Si Jesukristo nagpahiyom samtang naglingkod uban sa nagpahiyom nga mga bata

Perfect Love [Hingpit nga Gugma], ni Del Parson

Nobyembre 27–Disyembre 3

1–3 Juan; Judas

“Ang Dios Gugma”

Samtang magbasa ka sa mga Sulat [Epistola] ni Juan ug Judas, pagtinguha og inspirasyon mahitungod kon unsaon nga ikaw makapakita sa imong gugma ngadto sa Dios. I-rekord kini nga mga panghunahuna ug buhata kini.

I-rekord ang Imong mga Panghunahuna

Sa dihang gisulat ni Juan ug Judas ang ilang mga sulat, sayop nga doktrina misugod na sa paggiya sa daghang mga Santos ngadto sa pagbiya sa kamatuoran (apostasiya). Ang ubang mini nga mga magtutudlo mikwestyon gani kon nagpakita ba gayod si Jesukristo “sa unod” (tan-awa, pananglitan, sa 1 Juan 4:1–3; 2 Juan 1:7). Unsa ang mabuhat sa usa ka lider sa Simbahan sa ingon nga sitwasyon? Si Apostol Juan mitubag pinaagi sa paghatag sa iyang personal nga pagsaksi sa Manluluwas: “Mao kini ang pagpamatuod nga among ihatag bahin niana nga gikan sa sinugdanan, nga among nadungog, nga among nakita sa among mga mata, nga among nasud-ong, ug nahikap sa among mga kamot, ang Pulong sa kinabuhi” (Joseph Smith Translation, 1 John 1:1 [sa 1 John 1:1, ]). Ug dayon mitudlo si Juan mahitungod sa gugma: Ang gugma sa Dios alang kanato ug ang atong gugma nga kita kinahanglan aduna alang Kaniya ug sa Iyang tanang mga anak. Bisan pa, usa ka saksi si Juan kabahin niana, usab. Personal niya nga nasinati ang gugma sa Manluluwas (tan-awa sa Juan 13:23; 20:2), ug buot niya nga ang mga Santos mobati nianang sama nga gugma. Ang pagpamatuod ug mga pagtulon-an ni Juan kabahin sa gugma sama usab ka gikinahanglan karon, kon ang hugot nga pagtuo diha ni Jesukristo gisukna ug ang sayop nga mga pagtulon-an nagdagsang. Ang pagbasa sa mga sulat ni Juan makatabang kanato sa pag-atubang sa mga kalisdanan karon uban sa kaisog, tungod kay “ang kahadlok wala diha sa gugma; hinonoa ang hingpit nga gugma nagahingilin sa kahadlok” (1 Juan 4:18).

icon sa personal nga pagtuon

Mga Ideya alang sa Personal nga Pagtuon sa Kasulatan

1 Juan; 2 Juan

Ang Dios kahayag, ug ang Dios gugma.

Kon kamo mopili og usa o duha ka pulong sa paghulagway sa Dios, unsa kaha kini? Diha sa iyang sulat, si Juan kasagarang migamit sa mga pulong nga “kahayag” ug “gugma” (tan-awa, sama pananglit, 1 Juan 1:5; 2:8–11; 3:16, 23–24; 4:7–21). Samtang ikaw magbasa sa unang duha ka mga sulat ni Juan, palandonga ang mga kasinatian ni Juan uban sa kahayag ug sa gugma sa Manluluwas. Sama pananglit, hunahunaa kon unsa ang nakat-onan ni Juan gikan sa mga pagtulon-an ni Jesus sa Juan 3:16–17; 12:35–36, 46; 15:9–14; 19:25–27. Nakakita ka ba og bisan unsa nga mga pagkasusama tali niini nga mga pagtulon-an ug sa unsa ang gitudlo sa 1 Juan mahitungod sa kahayag ug gugma sa Dios? Unsa ang personal nga mga kasinatian ang nakatudlo kanimo nga ang Dios mao ang kahayag ug gugma?

1 Juan 2–4; 2 Juan

“Kon kita maghinigugmaay ang usa sa usa, ang Dios magapabilin kanato.”

Makaplagan usab nimo ang mga pulong sama sa “anaa kaniya” (abide) ug “magapabilin” (dwell) nga gibalik-balik sa tibuok nga mga sulat ni Juan. Pangitaa kini nga mga pulong, ilabi na kon imong basahon ang 1 Juan 2–4 ug ang 2 Juan. Unsa kaha ang kahulogan sa “makapanag-iya” o “magapabilin” diha sa Dios ug sa Iyang doktrina? (tan-awa sa 2 Juan 1:9). Unsa ang kahulogan nganha kanimo sa “makapanag-iya” o “magapabilin” diha kanimo?

1 Juan 2:24–3:3

Ako makahimo nga mahisama ni Jesukristo.

Ang tumong ba nga mahimong sama ni Kristo ingon og taas kaayo nga tumong alang kanimo? Hunahunaa ang makaawhag nga tambag ni Juan: “Mga anak, pabilin kamo diha kaniya; nga sa igapadayag na siya unya, kita may pagsalig … [ug] kita mahisama kaniya” (1 Juan 2:28; 3:2). Unsay imong nakita sa 1 Juan 2:24–3:3 nga makahatag kanimo og pagsalig ug kahopayan isip disipulo ni Jesukristo? Samtang magtuon ka sa mga sulat ni Juan, pangitaa ang ubang mga baroganan o tambag nga makatabang kanimo sa imong paningkamot nga mahimong mas mahisama ni Kristo.

Tan-awa usab sa Moroni 7:48; Doktrina ug mga Pakigsaad 88:67–68; Scott D. Whiting, “Pagkahimong Sama Kaniya,” Liahona, Nob. 2020, 12–14.

1 Juan 4:12

“Walay tawo … nga nakakita sa Dios sa bisan unsa nga higayon”?

Ang Hubad ni Joseph Smith sa,1 Juan 4:12 nagklaro nga “walay tawo nga nakakita sa Dios sa bisan unsa nga higayon, gawas kanila kinsa nagtuo” (tan-awa usab sa Juan 6:46; 3 Juan 1:11). Ang mga kasulatan nagrekord sa pipila ka higayon sa dihang ang Dios nga Amahan nagpakita sa Iyang kaugalingon ngadto sa matinud-anong mga indibidwal, lakip ni Juan mismo (tan-awa sa Pinadayag 4; tan-awa usab sa Mga Buhat 7:55–56; 1 Nephi 1:8; Doktrina ug mga Pakigsaad 76:23; Joseph Smith—Kasaysayan 1:16–17).

1 Juan 5

Kon magpakita ako og pagtuo diha ni Jesukristo ug matawo ako pag-usab, mabuntog nako ang kalibotan.

Samtang magbasa ka sa 1 Juan 5, pangitaa kon unsay angay natong buhaton sa pagbuntog sa kalibotan ug sa pag-angkon sa kinabuhing dayon. Unsa kaha mahisama ang pagbuntog sa kalibotan diha sa imong kinabuhi? Makakita usab ikaw og mga tubag ug mga pagpasabot sa mensahe ni Elder Neil L. Andersen “Pagbuntog sa Kalib[o]tan” (Liahona, Mayo 2017, 58–62).

Judas 1

“[Managtubo] diha sa inyong balaan uyamot nga tinoohan.”

Unsa ang gitudlo sa Judas 1:10–19 kanimo mahitungod niadtong kinsa nakig-away batok sa Dios ug sa Iyang buhat? Unsa ang imong nakat-onan gikan sa mga bersikulo 20–25 mahitungod kon unsaon sa pagpabilin sa imong hugot nga pagtuo diha ni Jesukristo nga lig-on?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

1 Juan 2:8–11.Sa pagtabang sa imong pamilya nga mamalandong sa mga pagtulon-an ni Juan, pagpundok diha sa usa ka ngitngit nga kwarto aron ang mga sakop sa pamilya makasinati sa kalainan tali sa paglakaw “diha sa kangitngit” ug paglakaw “diha sa kahayag.” Sa unsa nga paagi nga ang kasilag maoy nakaingon nga kita naglakaw sa kangitngit ug mahisukamod? Sa unsa nga paagi nga ang paghigugma sa usag usa makahatag og kahayag sa atong kinabuhi?

1 Juan 3:21–22.Unsa ang anaa niini nga mga bersikulo ang nagdugang sa atong “pagsalig” diha sa Dios ug sa atong abilidad sa pagdawat og mga tubag sa atong pag-ampo?

usa ka pamilya nagluhod diha sa pag-ampo

Ang pagsunod sa mga sugo sa Dios nagtabang kanato nga mabuntog ang kalibotan.

1 Juan 5:2–3.Aduna bay bisan unsa nga mga sugo nga atong gihunahuna nga “mabug-at” o malisod nga sundon? Sa unsa nga paagi nga ang atong gugma sa Dios makausab sa atong pagbati mahitungod sa Iyang mga sugo?

3 Juan 1:4.Unsay ipasabot sa “nanagsubay sa kamatuoran”? Tingali mahimong gamiton nimo kini nga oportunidad sa pagsulti sa mga sakop sa imong pamilya kon giunsa nimo pagtan-aw ang ilang paglakaw diha sa kamatuoran ug sa paghisgot mahitungod sa hingpit nga kalipay kini nagdala kanimo. Ang mga sakop sa pamilya tingali malingaw sa pagsulat o sa pagdrowing sa mga kamatuoran nga ilang nakat-onan diha sa mga tunob nga papel ug sa paggamit niini sa paghimo og usa ka dalan nga ang imong pamilya mahimong magkuyog sa paglakaw.

Judas 1:3–4.Aduna bay bisan unsa nga espirituhanong mga kakuyaw nga “nanagpakasulod” sa atong kinabuhi ug pamilya? (Judas 1:4). Unsaon nato pagsunod ang pahimangno ni Judas nga “makigbisog sa pagpanalipod sa tinuohan” ug mobatok niini nga mga kakuyaw? (Judas 1:3). Unsay atong mahimo sa pagsiguro nga ang “kalinaw, ug gugma, pagadayagaon” sa atong pamilya? (Judas 1:2).

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Kon Asa ang Gugma,” Children’s Songbook, 76–77.

Pagpalambo sa Personal nga Pagtuon

Pangitaa ang gugma sa Dios. Si Presidente M. Russell Ballard mitudlo, “[Ang] ebanghelyo mao ang ebanghelyo sa gugma—gugma alang sa Dios ug gugma alang sa usag usa” (“God’s Love for His Children,” Ensign, Mayo 1988, 59). Samtang ikaw magbasa sa mga kasulatan, hunahunaa ang paghinumdom sa mga ebidensya sa gugma sa Dios.

Kristo naglakaw subay sa daplin sa usa ka lanaw

Walk with Me [Lakaw uban Kanako], ni Greg K. Olsen