Iesu o loo talanoa i se tamaitiiti laitiiti

18–24 Setema

2 Korinito 8–13

“E Alofa le Atua i Le Ua Foa’i ma le Loto Malie”

O le tusifaamaumauina o lagona faaleagaga o le a fesoasoani e te manatua ai mea e te a’oa’oina i le taimi o lau su’esu’ega o tusitusiga paia. E mafai ona e tusia i se apitala’aga mo su’esu’ega, fai ni faamatalaga pupuu i avanoa i autafa o au tusitusiga paia, faaopoopo faamatalaga i lau polokalama o le Potutusi o le Talalelei [Gospel Library], pe pu’e se talatalaga o ou mafaufauga.

Tusifaamaumau Ou Lagona Uuna’i

O le a se mea e te faia pe a e faalogo sa tauivi i le mativa se aulotu o le Au Paia i se isi nofoaga? O le tulaga lenei sa faamatala atu e Paulo i le Au Paia i Korinito i le 2 Korinito 8–9. Sa faamoemoe na te faatauanaua le Au Paia i Korinito e foai atu nisi o a latou mea e tele i Au Paia sa manaomia le fesoasoani. Ae o tua atu o se talosaga mo foai, o loo i ai foi i upu a Paulo ni upumoni loloto e uiga i le foai atu: “Ia taitoatasi ma foai e pei ona filifili i lona loto; ‘aua ma le tiga, ‘aua foi ma le faatauanauina: aua e alofa le Atua i le ua foai ma le loto malie” (2 Korinito 9:7). I o tatou aso, o loo i ai pea le Au Paia i le lalolagi atoa o loo manaomia le fesoasoani. O nisi taimi, o le mea sili lava tatou te faia mo i latou o le anapogi ma foa’i atu taulaga anapogi. I isi tulaga, o le tatou foai atu e mafai ona sili atu le tu’usa’o ma le patino. Po o a lava a tatou ituaiga osigataulaga e fai, e aoga le iloilo o o tatou lagona e faaosofia ai le foai atu. Pe o a tatou osigataulaga o ni faaalia lea o le alofa? Aua, o le alofa lea e mafua ai le loto malie o se tagata foai.

aikona o su’esu’ega faaletagata lava ia

Manatu mo Suesuega Faaletagata Lava Ia o Tusitusiga Paia

2 Korinito 8:1–15; 9:5–15

E mafai ona ou faasoa atu ma le loto malie mea ua maua e faamanuia ai e matitiva ma e le tagolima.

E toatele lava tagata o e o loo manaomia le fesoasoani i le lalolagi atoa. E mafai faapefea ona tatou faia se eseesega? Sa ofoina mai e Elder Jeffrey R. Holland le fautuaga lenei: “Mauoa pe mativa, e tatau ona tatou ‘fai le mea ua tatou mafai’ pe a i ai nisi e le tagolima [tagai Mareko 14:6,8]. … O le [Atua] o le a fesoasoani ma taiala outou i ni galuega agaalofa faalesoo pe afai o outou mananao ma le lotofuatiaifo ma tatalo ma saili mo ni auala e tausi ai poloaiga ua Ia tuuina mai pea lava pea ia i tatou” (“Pe le o i tatou ea o ni Tagata Aisi?,” Liahona, Nov. 2014, 41).

Faitau le 2 Korinito 8:1–15; 9:6–15, ma ia malamalama i mataupu faavae sa aoao mai e Paulo e uiga i le tausiaina o e matitiva ma e le tagolima. O le a se mea ua musuia ai oe i le fautuaga a Paulo? Atonu e te tatalo mo le taitaiga e uiga i le mea e mafai ona e faia e faamanuia ai se tasi o manaomia le fesoasoani. Ia mautinoa e faamaumau ou lagona e te maua ma faatino.

Tagai foi Mosaea 4:16–27; Alema 34:27–29; Russell M. Nelson, “O Le Poloaiga Lona Lua ma le Sili,” Liahona, Nov. 2019, 96–100; Henry B. Eyring, “E Le o Lenei Ea le Anapogi Ou te Loto I Ai?,” Liahona, Me 2015, 22–25.

2 Korinito 11:1–6, 13–15; 13:5–9

“Ina tofotofo ia outou ia te outou, po ua outou i le faatuatua.”

O aso nei e pei o aso o Paulo, e i ai i latou o e saili e taitai ese i tatou, “mai le [faigofie o loo] ia Keriso” (2 Korinito 11:3). Mo lena mafuaaga, e taua ai le faia o le mea na fautuaina mai e Paulo: “Ina tofotofo ia outou ia te outou, po ua outou i le faatuatua” (2 Korinito 13:5). E mafai ona e amataina lenei faagasologa i le mafaufau po o le a le uiga o le “ua outou i le faatuatua.” E faapefea ona e iloa pe o e i le faatuatua? Vaavaai mo avanoa e tofotofo ai oe lava.

O se vaega o lou tofotofoga, atonu foi e te mafaufau loloto i le fuaitau, “o le [faigofie o loo] ia Keriso” ((2 Korinito11:3). Ua faapefea ona e maua le faigofie ia Keriso ma Lana talalelei? E ono faapefea ona “faaleagaina [lou mafaufau] mai [lena faigofie]”? O le a se fautuaga aoga e te maua i le 2 Korinito 11:1–6, 13–15?

Ia mafaufau foi i le fautuaga lenei mai ia Peresitene Dieter F. Uchtdorf: “Afai o loo e manatu e le o matua aoga tele le talalelei ia te oe, ou te valaaulia oe ia taofi teisi lava, toe tagai i lou olaga mai se mea maualuga, ma faafaigofie lou auala i le avea ai ma soo. Taulai atu i aoaoga faavae autu, mataupu faavae, ma faaaogaaga o le talalelei. Ou te folafola atu o le a taiala ma faamanuia outou e le Atua i o outou ala e faamalieina ai le olaga, ma o le a mautinoa lava le aoga atili o le talalelei mo outou” (“E Aoga!,” Liahona, Nov. 2015, 22).

2 Korinito 12:5–10

Ua lava le alofa tunoa o le Atua e fesoasoani ou te maua ai le malosi i o’u vaivaiga.

Tatou te le iloa po o le a le “mea matuitui i le tino” o Paulo, ae ua tofu i tatou uma ma mea matuitui tatou te moomoo ia aveese e le Atua mai o tatou olaga. Mafaufau i au mea matuitui ao e faitau i le 2 Korinito 12:5–10, ma mafaufau loloto i mea ua e aoaoina e uiga ia Iesu Keriso i nei fuaiupu. O a mea na aoao mai e Paulo i nei fuaiupu e uiga i tofotofoga ma vaivaiga? O le a le uiga ia te oe o le, “ua lava le alofa tunoa”o le Atua mo oe?

Tagai foi Mosaea 23:21–24; 24:10–15; Eteru 12:27; Moronae 10:32–33.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

2 Korinito 8–9.O a ni mea tatou te maua i nei mataupu ua musuia ai i tatou e aapa atu i e matitiva ma isi o manaomia le fesoasoani? Atonu o se taimi lelei lea e fuafua ai se faatinoga o se auaunaga faaleaiga mo se tagata o manaomia le fesoasoani.

2 Korinito 9:6–7.E iloa e lou aiga se tagata e mafai ona faamatalaina o se “tagata foai loto malie”? E mafai faapefea ona tatou faia a tatou auaunaga i isi ia faateleina le loto malie? E mafai e tagata laiti o le aiga ona fai ni pine fai mai, “O a’u o se tagata foai loto malie.” E mafai ona e tuuina atu ia pine i tagata o le aiga i soo se taimi e te vaaia ai i latou o auauna atu i le tasi ma le isi ma le loto malie.

2 Korinito 10:3–7.E mafai faapefea ona e aoaoina lou aiga e uiga i le tatou “taua” e faasaga i le amioleaga? Mata e fiafia lou aiga e fau se papuipui po o se olo i nofoa ma palanikeke? O lenei mea e mafai ona taitai atu ai i se talanoaga e faatatau i auala e lafoai ese ai mea e faapea ona taitai ese ai i tatou mai le Atua ma le ala e “faatoilaloina manatu uma ia anaana ia Keriso.” O a “auupega” faaleagaga tatou te faaaogaina e pulea ai o tatou mafaufauga? (tagai Efeso 6:11–18).

2 Korinito 11:3.O le a se mea e mafai ona faia e lou aiga e faateleina ai le taulai atu “[i le faigofie] ia Keriso”?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Foai,’ O Si Auvai Lea,” Tusipese a Tamaiti, 116.

Faaleleia o Suesuega Faaletagata Lava ia

Tusifaamaumau lagona uunaia. Sa saunoa Elder Richard G. Scott: “O le malamalama ua faamaumauina lelei, o le malamalama lea e mafai ona maua i taimi e manaomia ai. … [O le tusifaamaumauina o le taitaiga faaleagaga] e faaleleia ai lou ono mauaina o se malamalama faaopoopo” (“Mauaina o le Malamalama Faaleagaga,” Ensign, Nov.1993,88; tagai foi Aoao Atu i le Ala a le Faaola, 12,30).

o tagata talavou o loo fesoasoani i se galuega fesoasoani

“Ia taitoatasi ma foai e pei ona filifili i lona loto; aua ma le tiga, aua foi ma le faatauanauina: aua e alofa le Atua i le ua foai ma le loto malie” (2 Korinito 9:7).