“14–20 Ogis. Rom 7–16: ‘Yufala I Mas Holemstrong Ol Stret Fasin blong Yufala, blong Winim Ol Rabis Fasin,’” kam Folem Mi—Blong Praemeri: Niu Testeman 2023 (2022)
“14–20 Ogis. Rom 7–16,” Kam Folem Mi—Blong Praemeri: 2023
14–20 Ogis
Rom 7–16
“Yufala I Mas Holemstrong Ol Stret Fasin blong Yufala, blong Winim Ol Rabis Fasin”
Taem yu stap ridim Rom 7–16, raetemdaon ol filing mo tingting we yu kasem abaot olsem wanem yu save tijim ol pikinini abaot ol trutok long ol japta ia.
Invaetem Ol Pikinini blong Serem Wanem Oli Gat
Sam dei bifo long klas, invaetem wan mo moa pikinini blong ridim wan ves long Rom 7–16 we oli save serem long klas. Yu save invaetem papa mo mama blong olgeta blong help sapos yu nidim.
Tijim Doktrin: Ol Smol Pikinini
Papa blong mi long Heven i lavem mi.
?Long wanem wei nao yu save yusum ol toktok blong Pol blong tijim ol pikinini se, Papa long Heven bae oltaem i lavem olgeta?
Samfala Aktiviti we Yu Save Mekem
-
Helpem ol pikinini blong lanem baehat sentens ia “[Nating] we i save tekemaot yumi long God, we hem i lavem yumi ya tumas” (Rom 8:39). Tingting long wan wei blong soem trutok ia long olgeta. Eksampol, yu save karem tu bod we yu bin nilim tufala tugeta, wan yu makem nem se “yumi” mo narawan “lav blong God.” Letem ol pikinini oli traem sapos oli save seperetem tufala bod ia.
-
Soem wan pikja blong san, o askem ol pikinini blong lukluk i go aotsaed tru long windo mo luk saen laet. ?Long wanem wei nao, san i olsem lav blong Papa long Heven? Helpem ol pikinini blong luk se, nomata se san i stap longwe tumas, i save helpem yumi blong filim wom. Yumi save filim lav blong Papa long Heven evri taem, nomata se Hem i no stap wetem yumi long saed blong bodi. Tugeta singsing wan singsing abaot lav blong Papa long Heven, olsem “My Heavenly Father Loves Me” (Children’s Songbook, 228–29).
Ol pikinini oli save helpem ol narafalawan blong lanem abaot Sevya mo gat fet long Hem. Taem blong Storian long Galili, i kam long Del Parson
Fet i kam taem yumi harem toktok blong God.
Taem ol pikinini oli harem tok blong God mo lisin gud long hem, fet blong olgeta long God bae i gro.
Samfala Aktiviti we Yu Save Mekem
-
Ridim Rom 10:17 long ol pikinini, mo soem ol pikja long olgeta, hemia we oli save harem toktok blong God (olsem famli skripja stadi, ol taem blong klas long jos o jeneral konfrens, luk long aktiviti pej blong wik ia). Askem ol pikinini se, wetaem nao oli bin harem toktok blong God.
-
Talem wanem stori blong wan pikinini we i lisin long toktok blong God, long ol defdefren wei. Taem yu stap talem stori, bloem wan balun smol smol blong ripresentem olsem wanem fet blong pikinini ia i stap gro, wanwan taem, taem hem i stap lisin long toktok blong God.
-
Blong helpem ol pikinini blong andastanem se, fet i save gro, helpem olgeta blong singsing long singsing ia “Faith” (Children’s Songbook, 96–97). Taem oli stap singsing, askem olgeta blong mekem olsem se, oli stap sidaon i go daon. Evri taem we oli singsing mo talem toktok ia fet, mekem olgeta oli stap girap sloslo olsem wan plan we i stap gro.
-
Haedem wan skripja we i fulwan insaed long klas rum, wan pikinini blong Presiden blong Jos mo wan kopi blong Fren magasin. Askem ol pikinini blong faenem ol samting ia mo serem, olsem wanem wanwan long ol samting ia i stap mekem i posibol blong yumi harem toktok blong God.
Mi save talem tangkyu long olgeta we oli helpem mi.
Pol i glad long ol pipol we oli bin helpem hem. Yu save helpem ol pikinini blong luksave ol kaen fasin we ol narawan oli mekem long olgeta, mo tingbaot blong talem tangkyu long olgeta.
Samfala Aktiviti we Yu Save Mekem
-
Eksplenem se Pol i tangkyu bigwan from help we hem i bin kasem, long wan woman we nem blong hem Fibi mo wan kapol we tufala i mared, nem blong tufala Prisila mo Akwila, (luk long Rom 16:1–4). Askem ol pikinini blong dro ol pikja blong Pol mo trifala pipol ia taem yu stap ridim ol ves ia.
-
Invaetem wanwan pikinini blong serem wan samting we i naes, we wan narafala man i bin mekem blong olgeta, i no longtaem i pas. Helpem ol pikinini blong mekem ol kad we i talem tangkyu, blong ol pipol ia.
-
Helpem ol pikinini blong lanem olsem blong talem tangkyu long ol defdefren lanwis. Singsing ia “Children All Over the World” (Children’s Songbook, 16–17) i save help.
Tijim Doktrin: Ol Bigfala Pikinini
Papa long Heven i wantem mi blong rere blong kasem evri samting we Hem i gat.
Plan blong Papa long Heven i mekem i posibol blong yumi, blong kam olsem Hem mo kasem evri samting we Hem i gat. Ol trutok ia i save givim insperesen long ol pikinini we yu tijim blong laef moa fetful, folem gospel.
Samfala Aktiviti we Yu Save Mekem
-
Ridim tugeta Rom 8:16–18. ?Wanem nao yumi lanem long ol ves ia abaot huia yumi, mo huia yumi save kam olsem? Eksplenem se wan “heir” i minim se wan we i gat ol propeti o i stap kasem, wanem we papa mi mama blong hem i gat. Raetem long bod sentens ia ?Wanem nao yumi nidim blong mekem blong kasem evri samting we Papa blong yumi long Heven i gat i stap? Tugeta, singsing wan singsing wan abaot fasin blong stap obei, olsem “I Will Follow God’s Plan” (Children’s Songbook, 164–65), mo stap lukaotem ol ansa. ?Wanem ol narafala ansa we ol pikinini oli save tingting long hem?
-
Askem ol pikinini blong tingbaot wan king we i wantem ol pikinini boe mo ol gel blong hem blong rul ova long kingdom blong hem sam dei. Eksplenem se Papa long Heven i olsem wan king, mo yumi yumi ol pikinini boe mo gel blong King(Hem). Yu save serem stori blong boe blong King Louis XVI blong Franis, we i stap long mesej blong Sista Elaine S. Dalton “Remember Who You Are!” (Liahona, Mei 2010, 121). ?From wanem hem i impoten blong tingbaot se yumi ol pikinini blong Papa long Heven, mo yumi bon i kam long wol ia, blong wan dei bae yumi kam olsem Hem? ?Olsem wanem nao trutok i gat paoa long ol joes we yumi mekem long ples ia long wol ia?
Fet i kam taem yumi harem toktok blong God.
ol pikinini oli gat plante janis blong harem toktok blong God. Helpem olgeta blong luksave se, olsem wanem nao taem oli stap harem toktok blong God, i save mekem fet blong olgeta i kam moa strong.
Samfala Aktiviti we Yu Save Mekem
-
Raetem ol toktok ia long bod: kam tru long , mo tru long blong . Askem ol pikinini blong fulumap emti spes ia, afta we oli rid Rom 10:17. Serem wan taem we wan i bin tijim wan trutok blong gospel we i bin helpem mekem fet blong yu i kam strong—ating yu save serem wan fevret skripja o kwot long jeneral konfrens. Invaetem ol pikinini blong serem eksperiens blong olgetawan.
-
Givim long wan pikinini, wan pikja blong Sevya we i stap hilim wan man, mo talem long pikinini ia blong letem ol pikinini blong luk pikja ia. Askem pikinini ia blong givim sam help long ol narafala pikinini blong traem talemaot wanem pikja i stap soem. ?Olsem wanem nao yumi save helpem ol pikinini blong lanem abaot Sevya mekem se oli save gat fet long Hem?
“I gud yumi livim fasin ya … we yumi stap jajem narafala man.”
Taem ol pikinini oli mitim ol narafala man we oli mekem ol defren joes bitim wanem we oli stap mekem, bae oli gat temtesen blong wantem jajem man. Tingting long olsem wanem kaonsel blong Pol long ol Man Rom, i save helpem olgeta blong stopem blong jajem ol narafala man.
Samfala Aktiviti we Yu Save Mekem
-
Invaetem wan pikinini blong ridim Rom 14:10, 13. Askem ol pikinini blong kaontem, hamas taem Pol i yusum toktok ia jajem. ?I minim wanem blong jajem wan narawan? ?From wanem nao yumi mas stop blong jajem ol narafala man?
-
Soem wan pikja blong wan narafala man, mo askem ol pikinini wanem yumi save abaot man o woman ia, taem yumi lukluk nomo long pikja ia. ?Wanem sam samting we yumi no save abaot man o woman ia? ?From wanem Lod i namba wan man blong jajem man ia? (Luk long 1 Samuel 16:7).
Stap Leftemap Tingting blong Lanem Samting long Hom
Askem ol pikinini blong jusum wan aktiviti we yufala i bin mekem long klas, mo mekem wetem ol famli blong olgeta. Talem long olgeta se long nekis wik, oli save serem wanem we oli bin mekem.
Kam Antap long Fasin blong Yumi blong Stap Tij
Givim ol janis long ol pikinini blong muv. I had tumas blong ol pikinini blong sidaon kwaet blong wan longfala taem. Wan wan taem, invaetem ol pikinini blong stanap olsem pat blong klas o sidaon long floa, be i no blong stap sidaon nomo long ol jea blong olgeta.