Jisas Kraes

11–17 Septemba

2 Korin 1–7

Yufala I Stretem Yufala Wetem God

Ridim 2 Korin 1–7 blong stap rere long lesen blong yu. Kam Folem Mi—Blong Wanwan Man, Woman, mo Famli i save helpem yu blong stadi long ol japta ia, mo aotlaen ia i save givim ol aedia blong tij.

serem pikja aekon

Invaetem Ol Pikinini blong Serem Wanem Oli Gat

Sam long ol pikinini long klas blong yu, maet oli bin raetem ol leta long wik ia abaot olsem wanem wan memba blong famli, i wan gudfala eksampol blong Jisas Kraes (luk long aotlaen blong wik ia long Kam Folem Mi—Blong Wanwan Man, Woman, mo Famli). Sapos oli mekem, askem olgeta bifo long klas blong ol serem wan leta long klas. O askem ol pikinini blong serem wan narafala samting we oli bin lanem.

tijing pikja bokis

Tijim Doktrin: Ol Smol Pikinini

2 Korin 1:3–4

Papa long Heven i givim kamfot long mi, mo mi save givim kamfot long ol narafala man.

?Wanem nao yu save mekem blong bildimap tras blong ol pikinini, blong oli save trastem se Papa long Heven bae i givim kamfot long olgeta. ?Olsem wanem nao yu save leftemap tingting blong olgeta blong givim kamfot long ol narafalawan?

Samfala Aktiviti we Yu Save Mekem

• Soem long ol pikinini sam samting we i givim kamfot olsem, wan blangket o bandej. Askem ol pikinini wanem nao i givim kamfot long olgeta taem oli harem nogud, o fraet o gat ol narafala problem. Ridim 2 Korin 1:3–4 wetem ol pikinini, mo eksplenem se “trabol” i wan narafala toktok blong ol problem we i had tumas. Serem sam wei we Papa long Heven i bin givim kamfot long yu, mo testifae se Hem bae i givim kamfot tu long ol pikinini.

• Soem ol pikja blong ol pipol we oli stap kasem baptaes (luk long Gospel Art Buk, ol namba 103–4) taem yu stap ridim 2 Korin 1:4 long ol pikinini. Eksplenem se taem yumi kasem baptaes, yumi promes blong givim kamfot long ol narafala man. ?Olsem wanem nao yumi save folem kaonsel blong Pol we i talem “Hem i stap givhan long mifala long olgeta trabol blong mifala”?

2 Korin 2:7–8, 10

Mi save fogivim ol narafala man.

Jusum aot long ol aktiviti ia—o mekemap wan blong yu—blong helpem olgeta blong gat wan strong filing blong wantem stap fogivim ol narafala man.

Samfala Aktiviti we Yu Save Mekem

• Eksplenem long ol pikinini se Pol i wantem blong ol Sent blong Korin blong fogivim wan man we i bin mekem sin. Ridim 2 Korin 2:7–8, 10, mo invaetem ol pikinini blong putum han blong olgeta long hat blong olgeta, long evri taem we oli harem ol toktok ia fogivim mo fogivim hem finis.

• Mi mi talem long yufala, se plis yufala i go mekem hem i save we yufala i lavem hem Letem wanwan i gat janis blong talem “Mi sore” mo “Mi fogivim yu.” ?Olsem wanem nao yumi helpem ol pipol oli save se yumi fogivim olgeta? Eksplenem se wan wei blong stap “talem stret lav blong yu long olgeta,” o soem lav long olgeta (2 Korin 2:8).

2 Korin 4:1–2

Mi biliv blong mas stap ones.

Pol i bin tijim se ol wokman blong Kraes oli bin “lego finis ol fasin blong haed, mo blong sem mo no save mekem ol giaman fasin.” Tingting hevi long ol wei we yu save mekem filing blong hat blong ol pikinini blong wantem, blong stap ones long evri samting.

Samfala Aktiviti we Yu Save Mekem

• Helpem ol pikinini blong lanem baehat ol toktok ia “Mifala i biliv blong mas stap ones ” (Ol Toktok blong Bilif 1:13). Raetem sentens ia long ol pepa jen blong han, we ol pikinini oli save flasem mo werem. Eksplenem se blong sta ones i blong stap talem trutok.

• Askem ol pikinini blong leftemap han blong olgeta taem yu talem, wan samting we i tru, mo putum han i go daon taem yu talem wan samting we i no tru. Mekem ol simpol toktok mo we i klia olsem, “Tedei hem i Sandei” o “Mi gat tri nus.” Ripitim aktiviti ia plante taem, letem ol pikinini oli gat janis blong stap talem wan toktok we i tru mo i no tru. ?From wanem nao Papa long Heven i wantem yumi blong stap talem trutok?

• Soem vidio ia “A Visit with Elder Ulisses Soares” (ChurchofJesusChrist.org). ?Wanem nao yangfala Soares i lanem abaot fasin blong stap talem trutok? Leftemap tingting blong ol pikinini blong rere blong mekem ol kavenan blong baptaes, taem oli stap talem trutok oltaem.

tijing pikja bokis

Tijim Doktrin: Ol Bigfala Pikinini

2 Korin 1:3–4

Papa long Heven i givim kamfot long mi, mo mi save givim kamfot long ol narafala wan.

Taem yumi stap tingbaot ol wei we God i bin givim kamfot long yumi, i givim insperesen long yumi blong givim kamfot long ol narafala man.

Samfala Aktiviti we Yu Save Mekem

• Taem yu ridim 2 Korin 1:3–4, askem ol pikinini blong lisin long wan ansa long kwestin ia “?Wanem nao God i mekem blong yumi?” Helpem ol pikinini blong mekem lis blong ol wei we God i stap givim kamfot long yumi. Invaetem ol pikinini blong serem ol eksperiens blong taem we oli bin harem nogud wari o fraet mo God i givim kamfot long olgeta.

• Invaetem ol pikinini blong tokbaot ol wei we yumi save stap obei long ol kavenan we yumi mekem taem yumi baptaes mo save givim kamfot long ol narafalawan (luk long Mosaea 18:9). Givim taem long olgeta blong tingting long wan we oli save we i nidim kamfot, mo mekem wan plan blong go aot mo givhan long man o woman ia.

2 Korin 2:5–11

Mi save fogivim ol narafala man.

I had blong fogivim ol narafala man taem we oli no stap kaen long yumi. Be ol pikinini we yu tijim bae oli eksperiensem lav, pis mo hapines taem oli lanem blong fogiv.

Samfala Aktiviti we Yu Save Mekem

• Talem long ol pikinini se, wan long Korin i bin mekem sin mo “lelebet trabol ” long ol Sent (luk long 2 Korin 2:5). Askem ol pikinini blong lukaotem mo faenem wanem Pol i wantem ol Sent blong mekem long 2 Korin 2:7–8 .

• Serem wan eksperiens taem yu bin fogivim wan narafala man—o wan narafala man i bin fogivim yu—mo eksplenem wanem nao yu bin filim afta long taem ia. O serem vidio blong “The Goal: A Story of Faith, Friendship and Forgiveness” (ChurchofJesusChrist.org). Invaetem ol pikinini blong oli serem ol eksperiens blong olgeta abaot fasin blong fogivim narafala man.

2 Korin 5:6–7

Mi “no makem laef blong mi long ol samting we mi luk be, mi makem long bilif blong mi.”

Tingting long olsem wanem blong leftemap tingting blong ol pikinini blong obei long ol komanmen blong God, iven oli no luk ol blesing we oli wantem luk long semtaem we oli stap obei.

Samfala Aktiviti we Yu Save Mekem

• Ridim 2 Korin 5:6–7 mo Alma 32:21 wetem ol pikinini, mo askem olgeta blong lukaotem ol toktok mo ol sentens we i help blong eksplenem wanem i fet. Askem olgeta blong raetemdaon ol mining blong olgeta, mo serem olgeta wetem wanwan long olgeta.

• Invaetem wan pikinini blong sarem ae blong hem, mo askem ol narafala pikinini blong givim daereksen blong helpem hem blong komplitim wan wok olsem, blong bildim wan taoa wetem ol brikis o blong wokbaot krosem rum. ?Olsem wanem nao aktiviti ia i helpem yumi blong andastanem wanem i minim blong wokbaot wetem fet” long God?

• Soem vidio ia “Reunited by Faith” (ChurchofJesusChrist.org), mo askem ol pikinini, olsem wanem yangfala man long vidio ia i bin wokbaot wetem fet. Serem wan eksperiens, taem yu wokbaot wetem fet mo leftemap tingting blong ol pikinini blong serem ol eksperiens blong olgeta.

2 Korin 7:8–10

Harem nogud blong God i lidim mi blong sakem sin.

Hem i nomo blong filim sem taem oli kasem yumi stap mekem wan samting we i rong. Helpem ol pikinini blong talem wanem i defren long ol filing ia, wetem harem nogud we i olsem hemia blong God, we i lid i go long fasin blong sakem sin.

Samfala Aktiviti we Yu Save Mekem

• Eksplenem se long 2 Korin 7:8–10, Pol i luklukbak long wan leta we hem i bin raetem bifo, i go long Ol Sent, we hem i stap askem askem strong mo wonem olgeta abaot ol sin blong olgeta. Ridim ol ves ia tugeta. ?From wanem Pol i glad se Ol Sent oli harem nogud? Poenemaot se kaen harem nogud ia hem i olsem hemia blong God.

• Askem ol pikinini blong tingbaot wan taem we oli bin mekem wan samting i rong mo oli filim nogud from. Invaetem olgeta blong askem olgetawan, “?From wanem mi harem nogud?” afta, serem ol ansa blong olgeta. Raetem ol ansa blong olgeta long bod (eksampol, “Mi fraet se bae mi kasem wan problem” o “Mi save se mi mekem Papa long Heven i harem nogud” o “Mi mekem wan i krae”). ?Wijwan long ol ansa long bod ia i olsem “harem nogud olsem hemia blong God”? (2 Korin 7:10). ?From wanem harem nogud olsem hemia blong God i moa gud bitim harem nogud we yumi stap filim taem yumi mekem wan samting i rong?

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong serem wetem ol famli blong olgeta, wan aktiviti we oli mekem long klas blong tedei, ating long taem blong famli haos naet.

Stap Kam Antap long Fasin blong Yumi blong Stap Tij

Soem wan skripja i stap. Jusum wan ves long skripja we yu luk se i gat mining long yu, mo soem klia long klasrum blong yu, we ol pikinini bae oli luk plante taem. Maet evri pikinini oli save gat janis blong jusum wan skripja blong soem klia.

aktiviti pej: Mi biliv blong mas stap ones