“7–13 Ogis. Rom 1–6: ‘Paoa blong God blong Save Sevem Man,’” Kam Folem Mi—Blong Praemeri: Niu Testeman 2023 (2022)
“7–13 Ogis. Rom 1–6,” Kam Folem Mi—Blong Praemeri: 2023
7–13 Ogis
Rom 1–6
“Paoa blong God blong Save Sevem Man”
?Wanem nao ol kwaet toktok blong spirit we yu kasem. Taem yu ridim Rom 1–6? Ol kwaet toktok blong spirit ia i save helpem yu blong jusum ol aedia blong tij o rere long wan blong yuwan long ples ia.
Invaetem Ol Pikinini blong Serem Wanem Oli Gat
Invaetem ol pikinini blong serem wanem oli bin mekem blong ansa long ol invitesen we yu bin givim long olgeta long lesen blong las wik.
Tijim Doktrin: Ol Smol Pikinini
Mi save soem fet blong mi long Jisas Kraes taem mi stap folem Hem.
Pol i bin tijim se gospel i gat paoa blong givim fasin blong sevem man long evriwan we oli stap laef folem fet long Jisas Kraes. ?Olsem wanem nao yu save helpem ol pikinini blong soem fet blong olgeta long Jisas Kraes taem oli stap folem Hem?
Samfala Aktiviti we Yu Save Mekem
-
Ridim long ol pikinini, Rom 1:17, mo helpem olgeta blong lanem baehat sentens ia: “Ol stret man blong mi we oli stap bilif long mi bambae oli save laef.” Yu save givim wan toktok long sentens, long wanwan pikinini mo askem olgeta blong talem toktok ia taem yu poen long olgeta. Eksplenem se sentens ia i minim se yumi mas gat fet long Jisas Kraes. Askem ol pikinini sapos oli save wanem ia fet. Soem wan pikja blong Jisas Kraes mo eksplenem se, yumi biliv se Hem i ril nomata se yumi no bin luk Hem Hemia i fet—blong biliv long wan samting, nomata yumi no bin luk.
-
Eksplenem se yumi stap soem fet blong yumi long Jisas Kraes, taem we yumi stap obei long Hem Haedem ol pikja raon long rum, blong ol pipol we oli mekem wanem we Jisas i bin askem yumi blong mekem. Letem ol pikinini oli gat janis blong faenem mo tokbaot ol pikja ia. ?Wanem nao yumi mas mekem blong folem Jisas?
-
Askem wan long ol pikinini blong sarem ae blong hem, mo lidim hem i go krosem rum blong go kasem pikja blong Jisas. Sapos i gat inaf taem i stap yet, letem ol narafala pikinini blong gat janis blong mekem. Helpem ol pikinini blong andastanem se oli save folem ol tijing blong Jisas, olsem we oli stap folem yu blong lidim olgeta.
Blong kasem baptaes i mekem yu yu wan niu man, o wan niu woman.
Ol pikinini we yu stap tijim, oli stap rere blong baptaes. ?Wanem nao oli save lanem abaot baptaes long Rom 6?
Samfala Aktiviti we Yu Save Mekem
-
Invaetem ol pikinini blong ripitim sentens ia “Wokbaot long niufala laef ya” (Rom 6:4). Talem long ol pikinini abaot, wanem hemia i minim long yu. Eksampol: yu save serem ol memori abaot dei we yu bin kasem baptaes, mo tokbaot olsem wanem baptaes blong yu i bin helpem yu blong kam moa olsem Jisas Kraes. Yusum aktiviti pej blong wik ia blong tijim ol pikinini se, baptaes i helpem yumi blong kam wan niufala man o woman.
-
Sapos eniwan long ol pikinini i bin atendem wan baptaes, askem olgeta blong serem eksperiens blong olgeta. O soem pikja blong wan we i stap kasem baptaes (luk long Gospel Art Buk, ol namba 35, 103–104). Helpem ol pikinini blong oli andastanem se long baptaes, yumi mekem ol promes blong kam olsem Jisas. Invaetem olgeta blong droem ol pikja blong olgetawan, mo serem wanem oli save mekem blong rere from baptaes blong olgeta.
-
Singsing wan singsing wetem ol pikinini abaot baptaes, olsem “When I Am Baptized” (Children’s Songbook, 103). ?Wanem nao yumi lanem abaot baptaes long singsing ia?
Baptaes i wan saed blong statem wan niufala laef olsem wan disaepol blong Kraes.
Tijim Doktrin: Ol Bigfala Pikinini
Mi save soem fet blong mi long Jisas Kraes taem mi stap folem Hem.
Pol i bin tijim se gospel i gat paoa blong givim fasin blong sevem man long evriwan we oli stap laef folem fet long Jisas Kraes. Fet long Lod Jisas Kraes, i fas prinsipol blong gospel. Hem i pusum yumi blong obei long ol komanmen. ?Olsem wanem nao yu save helpem ol pikinini blong andastanem moa gud abaot fet?
Samfala Aktiviti we Yu Save Mekem
-
Askem wan pikinini blong faenem Rom long wan map. Helpem ol pikinini andastanem se, afta long sam wik we i stap kam, bae oli lanem samting long ol leta blong Pol we i bin raetem i go long ol memba blong Jos long ol defdefren ples, statem wetem leta blong hem we i go long Ol Man Rom.
-
Raetem ves ia Rom 1:16 long bod, mo karemaot sam toktok mo putum wan laen long emti spes we oli stap long hem. Askem ol pikinini blong lukluk long ol skripja mo fulumap spes long laen. Invaetem ol pikinini blong serem wanem toktok ia: “Mi mi no sem nating long gud nius ya,” i stap minim long olgeta.
-
Invaetem wan pikinini blong ridim Rom 1:17, mo askem ol narafala pikinini blong lisin long wan toktok we oli stap ripitim long ves ia. ?Hem i minim wanem se “ol stret man blong mi we oli stap bilif long mi bambae oli save laef”? Helpem ol pikinini blong faenem wan mining blong fet long wan buk olsem Gaed long Ol Skripja, “Fet” (olskripja.ChurchofJesusChrist.org). ?Laef blong yumi bae i olsem wanem, sapos yumi no gat fet long Jisas Kraes?
-
Soem long ol pikinini wan plant o sid, mo askem olsem wan yumi helpem wan sid blong i gro i kam bigwan. Eksplenem se taem yumi planem o givim wota long wan, yumi stap soem se yumi gat fet se bae i gro. ?Long wanem wei nao yumi soem se yumi gat fet long Jisas Kraes? Tingting blong singsing long wan singsing abaot fet, olsem “Fet” (Liahona, Jen 2019, 96), olsem pat blong aktiviti ia.
Yumi evriwan i nidim Jisas Kraes, mekem se yumi save kasem fogivnes from ol sin blong yumi.
Pol i wantem Ol Man Rom blong oli andastanem se fasin blong sevem man i kam nomo tru long long Jisas Kraes mo gladhat blong Hem. Tingting hevi long olsem wanem nao bae yu save tijim trutok ia long ol pikinini.
Samfala Aktiviti we Yu Save Mekem
-
Givim long wanwan pikinini, wan toktok aot long Rom 3:23–24, we yu bin raetem long wan pis pepa. Invaetem ol pikinini blong putum ol toktok ia long oda mo ridim ol ves tugeta. Askem ol pikinini wanem oli lanem long ol ves ia. Eksplenem se “gladhat” long ves 24 i minim presen blong lav mo sore blong Sevya, we i mekem se i posibol blong yumi kasem fogivnes from ol sin blong yumi mo kam moa gud.
-
Hangem wan pikja hae antap long wan wol o long wan narafala ples we ol pikinini oli no save tajem olgetawan. Askem olgeta blong traem blong tajem, mo komperem hemia wetem wanem we Pol i bin tijim long Rom 3:23. Afta helpem olgeta blong tajem pikja. ?Wanem nao Sevya i bin mekem blong yumi, we yumi no save mekem yumiwan? Invaetem ol pikinini blong serem wanem oli bin filim abaot Sevya, taem oli tingbaot wanem we Hem i bin mekem mo i save mekem blong helpem olgeta.
Blong kasem baptaes i mekem yu yu wan niu man, o wan niu woman.
Pol i tijim se, baptaes i ripresentem ded mo Laef Bakegen long Ded, blong Kraes. I wan simbol blong, girap blong “yumi save gohed blong wokbaot long niufala laef ya” (Rom 6:4). Yumi mekem komitmen blong yumi i kam niu bakegen blong wokbaot long wan niufala laef, evri taem we yumi tekpat long sakramen.
Samfala Aktiviti we Yu Save Mekem
-
Invaetem wan pikinini blong ridim Rom 6:3–6. ?Wanem nao Pol i talem abaot baptaes se“i semmak olsem”?
-
Toktok raon long olsem wanem ol baptaes i ripresentem ded mo laef bakegen long ded. Bae i help sapos yu soem wan pikja blong wan we i kasem baptaes o soem wan vidio olsem “The Baptism of Jesus” (ChurchofJesusChrist.org). ?From wanem ded mo laef bakegen long ded. Oli ol gudfala simbol blong wanem we i hapen taem yumi baptaes?
-
Tugeta ridim prea blong sakramen (luk long Doktrin mo Ol Kavenan 20:77, 79). Rimaenem ol pikinini se taem yumi tekem sakramen, yumi riniu long ol komitmen blong folem Jisas Kraes, we yumi bin mekem taem yumi kasem baptaes. ?Long wanem wei nao, sakramen i helpem yumi blong “save gohed blong wokbaot long niufala laef ya”?
-
Invaetem ol pikinini blong dro ol pikja blong soem se i minim wanem long olgeta blong “wokbaot long niufala laef.” Ol pikinini oli save hangem ol pikja ia long ol rum blong olgeta, blong helpem olgeta blong mekem ol gudfala joes.
Stap Leftemap Tingting blong Lanem Samting long Hom
Givim sam tingting long ol pikinini se, blong oli askem long ol memba blong famli blong letem olgeta i save, taem oli stap mekem wan samting we i stap soem fet.
Stap Kam Antap long Fasin blong Yumi blong Stap Tij
Bildimap ol pikinini blong oli gat tras long olgetawan. Presem ol pikinini taem oli tekpat long kas. Hemia i wan wei blong bildimap tras long olgeta, se oli save lanem gospel.