faatanoa o le vai papatisoga i le malumalu

4–10 Setema

1 Korinito 14–16

“O Le Atua E Le o le Atua ia o le Faasoesa, a o le Filemu”

Tusifaamaumau ou lagona a o e faitau i le 1 Korinito 14–16. Tatalo mo mea ua aoaoina ai oe e le Agaga, ma ole atu i le Tama Faalelagi pe o i ai nisi mea e finagalo o Ia e te aoaoina.

Tusifaamaumau Ou Lagona Uunai

Talu ai ona sa fou le Ekalesia ma ona aoaoga faavae i Korinito, e malamalama lava le faapea, sa oo le Au Paia i Korinito i le vavao. Sa aoaoina muamua i latou e Paulo i upumoni faavae o le talalelei: “Na maliu Keriso ma sui o a tatou agasala … na tanu foi o ia ma toe tu mai i le aso tolu” (1 Korinito 15:3–4). Peitai e lei leva ae amata e nisi o tagata o le ekalesia ona aoao atu e faapea “e leai se toetu mai o e ua oti” (1 Korinito 15:12). Sa augani atu Paulo ia i latou e “taofi mau” i upumoni sa aoaoina ai i latou (1 Korinito 15:2). Pe a tatou fetaia’i ma ni manatu feteena‘i e faatatau i upumoni o le talalelei, e lelei ona manatua o le “Atua e le o le atua ia o le faasoesa, a o le filemu” (1 Korinito 14:33). O le faalogo i auauna atofaina a le Alii ma le taofimau i upumoni faigofie latou te aoao mai pea lava pea, e mafai ona fesoasoani tatou te maua ai le filemu ma le “tumau i le faatuatua” (1 Korinito 16:13).

aikona o su’esu’ega faaletagata lava ia

Manatu mo Suesuega Faaletagata Lava Ia o Tusitusiga Paia

1 Korinito 14

E mafai ona ou sailia le meaalofa o valoaga.

O le a le meaalofa o le vavalo? Pe o le tomai lea e valoia ai le lumanai? E mo nao perofeta lava? Pe e mafai e soo se tasi ona maua lenei meaalofa?

Mafaufau loloto i nei fesili ao e suesue i le 1 Korinito 14:3, 31, 39–40. E mafai foi ona e faitau i le Faaaliga 19:10 ma le “Valoaga, Valoia” i le Taiala i Tusitusiga Paia (scriptures.ChurchofJesusChrist.org). E faavae i mea ua iloa, e faapefea ona e faamatalaina le meaalofa o valoaga? Mata o le a le uiga o le faamatalaga a Paulo ina ua ia valaaulia tagata o Korinito e “naunau ina ia perofeta”? (1 Korinito 14:39). E mafai faapefea ona e talia lenei valaaulia?

Tagai foi i le Ioelu 2:28–29; Alema 17:3; Mataupu Faavae ma Feagaiga 11:23–28.

1 Korinito 14:34–35

E faapefea ona faatatau le faamatalaga e uiga i tamaitai o loo i nei fuaiupu i aso nei?

I aso o Paulo, sa eseese ni faamoemoega e uiga i le auala e auai ai tamaitai i faalapotopotoga, e aofia ai sauniga lotu. Po o le a lava le uiga o aoaoga i le 1 Korinito 14:34–35 i aso o Paulo, e le tatau ona malamalama i ai e faapea o lona uiga e le mafai ona tautatala ma taitai tamaitai i le Ekalesia i aso nei (tagai Faaliliuga a Iosefa Samita, 1 Korinito 14:34 [i le 1 Korinito 14:34, vaefaamatalaga e]). Na saunoa mai Peresitene Russell M. Nelson i tamaitai o le Ekalesia i aso nei: “Matou te manaomia lo outou malosi, lo outou liua, lo outou talitonuga maumaututu, lo outou tomai e taitai, lo outou atamai, ma o outou leo. E le mafai ona atoa le malo o le Atua ma e le mafai lava ona atoa e aunoa ma tamaitai o e osia feagaiga paia ona tausia lea, o tamaitai o e e mafai ona tautatala atu ma le mana ma le pule a le Atua!” (“O Se Talosaga i O’u Tuafafine,” Liahona, Nov. 2015, 96).

1 Korinito 15:1–34, 53–58

Sa maua e Iesu Keriso le manumalo i le oti.

O le Toetu o Iesu Keriso ua matuai taua i le faaKerisiano, e ono faapea mai se tasi, a aunoa ma lea, ua leai se faaKerisiano—ina ia faaaoga upu a Paulo, “po ua faaleaoga la matou talai, ua faaleaoga foi lo outou faatuatua” (1 Korinito 15:14). Ae sa aoao atu nisi o le Au Paia i Korinito e faapea, o le a “leai se toetu mai o e ua oti” (1 Korinito 15:12). A o e faitau i le tali a Paulo i le 1 Korinito 15, faaalu sina taimi e mafaufau loloto ai po o le a se suiga o le a i ai lou olaga pe afai e te lei talitonu i le Toetu (tagai 2 Nifae 9:6–19; Alema 40:19–23; Mataupu Faavae ma Feagaiga 93:33–34). O le a le uiga ia te oe o le fasifuaitau “Afai foi ua le toe faatuina Keriso, ua faaleaoga lo outou faatuatua”? (fuaiupu 17).

E taua foi le ta’ua na faatatau atu Paulo i le papatisoga mo e ua oti o se faamaoniga mo le moni o le toetu (tagai 1 Korinito 15:29). Ua faapefea ona faamalosia e galuega o le malumalu ma talafaasolopito o aiga lou faatuatua i le aoaoga faavae o le toetu?

Tagai foi Mataupu Faavae ma Feagaiga 138:11–37.

1 Korinito 15:35–54

O tino toetutu e ese mai i tino faaletino.

Pe na e mafaufau ea pe faapei se tino toetu? E tusa ai ma le 1 Korinito 15:35, sa mafaufau foi faapena nisi o tagata Korinito. Faitau le tali a Paulo i fuaiupu 36–54, ma maitau upu ma fasifuaitau ua faamatalaina ai le eseesega i le va o tino faaletino ma tino toetu. A o e faia, atonu e te faatusatusaina ia fuaiupu 40–42 ma le Mataupu Faavae ma Feagaiga 76:50–112. O le a se mea ua faaopoopo atu e le faaaliga ia Iosefa Samita i lou malamalamaaga? (tagai foi Faaliliuga a Iosefa Samita, 1 Korinito 15:40 [i le 1 Korinito 15:40, vaefaamatalaga a]). Aisea e taua ai nei upumoni ia te oe?

Tagai i le Luka 24:39; Alema 11:43–45; Mataupu Faavae ma Feagaiga 88:14–33.

la oso

“E ese le pupula o le la” (1 Korinito 15:41).

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

1 Korinito 15:29.Tatou te aoao mai i le fuaiupu 29 sa auai le Au Paia anamua i papatisoga mo e ua maliliu, e pei lava ona tatou faia i aso nei. O le a faapefea ona tatou faamatala atu i isi le pogai tatou te papatiso ai mo o tatou tuaa? (tagai “What Are Baptisms for the Dead?,” [vitio], ChurchofJesusChrist.org). O a ni mea o tatou faia o se aiga e tuuina atu ai sauniga o le malumalu mo o tatou tuaa ua maliliu o loo manaomiaina? E mafai ona e maua nisi punaoa i lenei autu i le tusiga o Autu o le Talalelei “Papatisoga mo e ua Maliliu” (topics.ChurchofJesusChrist.org) ma i le FamilySearch.org.

1 Korinito 15:35–54.O a ni meafaitino po o ni ata e mafai ona e faaali atu e fesoasoani i lou aiga ia malamalama i nisi o upu sa faaaoga e Paulo e faamatala ai le eseesega o tino faaletino mai tino toetu? Mo se faataitaiga, ina ia faaali atu le eseesega i le va o le pala ma le le pala (tagai fuaiupu 52–54) e mafai ona e faaali atua le uamea ua elea ma le uamea e le elea. Po o le, e mafai foi ona e faatusatusaina se mea vaivai i se mea malosi (tagai fuaiupu 43).

1 Korinito 15:55–57.E faapitoa le anoa o se talanoaga e uiga i nei fuaiupu pe afai e iloa e lou aiga se tagata ua maliu. E mafai e tagata o le aiga ona molimau i le auala ua aveese ai e Iesu Keriso “le tui o le oti” (fuaiupu 56).

1 Korinito 16:13.Ina ia fesoasoani i tagata o le aiga ia fesootai i lenei fuaiupu, e mafai ona e tusia se lio i le palapala ma faatonu se tagata o le aiga e “tumau” ai i totonu a o moeiini ona mata. Ona taumafai lea o isi e tulei pe toso ese o ia mai le li’o. O le a le eseesega o i ai pe afai e pupula mata o le tagata o loo i totonu o le lio ma mafai ona “mataala”? O le a se mea e mafai ona tatou faia e “tumau mausali” pe a tofotofoina i tatou e fai ni filifiliga leaga? (tagai foi “Stay in the Boat and Hold On!,” [vitio], ChurchofJesusChrist.org).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Viiga fautuaina: “Ua Toetu mai o Ia!,” Viiga, nu. 111.

Faaleleia o Suesuega Faaletagata Lava ia

Tagai mo ni mamanu. I tusitusiga paia tatou te maua ai mamanu o loo faaalia ai le ala e fai ai e le Alii Lana galuega. O a ni mamanu e te maua i le 1 Korinito 14 e fesoasoani tatou te malamalama ai i le ala e aoao ai ma faagaeetia ai le tasi ma le isi?

O Keriso o loo faaali atu ia Maria i le togalaau o le tuugamau

Se a Le Mea E Te Tagi Ai?, © saunia e Simon Dewey 2021 Faaaogaina i le faatagaga a le Altus Fine Art/www.altusfineart.com