tulo ka babaye naglakaw sa gawas sa templo

Oktubre 23–29

1 ug 2 Timoteo; Tito; Filemon

“Pagkinabuhi Ingon nga Panig-ingnan”

Usahay makatabang ang pagtuon sa imong kasulatan nga adunay usa o daghang mga pangutana sa hunahuna. Dapita ang Espiritu sa paggiya kanimo sa pagtubag samtang ikaw magtuon, ug i-rekord ang bisan unsa nga inspirasyon nga imong madawat.

I-rekord ang Imong mga Panghunahuna

Sa mga sulat nga gisulat ni Pablo ngadto ni Timoteo, Tito, ug Filemon, makali-li kita ngadto sa kasingkasing sa usa ka sulugoon sa Ginoo. Dili sama sa ubang mga sulat ni Pablo ngadto sa tibuok kongregasyon, kini gisulat ngadto sa mga indibidwal—sa suod nga mga higala ug mga kauban ni Pablo sa buhat sa Dios—ug ang pagbasa niini sama nga nagpaminaw sa usa ka panag-istoryahanay. Makita nato nga si Pablo nag-awhag ni Timoteo ug Tito, duha ka lider sa mga kongregasyon, sa ilang pagserbisyo sa Simbahan. Makita nato siya nga nag-awhag sa iyang higala nga si Filemon sa pagpakig-uli sa usa ka isig ka Santos ug pagtagad kaniya sama sa usa ka igsoon sa ebanghelyo. Ang mga pulong ni Pablo wala direktang gitumong ngari kanato, ug tingali wala gayod siya magdahom nga daghan kaayong mga tawo ang mobasa niini sa umaabot. Apan makita nato nga niini nga mga sulat mao ang tambag ug awhag alang kanato, bisan unsa pa man ang atong personal nga pangalagad diha sa pagserbisyo ni Kristo.

icon sa personal nga pagtuon

Mga Ideya alang sa Personal nga Pagtuon sa Kasulatan

Kinsa sila si Timoteo ug Tito?

Sila si Timoteo ug Tito nagserbisyo uban ni Pablo sa iyang pipila ka misyonaryo nga mga panaw. Atol sa ilang pagserbisyo, naangkon nila ang pagtahod ug pagsalig ni Pablo. Si Timoteo gitawag sa kaulahian isip usa ka lider sa Simbahan sa Efeso, ug si Tito gitawag nga usa ka lider sa Creta. Niini nga mga sulat, mihatag si Pablo ni Timoteo ug Tito og mga panudlo ug pag-awhag kabahin sa ilang mga responsibilidad, nga naglakip sa pagsangyaw sa ebanghelyo ug pagtawag og mga tawo nga moserbisyo isip mga bishop.

Tan-awa usab sa Giya ngadto sa mga Kasulatan, “Epistola ni Pablo, Mga,” “Timoteo,” “Tito.”

duha ka misyonaryo nakigsulti ngadto sa usa ka tawo

“Ayaw itugot nga adunay magatamay kanimo tungod sa imong kabatan-on; hinonoa alang sa mga magtotoo, pagkinabuhi ingon nga panig-ingnan” (1 Timoteo 4:12).

1 Timoteo 4:10–16

“Pagkinabuhi ingon nga panig-ingnan.”

Si Timoteo batan-on pa kaayo, apan nasayod si Pablo nga siya mahimong bantugang lider sa Simbahan bisan pa sa iyang kabatan-on. Unsa nga tambag ang gihatag ni Pablo ngadto ni Timoteo sa 1 Timoteo 4:10–16? Sa unsa nga paagi kini nga tambag nagtabang kanimo sa paggiya sa uban ngadto sa Manluluwas ug sa Iyang ebanghelyo?

Tan-awa usab sa Alma 17:11.

2 Timoteo

“Kay kita wala sa Dios hatagig espiritu sa katalaw; kondili sa espiritu sa gah[o]m, ug sa gugma, ug sa pagpugong sa kaugalingon.”

Ang 2 Timoteo gituohan nga mao ang kataposang sulat nga gisulat ni Pablo, ug ingon og nasayod siya sa iyang panahon sa yuta nga mubo na lamang (tan-awa sa 2 Timoteo 4:6–8). Unsa kaha ang gibati ni Timoteo, nasayod nga siya mahimong sa dili madugay mawad-an sa iyang sinaligang magtutudlo ug lider? Unsay gisulti ni Pablo sa pag-awhag kaniya? Mahimo usab nimong basahon ang imong kaugalingong mga hagit ug mga kahadlok diha sa hunahuna. Unsa nga mga mensahe sa paglaom ug pag-awhag nga ang Ginoo aduna alang kanimo diha sa 2 Timoteo?

Tan-awa usab sa Kelly R. Johnson, “Molahutay nga Gah[o]m,” Liahona, Nob. 2020, 112–14.

2 Timoteo 3

Ang pagpuyo sa ebanghelyo naghatag og kaluwasan gikan sa espirituhanong mga kakuyaw sa kataposang mga adlaw.

Nagpuyo kita “sa kataposang mga adlaw” nga gihisgotan ni Pablo, ug ang “panahon nga malisod” moabot (2 Timoteo 3:1). Samtang magbasa ka sa 2 Timoteo 3, isulat ang mga kalisod sa kataposang mga adlaw nga gihisgotan (tan-awa usab sa 1 Timoteo 4:1–3):

Makahunahuna ka ba og mga ehemplo niini nga mga kalisod sa kalibotan sa imong palibot—o sa imong kaugalingong kinabuhi? Sa unsa nga paagi nga kini nga mga kalisod, sama sa mga tawo nga gihulagway sa bersikulo 6, “magapanakasaka sa [inyong kabalayan], ug [kamo] mabihag”? Unsa nga tambag ang imong makaplagan sa 2 Timoteo 3, ug bisan diin niini nga mga sulat, nga makahimo kanimo ug sa imong pamilya nga luwas gikan niini nga espirituhanong mga kakuyaw? (tan-awa, sama pananglit sa, 1 Timoteo 1:3–11; 2 Timoteo 2:15–16; Tito 2:1–8).

Kinsa si Filemon?

Si Filemon usa ka Kristiyano nga nakabig ni Pablo ngadto sa ebanghelyo. Gipanag-iya ni Filemon ang usa ka ulipon nga ginganlan og Onesimo, kinsa sa dayag milayas ngadto sa Roma. Didto nahimamat ni Onesimo si Pablo ug nakabig ngadto sa ebanghelyo. Gipabalik ni Pablo si Onesimo ngadto ni Filemon uban sa usa ka sulat nga nag-awhag ni Filemon sa pagdawat ni Onesimo “dili na ingon nga ulipon, kon dili labaw na sa ulipon, ingon nga minahal nga igsoon” (Filemon 1:16).

Filemon

Ang mga disipulo ni Jesus nagtinagdanay sa usag usa sama sa managsoong mga lalaki ug mga babaye.

Samtang imong basahon ang sulat ni Pablo ngadto ni Filemon, pamalandonga kon unsaon kaha kanimo paggamit ang iyang tambag ngadto sa imong mga relasyon sa uban. Sa ubos mao ang pipila ka mga pangutana nga mahimo nimong ipangutana:

• Mga bersikulo 1–7: Unsa ang gisugyot sa mga pulong “kaabay sa buhat” ug “masigkasundalo” nganha kanimo mahitungod sa mga relasyon taliwala sa mga Santos? Kanus-a nimo gibati ang “kahayahay pinaagi” sa mga kaigsoonan diha ni Kristo?

• Mga bersikulo 8–16: Unsa ang gipasabot sa “pagsugo” ug “paghangyo”? Nganong gipili ni Pablo ang paghangyo ni Filemon kay sa pagsugo kaniya? Unsa ang gilauman ni Pablo nga matuman pinaagi sa pagpadala og balik ni Onesimo ngadto ni Filemon?

• Bersikulo 16: Unsa ang gipasabot nga mahimong “minahal nga igsoong lalaki [o babaye] … diha sa Ginoo”? Nakaila ka ba og usa ka tawo kinsa kinahanglan nimong dawaton niini nga paagi?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

1 Timoteo 2:9–10.Unsa ang gipasabot sa “pagpatahom sa [atong mga kaugalingon] … pinaagi sa maayong buhat”? Unsa ang pipila ka maayong buhat nga mahimo sa imong pamilya karon nga semana? Mahimong manganta mo og dungan og usa ka awit mahitungod sa paghimo og maayong buhat, sama sa “Nakabuhat Ba Ako og Maayo Karon?” (Mga Himno, nu.135).

1 Timoteo 4:12.Aron matabangan ang mga sakop sa imong pamilya nga magtinguha nga mahimong “usa ka panig-ingnan sa mga magtutuo,” hunahunaa ang pagdapit kanila sa pagdrowing og mga hulagway sa mga tawo kinsa nahimong maayong mga ehemplo ngadto kanila. Sa unsa nga paagi kini nga mga tawo midasig kanato sa pagsunod ni Jesukristo? Ang mensahe ni Presidente Thomas S. Monson “Pagpakita og Ehemplo ug Kahayag” (Liahona, Nob. 2015, 86–88) makahatag kanimo og pipila ka mga ideya kabahin kon unsaon nga mahimong panig-ingnan sa uban.

1 Timoteo 6:7–12.Ngano kaha nga “ang pagkamahigugmaon og salapi mao ang gamot sa tanang pagkadaotan”? Unsa ang mga kakuyaw sa pagtutok sa atong mga kinabuhi sa salapi o mga kabtangan? Sa unsa nga paagi kita makontento sa mga panalangin nga kita aduna?

2 Timoteo 3:14–17.Sumala niini nga mga bersikulo, unsa nga mga panalangin ang moabot niadtong kinsa nahibalo ug nagtuon sa mga kasulatan? Tingali ang mga sakop sa pamilya makahimo sa pagpakigbahin og mga kasulatan nga ilang nakaplagan nga labing makahatag og “kaayohan.”

Filemon 1:17–21.Unsa ang andam nga buhaton ni Pablo alang ni Onesimo? Sa unsa nga paagi kini susama ngadto sa unsay andam nga gibuhat sa Manluluwas alang kanato? (tan-awa usab sa 1 Timoteo 2:5–6; Doktrina ug mga Pakigsaad 45:3–5). Unsaon nga kita makasunod sa mga panig-ingnan ni Pablo ug sa Manluluwas?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Dan-ag,” Songbook sa mga Bata,, 96.

Pagpalambo sa Atong Pagtudlo

Itudlo ang klaro ug yanong doktrina. Ang ebanghelyo matahom sa kayano niini (tan-awa sa Doktrina ug mga Pakigsaad 133:57). Kay sa maningkamot sa paglingaw sa imong pamilya uban sa mga leksiyon nga nagkinahanglan og daghang pagpangandam, paningkamoti ang pagtudlo og putli ug yano nga doktrina (tan-awa sa 1 Timoteo 1:3–7).

duha ka bata nagtuon sa mga kasulatan

“Ug nga sukad sa imong pagkabata ikaw nakasabot na sa balaan nga kasulatan nga makagagahom sa pagtudlo kanimo ngadto sa kaluwasan pinaagi sa pagtuo diha ni Jesukristo” (2 Timoteo 3:15).