31 Julae–6 Ogis

Ol Wok 22–28

Wan Man blong Wok blong Mi mo Wan Witnes

Ol filing mo tingting we oli kam long Tabu Spirit, plante taem oli kwaet mo oli save ronwe kwik. Raetemdaon ol filing mo ol tingting blong yu. Hemia bae i mekem se bae yu save tingting plante moa long olgeta long wan fasin we i moa dip. Taem yu stap ridim Ol Wok 22–28, raetemdaon ol tingting mo ol filing we oli kam long yu, mo tekem taem blong stap tingting hevi long olgeta.

Raetemdaon Ol Filing mo Tingting blong Yu

“Taem yumi stap mekem wok blong Lod,” Presiden Thomas S. Monson i promesem, “yumi gat raet blong kasem help we i kam long Lod” (“To Learn, to Do, to Be,” Liahona, Nov. 2008, 62). Yumi no gat raet blong gat wan rod we i smut, mo wan longfala laen blong ol sakses. Blong gat wan pruf long hemia, yumi nidim blong luk i no go bitim Aposol Pol. Wok blong hem, we Sevya i bin givim, i blong “i talemaot nem blong mi long ol man we oli no laen blong Isrel, mo long ol king, mo long ol laen blong Isrel tu” (Ol Wok 9:15). Long ol japta 22–28 blong Buk blong Ol Wok, yumi luk Pol i mekem wok ia i hapen, mo i fesem ol bigfala agens—ol jen, kalabus, abius long bodi, sip i rek, mo iven snek i kakae hem. Be yumi luk tu se Jisas i stanap long saed blong hem, mo i talem long hem: “Hemia nating ya. Yu no fraet.” (Ol Wok 23:11). Ol eksperiens blong Pol oli blong mekem yumi tingbaot se wok blong Lod blong “talemaot gospel blong [Hem] wetem saon blong stap glad,” i kam wetem promes ia: “Leftemap hat blong yufala mo stap glad, from we mi stap long medel blong yufala” (Doktrin mo Ol Kavenan 29:4–5; luk tu long Matiu 28:19–20).

Sam Aedia blong Skripja Stadi blong Yuwan

Ol Wok 22:1–21; 26:1–29

Ol disaepol blong Jisas Kraes oli serem testemoni blong olgeta long fasin we i klia mo i tok stret.

Taem we Pol i bin givim ol strong testemoni we oli bin raetemdaon long Ol Wok 22 mo 26, long tetaem ia, ol soldia blong Rom oli bin holemtaet hem i prisena. Ol pipol we hem i bin toktok long olgeta, oli bin gat paoa blong panisim hem blong hem i ded. Be yet, hem i bin jusum blong i tok stret, i talem witnes blong hem abaot Jisas Kraes mo visen blong heven” (Ol Wok 26:19) we hem i bin kasem. ?Wanem nao i givim insperesen long yu abaot ol toktok blong hem? Tingting long ol janis ia we yu gat blong serem testemoni blong yu. Eksampol: ?weswe long ol fren blong yu? ?Oli save olsem wanem yu yu filim abaot Jisas Kraes? O ?wetaem nao i las taem we yu bin talem long famli blong yu olsem wanem we yu yu kasem testemoni blong yu long saed blong gospel?

Taem we oli jikim yang Josef Smit from se hem i talem abaot Fas Visen blong hem, hem i bin kasem insperesen tru long wei we Pol i bin testifae abaot visen blong hem (luk long Josef Smit—Histri 1:24–25). ?Olsem wanem nao bae yu talem sot wanem we Josef Smit i bin lanem aot long Pol? ?Wanem nao yu yu lanem aot long tufala witnes blong Jisas Kraes?

Luk tu long Neil L. Andersen, “Yumi Toktok Abaot Kraes,” Liahona, Novemba 2020, 88–91.

Ol Wok 23:10–11; 27:13–25, 40–44

Lod bae i sapotem olgeta we oli traehad blong wok blong Hem.

Olsem we seves blong Pol i soemaot klia, ol samting we oli had insaed long laef blong yumi oli no wan saen se God i no agri wetem yumi, o wok ia we yumi stap mekem. Wanem i stap, i we, samtaem, hem i tru long hadtaem nao we yumi filim sapot blong Hem i strong moa. Maet bae hem i intresting blong luklukbak long wanem yu bin ridim i no longtaem i pas abaot seves blong Pol, mo mekem wan lis blong sam long ol samting we hem i bin gotru long hem (eksampol, luk long Ol Wok 14:19–20; 16:19–27; 21:31–34; 23:10–11; 27:13–25, 40–44). ?Olsem wanem Lod i bin stanap long saed blong hem? ?Olsem wanem nao Hem i bin stanap long saed blong yu?

Ol Wok 24:24–27; 26:1–3, 24–29; 27

I gat sefti mo pis taem yumi stap mekem folem ol toktok blong ol wokman blong God.

Truaot long seves blong hem, Pol i bin talem wan strong testemoni abaot Jisas Kraes mo gospel blong Hem. Plante pipol oli bin akseptem witnes blong hem, be i no evriwan. Taem yu stap ridim Ol Wok 24:24–27 mo Ol Wok 26:1–3, 24–29, lukaotem ol toktok mo ol sentens we oli soem olsem wanem olgeta rula blong Rom we oli stap long Judia oli bin fesem ol tijing blong Pol:

• Filiks

• Festas

• King Agripa

Taem we oli bin stap sel i go long Rom blong Sisa i jajem hem, Pol i talem profesi finis se “bae i gat plante trabol long rod ya … Bambae i isi nomo blong yumi lusum ol kago ya, wetem sip ya, mo ating yumi tu, bambae yumi lus” (Ol Wok 27:10). Ridim japta 27 blong faenemaot olsem wanem ol fren blong Pol long sip oli bin mekem long fes blong ol woning ia blong hem. ?Yu yu faenem eni lesen blong yuwan tru long eksperiens blong olgeta?

?Yu yu mekem finis olsem wan long ol pipol ia taem yu bin harem ol tijing blong ol lida blong Jos? ?Wanem nao sam posibol risal blong stap mekem olsem ia? ?Wanem nao yu yu lanem aot long ol stori ia abaot fasin blong mekem folem advaes blong Lod tru long ol wokman blong Hem?

Luk tu long 2 Nifae 33:1–2; D. Todd Christofferson, “Voes blong Woning,” Jeneral Konfrens, Mei 2017, 108–11; “Follow the Living Prophet,” Teachings of Presidents of the Church: Ezra Taft Benson (2014), 147–55.

Ol Aedia blong Famli Skripja Stadi mo Haos Naet

Ol Wok 24:16.Bifo hem i bin jenisim laef blong hem, Pol i bin gat wan longfala histri blong ol rong samting agensem God. Be, from se hem i wantem blong sakem sin, nao hem i bin save talem: “ mi, tingting blong mi i no gat wan rong agensem God, mo agensem evri man.” (luk tu long Doktrin mo Ol Kavenan 135:4–5). ?Olsem wanem nao bae yumi save karem ol rong blong yumi agensem God mo ol narawan, oli aot long tingting blong yumi?

Ol Wok 26:16–18.Long ol ves ia, ?wanem nao Lod i singaotem Pol blong go mekem? ?Wanem janis i stap blong yumi save mekem ol semmak samting?

Ol Wok 28:1–9.?I gat eniwan insaed long famli we i laekem ol snek? Maet bae yu wantem askem man o woman ia, o wan nara memba blong famli blong talem ol stori we oli stap long Ol Wok 28:1–9. Maet bae ol pikinini blong yu oli glad blong droem wan pikja abaot ol stori ia, o blong aktem olgeta. ?Wanem lesen nao yumi stap lanem aot long ol stori ia? Wan long ol lesen ia, i we Lod i mekem ol promes we Hem i mekem long ol wokman blong Hem. Eksampol: yu save komperem ol promes we Lod i mekem long Mak 16:18 mo taem oli kamtru long ol eksperiens blong Pol. Mo tu, yu save faenem long wan las jeneral Konfrens toktok, wan promes we wan long ol wokman blong Lod i bin mekem—maet wan we i gat mining long famli blong yu—mo soem hemia insaed long hom blong yu. ?Olsem wanem yumi save soem fet blong yumi se promes ia bae i kamtru?

God i protektem Pol taem wan posen snek i kakae hem.

Ol Wok 28:22–24.Semmak olsem Jos long taem blong Pol (we oli singaotem wan “grup” long ves 22), Jos blong tedei, plante oli stap tok agens. Taem ol pipol oli stap toktok agensem Sevya mo Jos blong Hem, ?olsem wanem nao Pol i stap fesem? ?Wanem nao yumi save lanem aot long eksperiens blong Pol?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Mi Save Ridima Hem I Laef,” STSP, pej 38.

Stap Kam Antap long Fasin blong Yumi blong Stap Tij

Lukluk nomo long ol prinsipol we bae i blesem famli blong yu. Taem yu stap stadi long ol skripja, askem yuwan: “?Wanem nao mi faenem long ples ia we bae i gat mining speseli long famli blong mi?” (Luk long Teaching in the Savior’s Way, 17.)

Pol long fored blong King Agripa. Strong long Testemoni Abaot Jisas Kraes, i kam long Daniel A. Lewis