“4–10 Septemba. 1 Korin 14–16: ‘From we God I No Stamba blong Fasin Ya we Olgeta Samting Oli Paspas, Hem I Stamba blong Pis,’” Kam Folem Mi—Blong Praemeri: Niu Testeman 2023 (2022)
“4–10 Septemba. 1 Korin 14–16,” Kam Folem Mi—Blong Praemeri: 2023
4–10 Septemba
1 Korin 14–16
“From we God I No Stamba blong Fasin Ya we Olgeta Samting Oli Paspas, Hem I Stamba blong Pis”
Taem yu stap ridim 1 Korin 14–16, Tabu Spirit bae i helpem yu blong save wanem blong tijim long klas blong yu. Luklukbak long aotlaen ia blong kasem moa aedia
Invaetem Ol Pikinini blong Serem Wanem Oli Gat
Yu save ridim 1 Korin 14:26 laod, blong statem lesen blong wik ia. Poenemaot se taem yumi kam tugeta long jos, yumi save tijim (o bildimap mo helpem) ol narawan taem yumi serem wanem yumi stap lanem. Askem ol pikinini wanem oli save serem blong tijim wan narawan long klas tedei.
Tijim Doktrin: Ol Smol Pikinini
Mi save laef wetem Papa long Heven afta we mi ded, from se Jisas i bin laef bakegen long ded.
?Long wanem wei nao yu save tijim ol pikinini se, from se, Jisas Kraes i bin laef bakegen long ded, yumi laef bakegen?
Samfala Aktiviti we Yu Save Mekem
-
Ripitim sentens ia: “Long Kraes oli save laef bakegen long ded.” (1 Korin 15:22). Soem wan pikja blong Sevya we i laef bakegen long ded (luk long aotlaen blong wik ia long Kam Folem Mi—Blong Wanwan Man, Woman, mo Famli) o soem vidio blong “Jesus Is Resurrected” (ChurchofJesusChrist.org). Eksplenem se wan dei bae yumi evriwan i ded, be from se Jisas i bin laef bakegen long ded, bae yumi laef bakegen afta we yumi ded.
-
Soem long ol pikinini wan jaket, we i ripresentem bodi blong yumi. Taem yumi stap laef, spirit blong yumi i stap insaed long bodi blong yumi mo bodi blong yumi i save muvmuv (wetem jaket ia). Taem yumi ded, spirit blong yumi i lego bodi blong yumi mo bodi blong yumi i no save muvmuv (karemaot jaket mo putum long wan tebol o jea blong ripresentem wan bodi we i no gat spirit blong hem). Taem yumi laef bakegen long ded, ol spirit blong yumi oli gobak long ol bodi blong yumi (werem jaket bakegen), mo oli neva seperet bakegen. Letem ol pikinini blong gat janis blong werem jaket, mo stap karemaot taem wan narafala pikinini i stap eksplenem wanem i hapen taem yumi laef bakegen long ded.
Mi save kasem baptaes blong ol pipol we oli bin ded.
Taem ol pikinini oli stap rere from baptaes blong olgetawan, tingting long olsem wanem yu save helpem olgeta blong lukluk fored tu long janis blong mekem baptaes blong ol ded man.
Samfala Aktiviti we Yu Save Mekem
-
Help ol pikinini blong tingting long ol samting we oli no save mekem blong olgetawan. ?Huia i helpem olgeta blong mekem ol samting ia? Soem wan pikja blong wan long ol bubu blong yu we i bin ded finis, we i no bin kasem baptaes. Tokbaot man o woman ia long olgeta, mo eksplenem se man o woman ia i nidim help blong yumi blong baptaes.
-
Askem ol pikinini sapos oli gat eni memba blong famli we oli bin go long tempol blong mekem baptaes blong ol ded man. Soem ol pikja blong wan ples blong baptaes insaed long tempol Askem ol pikinini sapos oli save wanem i stap hapen long ples ia. Eksplenem se long tempol yumi save mekem baptaes long bihaf blong olgeta we oli bin ded mo no bin kasem baptaes. Afta, ol pipol ia oli save jusum blong akseptem o blong no akseptem baptaes ia.
Papa long Heven i wantem mi blong laef wetem Hem long selestial kingdom.
?Olsem wanem nao yu tijim ol pikinini abaot selestial, terestrial mo telestial kingdom. Ol aktiviti ia i save help.
Samfala Aktiviti we Yu Save Mekem
-
Raetem long bod selestial, terestrial, mo telestial. Helpem ol pikinini blong lanem blong talem ol toktok ia.
-
Soem pikja blong san mun mo ol sta. Invaetem ol pikinini blong putum long oda, hemia we laet blong hem i saen moa kasem hemia we i no saen tumas. Ridim 1 Korin 15:40–41 long ol pikinini (luk tu long Josef Smit Translesen long ves 40, futnot a). Eksplenem se san, mun mo sta oli ripresentem ol kingdom we yumi save laef long hem afta we bae yumi laef bakegen. Long selestial kingdom, yumi save laef wetem Papa long Heven.
-
Givim long ol pikinini wan kopi blong aktiviti pej blong wik ia blong oli kalarem. Taem oli stap kala, serem ol filing blong yu abaot Sevya, mo wanem we Hem i bin mekem, blong mekem se i posibol blong yumi laef wetem Papa long Heven bakegen.
“Flas blong san i narafala” (1 Korin15:41).
Tijim Doktrin: Ol Bigfala Pikinini
From Jisas Kraes mo Laef Bakegen long Ded blong Hem, bae mi laef bakegen long ded.
Ol pikinini we yu tijim, ?oli andastanem from wanem Laef Bakegen long Ded blong Jisas Kraes i impoten? Ol aedia ia oli save help.
Samfala Aktiviti we Yu Save Mekem
-
Invaetem ol pikinini blong ridim wan ves, wan afta wan, long 1 Korin 15:12–22, mo stap lukaotem ol ansa long kwestin ia “?Wanem bae i hapen sapos, i no gat wan laef bakegen long ded?”
-
Invaetem ol pikinini blong mekem drama long olsem wanem blong eksplenem laef bakegen long ded long wan narafala man. Blong kasem ol aedia, oli save luklukbak long wan singsing abaot Laef Bakegen long Ded blong Sevya, olsem “Did Jesus Really Live Again?” (Children’s Songbook, 64). Luk vidio ia tu “Until We Meet Again” (ChurchofJesusChrist.org). Serem testemoni blong yu abaot Laef Bakegen long Ded blong Kraes.
Mi save rere blong go long tempol blong baptaes blong ol ded man.
Baptaes blong ol dedman i wan hadwok wetem fulap glad mo lav, long bihaf blong ol bubu blong yumi. ?Olsem wanem nao yu save helpem ol pikinini blong rere blong tekpat long wok ia?
Samfala Aktiviti we Yu Save Mekem
-
Ridim 1 Korin 15:29. ?Wanem nao ol Sent long taem blong Pol, oli stap mekem we tedei, yumi tu yumi stap mekem? Askem long ol pikinini from wanem yumi stap baptaes long bihaf blong olgeta we oli ded finis. Sapos i gat nid, eksplenem se plante long ol bubu blong yumi oli no gat janis blong kasem baptaes mo konfemesen long laef ia. Long tempol, yumi save baptaes mo kasem konfemesen long bihaf blong olgeta.
-
Sam dei bifo long klas, askem wan papa o mama blong wan pikinini, blong helpem pikinini blong hem blong rere blong serem wan famli tri o talem wan stori abaot wan bubu blong hem, long taem blong klas. yu save tokbaot ol bubu blong yu tu.
-
Invaetem wan memba blong bisoprik o wan yut long wod blong yu blong tokbaot sam samting we ol pikinini oli mekem blong rere blong go insaed long tempol. Askem ol pikinini blong ademap ol aedia blong olgeta. Invaetem olgeta blong mekem wan gol blong go long tempol wan dei.
Afta we mi laef bakegen long ded, mi save laef long selestial kingdom.
Blong tijim Ol Man Korin abaot bodi we bae yumi kasem long taem yumi laef bakegen long ded, Pol i talemaot tri digri blong glori: selestial, terestrial mo telestial.
Samfala Aktiviti we Yu Save Mekem
-
Ridim 1 Korin 15:40–41 mo invaetem wan pikinini blong dro wan san, mun mo sta long bod. Askem ol memba blong klas blong talemaot se, wijwan kaen bodi we i laef bakegen long ded, ol wanwan droing ia oli ripresentem.
-
Singsing tugeta wan singsing we i go wetem topik ia “The Lord Gave Me a Temple” (Children’s Songbook, 153). O soem vidio blong “Our Eternal Life” (ChurchofJesusChrist.org). ?Wanem nao singsing o vidio ia i tijim yumi abaot stap rere blong laef long selestial glori?
-
Eksplenem se Josef Smit i bin luk wan visen, we i luk tri kingdom we i majem ol kaen bodi we Pol i stap tokbaot ia. Helpem ol pikinini blong faenem ol sentens long Doktrin mo Ol Kavenan 76:50–53, 70; 76:71–79; 76:81–82 we i tokbaot ol tri kingdom.
Stap Leftemap Tingting blong Lanem Samting long Hom
Invaetem ol pikinini blong askem ol papa mo mama blong olgeta blong talem wan stori abaot wan long ol bubu blong olgeta we i ded finis. Oli save serem stori ia long klas nekis wik.
Stap Kam Antap long Fasin blong Yumi blong Stap Tij
Leftemap tingting blong ol pikinini blong oli askem kwestin. “ Traehad blong luk ol kwestin blong ol pikinini olsem ol janis, be i no olsem wan samting we i kam spolem yumi, mo i blokem lesen blong yu. Ol kaen kwestin olsem, oli givim ol bigfala niu tingting long wanem ol pikinini oli stap tingting long hem, long wanem wari oli gat yet, mo olsem wanem blong fesem ol samting we oli stap lanem. Helpem olgeta blong luk se ansa long ol kwestin blong olgeta, oli save fanem insaed long ol skripja mo ol toktok blong ol profet we oli stap laef” (Teaching in the Savior’s Way,, 25–26