sister nga mga misyonaryo nakig-istorya sa usa ka batan-ong lalaki

Oktubre 16–22

1 ug 2 Mga Taga-Tesalonica

“Makasangkap sa Nakulang diha sa Inyong Pagtuo”

Kon dili nato i-rekord ang mga panghunahuna nga atong nadawat gikan sa Espiritu, tingali makalimot kita niini. Unsay giaghat sa Espiritu kanimo nga i-rekord samtang ikaw magbasa sa 1ug 2 Mga Taga-Tesalonica?

I-rekord ang Imong mga Panghunahuna

Sa Tesalonica, si Pablo ug si Silas gipasanginlan nga “nakapagubot sa kalib[o]tan” (Mga Buhat 17:6). Ang ilang pagsangyaw nakapasuko og piho nga mga lider taliwala sa mga Judeo, ug kini nga mga lider mikutaw sa mga tawo nga magkaguliyang (tan-awa sa Mga Buhat 17:1–10). Isip resulta, sila si Pablo ug Silas gitambagan sa pagbiya sa Tesalonica. Nabalaka si Pablo mahitungod sa bag-ong mga kinabig nga taga-Tesalonica ug sa pagpanggukod nga ilang giatubang, apan siya wala makabalik aron sa pagbisita kanila. “Sa wala na ako makaantos,” misulat siya, “nagsugo ako aron masayod mahitungod sa inyong pagtuo.” Agig tubag, ang luyo-luyo [assistant] ni Pablo nga si Timoteo, kinsa nagserbisyo sa Tesalonica, “gikadad-an niya kami sa mga maayong sugilon mahitungod sa inyong pagtuo ug paghigugma” (1 Mga Taga-Tesalonica 3:5–6). Gani, ang mga Santos nga taga-Tesalonica nailhan isip mga ehemplo “ngadto sa tanang mga magtutuo” (1 Mga Taga-Tesalonica 1:7), ug ang mga balita sa ilang pagtuo mikaylap ngadto sa lagyong mga siyudad. Hunahunaa ang kalipay ug kahupay ni Pablo sa pagkadungog nga ang iyang buhat taliwala kanila “wala mapakyas” (1 Mga Taga-Tesalonica 2:1). Apan si Pablo nasayod nga ang pagkamatinud-anon kaniadto dili igo alang sa espirituhanon nga paglahutay sa umaabot, ug nabalaka siya sa impluwensiya sa mini nga mga magtutudlo taliwala sa mga Santos (tan-awa sa 2 Mga Taga-Tesalonica 2:2–3). Ang iyang mensahe ngadto kanila, ug ngari kanato, mao ang pagpadayon nga “makasangkap sa nakulang diha sa [atong] pagtuo” ug sa “paghimo niini sa labi pa gay[o]d” pinaagi sa gugma (tan-awa sa 1 Mga Taga-Tesalonica 3:10; 4:10).

icon sa personal nga pagtuon

Mga Ideya alang sa Personal nga Pagtuon sa Kasulatan

1 Mga Taga-Tesalonica 1–2

Ang mga disipulo ni Kristo nagserbisyo sa uban inubanan sa katiunay ug gugma.

Diha sa 1 Mga Taga-Tesalonica, ang mga pulong ni Pablo nagpadayag sa kabalaka ug kalipay sa usa ka tawo kinsa mihatag sa iyang kaugalingon sa hingpit ngadto sa pagserbisyo sa mga anak sa Dios. Ilabi na sa unang duha ka kapitulo sa 1 Mga Taga-Tesalonica, makita nimo ang mga pulong ug mga hugpong sa mga pulong nga naghulagway sa mga kinaiya ug mga linihokan sa usa ka disipulo sa Ginoo. Sama pananglit, unsa ang imong nakat-onan gikan sa 1 Mga Taga-Tesalonica 1:5–8; 2:1–13 mahitungod sa pagserbisyo sa Ginoo?

Paghunahuna mahitungod sa imong kaugalingong mga oportunidad sa pagserbisyo sa Dios ug sa Iyang mga anak. Unsay imong nakaplagan niini nga mga kapitulo nga nagdasig kanimo sa pagpausbaw sa imong serbisyo? Hunahunaa ang pagpangutana sa imong kaugalingon og mga pangutana nga gibase sa unsay imong nakaplagan, sama sa “Ako ba usa ka ehemplo sa mga butang nga ako nahibalo?” (tan-awa sa 1 Mga Taga-Tesalonica 1:7).

1 Mga Taga-Tesalonica 3:7–13; 4:1–12

“Magapatubo ug magapadagaya sa gugma.”

Gikahimuot ni Pablo ang pagkamatinud-anon sa mga Santos nga mga taga-Tesalonica (tan-awa sa 1 Mga Taga-Tesalonica 3:7–9). Apan gusto usab siya kanila nga “magalabi pa gayod” diha niana nga pagkamatinud-anon (1 Mga Taga-Tesalonica 4:1). Samtang ikaw magbasa sa 1 Mga Taga-Tesalonica 3:7–13; 4:1–12, pamalandong og mga paagi nga ikaw makahimo nga “magalabi pa gayod” sa espirituhanong paagi (1 Mga Taga-Tesalonica 4:10). Sama pananglit, alinggati nga migamit si Pablo og mga pulong sama sa “pagbalaan” ug “pagkabalaan.” Unsa ang imong nakat-onan gikan sa mga panulat ni Pablo mahitungod sa mga kahulogan niini nga mga pulong? Unsaon sa Manluluwas pagtabang kanimo nga mahimong mas balaan ug mas pagkabalaan?

Tan-awa usab sa Giya ngadto sa mga Kasulatan, “Balaan,” “Pagkabalaan,” scriptures.ChurchofJesusChrist.org.

1 Mga Taga-Tesalonica 4:16–18; 5:1–10; 2 Mga Taga-Tesalonica 1:4–10

Kon ako matinud-anon ug mabinantayon, maandam ako alang sa Ikaduhang Pag-anhi sa Manluluwas.

Diha sa 1 Mga Taga-Tesalonica 5:1–10, migamit si Pablo og pipila ka mga pasumbingay sa pagtudlo mahitungod sa panahon nga si Jesus mobalik nganhi sa yuta. Samtang ikaw magtuon niini nga mga pasumbingay, hunahunaa ang pagsulat sa mga panghunahuna nga moabot nganha kanimo mahitungod sa Ikaduhang Pag-anhi ni Jesukristo:

• “Usa ka kawatan sa kagabhion”:

• “Pagbati sa babaye nga tali-anak”:

• Ubang mga pasumbingay nga imong makita:

Unsang dugang nga mga kamatuoran ang imong makat-onan gikan sa 1 Mga Taga-Tesalonica 4:16–18; 5:1–10; 2 Mga Taga-Tesalonica 1:4–10? Unsa ka naaghat sa pagbuhat nga mabantayan ug maandam alang sa pag-anhi sa Manluluwas?

Tan-awa usab sa D. Todd Christofferson, “Pagpangandam alang sa Pagbalik sa Ginoo,” Liahona, Mayo 2019, 81–84.

2 Mga Taga-Tesalonica 2

Usa ka apostasiya, o pagbiya gikan sa kamatuoran, gipanagna nga mag-una sa Ikaduhang Pag-anhi.

Taliwala sa nagkagrabe nga pagpanggukod, daghang mga Santos nga taga-Tesalonica mituo nga ang Ikaduhang Pag-anhi sa Manluluwas tingali gyod duol na. Apan nasayod si Pablo nga sa dili pa mobalik si Jesus sa yuta adunay apostasiya—usa ka rebelyon o “pagbiya ” gikan sa kamatuoran (tan-awa sa 2 Mga Taga-Tesalonica 2:1–4). Ikaw makapalig-on sa imong pagsabot sa Dakong Apostasiya—ug ang imong pagpasalamat alang sa Pagpahiuli—pinaagi sa pagpamalandong sa pipila sa mosunod:

• Mga kasulatan nga nanagna sa Apostasiya: Isaias 24:5; Amos 8:11–12; Mateo 24:4–14; 2 Timoteo 4:3–4

• Mga kasulatan nga nagpakita nga ang Apostasiya nagsugod na sa panahon ni Pablo: Mga Buhat 20:28–30; Mga Taga-Galacia 1:6–7; 1 Timoteo 1:5–7

• Mga obserbasyon mahitungod sa Dakong Apostasiya pinaagi sa Kristiyanong mga repormista:

  Martin Luther: “Wala akoy laing gitinguha lapas sa pagreporma sa Simbahan nga nahiuyon sa Balaang mga Kasulatan. … Yano akong moingon nga ang Pagkakristiyano mihunong sa pagkaana taliwala niadtong kinsa unta mopatunhay niini” (sa E. G. Schweibert, Luther and His Times: The Reformation from a New Perspective [1950], 590).

  Roger Williams: “Ang apostasiya … mihugaw sa tanan nga wala nay pagkaayo gikan niana nga apostasiya hangtod mopadala si Kristo og bag-ong apostoles aron sa pagtukod pag-usab sa Simbahan” (sa Philip Schaff, The Creeds of Christendom [1877], 851).

Tan-awa usab sa 2 Nephi 28; Gospel Topics, “Apostasy,” topics.ChurchofJesusChrist.org.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

1 Mga Taga-Tesalonica 3:9–13.Unsa ang nakapadani kanimo mahitungod sa mga pagbati nga si Pablo aduna alang sa iyang mga higala? Sa unsang paagi kita “magapatubo ug magapadagaya sa gugma ang usa ug usa”? (bersikulo 12).

1 Mga Taga-Tesalonica 4:13–18.Unsa nga mga hugpong sa mga pulong niini nga mga bersikulo mahitungod sa pagkabanhaw ang naghatag kanimo og kahupayan?

1 Mga Taga-Tesalonica 5:14–25.Samtang ikaw magrebyo sa tambag ni Pablo sa 1 Mga Taga-Tesalonica 5:14–25, dapita ang matag sakop sa pamilya sa pagpangita og usa ka hugpong sa mga pulong nga ang pamilya makahatag og gibug-aton diha niini. Pangita og mamugnaong mga paagi sa pagpakita niini nga mga hugpong sa mga pulong diha sa inyong panimalay isip usa ka pahinumdom. Sama pananglit, ang matag tawo mahimong mangita o magdrowing og mga hulagway nga nagpakita o naglig-on sa hugpong sa mga pulong nga iyang gipili.

2 Mga Taga-Tesalonica 3:13.Mobati ba gayod kita og “pagkataka sa pagbuhat og maayo”—nabug-atan, tingali, sa mga gikinahanglan sa pagka-disipulo? Unsa ang magtabang kanato kon mobati kita niini nga paagi? (Tan-awa sa Mga Taga-Galacia 6:9; Doktrina ug mga Pakigsaad 64:33.) Unsaon nato sa pagsuporta ang usag usa kon mahitabo kini?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Maninguha Kong Mahimong Mahisama Kang Jesus,” Songbook sa mga Bata, 40.

Pagpalambo sa Personal nga Pagtuon

Pagtinguha og pagpadayag matag adlaw. “Ang pagpadayag sa kasagaran moabot ‘pagtulon-an human sa usa ka pagtulon-an’ (2 Nephi 28:30), dili tanan sa kausa. … Ayaw paghunahuna sa [pagtuon sa ebanghelyo] isip usa ka butang nga gahinan og panahon apan isip usa ka butang nga kanunay nimong gibuhat” (Pagtudlo sumala sa Pamaagi sa Manluluwas, 12).

Kristo diha sa mga panganod

Resurrected Christ [Nabanhaw nga Kristo], ni Robert T. Barrett