Composite nga art ni Eric Johnsen: The Grand Council [Ang Dakong Konseho], ni Robert T. Barrett; pundok sa mga bituon sa maayong kabubut-on sa European Space Agency

Disyembre 11–17

Gipadayag 6–14

“Gibuntog sa Atong mga Kaigsoonan … pinaagi sa Dugo sa Nating Karnero”

Samtang imong basahon ang Gipadayag 6–14, hunahunaa ang mga bata nga imong gitudloan. Ang Espiritu Santo makatabang kanimo sa pagtino og mga kamatuoran nga importante ngadto kanila.

Dapita ang Pagpaambit

Ipakita ang pipila ka hulagway nga motabang sa mga bata nga makahinumdom sa mga butang nga bag-ohay nilang nakat-onan sa panimalay o sa Primary. Dapita ang mga bata sa pagpakigbahin sa unsay ilang nahibaloan mahitungod sa mga hulagway.

Itudlo ang Doktrina: Mas Gagmay nga mga Bata

Gipadayag 7:9, 13–14

Si Jesukristo nagtabang kanako nga mahimong limpyo.

Si Juan nakakita og daghang tawo nga nagsul-ob og mga bisti nga “gipaputi … sa dugo sa Nating Karnero” (bersikulo 14). Ikonsiderar kon sa unsang paagi nga kini nga panan-awon makatabang sa mga bata nga makasabot sa kaimportante nga malimpyohan pinaagi sa Pag-ula ni Jesukristo.

Posible nga mga Kalihokan

• Ipakita sa mga bata ang pipila ka puti nga mga sinina (o usa ka hulagway sa pipila niini) ug usa ka hulagway ni Jesus. Basaha ang Gipadayag 7:9, 13–14 ngadto sa mga bata, ug hangyoa sila sa pagtudlo ngadto sa hulagway ug sa mga sinina sa matag higayon nga makadungog sila sa pulong nga puti. Ipasabot nga ang puti nga mga sinina nagrepresentar sa kalimpyo ug nagpahinumdom kanato nga si Jesukristo makahimo kanato nga limpyo gikan sa atong mga sayop.

• Ipakita sa mga bata ang usa ka piraso sa puti nga panapton o usa ka piraso sa papel, ug pahugawi kini kanila pinaagi sa pagmarka niini gamit ang bolpen o sa pagbutang og hugaw niini. Ipasabot nga kon kita dili motuman sa mga sugo, kini daw mabati nga adunay hugaw sa atong mga sinina. Ipakita ang usa ka hulagway ni Jesus nga didto sa Getsemani (sama sa Libro sa mga Hulagway sa Ebanghelyo, nu. 56), hiposa ang hugaw nga panapton, ug ipakita nila ang usa ka limpyo nga panapton. Pagpamatuod nga si Jesukristo makatabang kanato nga mahimong limpyo.

• Kantaha ang usa ka awit mahitungod sa bunyag, sama sa “Kon Ako Bunyagan” (Songbook sa mga Bata, 53), ug pagpamatuod nga si Jesus nagtabang kanato nga mahimong limpyo sa dihang kita gibunyagan.

Gipadayag 12:7–11

Mipakita ako og hugot nga pagtuo diha ni Jesukristo didto sa kinabuhi sa wala pa dinhi sa yuta.

Sa Gubat sa Langit, ang matinud-anong mga anak sa Dios mibuntog ni Satanas pinaagi “sa pulong sa ilang pagpamatuod” ug pinaagi sa pagpakita og hugot nga pagtuo diha ni Jesukristo (Gipadayag 12:11). Nagpadayon sila karon sa pagbuhat sa ingon.

Posible nga mga Kalihokan

• Aron matabangan ang mga bata nga makasabot sa unsay ipasabot sa pagsunod sa ehemplo sa usa ka tawo, pagpili og usa ka bata nga mahimong “lider”, ug hangyoa ang uban sa pagsunod kaniya pinaagi sa pagbuhat sa bisan unsa nga iyang buhaton. Dayon tugoti ang ubang mga bata nga mahimong lider. Basaha ang Gipadayag 12:7–11 ngadto sa mga bata ug ipasabot nga sa wala pa kita matawo, mipili kita sa pagsunod ni Jesus ug dili ni Satanas.

• Kantaha og dungan ang usa ka awit mahitungod sa kinabuhi sa wala pa dinhi sa yuta, sama sa “Langit Gipuy-an Ko” o “Sundon Ko ang Plano sa Dios” (Songbook sa mga Bata, 140, 86–87). Ipangutana ang sama sa, “Unsay nahitabo didto sa langit sa wala pa kita matawo?” ug “Unsa ang atong gipili nga buhaton?” (Tan-awa usab sa “Pasiuna: Ang Plano sa Atong Langitnong Amahan” diha sa Mga Istorya sa Bag-ong Tugon, 1-5.)

Gipadayag 14:6–7

Ang ebanghelyo gipahiuli sa atong panahon.

Si Juan misulat mahitungod sa usa ka anghel kinsa modala sa “walay kataposang Maayong Balita” (Gipadayag 14:6). Ang paghisgot sa Gipadayag 14:6–7 maghatag og oportunidad alang kanimo sa pagpamatuod bahin sa Pagpahiuli sa ebanghelyo ni Jesukristo sa atong panahon.

Posible nga mga Kalihokan

• Ipakita sa mga bata ang usa ka hulagway ni Moroni nga nakig-istorya kang Joseph Smith samtang imong basahon ang Gipadayag 14:6 (tan-awa sa Libro sa mga Hulagway sa Ebanghelyo, nu. 91). Dapita ang mga bata sa pagtudlo ngadto sa anghel diha sa hulagway. Ipaambit kanila ang istorya sa pagbisita ni Moroni (tan-awa sa “Kapitulo 3: Ang Anghel Moroni ug ang Bulawan nga mga Palid,” diha sa Mga Istorya sa Doktrina ug mga Pakigsaad, 13–16).

• Dapita ang mga bata sa pagdrama-drama sa istorya ni Moroni nga mibisita kang Joseph Smith (tan-awa sa Joseph Smith—Kasaysayan 1:29–35). Tabangi sila sa pagngalan sa pipila ka panalangin nga atong natagamtan tungod kay napahiuli ang ebanghelyo ni Jesukristo. Ipaambit ang imong pagpamatuod kabahin sa Pagpahiuli.

Itudlo ang Doktrina: Mas Magulang nga mga Bata

Gipadayag 9:1–2

Ang ebanghelyo makatabang kanako sa pagbuntog sa tintasyon.

Ang aso nga nagpangitngit sa kahanginan diha sa Gipadayag 9:2 makumpara sa mga tintasyon (tan-awa sa 1 Nephi 12:17).

Posible nga mga Kalihokan

• Pagdrowing og mga hulagway sa adlaw ug ngitngit nga panganod, ug guntinga kini. Dapita ang mga bata sa pagbasa sa Gipadayag 9:2 ug 1 Nephi 12:17 ug isulat diha sa ngitngit nga panganod kon unsa ang girepresentar sa aso o gabon dinhi niini nga mga bersikulo. Ibutang ang ngitngit nga panganod diha sa pisara, ug dapita ang mga bata sa paghimo og lista sa mga tintasyon nga giatubang sa mga bata nga ilang kaedad. Dayon ibutang ang adlaw diha sa pisara ug hangyoa sila sa paghimo og lista sa mga himan nga gihatag sa Langitnong Amahan kanato aron sa pagbuntog sa kangitngit sa kalibotan.

Gipadayag 12:7–11

Mipakita ako og hugot nga pagtuo diha ni Jesukristo didto sa kinabuhi sa wala pa dinhi sa yuta.

Ang mga bata nga imong gitudloan ania sa kalibotan tungod kay sila adunay hugot nga pagtuo diha ni Jesukristo sa kinabuhi sa wala pa dinhi sa yuta ug mipili sa pagsunod Kaniya.

Posible nga mga Kalihokan

• Basaha og dungan ang Gipadayag 12:7–11, ug isulat diha sa pisara ang mga pulong nga dragon, Gubat didto sa Langit, gitambog, pagpamatuod, ug Nating Karnero. Hangyoa ang mga bata sa pag-summarize niini nga mga bersikulo gamit ang mga pulong diha sa pisara. Unsay atong makat-onan mahitungod ni Jesukristo (ang Nating Karnero) gikan niini nga mga bersikulo? Unsa ang atong makat-onan mahitungod sa mga pagpili nga atong gihimo didto sa kinabuhi sa wala pa dinhi sa yuta?

• Diha sa pisara, paghimo og tulo ka kolum ug sulati kini og Sa wala pa kini nga kinabuhi, Atol niini nga kinabuhi, ug Sa duha. Pag-andam og mga ginunting nga papel nga nagpahayag og mga kamatuoran mahitungod sa kinabuhi sa wala pa dinhi sa yuta ug mahitungod sa mortal nga kinabuhi, sama sa Aduna kitay mga lawas, Wala kitay mga lawas, Nagpuyo kita sa presensiya sa Dios, Nakiggubat kita kang Satanas, Mopakita kita og hugot nga pagtuo diha ni Jesukristo, ug Mosunod kita sa plano sa Dios. Papuli-puliha ang mga bata sa pagkuha og usa ka ginunting nga papel ug sa pagdesisyon kon hain nga kolum kini nalakip. Ipaambit ang imong pagsalig nga ang mga bata makapadayon sa pagpakita og hugot nga pagtuo diha kang Kristo.

Gipadayag 14:6–7

Isip kabahin sa Pagpahiuli, ang ebanghelyo isangyaw sa tibuok kalibotan.

Ang mga bata nga imong gitudloan makatabang sa pagsangyaw sa ebanghelyo “ngadto sa tanang katawhan sa kalibotan sa nagkalainlaing nasod, banay ug pinulongan” (Gipadayag 14:6).

Posible nga mga Kalihokan

• Hangyoa ang mga bata sa pagbasa sa Gipadayag 14:6–7 ug sa pagsulat diha sa pisara og mga pulong o mga pulongan gikan niini nga mga bersikulo nga mahinungdanon kanila. Hangyoa sila sa pagpaambit kon nganong ilang gipili kadto nga mga pulong o mga pulongan. Ipasabot nga kini nga mga bersikulo naghulagway sa Pagpahiuli sa ebanghelyo sa atong panahon. Pangutan-a sila kon sa unsang paagi nga sila makaapil sa buhat sa pagsangyaw sa ebanghelyo ngadto sa kalibotan.

• Dapita ang mga bata sa pagbasa sa Gipadayag 14:7 ug sa pagsulti og balik gamit ang ilang kaugalingon nga mga pulong sa mensahe nga ang anghel aduna alang sa kalibotan. O dapita sila sa pagdrowing og hulagway nga nagrepresentar sa mensahe sa anghel. Unsa ang atong mapaambit sa uban mahitungod sa ebanghelyo ni Jesukristo?

Awhaga ang Pagkat-on diha sa Panimalay

Tabangi ang mga bata sa pagsulat og pulong o pulongan nga makatabang kanila nga makahinumdom sa usa ka butang nga ilang nakat-onan sa klase karon. Dapita sila nga ipakita ang unsay ilang gisulat ngadto sa usa ka tawo sa panimalay ug sa pagpaambit sa unsay ilang nakat-onan.

Pagpalambo sa Atong Pagtudlo

Itudlo ang doktrina pinaagi sa musika. Ang pagkanta og mga awit uban sa mga bata makasuporta sa doktrina nga imong gitudlo gikan sa mga kasulatan. Alang sa mga ideya, tan-awa sa “Paggamit og Musika sa Pagtudlo sa Doktrina” diha sa seksiyon nga giulohan og “Mga Panudlo alang sa Panahon sa Pagpanganta ug sa Pasundayag sa mga Bata sa Panagtigom alang sa Sakramento” sa kataposan niini nga manwal.