Christ Preaching in the Spirit World [Kristo Nagsangyaw didto sa Kalibotan sa mga Espiritu], ni Robert T. Barrett

Nobyembre 20–26

1 ug 2 Pedro

“Nagakalipay sa Labihan Gay[o]d nianang Dili Ikaasoyng Kalipay ug Puno sa Himaya”

Samtang ikaw magbasa sa mga Sulat ni Pedro, mahimong madawat nimo ang espiritwal nga mga panghunahuna. Diha dayon i-rekord kini samtang ikaw “diha pa ubos sa gah[o]m sa Espiritu” (Doktrina ug mga Pakigsaad 76:80) aron sa tukma masabtan nimo unsa ang gitudlo sa Dios kanimo.

I-rekord ang Imong mga Panghunahuna

Human dayon sa Iyang Pagkabanhaw, ang Manluluwas mihimo og panagna nga tingali nakapahasol ni Pedro. Gitagna niya nga si Pedro pagapatyon tungod sa iyang hugot nga pagtuo, ingon nga pagadad-on “sa dapit nga dili [niya] gustong adtoan … , sa pagpaila sa kamatayon nga pinaagi niini pagapasidonggan ni Pedro ang Dios” (Juan 21:18–19). Paglabay sa mga tuig, sa dihang gisulat ni Pedro ang iyang mga sulat [epistola], nasayod siya nga ang iyang gipanagna nga pagkamartir duol na: “Kining akong lawas dili na madugayng pagabiyaan, sumala sa gipadayag kanako sa atong Ginoong Jesukristo” (2 Pedro 1:14). Ug gani ang iyang mga pulong wala mapuno sa kahadlok o pagduhaduha. Hinoon, iyang gitudloan ang mga Santos nga “igakalipay og dako,” bisan tuod nga sila karon “anaa pagaantuson sa makadiyot sa nagkalainlaing mga pagsulay.” Gitambagan niya sila sa paghinumdom nga “ang pagkatinuod sa [ilang] pagtuo” mosangpot ngadto sa “pagdalayeg ug paghimaya ug pasidungog kaninyo inig padayag na unya kang Jesukristo” ug “sa kaluwasan sa [ilang] mga kalag” (1 Pedro 1:6–7, 9). Ang hugot nga pagtuo ni Pedro nakapahupay tingali niadtong unang mga Santos, sama nga kini makaawhag sa mga Santos karon, kinsa usab “nagpakaambit sa mga kasakit ni Kristo, aron [kita] magakalipay usab ug magasadyaon inig padayag na unya sa iyang himaya” (1 Pedro 4:13).

Mga Ideya alang sa Personal nga Pagtuon sa Kasulatan

1 Pedro 1:3–9; 2:19–24; 3:14–17; 4:12–19

Makakaplag ako og hingpit nga kalipay atol sa mga panahon sa pagsulay ug pag-antos.

Ang yugto sa Paglansang diha sa Krus ni Kristo dili usa ka sayon nga panahon nga mahimong usa ka Kristiyano, ug ang unang sulat ni Pedro nag-angkon niana. Diha sa unang upat ka mga kapitulo, inyong mamatikdan ang mga pulong ug hugpong sa mga pulong nga naghulagway sa kalisod: kabug-at, mga tintasyon, kasakit, magasilaob nga kalisdanan, ug mga pag-antos (tan-awa sa 1 Pedro 1:6; 2:19; 4:12–13). Apan ikaw makamatikod usab og mga pulong nga ingon ug malipayon––mahimo kang maghimo og lista sa unsay imong makaplagan. Sama pananglit, samtang magbasa ka sa 1 Pedro 1:3–9; 2:19–24; 3:14–17; ug 4:12–19, unsay naghatag kanimo og paglaom nga ikaw makakaplag og kalipay bisan taliwala sa malisod nga mga kahimtang?

Mahimo usab nga imong basahon ang mensahe ni Presidente Russell M. Nelson diha sa “Hingpit nga Kalipay ug Espirituhanon nga Pagsugakod” (Liahona, Nob. 2016, 81–84) ug pangita og mga pagkasama tali sa unsay gitudlo ni Pedro ug sa unsay gitudlo ni Presidente Nelson. Unsa mahitungod sa plano sa kaluwasan ug sa ebanghelyo ni Jesukristo ang naghatag kanimo og hingpit nga kalipay?

Tan-awa usab sa Ricardo P. Giménez diha sa, “Pagpangita og Kadangpan gikan sa mga Kalis[o]d sa Kinabuhi,” Liahona, Mayo 2020, 101–3.

1 Pedro 3:18–20; 4:1–6

Ang ebanghelyo gisangyaw ngadto sa mga patay aron mahukman sila sa makiangayong paagi.

Usa ka adlaw niana ang matag tawo mobarog sa hukmanan ug “magahatag ra unyag husay ngadto kaniya nga andam sa paghukom sa buhi ug sa mga patay” (1 Pedro 4:5). Unsaon sa Dios sa paghukom sa tanang katawhan sa makiangayong paagi kon ang ilang mga oportunidad sa pagsabot ug pagsunod sa ebanghelyo managlahi kaayo? Alinggati kon giunsa sa doktrina nga gitudlo ni Pedro sa 1 Pedro 3:18–20; 4:6 pagtabang sa pagtubag niini nga pangutana. Sa unsa nga paagi kini nga mga bersikulo naglig-on sa imong hugot nga pagtuo sa pagkamakiangayon ug hustisya sa Dios?

Sa pagsuta og dugang niini nga doktrina, tun-i ang Doktrina ug mga Pakigsaad 138, usa ka pagpadayag nga nadawat ni Presidente Joseph F. Smith samtang namalandong siya niining mga sinulat ni Pedro. Unsa ang dugang nga mga kamatuoran ang nakat-onan ni Presidente Smith?

Tan-awa usab ang Giya ngadto sa mga Kasulatan, “Bunyag sa mga Patay, Mga,” topics.ChurchofJesusChrist.org.

2 Pedro 1:1–11

Pinaagi sa gahom ni Jesukristo, mapalambo nako ang akong balaang pagkatawo.

Gibati ba nimo nga ang pagkahimong sama ni Jesukristo ug ang pagpalambo sa Iyang mga hiyas dili posible? Si Elder Robert D. Hales mitanyag niining makaawhag nga hunahuna mahitungod kon unsaon nato nga makapalambo og Kristohanong mga hiyas: “Ang mga hiyas sa Manluluwas … nahiusa kini nga mga kinaiya, nadugang ngadto sa usag-usa, nga milambo diha kanato sa maka-impluwensya nga pamaagi. Sa laing pagkasulti, dili kita makabaton og usa ka Kristohanong kinaiya nga dili usab makabaton ug maka-impluwensya sa uban. Samtang ang usa ka kinaiya mahimong lig-on, mao usab ang daghan pa” (“Pagkahimong usa ka Disipulo sa Atong Ginoong Jesukristo,” Liahona, Mayo 2017, 47).

Ang matag Kristohanong hiyas nga atong mapalambo nagtabang kanato sa paglala og espirituhanong kurtina sa pagkadisipulo.

Samtang imong basahon ang 2 Pedro 1:1–11, palandonga ang mga hiyas sa “balaang kinaiyahan” nga gilista niini nga mga bersikulo. Sa imong kasinatian, giunsa sila “paglala,” ingon sa paghulagway ni Elder Hales? Giunsa nila pagtukod diha sa usag usa? Unsa pa ang imong nakat-onan gikan niini nga mga bersikulo mahitungod sa proseso sa paghimo nga mas mahisama ni Kristo?

Mahimo usab nga ikaw mamalandong “sa bililhon ug dagko uyamot nga mga saad” ang Dios naghatag sa Iyang mga Santos––lakip kanimo (2 Pedro 1:4). Ang mensahe ni Elder David A. Bednar diha sa “Bililhon ug Dagko Uyamot nga mga Saad” (Liahona, Nob. 2017, 90–93) makatabang kanimo sa pagsabot kon unsa kadto nga mga saad ug unsaon sa pagdawat niini.

Mga Ideya alang sa Pamilya nga Pagtuon sa Kasulatan ug Home Evening

1 Pedro 2:5–10.Samtang magbasa ka niini nga mga bersikulo uban sa imong pamilya, hunahunaa ang paggamit og dagkong mga bato aron sa pagtabang sa mga sakop sa pamilya nga mahanduraw ang mga pagtulon-an ni Pedro nga ang atong Manluluwas mao ang atong “bato nga pamag-ang.” Sa unsang paagi kita sama sa “madasigon [buhi] nga mga bato” nga gigamit sa Dios sa pagtukod sa Iyang gingharian? Unsay atong makat-onan gikan ni Pedro mahitungod sa Manluluwas ug sa atong tahas diha sa Iyang gingharian? Unsa ang mensahe ni Pedro sa imong pamilya?

1 Pedro 3:8–17.Sa unsang paagi kita “kinahanglan nga andam kanunay sa paghatag og tubag” ngadto niadtong mangutana kanato mahitungod sa atong hugot nga pagtuo? Tingali ang imong pamilya malingaw sa pag-role play sa mga sitwasyon diin adunay tawo nga moduol kanila nga adunay pangutana mahitungod sa ebanghelyo.

1 Peter 3:18–20; 4:6.Unsa ang mabuhat sa imong pamilya nga mobati nga nasumpay ngadto sa inyong mga katigulangan? Tingali mahimo ninyong isaulog ang mga adlawng natawhan sa namatay nga mga katigulangan pinaagi sa pag-andam sa ilang kinaham nga mga pagkaon, pagtan-aw sa mga litrato, o pagsaysay og mga istorya gikan sa ilang mga kinabuhi. Kon posible, mahimo usab nga ikaw makaplano sa pagdawat og mga ordinansa alang sa imong mga katigulangan diha sa templo (alang sa tabang, bisitaha ang FamilySearch.org).

2 Pedro 1:16–21.Niini nga mga bersikulo, gipahinumdoman ni Pedro ang mga Santos sa iyang kasinatian diha sa Bukid sa Transpigurasyon (tan-awa usab sa Mateo 17:1–9). Unsa ang atong makat-onan gikan niini nga mga bersikulo mahitungod sa mga pagtulon-an sa mga propeta? (tan-awa usab sa Doktrina ug mga Pakigsaad 1:38). Unsa ang makahatag kanato og pagsalig sa pagsunod sa atong buhi nga propeta karon?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Family History—Naghimo Ako,” Songbook sa mga Bata,, 100.

Pagpalambo sa Atong Pagtudlo

“Andam kanunay.” Impormal nga mga higayon sa pagtudlo diha sa panimalay moabot ug molabay dayon, busa importante ang pagpahimulos niini kon kini moabot. Sa unsa nga paagi ikaw makapaningkamot nga “andam kanunay” sa pagtudlo sa imong mga sakop sa pamilya sa mga kamatuoran sa ebanghelyo ug mopaambit “sa paglaom nga anaa kaninyo” (1 Pedro 3:15) kon moabot ang mga higayon sa pagtudlo? (Tan-awa sa Pagtudlo sumala sa Pamaagi sa Manluluwas, 16.)

Bisan si Pedro nag-atubang og daghang pagpanggukod ug oposisyon, nagpabilin siya nga makanunayon sa iyang pagpamatuod ni Kristo.