Korin, Saot Gris, Forom mo Sivik Senta, peinting i kam long Balage Balogh/www.ArchaeologyIllustrated.com

21–27 Ogis

Fas Korin 1–7

“Yufala I Mas Joen Gud we Yufala I Gat Wan Tingting Nomo, mo we Fasin blong Yufala I Wan Nomo”

Tabu Spirit bae i helpem yu save wanem ol prinsipol blong gospel long 1 Korin 1–7 we bae i helpem ol pikinini we yu tijim. Taem yu stap prea mo ridim ol japta ia, rekodem ol tingting mo filing we i kam long yu tru long Spirit.

Invaetem Ol Pikinini blong Serem Wanem Oli Gat

Askem ol pikinini sapos oli bin serem wan samting we oli bin lanem long Praemeri, long las wik, wetem ol famli blong olgeta. (Maet bae yu nidim blong luklukbak long lesen blong las wik mo tokbaot smol.) Sapos olsem, ?Wanem nao oli serem?

Tijim Doktrin: Ol Smol Pikinini

Fas Korin 2:11–14

Tabu Spirit i tijim ol trutok blong gospel long mi.

Wan long ol wok blong Tabu Spirit i blong tijim trutok long yumi. ?Wanem ol eksperiens we yu save serem wetem ol pikinini blong helpem olgeta blong andastanem hemia?

Samfala Aktiviti we Yu Save Mekem

• Soem ol samting o ol pikja we oli ripresentem ol wei we yumi save lanem abaot wol (olsem wan skul, buk o smatfon). ?Wanem nao yumi save lanem taem yumi yusum ol samting ia? Eksplenem se long 1 Korin 2:11, 14, Pol i tijim se yumi save lanem abaot God, tru long Spirit blong God nomo, we hem i Tabu Spirit. ?Wanem nao yumi save mekem blong lanem “ol samting blong God”?

• Klapem han blong yu taem yu talem wanwan silabol long sentens ia “Tabu Spirit i tijim trutok long yumi.” Askem ol pikinini blong klapem han blong olgeta mo ripitim sentens ia. Serem wetem ol pikinini wan eksperiens, taem we Tabu Spirit i bin helpem yu blong save wan samting se i tru.

• Singsing tugeta wan singsing abaot Tabu Spirit, olsem “The Holy GhostChildren’s Songbook,105). Helpem ol pikinini blong faenem ol toktok mo ol sentens insaed long singsing ia, we i tijim, olsem wanem Tabu Spirit i stap toktok long yumi mo wanem Hem i stap long yumi.

1 Korin 3:10–11

Jisas Kraes Hem i Sevya blong mi

Ol pikinini oli stap putum wan fandesen blong ol testemoni blong olgeta, mo yu save helpem olgeta blong bildimap wan strong fandesen long Jisas Kraes.

Samfala Aktiviti we Yu Save Mekem

• Ridim 1 Korin 3:11 long ol pikinini, mo eksplenem se Jisas Kraes hem i fandesen blong yumi. Soem sam pikja long ol pikinini blong ol samting we yumi save gat testemoni long olgeta, soem tu wan pikja blong Jisas. Helpem olgeta blong arenjem ol pikja ia mo putum pikja blong Jisas andanit, olsem wan fandesen, mo oli “bildimap” ol narafala pikja long wan testemoni long Hem.

• Mekemap ol aksen blong singsing ia “The Wise Man and the Foolish Man” (Children’s Songbook, 281), mo singsing long singsing ia wetem ol pikinini. Givim long wanwan pikinini wan ston we oli raetem “Jisas Kraes i fandesen blong mi” long hem. Letem olgeta oli tekem ol ston ia i go hom blong i stap rimaenem olgeta long wanem oli bin lanem.

• Serem ol pikja we i soem sam long ol fevret stori abaot laef blong Sevya, mo askem ol pikinini blong talem wanem i stap hapen long ol pikja ia, long yu. Letem olgeta oli serem ol fevret stori blong olgeta abaot Jisas. Serem testemoni blong yu se, Jisas Kraes i fandesen blong fet blong yu.

1 Korin 6:19

Bodi blong mi i olsem wan tempol.

?Long wanem wei nao yu save helpem ol pikinini blong talem tangkyu from bodi blong olgeta, olsem wan presen we i kam long God, mo wantem blong lukaotem gud olgeta?

Samfala Aktiviti we Yu Save Mekem

• Soem pikja blong ol tempol (luk long aotlaen blong wik ia long Kam Folem Mi—Blong Wanwan Man, Woman, mo Famli), mo ridim ol toktok ia long 1 Korin 6:19: “Bodi blong yufala i olsem haos blong Tabu Spirit.” Helpem ol pikinini blong andastanem se Papa long Heven i wantem yumi blong mekem bodi blong yumi i klin mo tabu, olsem wan tempol.

• Soem wan pikja blong wan pikinini, mo putum ol pikja raon long hem, blong ol samting we oli gud blong ol bodi blong yumi, mo ol samting we oli nogud long bodi blong yumi. Invaetem ol pikinini blong gat janis blong talemaot ol gudfala samting mo karemaot ol nogud wan.

• Singsing tugeta wan singsing abaot bodi blong yumi, olsem “Head, Shoulders, Knees, and Toes” (Children’s Songbook, 275), mo askem ol pikinini from wanem oli tangkyu from bodi blong olgeta.

Tijim Doktrin: Ol Bigfala Pikinini

1 Korin 1:23–25

Blong stap waes, i minim blong stap trastem waes tingting blong God.

Ol pikinini we yu tijim, bae oli faenem—sapos oli no faenem yet—we sam pipol oli tijim ol samting we i no go wetem waes tingting blong God. Taem oli stadi long 1 Korin 1:23–25 i save helpem ol pikinini blong andastanem se yumi save trastem waes blong God, from we hem i moa bigwan bitim blong yumi.

Samfala Aktiviti we Yu Save Mekem

• Askem ol pikinini blong ridim 1 Korin 1:23–25 mo faenem ol toktok ia waes mo krangke fasin. Eksplenem plante pipol oli ting se ol tijing blong Pol oli krangke, be Pol i eksplenem se, blong stap long gospel blong Kraes, hem i waes tingting we i tru. ?From wanem i waes tingting blong stap biliv long wanem we God i stap tijim?

• Helpem ol pikinini blong mekem drama long olsem wanem oli save ansa long ol pipol we oli tingting se ol komanmen blong God oli “krangke”—olsem komanmen blong gat fet long Sevya, obei long Tok blong Waes, o obei long loa blong taeting. Eksampol, oli save testifae long ol blesing we i kam taem yumi stap laef folem ol tijing ia.

• Serem wan eksperiens taem ol narafala man oli tingting se ol bilif blong yu oli krangke, o serem wan eksampol long ol skripja. Letem ol pikinini oli serem ol eksperiens blong olgeta we i kolosap semmak. ?Olsem wanem nao 1 Korin 1:25 i helpem yumi blong stap fetful oltaem, taem ol narafala man oli singaotem biliv blong yumi krangke?

Fas Korin 2:11–14

Tabu Spirit i tijim ol trutok blong gospel long mi.

?Long wanem wei nao yu save helpem ol pikinini blong luksave se oli nidim Tabu Spirit blong andastanem “ol samting blong God”?

Samfala Aktiviti we Yu Save Mekem

• Askem ol pikinini blong mekem lis blong ol wei we yumi lanem abaot wol—eksampol, ol buk, skul mo intanet. Afta, ridim tugeta 1 Korin 2:11–14. ?Wanem nao ol ves ia oli tijim abaot, olsem wanem yumi lanem “ol samting blong God”?

• Talem wan taem we yu bin lanem wan samting tru long Spirit blong God. Helpem ol pikinini blong talemaot ol taem we oli bin filim Spirit. ?Wanem “ol samting blong God” (1 Korin 2:11) we Spirit i bin helpem yumi blong andastanem?

• Invaetem wanwan pikinini blong ridim wan long ol skripja ia: 1 Korin 2:11–14; 1 Nifae 10:17; Moronae 10:3–5; mo Doktrin mo Ol Kavenan 8:2–3. Askem ol pikinini blong serem wanem oli bin lanem long ol skripja ia, abaot olsem wanem Tabu Spirit i stap tijim yumi. ?From wanem yu tangkyu from presen ia blong Tabu Spirit.

1 Korin 6:19–20

Mi mas lukaotem gud bodi blong mi wetem respek mo mekem i tabu.

Taem yumi andastanem se ol bodi blong yumi oli ol presen we i kam long Papa long Heven, i helpem ol pikinini blong lukaotem ol bodi blong olgeta i tabu, iven sapos oli kasem temtesen blong no mekem olsem.

Samfala Aktiviti we Yu Save Mekem

• Karem wan kontena wetem ol pikja blong wan pikinini mo wan tempol insaed long hem. Invaetem ol pikinini blong ridim 1 Korin 6:19–20 mo talemaot se wanem i stap insaed long kontena. Letem oli openem mo toktok raon long olsem wanem ol bodi blong yumi oli olsem ol tempol.

• Toktok wetem ol pikinini abaot, olsem wanem yumi mas lukaotem gud wan tempol. Sapos ol bodi blong yumi oli olsem ol tempol, ?olsem wanem nao yumi mas tritim ol bodi blong yumi? Singsing o stap ridim ol toktok long wan singsing abaot ol tempol “The Lord Gave Me a Temple” (Children’s Songbook, 153), i save help blong ansarem ol kwestin ia. Taem yumi mekem ol mistek, ?olsem wanem nao yumi save mekem “ol tempol” blong yumi oli klin bakegen?

• Ridim tugeta “Bodi blong Yu I Tabu” (insaed long Blong Ol Yut Oli Kam Strong [gaed, 2022], 22–29). Invaetem ol pikinini blong mekem wan lis long bod, abaot kaonsel we oli fanem abaot, olsem wanem blong lukaotem gud ol bodi blong yumi.

Stap Leftemap Tingting blong Lanem Samting long Hom

Invaetem ol pikinini blong serem wetem ol famli blong olgeta, wan singsing we oli bin singsing long hem long klas mo wanem oli lanem long hem.

Stap Kam Antap long Fasin blong Yumi blong Stap Tij

Testifae abaot Jisas Kraes. Wan long ol impoten samting we yu save mekem olsem wan tija i blong, testifae abaot Jisas Kraes. Hemia bae i helpem ol pikinini blong mekem testemoni blong olgeta i kam strong mo filim lav blong Sevya long olgeta.