14–20 Ogis

Rom 7–16

“Yufala I Mas Holemstrong Ol Stret Fasin blong Yufala, blong Winim Ol Rabis Fasin”

I gat samfala prinsipol blong gospel nomo we oli stap long Rom 7–16 we oli save putum long aotlaen ia, hemia blong yu no lukluk nomo long wanem oli tokbaot long ples ia. Tekem not mo lisingud long insperesen we yu stap kasem taem yu stap stadi.

Raetemdaon Ol Filing mo Tingting blong Yu

Taem hem i openem leta blong hem i go long Ol Man Rom, Pol i talem gudfala griting i go long ol memba blong Jos taem hem i singaotem, “Olgeta we God i lavem tumas,” be bambae oli singaotem “Ol man blong Hem.” Hem i talem “we olgeta man long wol oli stap harem nius blong bilif blong yufala” (Rom 1:7–8). Iven we Pol i bin spendem plante taem blong hem long leta blong stretem ol giaman tingting mo ol rabis fasin, i luk se hem i bin wantem blong talemgud long olgeta niufala Kristin Man ia, se olgeta tu oli ol tru man blong God, we God i lavem olgeta tumas. Kaen kaonsel blong Hem i stap blesem yumi evriwan we i stap gat hadtaem blong filim lav ia blong God, mo blong kam wan man blong hem, i wan samting we i longlongwe. Wetem tingting i stap daon mo wetem andastaning, Pol i luksave se, samtaem, hem i no harem gud, (Rom 7:24), be gospel ia blong Jisas Kraes i bin givim hem paoa blong winim sin (luk long Josef Smit Translesen, Rom 7:22–27, [insaed long JST apendiks]) Wetem paoa ia, paoa blong Sevya blong pemaot man, yumi save “winim ol rabis samting”—tugeta long wol ia, mo insaed long yumiwan—wetem ol gudfala samting (Rom 12:21).

Sam Aedia blong Skripja Stadi blong Yuwan

Rom 7–8

Olgeta we oli stap folem Spirit oli save kam joen wetem Kraes blong kasem evri samting we Hem i gat.

Iven afta we yu kam insaed long wan “niu laef” tru long odinens blong baptaes (Rom 6:4), maet yu bin filim sam tingting we oli agensem olgeta, olsem we Pol i tokbaot long Rom 7—“rabis fasin ia we i stap wok oltaem” bitwin man we i folem ol fasin blong wol mo ol stret mo gud fasin” (Rom 7:23). Be Pol i stap tokbaot yu abaot hop long Rom 8:23–25. ?Wanem risen nao from hop ia, yu yu faenem insaed long japta 8? Maet bae yu lukaotem ol blesing tu we oli kam, hemia from “Spirit ya blong God i mekem ples blong hem finis long yufala” (Rom 8:9). ?Olsem wanem nao bae yu lukaotem kampani blong Tabu Spirit moa fulwan insaed long laef blong yu?

Rom 8:16–39

Presen ia, we i glori we i no save finis, i bigwan moa long ol tes blong mi long wol ia.

Sam yia afta we Pol i bin raetem leta ia, Ol Sent long Rom oli safa ol bigfala agens, we oli nogud tumas. ?Wanem nao yu yu faenem insaed long Rom 8:16–39 we i maet i bin helpem Ol Sent ia taem agens i kam fesem olgeta? ?Olsem wanem nao, maet, ol toktok ia oli blong yu mo ol tes we yu yu stap fesem naoia?

Lukaotem wanem i joenem ol ves ia mo advaes ia we i kam long Sista Linda S. Reeves: “Mi no save from wanem yumi gat plante tes we yumi gat, be hem i filing blong mi se praes i bigwan tumas, i no save finis, i no gat en, i gat plante glad mo i bigwan bitim wanem yumi andastanem, mekem se long dei blong givim praes, bae yu filim blong talem long Papa ia we i gat bigfala lav mo sore: ‘?Hemia nomo blong mi mas mekem?’ “… Mi bilif se, sapos evri dei yumi save tingbaot mo luksave hamas lav ia we Papa blong yumi long Heven mo Sevya i gat long yumi, bae yumi wantem blong mekem eni samting blong stap bakegen wetem Tufala bakegen, wetem lav we i no save finis blong Tufala, i raonem yumi. ?Wanem we yumi safa long ples ia bae i impoten sapos long en, ol hadtaem ia nao bae oli ol samting we bae i mekem yumi save kwalifae from laef we i no save finis mo fasin blong kam olsem wan god insaed long kingdom wetem Papa mo Sevya blong yumi? (“Klin Inaf blong Kasem Ol Blesing blong Promes,” Jeneral Konfrens, Oktoba 2015, 11). Disaed wanem nao bae yu mekem blong tingbaot evri dei mo luksave evri dei, lav ia we God i gat long yu.

Rom 8:29–30; 9–11

?Wanem nao Pol i minim tru long ol toktok ia, “hem i singaot yumi finis,” “ jusumaot yumi,” mo save finis?

Pol i yusum ol toktok ia, “hem i singaot yumi finis,” “ jusumaot yumi,” mo save finis, blong tijim se, bifo long laef ia, God i jusum sam long ol pikinini blong Hem blong oli pat blong Isrel, ol kavenan pipol blong Hem. Hemia i minim se bae oli kasem ol spesel blesing mo responsabiliti blong mekem se oli save blesem evri pipol blong wol (luk long Gaed long Ol Skripja, “Jusum Man, Fasin blong God I,” olskripja.ChurchofJesusChrist.org). Be, Pol i talem bigwan long Rom 9–11 se evriwan long ol pikinini blong God oli save kam ol kavenan pipol blong Hem, mo yumi evriwan i kasem laef we i no save finis long semfala wei—tru long fet long Jisas Kraes, mo tru long fasin blong stap obei long ol komanmen blong Hem.

Luk tu long Efesas 1:3–4; 1 Pita 1:2; Alma 13:1–5; Gospel Topics, “Foreordination,” topics.ChurchofJesusChrist.org.

Rom 12–16

Pol i invaetem mi blong kam wan tru Sent, mo wan we i folem Jisas Kraes.

Ol las faef japta blong Rom i tekem plante spesifik instraksen blong fasin blong stap laef olsem Ol Sent. Wan wei blong stadi long ol instraksen ia, i blong lukaotem ol topik we oli stap ripitim. ?Olsem wanem nao bae yu talem sot advaes blong Pol?

Maet bae yu no save yusum evriwan long advaes ia long wan taem, be Spirit i save helpem yu blong faenem wan o tu prinsipol we yu save stat wok long hem tedei. Serem wanem we hat blong yu i wantem wetem Papa blong yu long Heven, tru long prea, mo askem help blong Hem.

Ol Aedia blong Famli Skripja Stadi mo Haos Naet

Rom 8:31–39.?Wanem nao yumi faenem insaed long Rom 8:31–39 we i tijim olsem wan Papa long Heven mo Jisas i filim abaot yumi? ?Wetaem nao yumi bin filim lav ia blong God?

Blong soem wanem i stap long ol ves 38–39, ol memba blong famli oli save faenem ol eksampol blong ol samting we, olsem yumi, mo olsem lav ia blong God, yumi no save seperet long hem.

Elda Wilford W. Andersen i tijim: “Miusik blong gospel, i wan glad filing long saed blong spirit.”

Rom 9:31–32.Mesej blong Elda Wilford W. Andersen: “The Music of the Gospel” (Liahona, May 2015, 54–56; luk tu long vidio long ChurchofJesusChrist.org) we i save help blong soemaot wanem we Pol i stap tijim abaot loa, ol wok, mo fet. Afta we yufala i toktok raon long mesej ia blong hem, famli blong yu i save traem blong danis wetem miusik, o nogat miusik. ?Olsem wanem fet i helpem yumi blong gat eksperiens blong gat glad ia blong gospel?

Rom 10:17.Raetem sam nem long ol glas blong wota, wetem ol ples we toktok blong God i stap long hem (olsem ol skripja, revelesen we i blong yuwan, mo jeneral konfrens). Toktok raon long wei we toktok blong God i mekem fet blong yumi i kam antap taem yu stap kapsaetem wanwan glas wota i go insaed long wan kontena we nem blong hem i “Bilif, o Fet.”

Rom 12.?Hem i minim wanem blong mekem yumi kam olsem wan “sakrifaes we i laef mo i tabu, mo we God i glad blong tekem? (ves 1).

Rom 14:13–21.Maet bae famli blong yu i laekem blong stadi long kaonsel blong Pol abaot fasin blong stap jajem mo stap raorao ova long ol samting we yumiwan nomo yumi stap laekem. Maet, yufala i save toktok raon long ol stret wei blong ansa, taem we ol nara pipol, we i tekem tu ol memba blong famli, oli mekem ol joes we oli defren long yu. ?Olsem wanem nao yumi save “folem ol fasin we i save mekem pis? (ves 19).

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Filim Lav Ia blong Sevya,” Fren, Julae 2021, pej 13.

Stap Kam Antap long Fasin blong Yumi blong Stap Tij

Letem ol pikinini oli soem wanem oli krietem. “Taem yu invaetem ol pikinini oli krietem wan samting we i go wetem wan prinsipol blong gospel, yu stap helpem olgeta blong andastanem gud moa prinsipol ia. … “Letem olgeta oli bildim samting, oli dro, oli kala, oli raet mo oli krietem samting” (Teaching in the Savior’s Way, 25).

Stap wetem Mi, i kam long Del Parson