“Oktubre 30–Nobyembre 5. Mga Hebreohanon 1–6: ‘Si Jesukristo, “ang Tuburan sa Dayong Kaluwasan,”’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 (2022)

“Oktubre 30–Nobyembre 5. Mga Hebreohanon 1–6,” Dali, Sunod Kanako—Alang sa mga Indibidwal ug mga Pamilya: 2023

Imahe

Kristo nagbarog uban sa usa ka batan-ong babaye

Balm of Gilead [Balsamo sa Galaad], ni Annie Henrie

Oktubre 30–Nobyembre 5

Mga Hebreohanon 1–6

Jesukristo, “ang Tuburan sa Dayong Kaluwasan”

Ang pag-ila sa espirituhanong mga panghunahuna nagtabang kanimo sa pag-ila unsa ang gustong itudlo sa Espiritu Santo kanimo. Ang paglihok sa imong mga panghunahuna nagpakita sa imong hugot nga pagtuo nga kadtong mga pag-aghat tinuod.

I-rekord ang Imong mga Panghunahuna

Kitang tanan kinahanglan nga adunay butang nga pagabiyaan aron dawaton ang ebanghelyo ni Jesukristo—mahimong bati nga mga kinaiya, dili husto nga mga pagtuo, dili maayong mga pakig-uban, o laing butang. Alang sa mga Hentil sa unang Kristiyanong Simbahan, ang pagkakabig kasagarang nagpasabot og pagbiya sa mga diyos-diyos. Alang sa mga Hebreohanon (o mga Judeo), ang pagkakabig nagmatuod nga mahimong, kon dili mas malisod, may gamay nga mas pagkakuti. Human ang tanan, ang ilang gihambin nga mga pagtuo ug mga tradisyon migamot diha sa pagsimba sa tinuod nga Dios ug sa mga pagtulon-an sa Iyang mga propeta, naglugway balik og liboan ka tuig. Apan ang Apostoles mitudlo nga ang balaod ni Moises natuman diha ni Jesukristo ug nga usa ka mas taas nga balaod karon mao ang sumbanan alang sa mga tumutuo. Ang pagdawat ba sa Kristiyanismo nagpasabot nga ang mga Hebreohanon kinahanglang mosalikway sa ilang unang mga pagtuo ug kasaysayan? Ang Sulat ngadto sa Mga Hebreohanon nagtinguha sa pagsulbad sa maong mga pangutana pinaagi sa pagtudlo nga ang balaod ni Moises, ang mga propeta ug ang mga ordinansa importante ang tanan, apan si Jesukristo mas labaw pa (tan-awa sa Mga Hebreohanon 1:1–4; 3:1–6; 7:23–28). Sa tinuod, kining tanan nga mga butang nagtudlo ug nagpamatuod ni Kristo isip ang Anak sa Dios ug ang gisaad nga Mesiyas nga gihulat kanunay sa mga Judeo.

Ang pagkakabig, kaniadtong unang mga panahon ug sa karon, nagpasabot sa paghimo ni Jesukristo nga sentro sa atong pagsimba ug sa atong mga kinabuhi. Kini nagpasabot sa paggunit og hugot sa kamatuoran ug sa pagbuhi niana nga makapalinga kanato gikan Kaniya, tungod kay Siya mao ang “tuboran sa dayong kaluwasan alang sa tanang magasugot kaniya” (Mga Hebreohanon 5:9).

Imahe

icon sa personal nga pagtuon

Mga Ideya alang sa Personal nga Pagtuon sa Kasulatan

Kinsa ang misulat sa Sulat ngadto sa mga Hebreohanon?

Ang pipila sa mga eskolar nangutana kon si Pablo ba ang misulat sa Sulat ngadto sa mga Hebreohanon. Ang estilo sa pagsulat sa mga Hebreohanon maingon og lahi gikan sa ubang mga sulat ni Pablo, ug ang labing unang mga bersyon sa teksto wala maghingalan og tagsulat. Hinoon, tungod sa mga ideya nga gipahayag sa mga Hebreohanon nga mauyunon kanunay sa ubang mga pagtulon-an ni Pablo, ang mga Santos sa Ulahing mga Adlaw, sa pagpadayon sa tradisyong Kristiyano, sa kinatibuk-an midawat nga si Pablo sa labing minos apil sa pagsulat niini nga sulat [epistola].

Tan-awa usab sa Giya ngadto sa mga Kasulatan, “Epistola ni Pablo, Mga.”

Mga Hebreohanon 1–5

Si Jesukristo mao ang “tukma nga hulad” sa Langitnong Amahan.

Daghang mga Judeo nakakita nga malisod ang pagdawat ni Jesukristo isip Anak sa Dios. Alinggati kon giunsa sa Sulat ngadto sa mga Hebreohanan pagpamatuod Kaniya. Sama pananglit, sa imong pagbasa sa unang lima ka kapitulo, mahimong magbuhat ka og lista sa mga ulohan, mga tahas, mga hiyas, ug mga buhat ni Jesukristo nga imong makaplagan nga gihisgotan. Unsa ang gitudlo niini nga mga butang kanimo mahitungod sa Manluluwas? Unsa ang gitudlo niini kanimo mahitungod sa Langitnong Amahan?

Unsa ang ikadugang sa mosunod nga pamahayag gikan ni Elder Jeffrey R. Holland ngadto sa imong pagsabot sa mga pagtulon-an niini nga mga kapitulo? “Si Jesus … mianhi aron pagpalambo sa panglantaw sa tawo kabahin sa Dios ug sa pagpangamuyo uban kanila sa paghigugma sa ilang Langitnong Amahan sama nga Siya sa kanunay naghigugma kanila ug mohigugma kanila sa kanunay. … Busa ang pagpakaon sa gigutom, pag-ayo sa masakiton, pagpanton sa pagpakaaron-ingnon, pagpangamuyo alang sa hugot nga pagtuo—kini mao ang Kristo nga nagpakita kanato sa agianan ngadto sa Amahan” (Ang Kahalangdon sa Dios,” Liahona, Nob. 2003, 72).

Mga Hebreohanon 2:9–18; 4:12–16; 5:7–8

Giantos ni Jesukristo ang tanang butang aron Siya makasabot ug makatabang kanako kon ako nag-antos.

Gibati ba nimo nga ikaw makahimo nga “manuol sa trono sa grasya” aron maningkamot og kalooy? (Mga Hebreohanon 4:16). Usa sa mensahe sa Sulat ngadto sa Mga Hebreohanon mao nga bisan pa sa atong mga sala ug mga kahuyang, ang Dios maduolan ug ang Iyang grasya makab-ot. Unsay imong nakaplagan diha sa Mga Hebreohanon 2:9–18; 4:12–16; 5:7–8 nga naglig-on sa imong pagsalig nga si Jesukristo motabang kanimo sa imong mortal nga mga hagit? Hunahunaa ang pagrekord diha sa usa ka journal sa imong mga hunahuna ug mga pagbati mahitungod sa unsay nahimo sa Manluluwas alang kanimo.

Tan-awa usab sa Mosiah 3:7–11; Alma 7:11–13; 34; Matthew S. Holland, “Ang Talagsaon nga Kanindot sa Gasa sa Anak,” Liahona, Nob. 2020, 45–47.

Mga Hebreohanon 3:7–4:11

Ang mga panalangin sa Dios maanaa niadtong kinsa “wala mopatig-a sa [ilang] kasingkasing.”

Pinaagi sa pag-istorya pag-usab kabahin sa karaang mga Israelite, milaom si Pablo sa pagdani sa mga Judeo sa paglikay sa sayop nga nahimo sa ilang mga katigulangan—nagsalikway sa mga panalangin sa Dios tungod sa ilang pagkawalay pagtuo. (Mabasa nimo ang istorya nga gipasabot ni Pablo diha sa Numeros 14:1–12, 26–35.)

Hunahunaa kon sa unsa nga paagi nga ang Mga Hebreohanon 3:7–4:11 mahimong imong magamit. Sa paghimo niini, mahimo kang mamalandong og mga pangutana nga sama niini:

Giunsa sa mga Israelite pagpasuko ang Ginoo? (tan-awa sa Mga Hebreohanon 3:8–11). Unsa ang mga sangputanan sa pagbaton og gahi nga kasingkasing?
Kanus-a ako mitugot sa akong kasingkasing nga mahimong magahi? Aduna bay mga panalangin nga gusto sa Dios nga ihatag kanako nga wala nako madawat tungod sa kakulang og hugot nga pagtuo?
Unsay akong mabuhat sa pagpalambo og usa ka humok ug mahinulsulong kasingkasing? (tan-awa sa Ether 4:15; Proverbios 3:5–6; Alma 5:14–15).

Tan-awa usab sa 1 Nephi 2:16; 15:6–11; Jacob 1:7–8; Alma 12:33–36; Neill F. Marriott, “Pagtugyan sa Atong Kasingkasing ngadto sa Dios,” Liahona, Nob. 2015, 30–32.

Imahe

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Mga Hebreohanon 1:8–9.Sa unsa nga paagi nga gipakita ni Jesus nga Siya nahigugma sa pagkamatarong ug nasilag sa kadaotan? Kon kita adunay dili matarong nga mga tinguha, unsay atong mabuhat sa pag-usab niini?

Mga Hebreohanon 2:1–4.Makahunahuna ka ba og usa ka butang nga gamiton sa leksiyon aron matabangan ang imong pamilya nga masabtan kon unsay gipasabot sa pagpabiling lig-on sa paghupot sa mga kamatuoran sa ebanghelyo “diin atong nadungog”? Mahimo nimong ihulagway kini gamit ang usa ka butang nga lisod gunitan. Sa unsa nga paagi nga ang atong mga paningkamot sa pagpadayon sa atong pagpamatuod sama sa pagdakop ug paggunit niini nga butang? Unsaon nato sa pagsiguro “nga ang mga butang nga atong nadungog” dili “maanod” palayo gikan kanato? (bersikulo 1).

Mga Hebreohanon 2:9–10.Sa pagsusi sa hugpong sa mga pulong “mag-uugda sa ilang kaluwasan,” mahimong sugdan nimo pinaagi sa paghisgot unsa ang buhaton sa usa ka mag-uugda. Unsa ang gipasabot sa kaluwasan? Sa unsa nga paagi si Jesukristo sama sa usa ka kapitan alang kanato ug sa atong kaluwasan?

Mga Hebreohanon 5:1–5.Kini nga mga bersikulo makatabang kanimo nga adunay panaghisgotan mahitungod sa unsay gipasabot nga pagatawgon sa Dios pinaagi sa usa ka tawo nga adunay awtoridad. Unsay atong makat-onan gikan sa ehemplo ni Jesukristo mahitungod sa pagdawat ug pagtuman sa mga calling?

“Walay tawo nga mangunay pagpahilunas iyang kaugalingon, kondili siya nga tinawag sa Dios, sama kang Aaron” (Mga Hebreohanon 5:4). Moses Calls Aaron to the Ministry [Moises Nagtawag ni Aaron ngadto sa Pagpangalagad], ni Harry Anderson

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Nagkinahanglan Ko Nimo sa Matag Takna,” Mga Himno, nu. 54.

Pagpalambo sa Personal nga Pagtuon

Sulayi ang nagkalainlaing mga paagi. Kay sa magtuon sa mga kasulatan sa samang paagi, hunahunaa ang lainlaing mga ideya sa pagtuon. Alang sa pipila ka ideya. tan-awa ang “Mga Ideya sa Pagpalambo sa Imong Personal nga Pagtuon sa Kasulatan” sa sinugdanan niini nga kapangohaan.