo ol tingting blong yu taem yu stap ridim 1 Korin 1–7. Ol filing mo tingting ia, maet insaed i gat tu ol kwaet toktok blong Spirit we i talem long yu blong stadi moa long wan aedia, o blong serem wan samting we yu bin lanem wetem ol narawan, o blong yu mekem ol jenis insaed long laef blong yu.
Raetemdaon Ol Filing mo Tingting blong Yu
Long ol manis we Pol i bin stap long Korin, “plante narafala man Korin tu oli harem tok blong Pol, nao oli bilif long Jisas, mo oli baptaes” (Ol Wok 18:8). So, ating bae hat blong Pol i brok taem hem i harem se, afta sam yia nomo, se Ol Sent long Korin oli seraot, oli raorao, mo long taem we hem i no bin stap, oli stat blong mekem folem “ol bisnis blong wol” (1 Korin 1:10–11, 20). Blong ansarem hemia, Pol i bin raetem leta ia, we naoia yumi save olsem Fas Korin. Hem i fulap long ol dip doktrin, be yet, long semtaem, i luk olsem se Pol i no glad se Ol Sent oli no bin rere blong akseptem evri doktrin we hem i wantem givim long olgeta. Hem i komplen i talem: “Bifo, mi mi no save toktok long yufala olsem we mi save toktok long ol man we Spirit blong God i stap long olgeta, nogat. Mi mi toktok long yufala olsem we yufala i man blong wol nomo, olsem we yufala i smosmol pikinini nomo long ol fasin blong Kristin man” (1 Korin 3:1–3). Taem yumi stap rere blong ridim ol toktok blong Pol, bae i save help blong yumi luklukbak fulwan se yumi rere blong kasem trutok—mo tu, blong luklukgud se yumi wantem blong mekem folem Spirit mo traehad blong stap wan wetem ol famli blong yumi, wetem ol nara Sent, mo wetem God.
Sam Aedia blong Skripja Stadi blong Yuwan
Ol memba blong Jos Ia blong Kraes, oli traehad blong stap wan.
Yumi no save evri ditel abaot yuniti we i nomo stap long medel blong Ol Sent long Korin, be yumi save gud abaot fasin blong no gat yuniti insaed long ol rilesensip blong yumiwan bakegen. Tingting long wan rilesensip insaed long laef blong yu we i nidim moa yuniti long hem; afta, lukaotem wanem Pol i bin tijim long 1 Korin 1:10–17; 3:1–11 long saed blong fasin we i nomo gat yuniti long medel blong Ol Sent long Korin. ?Wanem niu tingting yumi kasem abaot wei we God bae i sapotem yumi?
Luk tu long Mosaea 18:21; 4 Nifae 1:15–17; Doktrin mo Ol Kavenan 38:23–27; 105:1–5; Gospel Topics, “Unity,” topics.ChurchofJesusChrist.org.
Blong mekem wok ia blong God, mi nidim waes blong God.
I nomata se hem i gud—mo oli stap leftemap tingting from— stap lukaotem waes long weaples we yumi save faenem (luk long 2 Nifae 9:29; Doktrin mo Ol Kavenan 88:118), Pol i bin givim sam strong woning abaot waes blong man we i no strong, we hem i singaotem waes blong wol ia, o waes blong man. Taem yu stap ridim 1 Korin 1:17–25, tingting hevi long wanem nao sentens ia i save minim. Long tingting blong yu, ?Pol i minim wanem taem hem i tokbaot “waes blong God”? ?From wanem nao yumi nidim waes blong God blong mekem wok blong God?
Long ol hadwok blong yu blong mekem ol responsabiliti blong yu blong mekem wok blong God, ?yu yu filim finis se yu fraet, mo stap seksek, olsem we Pol i bin filim taem hem i bin tijim Ol Sent long Korin? (1 Korin 2:3). ?Wanem nao yu faenem long 1 Korin 2:1–5 we i givim paoa long tingting? Tingting long wei we yu save soem se yu trastem “paoa blong God” i bitim “waes blong ol man.”
Luk tu long Doktrin mo Ol Kavenan 1:17–28.
Mi nidim Tabu Spirit blong save andastanem ol samting we oli blong God.
Sapos yu wantem lanem moa abaot wan samting olsem makanik blong trak, o stael bilding blong bifo, ?olsem wanem nao bae yu mekem? Folem 1 Korin 2:9–16, ?olsem wanem nao, fasin blong lanem “ol samting we oli blong God” i defren blong lanem “ol samting we oli blong man”? ?From wanem yumi mas gat Tabu Spirit blong save andastanem ol samting we oli blong God? Afta we yu ridim ol ves ia, ?wanem nao yu filim blong mekem blong andastanem moa fulwan ol samting long saed blong spirit? ?Olsem wanem ol toktok blong Pol i save helpem wan we i gat hadtaem wetem testemoni blong hem?
Bodi blong mi i tabu.
Plante pipol we oli stap long Korin oli bin filim se rabis fasin long saed blong seks, i wan samting we i oraet nomo, mo bodi blong olgeta, oli mekem ia nao blong gat gud taem. Long nara toktok, Korin i no bin defren long wol ia tedei. ?Wanem nao Pol i stap tijim long 1 Korin 6:13–20 we i save helpem yu blong eksplenem long ol narawan from wanem yu yu wantem laef long wan laef we i klin?
Olsem Pol, Sista Wendy W. Nelson i leftemap tingting blong Ol Sent blong oli mas stap klin long saed blong seks; luk long “Love and Marriage” (worldwide devotional for young adults, Jan. 8, 2017, broadcasts.ChurchofJesusChrist.org). Folem wanem Sista Nelson i talem, ?wanem blesing nao i kam taem yumi stap laef folem ol standet blong Lod long saed blong lav mo praevet laef long saed blong seks?
?Weswe? ?Pol i bin tijim se i moa gud blong no mared bitim blong mared?
Samfala ves long 1 Korin 7 maet oli stap traem blong talem se mared i wan gud samting, blong stap singgel mo no gat seks, i wan fasin we i moa gud. Be, Joseph Smith Translation, 1 Corinthians 7:29–33 (long Bible appendix) i helpem yumi blong andastanem se Pol i bin stap tokbaot olsem we oli singaotem olgeta blong stap fultaem misinari, mo i talem se bae oli wok blong God long wan moa gud wei sapos oli stap singgel nomo long taem blong misin blong olgeta. Lod i bin tijim tru long ol wokman blong Hem, mo tru long Pol tu, se mared i pat blong plan ia blong Hem we i no save finis, mo i nid blong gat mared blong save kam olsem wan god (luk long 1 Korin 11:11; Doktrin mo Ol Kavenan 131:1–4).
Ol Aedia blong Famli Skripja Stadi mo Haos Naet
-
1 Korin 1:10–17; 3:1–11.Taem ol memba blong famli blong yu oli stap ridim ol ves ia, invaetem olgeta blong faenem wan niu tingting we i save helpem olgeta blong oli kam wan moa.
-
1 Korin 3:1–2.Mebi yu save ridim ol ves ia taem yu stap dring melek mo kakae mit. Yu save komperem wei we ol bebi oli stap groap oli kam bigwan, wetem wei we yumi stap groap long saed blong spirit.
-
1 Korin 3:4–9.Pol i bin komperem ol misinari hadwok blong hem, olsem fasin blong planem ol sid. Taem oli komperem hemia, ?Hem i tijim wanem long yumi abaot fasin blong stap serem gospel?
-
1 Korin 6:19–20.Blong stap komperem bodi blong yumi long tempol, olsem we Pol i bin mekem, i wan wei we i wok blong stap tijim abaot se bodi blong yumi i tabu tumas. Maet yu save soem ol pikja blong tempol, olsem olgeta we oli stap long aotlaen ia. ?From wanem nao ol tempol oli tabu? ?Olsem wanem nao bodi blong yumi oli olsem ol tempol? ?Wanem nao yumi save mekem blong tritim bodi blong yumi olsem ol tempol? (Luk tu long the Ogis 2020 spesel edisen blong Liahona long saed blong seks; hemia i stap long Inglis mo Franis nomo.)
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “The Lord Gave Me a Temple,” Children’s Songbook, 153.
Stap Kam Antap long Stadi blong Yuwan
Yu mas save wet longtaem wetem yuwan. Pol i bin tijim se melek i kam fastaem long mit taem yumi stap lanem gospel (luk long 1 Korin 3:1–2). Sapos yu faenem se i gat sam doktrin we oli had tumas blong andastanem naoia, gat longfala tingting. Trastem se ol ansa bae oli kam taem yu gat fet mo yu wok strong wetem strong tingting blong stap stadi.
Pol i bin komperem bodi blong yumi long wei we tempol i tabu tumas. Folem klok i wok, stat long top lef: Tiruana Meksiko Tempol, Taepe Taewan Tempol, Tegujigalpa Honduras Tempol, Yuston Teksas Tempol.