Composite art ni Eric Johnson: Ang Halangdong Konseho, ni Robert T. Barrett; pundok sa bitoon kortesiya sa European Space Agency

Disyembre 11–17

Pinadayag 6–14

“Sila Nakadaog … pinaagi sa Dugo sa Kordero”

Si Presidente Boyd K. Packer mitambag: “Kon ang pinulongan sa kasulatan sa sinugdanan daw lahi alang kaninyo, padayuna ang pagbasa. Sa umaabut inyong makita ang katahom ug gahom nga anaa niana nga mga pahina” (“Ang Yawe sa Espirituhanong Panalipod,” Liahona, Nob. 2013, 27).

I-rekord ang Imong mga Panghunahuna

Hunahunaa ang usa ka babaye “tungod sa kasakit sa pagbati, ug kasakit sa pagpanganak.” Karon hunahunaa ang “usa ka dakong dragon nga mapula, nga may pito ka buok ulo ug napulo ka buok sungay” naglupad ibabaw sa babaye, nag-atang “aron iyang subaron ang bata inigkahimugso na niini” (Pinadayag 12:2–4). Aron masabtan kini nga mga bersikulo sa pinadayag ni Juan, hinumdumi nga kini nga mga imahe nagrepresentar sa Simbahan ug sa gingharian sa Dios ug sa kakuyaw nga ilang pagaatubangon. Alang sa mga Santos kinsa nakasinati og grabe nga pagpanggukod sa panahon ni Juan, ang kadaugan ibabaw sa dautan ingon og dili posible. Kini nga kadaogan lisod usab nga lantawon sa panahon sama sa atoa, nga ang kaaway anaa “nakiggubat sa mga balaan” ug adunay “kagahom … ang tanang kabanayan ug katawhan ug pinulongan ug kanasuran” (Pinadayag 13:7). Apan sa kataposan sa pagpadayag ni Juan mahimayaong nagpakita nga ang maayo magpatigbabaw sa dautan. Ang Babilonia mapukan. Ug ang mga Santos “managpakalabang sa dakong kasakitan” nga may mga tag-as nga bisti nga puti––dili tungod kay ang ilang mga tag-as nga bisti nga puti wala gayod mamansahi, apan tungod kay ang mga Santos “ang ilang mga tag-as nga bisti gilabhan nila ug gipaputi diha sa dugo sa Kordero” (Pinadayag 7:14).

Mga Ideya alang sa Personal nga Pagtuon sa Kasulatan

Pinadayag 6–11

Nakita ni Juan ang daghang mga panghitabo sa kasaysayan sa yuta, ilabi na niadtong sa ulahi nga mga adlaw.

Niini nga mga kapitulo imong mabasa ang mahitungod sa usa ka basahon nga may pito ka mga selyo. Kon ikaw natingala kon unsay kahulogan niini, wala ka mag-inusara. Si Propeta Joseph Smith mao usab. Ang Ginoo mipadayag ngadto ni Joseph nga kini nga basahon ug ang mga timri niini nagrepresentar sa istorya sa “temporal nga kinabuhi” sa kalibotan, nga ang matag silyo nagrepresentar og usa ka libo ka tuig (tan-awa sa Doktrina ug mga pakigsaad 77:6–7). Tingali ikaw mainteresado nga mahibalo nga ang mga panghitabo sa unang upat ka mga silyo gi-summarize diha sa panan-awon ni Juan sa walo lamang ka bersikulo (Pinadayag 6:1–8). Ang sunod nga tulo ka mga bersikulo naghulagway sa ikalima nga silyo (mga bersikulo 9–11). Ang mga panghitabo sa kataposang duha ka silyo naggamit sa kadaghanan sa nahibiling basahon sa Pinadayag. Sa laing pagkasulti, ang labing gipunting sa panan-awon ni Juan mao ang kataposang mga adlaw––atong mga adlaw. Samtang ikaw magbasa, palandonga kon nganong importante ang mahibalo kon unsa ang gisulat ni Juan mahitungod sa ulahing mga adlaw.

Samtang ikaw magbasa mahitungod sa mga panghitabo nga gipanagna ni Juan, hunahunaa ang mosunod nga mga sugyot ug mga pangutana:

• Basaha ang Pinadayag 7 uban sa buhat sa pagpundok sa Israel nga anaa sa hunahuna. Unsa nga mga hunahuna ikaw aduna mahitungod niini nga buhat? (tan-awa usab sa Doktrina ug mga Pakigsaad 77:8–11). Unsa ang imong nakat-onan gikan sa mga bersikulo 13–17 mahitungod ni Jesukristo ug niadtong kinsa miduol ngadto Kaniya?

• Unsa ang gitudlo sa mga kapitulo 8; 9; ug 11 kanimo mahitungod sa mga panghitabo sa kataposang mga adlaw? (tan-awa usab sa Doktrina ug mga Pakigsaad 77:12–13, 15). Unsaon nato sa pagpangandam sa espirituhanong paagi alang niini nga mga panghitabo?

• Pinadayag 10 nagsaysay sa usa ka basahon nga gihatag sa usa ka anghel ngadto ni Juan ug nagmando kaniya sa pagkaon. Unsa kaha ang gisimbolo niini? (tan-awa sa Doktrina ug mga Pakigsaad 77:14).

Pinadayag 12–13

Ang Gubat didto sa Langit nagpadayon dinhi sa yuta.

Wala kaayo kitay nahibaloan mahitungod sa Gubat sa Langit, apan adunay klaro nga mubo nga paghulagway niini sa Pinadayag 12:7–11. Samtang magbasa ka niini nga mga bersikulo, handurawa ang imong kaugalingon nga isip kabahin niana nga premortal nga panagbangi. Unsa ang imong nakat-onan mahitungod kon unsaon si Satanas sa pagbuntog? (tan-awa sa bersikulo 11).

Ang gubat nga nagsugod didto sa langit nagpadayon sa yuta, samtang si Satanas nagpadayon sa “pagpakiggubat batok [niadtong kinsa] adunay pagpamatuod ni Jesukristo” (Pinadayag 12:17). Unsa ang imong nakat-onan gikan sa Pinadayag 13 mahitungod kon giunsa niya sa pagpakiggubat karon? Giunsa sa “dugo sa Kordero” ug “sa pulong sa [imong] pagpamatuod” (Pinadayag 12:11) pagpadayon sa pagtabang kanimo niini nga gubat?

Tan-awa usab sa 1 Nephi 14:12–14; Moroni 7:12–13; Moises 4:1–4; Doktrina ug mga Pakigsaad 29:36–37; Gospel Topics, “War in Heaven,” topics.ChurchofJesusChrist.org.

Pinadayag 14:6–7

“Nakita ko ang laing manolunda … nga may gidalang walay kataposan nga ebanghelyo.”

Usa sa katumanan sa panagna niini nga mga bersikulo nahitabo sa dihang si Moroni nagpakita ngadto ni Joseph Smith ug migiya kaniya ngadto sa mga rekord nga iyang gihubad ug gimantala nga ang Basahon ni Mormon. Kini nga basahon naglakip sa “walay kataposang Maayong Balita” nga kita gisugo nga atong isangyaw ngadto sa “tanang kanasuran ug kabanayan, ug pinulongan, ug katawhan” (Pinadayag 14:6).

Sa pagkat-on mahitungod sa ubang mga anghel kinsa nakaapil sa pagpahiuli sa walay kataposang ebanghelyo, tan-awa sa Doktrina ug mga Pakigsaad 13; 27:5–13; 110:11–16; 128:20–21.

Tan-awa usab sa “Ang Pagpahiuli sa Kahingpitan sa Ebanghelyo ni Jesukristo: Duha ka Gat[o]s ka Tuig nga Pamahayag ngadto sa Kalib[o]tan,” ChurchofJesusChrist.org.

Mga Ideya alang sa Pamilya nga Pagtuon sa Kasulatan ug Home Evening

Pinadayag 7:9, 13–15.Unsa ang matudlo niini nga bersikulo kanato mahitungod kon ngano nga kita magsul-ob og puti alang sa mga ordinansa sa templo?

Pinadayag 7:14–17.Hunahunaa ang pagdapit og mga sakop sa pamilya sa pagpakigbahin sa ilang mga pagbati mahitungod sa mga saad sa Ginoo dinhi niini nga mga bersikulo. Unsaon sa Iyang mga saad pagtabang kanato kon kita anaa sa “dakong kasakitan”? (bersikulo 14).

Pinadayag 12:7–11; 14:6.Ang pipila ka sakop sa pamilya tingali malingaw ug makabenepisyo sa pagdrowing og mga litrato sa mga panan-awon nga gihulagway sa Pinadayag. Pananglitan, magdrowing og mga litrato base sa Pinadayag 12 nga mahimong mosangpot sa mga panaghisgutan mahitungod sa Gubat sa Langit (tan-awa sa mga bersikulo 7–11). Ang mga hulagway nga gibase diha sa Pinadayag 14:6 makagiya ngadto sa mga panaghisgot mahitungod sa Pagpahiuli sa ebanghelyo.

Human mabasa ang Pinadayag 14:6 og dungan, hunahunaa ang pagpakita og mga hulagway ni anghel Moroni ug sa ubang mga anghel kinsa mitabang sa pagpahiuli sa ebanghelyo sa atong panahon (tan-awa ang mga hulagway sa kataposan niini nga outline). Tingali ang mga sakop sa pamilya makapuli-puli sa pagpataas og usa ka hulagway ug sa pagpakigbahin og mga katarongan nga sila mapasalamaton nga ang mga anghel miabot “may gidalang walay kataposang ebanghelyo aron imantala ngari [kanato].”

Pinadayag 12:11.Unsa kaha ang gipasabot sa mga pulong “ang pulong sa ilang pagpanghimatuod”? Sa unsa nga paagi nga ang atong pagpamatuod ni Jesukristo makatabang nato ug sa uban sa pagbuntog ni Satanas?

Pinadayag 13:11–14.Unsa ang mga hunahuna sa mga sakop sa imong pamilya mahitungod sa nagpahisalaag nga mapintas nga mananap? Unsaon nato sa pag-ila ug paglikay sa pangilad nga atong makita sa kalibotan karon?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Magmaisugon Ko,” Songbook sa mga Bata, 85.

Pagpalambo sa Personal nga Pagtuon

Ipaunlod ang imong kaugalingon diha sa mga kasulatan. Si Presidente Russell M. Nelson mitudlo, “Inadlaw nga pagbasa sa pulong sa Dios importante alang sa espirituhanong kaluwasan, ilabi na niining panahon sa nagkagrabe nga kaguliyang” (“Paminaw Kaniya,” Liahona, Mayo 2020, 89). Unsa ang kahulogan sa “pagpatuhop diha sa pulong sa Dios” nganha kanimo?

“Si Sidney Rigdon uban ni Oliver Cowdery.” Moroni Delivering the Golden Plates, ni Gary L. Kapp; Upon You My Fellow Servants, ni Linda Curley Christensen and Michael T. Malm (Juan nga Bautista nagtugyan sa Aaronic nga Pagkapari diha ni Joseph Smith); Keys of the Kingdom, ni Linda Curley Christensen and Michael T. Malm (Pedro, Santiago, ug Juan nagtugyan sa Melchizedek nga Pagkapari diha ni Joseph Smith; Vision in the Kirtland Temple, ni Gary E. Smith (Moises, Elias, ug Elijah nagpakita ngadto ni Joseph Smith ug Oliver Cowdery).