The City Eternal [Ang Mahangtorong Dakbayan], ni Keith Larson

Disyembre 25–31

Gipadayag 15–22

“Ang Modaog Makadawat [Niining Tanan]”

Samtang mangandam ka sa pagtudlo, gamita ang imong personal o uban sa imong pamilya nga kasinatian sa pagtuon sa Gipadayag 15–22. Unsay importante alang kanimo? Unsa nga mga impresyon ang imong nadawat? Hinumdomi nga ang tanang kalihokan nga gisugyot niini nga latid mahimong mapahiangay alang sa mga bata sa bisan unsang edad.

Dapita ang Pagpaambit

Dapita ang mga bata sa pagpaambit kon nganong gusto nilang mopuyo pag-usab uban sa Langitnong Amahan. Sa tibuok leksiyon, tabangi sila sa pagpangita og mga butang nga ilang mahimo aron mangandam sa pagbalik ngadto Kaniya.

Itudlo ang Doktrina: Mas Gagmay nga mga Bata

Gipadayag 15:2–4

Ako makadayeg sa Dios pinaagi sa pagkanta.

Ang mga Santos nga gihulagway ni Juan sa Gipadayag 15:2–4 mikanta og mga pagdayeg alang sa Iyang kaayo. Unsa nga mga awit sa pagdayeg ang makatabang sa mga bata nga makapahayag sa ilang gugma alang sa Langitnong Amahan ug ni Jesukristo?

Posible nga mga Kalihokan

• Samtang imong basahon og kusog ang mga bahin sa Gipadayag 15:2–4, hangyoa ang mga bata sa paghimo og mga aksiyon sama sa pagpakaaron-ingnon nga nagtukar og alpa o nagdirekta og choir. Unsay atong bation kon manganta kita mahitungod ni Jesus?

• Hangyoa ang mga bata sa pagpaambit sa pipila sa ilang paborito nga mga awit mahitungod sa Langitnong Amahan ug ni Jesukristo. Kantaha og dungan ang pipila sa mga awit, ug tabangi ang mga bata nga makasabot kon unsay gitudlo sa mga awit kanato mahitungod sa Langitnong Amahan ug sa Manluluwas.

Gipadayag 19:7

Makapangandam ako alang sa Ikaduhang Pag-anhi ni Jesukristo pinaagi sa pagpili sa matarong.

Unsaon nimo pagtabang ang mga bata nga makasabot nga ang Ikaduhang Pag-anhi mahimong usa ka malipayon nga panghitabo alang kanato kon mosunod kita sa mga sugo ni Jesus?

Posible nga mga Kalihokan

• Pangutan-a ang mga bata kon nakatambong na ba sila og kasal. Sama sa unsa kadto? Nganong malipayon ang mga tawo diha sa kasal? Ipakita ang hulagway sa Ikaduhang Pag-anhi sa Manluluwas diha sa latid niini nga semana sa Dali, Sunod Kanako—Alang sa mga Indibidwal ug mga Pamilya, ug basaha ang Gipadayag 19:7. Ipasabot nga ang “kasal sa Nating Karnero” nagrepresentar sa Ikaduhang Pag-anhi ni Jesukristo. Nganong maglipay man kita kon moanhi na pag-usab ang Manluluwas? Tabangi ang mga bata sa pagtandi sa kalipay sa usa ka kasal ngadto sa kalipay sa pagbalik sa Manluluwas.

• Ipaambit sa mga bata kon nganong nagpaabot ka sa Ikaduhang Pag-anhi ni Jesus. Mahimo usab ninyong kantahon og dungan ang usa ka awit mahitungod sa Ikaduhang Pag-anhi, sama sa “Kon Siya Moanhi Pag-usab” (Songbook sa mga Bata, 46–47).

• Dapita ang mga bata sa pagpaambit kon unsay ilang gibuhat aron mangandam sa pagsimba sa Dominggo. Nganong buhaton man nato kini nga mga butang sa dili pa kita moadto sa simbahan? Nganong kinahanglan man kitang mangandam sa Ikaduhang Pag-anhi ni Kristo? Sa pahina sa kalihokan niini nga semana, ipadrowing sa mga bata kon unsay ilang mabuhat aron mangandam sa Ikaduhang Pag-anhi.

Gipadayag 21:1, 3–4, 22–27; 22:1–2

Gusto sa Langitnong Amahan nga mopuyo ako uban Kaniya didto sa celestial nga gingharian.

Sa kataposang duha ka kapitulo sa Gipadayag, si Juan migamit og matahom nga mga pinulongan aron sa paghulagway sa celestial nga himaya nga matagamtam sa mga matinud-anon.

Posible nga mga Kalihokan

• Tabangi ang mga bata sa pagdrowing diha sa pisara sa kahoy nga gihulagway diha sa Gipadayag 22:2. Ipasabot nga kini nga kahoy mao ang kahoy sa kinabuhi, ug ang mga bunga niini nagrepresentar sa gugma sa Dios (tan-awa sa 1 Nephi 11:21–22). Hatagi ang mga bata og mga piraso sa papel nga giporma og bunga, ug dapita sila sa pagdrowing diha sa papel sa usa ka butang nga nakatabang kanila nga mobati sa gugma sa Langitnong Amahan. Ipasabot nga kadtong naghigugma ug nagsunod sa Langitnong Amahan mopuyo uban Kaniya diha sa celestial nga gingharian.

• Ipaambit sa mga bata ang pipila ka hulagway o mga detalye nga gigamit ni Juan sa paghulagway sa celestial nga himaya (tan-awa sa Gipadayag 21:1, 3–4, 22–27; 22:1–2), ug dapita ang mga bata sa pagdrowing og mga hulagway niini nga mga butang.

• Kantaha og dungan ang usa ka awit nga nagtudlo unsaon nato nga makapangandam nga mobalik sa presensiya sa Dios, sama sa “Sundon Ko ang Plano sa Dios” (Songbook sa mga Bata, 86–87). Dapita ang mga bata sa pagtino kon unsay ilang mabuhat aron makapuyo pag-usab uban sa Langitnong Amahan.

Itudlo ang Doktrina: Mas Magulang nga mga Bata

Gipadayag 19:7–8

Makapangandam ako alang sa Ikaduhang Pag-anhi ni Jesukristo pinaagi sa pagpili sa matarong.

Unsaon nimo pagtabang ang mga bata nga imong gitudloan nga makasabot nga ang Ikaduhang Pag-anhi ni Jesukristo mahimong usa ka malipayong panghitabo alang sa mga matarong?

Posible nga mga Kalihokan

• Basaha og dungan ang Gipadayag 19:7–8, ug tabangi ang mga bata sa pagsabot sa mga simbolismo niini nga mga bersikulo—ang kasal mao ang Ikaduhang Pag-anhi sa Manluluwas, ang Nating Karnero mao ang Manluluwas, ug ang Iyang asawa mao ang Simbahan (o kitang tanan). Unsa nga mga butang ang atong mabuhat aron mangandam sa pag-anhi pag-usab sa Manluluwas?

• Rebyoha ug sag-uloha ang Mga Artikulo sa Hugot nga Pagtuo 1:10 uban sa mga bata. Ipasabot nga kini nga artikulo sa hugot nga pagtuo naghulagway sa makapahinam, mahimayaon nga mga panghitabo nga mahitabo sa pag-anhi pag-usab ni Jesus. Ipakita ang hulagway sa Ikaduhang Pag-anhi ni Jesus diha sa Dali, Sunod Kanako—Alang sa mga Indibidwal ug mga Pamilya, ug dapita ang mga bata sa pagdrowing kon sama sa unsa kaha ang Ikaduhang Pag-anhi ni Jesus.

Gipadayag 20:12–13

Hukman ako sa Dios.

Tanan kanato ugma damlag mobarog sa atubangan sa Dios aron hukman. Makatabang ka sa mga bata nga makasabot nga ang Iyang paghukom matarong, makiangayon, ug maloloy-on.

Posible nga mga Kalihokan

• Isulat diha sa pisara Sama sa unsa man kaha ang Adlaw sa Paghukom? Dapita ang mga bata sa pagpangita og mga tubag sa pangutana diha sa Gipadayag 20:12–13 ug sa “Paghukom, Ang Katap[o]san nga” sa Giya ngadto sa mga Kasulatan (scriptures.ChurchofJesusChrist.org). Unsa ang nabuhat sa Manluluwas aron ang Adlaw sa Paghukom mahimong malipayon nga adlaw? (tan-awa sa Mga Artikulo sa Hugot nga Pagtuo 1:3–4). Unsa ang atong mabuhat aron malipayon kini nga adlaw alang kanato?

  

  The Last Judgement [Ang Kataposang Paghukom], ni John Scott

• Pagdala sa klase og notebook nga nagrepresentar sa “libro sa kinabuhi” (Gipadayag 20:12), diin imong gisulat ang pipila sa Kristohanong mga hiyas ug maayo nga mga buhat sa mga bata sa imong klase. Basaha ngadto sa mga bata ang mga butang nga imong gisulat, ug dapita sila sa paghisgot mahitungod sa Kristohanong mga kinaiya nga ilang nakita sa usag usa. Ipaambit ang imong pagpamatuod nga si Jesukristo nagtabang kanato nga mahimong mas mahisama Kaniya ug naghatag og paagi alang kanato nga maghinulsol nga makabuntog sa sala.

Gipadayag 21:1, 3–4, 22–27; 22:1–2, 17

Gusto sa Langitnong Amahan nga mopuyo ako uban Kaniya didto sa celestial nga gingharian.

Samtang imong gibasa ang paghulagway ni Juan sa celestial nga himaya diha sa Gipadayag 21–22, unsay nakapadani kanimo? Unsay imong gibati nga angayng ipaambit sa mga bata nga imong gitudloan?

Posible nga mga Kalihokan

• Dapita ang mga bata sa pagsiksik sa mosunod nga mga bersikulo alang sa pipila ka pulong o mga pulongan nga gigamit ni Juan sa paghulagway sa celestial nga himaya: Gipadayag 21:1, 3–4, 22–27; 22:1–2. Papilia sila og usa ka butang niini nga mga bersikulo nga ganahan nilang drowingon. Dayon mahimo nilang hisgotan ang ilang mga drowing diha sa klase. Awhaga sila sa pagpakita sa ilang mga drowing ngadto sa ilang mga pamilya sa panimalay.

• Basaha og dungan ang Gipadayag 22:17, ug ipasabot nga ang pangasaw-unon kinsa miingon og “Dali ngari” mao ang Simbahan. Isip mga miyembro sa Simbahan, kinsa man ang uban nga gusto natong dapiton nga “moduol” ngadto? (tan-awa sa Moroni 10:30–33). “Giuhaw” sa unsa kaha ang kadtong mga naglibot kanato? Unsa ang pipila ka maayo nga mga paagi sa pagdapit sa mga tawo aron “moduol”?

Awhaga ang Pagkat-on diha sa Panimalay

Tabangi ang mga bata nga mangandam sa pagbasa sa Basahon ni Mormon sa sunod tuig pinaagi sa pagdapit kanila sa paghangyo sa usa ka sakop sa pamilya o higala sa pagpaambit og paborito nga bersikulo o istorya gikan sa Basahon ni Mormon.

Pagpalambo sa Atong Pagtudlo

Tudloi ang mga bata sa pagrekord og mga impresyon. Kon makakat-on ang mga bata sa gawi sa pagrekord og mga impresyon, makatabang kini kanila sa pag-ila ug pagsunod sa Espiritu. Ang mga bata makarekord og mga impresyon pinaagi sa pagmarka sa mga kasulatan, pagdrowing og mga hulagway, o paghimo og yano nga mga pagsulat diha sa journal. (Tan-awa sa Pagtudlo sumala sa Pamaagi sa Manluluwas, 30.)