28 Aokuso–3 Setema

1 Korinito 8–13

“O Outou o le Tino o Keriso ”

A o e faitau ma le agaga tatalo i le 1 Korinito 8–13, e mafai ona tautala atu le Agaga Paia ia te oe i auala ma‘ale‘ale (tagai 1 Tupu 19:11–12). O le tusifaamaumauina o nei lagona o le a fesoasoani e te manatua ai ou lagona ma manatu sa i ai i le taimi o lau su‘esu‘ega.

Tusifaamaumau Ou Lagona Uuna‘i

I le taimi o Paulo, sa avea ai Korinito ma totonugalemu o se fefa‘ataua‘iga tamaoaiga faapea ma tagata sa nofoia mai le Malo atoa o Roma. Faatasi ai ma le tele na‘ua o aganuu ma tapua‘iga eseese i le nuu, sa faigata ai i tagata o le Ekalesia i Korinito ona tumau i le lotogatasi, o lea sa taumafai ai Paulo e fesoasoani ia i latou ia maua le tasi i lo latou talitonu ia Keriso. O lenei lotogatasi sa tatau ona sili atu nai lo na o le nonofo faatasi i le filemu; sa le i fai atu Paulo ia i latou ia tau lava o le onosa‘i i eseesega o le tasi ma le isi. Ae, sa ia a‘oa‘o atu a outou auai i le Ekalesia a Iesu Keriso, ua outou “papatisoina … i le tino e tasi,” ma e manaomia uma lava itutino o le tino (1 Korinito 12:13). A leiloa se tagata e to‘atasi o le ekalesia, e pei lava o le leai o se vae po o se lima, ma o le taunu‘uga e vaivai ai le tino. A mafatia se tagata e toatasi o le ekalesia, e tatau ona tatou tau fai lagonaina uma ma fai la tatou vaega e faaitiitia ai. I lenei ituaiga o lotogatasi, e le na o le faailoaina o eseesega ae ia faapelepele i ai, aua a aunoa ma tagata o le ekalesia e eseese meaalofa ma tomai, o le a tapulaa foi le tino. O lea la, pe e te lagonaina le pei ua leva ona e lagolelei i totonu o le Ekalesia, pe o e tau mafaufau pe e te auai moni i ai, o le savali a Paulo ia te oe, o le lotogatasi e le o le tutusa. E te mana‘omia ou uso a Au Paia, ma e mana‘omia oe e ou uso a Au Paia

Manatu mo Su‘esu‘ega Faaletagata Lava Ia o Tusitusiga Paia

1 Korinito 10:1–13

E saunia e le Atua se auala e sao ai mai faaosoosoga.

O aafiaga faaleagaga, e oo lava i aafiaga faavavega, e le tuusaunoa ai i tatou mai faaosoosoga ua “ [masani ai le tagata” (1 Korinito 10:13). Atonu o le tasi lena o mafuaaga na tusi ai Paulo e uiga i le mea na ala ai ona tauivi tagata Isaraelu i aso o Mose ma faaosoosoga, e ui ina sa latou vaaitino i vavega tetele (tagai Esoto 13:21; 14:13–31). A o e faitau i le 1 Korinito 10:1–13, o a ni lapataiga i aafiaga o tagata Isaraelu e foliga mai e faatatau foi ia te oe? O a ni ituaiga o mea e “sao” ai mai tofotofoga ua tuuina atu e le Tama Faalelagi ia te oe? (tagai foi Alema 13:27–30; 3 Nifae 18:18–19).

1 Korinito 10:16–17; 11:16–30

O le faamanatuga e soofaatasi ai i tatou o ni tagata o le Ekalesia a Keriso.

E ui o le sauniga o le faamanatuga e aofia ai se tautinoga patino i le va o se tagata ma le Alii, ae o se aafiaga foi tatou te fefaasoaai ai ma isi. E toetoe lava o taimi uma tatou te fetagofi faatasi ai i le faamanatuga, o se tino [e tasi] o le Au Paia. Faitau i mea na aoao mai e Paulo e uiga i le faamanatuga, ma mafaufau pe mafai faapefea e lenei sauniga paia ona fesoasoani i le “toatele” ia “tasi” ia Keriso (1 Korinito 10:17). E faapefea e le ai ma inu i le faamanatuga ona fesoasoani e te lagona ai le latalata atu ia Keriso ma isi tagata talitonu? E faapefea ona faatosina e nei fuaiupu ou lagona e uiga i le faamanatuga ma le ala e te saunia i ai?

1 Korinito 11:11

I le fuafuaga a le Atua, e manaomia e alii ma tamaitai ia le tasi ma le isi.

I le 1 Korinito 11:4–15, na faatatau atu Paulo i tu ma aga faaleaganuu ia tatou te le o mulimulitaia i aso nei. Ae ui i lea, na aoao mai foi e Paulo se upumoni taua e faatatau i le faavavau, o loo maua i le fuaiupu 11. E te manatu o le a le uiga o lenei fuaiupu, ma aisea e taua ai? Na aoao mai Elder David A. Bednar, “O le alii ma le tamaitai ua fuafuaina e aoao mai, faamalosia, faamanuia, ma faaatoatoa e le tasi le isi” (“Matou te Talitonu i le Nofo Mama,” Liahona, Me 2013, 42). E faapefea ona faatosina e lenei upumoni se faaipoipoga? E tatau faapefea ona aafia ai le ala tatou te auauna atu ai i le Ekalesia?

Tagai foi Jean B. Bingham, “Auauna Atu e pei ona Faia e le Faaola,” Liahona, Me 2020, 60–63.

1 Korinito 12–13

O meaalofa faaleagaga ua tuuina mai ina ia manuia ai fanau uma a le Tama Faalelagi.

O le lisi o meaalofa faaleagaga o loo i le 1 Korinito 12–13 e le o atoa. Ae o se nofoaga lelei lea e amata ai a o e faailoaina ma mafaufau loloto i meaalofa faaleagaga ua tuuina mai e le Tama Faalelagi ia te oe. O le tusiga “Meaalofa Faaleagaga” i le Gospel Topics (topics.ChurchofJesusChrist.org) e mafai ona fesoasoani ina ia e malamalama lelei ai i nei meaalofa. A o e faitau i le lisi o meaalofa a Paulo, atonu e te faaopoopo i ai ni isi e te matauina i isi, ia te oe lava, po o i tagata o loo i tusitusiga paia. Afai o i ai sau faamanuiaga faapeteriaka, atonu o loo ta’ua ai nisi o au meaalofa faaleagaga. E faapefea ona fesoasoani nei meaalofa e faamanuia ai isi? Mafaufau pe mafai faapefea ona e saili “naunau ai i meaalofa e sili” (1 Korinito 12:31).

Tagai foi 1 Korinito 14; Moronae 10:8–21, 30; Mataupu Faavae ma Feagaiga 46:8–26; Mataupu Faavae o le Faatuatua 1:7.

Manatu mo Suesuega Faaleaiga o Tusitusiga Paia ma Afiafi Faaleaiga

1 Korinito 9:24–27.Sa faatusa e Paulo le ola i le talalelei i le tamoe i se tuuga, e mafai ona fai se tuuga a le tou aiga e faamalamalama ai lenei manatu. Tuu atu se pale i tagata uma e faamaeaina le tuuga, ma talanoa i le auala o le a manumalo ai i latou uma o e mulimuli ma le maelega ia Iesu Keriso i lenei olaga i le taui “e le pala lava” (1 Korinito 9:25; tagai foi 2 Timoteo 4:7–8). O a ni mea e fai e se tagata tamoe e saunia ai mo se tuuga? O a ni mea e mafai ona tatou faia e saunia ai e toe foi atu i le Tama Faalelagi?

Sa faatusa e Paulo le ola i le talalelei i le tamoe i se tuuga.

1 Korinito 12:1–11.A uma ona faitau faatasi nei fuaiupu, mafaufau e tuu atu i tagata uma se fasipepa ua i ai i luga le igoa o se isi tagata o le aiga. Fai atu i tagata uma e lisi meaalofa faaleagaga ua latou matauina o loo i ai i lena tagata. E mafai ona e pasi faataamilo ia fasipepa seia oo ina maua e tagata uma se avanoa e tusi ai e uiga i meaalofa a tagata taitotasi o le aiga.

1 Korinito 12:3.Aisea e manaomia ai le Agaga Paia i le mauaina o se molimau ia Iesu Keriso? O le a se mea e mafai ona tatou faia e valaaulia ai le Agaga Paia e faamalosia a tatou molimau ia te Ia?

1 Korinito 12:12–27.O le tala faatusa a Paulo e uiga i le tino e mafai ona avea ma se auala e manatua pea e talanoa ai le lotogatasi o le aiga. Mo se faataitaiga, e mafai ona taumafai tagata o le aiga e tusi se ata o le tino ia nao mata po o taliga (tagai fuaiupu 17). O a mea o fautua mai e nei fuaiupu e uiga i le auala e tatau ona tatou faia ai le tasi ma le isi o ni tagata o le aiga?

1 Korinito 13:4–8.O le faauigaga a Paulo o le alofa mama, e mafai ona faia ai se anavatau musuia mo lou aiga. E mafai ona e totofi atu i tagata taitoatasi o le aiga e suesue se fuaitau i fuaiupu 4–8 ma aoao atu i tagata uma o le aiga le uiga o le faaaoga o faauigaga, faataitaiga, ma aafiaga patino. E faapefea ona avea le Faaola ma faataitaiga o nei uiga auaumama? E mafai foi ona outou faia faatasi ni pepa o loo i ai se savali mo nei fuaitau taitasi ma faapipii solo i totonu o le tou fale. Ia fatufatuai!

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Loo Tautalagia Iinei Le Alofa,” Tusipese a Tamaiti, 102–03.

Faaleleia o Lo Tatou Aoao Atu

Faaali atu se mau. Faaali atu se fuaiupu e te iloa e anoa i se nofoaga e mafai ona vaai soo i ai tagata o le aiga. Valaaulia isi tagata o le aiga e feauaua’i e filifili se mau e faaali i luga.

“O le areto tatou te tofitofi ai, e le o le mafuta faatasi ea lea ma le tino o Keriso? Aua o i tatou le toatele, o le areto e tasi ma le tino e tasi i tatou” (1 Korinito 10:16–17).