bag-ong natawo nga bata

Little Lamb [Gamay nga Nating Karnero], ni Jenedy Paige

Disyembre 18–24

Pasko

“Maayong Balita … nga Makalipay Kaayo”

Kini nga leksiyon usa ka oportunidad sa pagtabang sa mga bata nga imong gitudloan sa pagsaulog sa pagkatawo, kinabuhi, ug misyon sa Manluluwas panahon sa Pasko. Hinumdomi kini samtang mangandam ka sa pagtudlo.

pagpaambit nga icon

Dapita ang Pagpaambit

Ipakita ang hulagway sa latid niini nga semana sa Dali, Sunod Kanako—Alang sa mga Indibidwal ug mga Pamilya, ug dapita ang mga bata sa pagpaambit sa unsay ilang nahibaloan mahitungod sa pagkatawo sa Manluluwas.

pagtudlo nga icon

Itudlo ang Doktrina: Mas Gagmay nga mga Bata

Mateo 2:1–12; Lucas 2:1–14

Si Jesukristo mianhi sa yuta isip usa ka masuso.

Ganahan ang mga bata sa istorya sa pagkatawo ni Jesukristo. Unsa nga mga kamatuoran sa doktrina ang imong nakita niini nga istorya nga gibati nimo nga angayang masabtan sa mga bata?

Posible nga mga Kalihokan

• Basaha ang Lucas 2:1–14 ngadto sa mga bata, o ihulagway ang mga panghitabo niini nga mga bersikulo pinaagi sa paggamit sa “Kapitulo 5: Jesukristo Natawo,” (diha sa Mga Istorya sa Bag-ong Tugon, 13–15). Dapita ang mga bata sa pagdrowing og mga hulagway niini nga mga hitabo ug sa paggamit sa mga hulagway aron sa pagsaysay sa istorya sa ilang kaugalingon. Nganong malipayon man kita nga natawo si Jesukristo?

• Hangyoa ang mga bata sa pagsaysay kanimo sa istorya bahin sa Maalamon nga mga Tawo nga misunod sa bituon aron sa pagpangita kang Jesus. Kon kinahanglan silang mapahinumdoman sa istorya, tan-awa sa Mateo 2:1–12 o sa “Kapitulo 7: Ang Maalamon nga mga Tawo” (sa Mga Istorya sa Bag-ong Tugon, 18). Tagoi ang usa ka hulagway ni Jesus diha sa lawak. Pagdrowing o paggunting og usa ka bituon nga papel ug kupti kini pataas. Dapita ang mga bata nga magpakaaron-ingnon nga mao ang maalamon nga mga tawo nga nagdala og mga gasa, ug giyahi sila libot sa kwarto aron sa pagpangita kang Jesus. Tabangi ang mga bata sa paghunahuna og pipila ka gasa nga atong mahatag kang Jesus.

• Kantaha ang pipila ka himno o awit sa Pasko dungan sa mga bata (tan-awa sa Mga Himno, mga nu. 120–130; Songbook sa mga Bata, 20–32). Hangyoa sila sa pagpaambit og usa ka butang nga gitudlo sa matag awit nga gibati nila nga importante nga mahibaloan.

Si Jesus nagluhod didto sa Tanaman sa Getsemani

Gethsemane [Getsemani], ni J. Kirk Richards

Juan 3:16

Gihimong posible ni Jesukristo nga makapuyo ako pag-usab uban sa Langitnong Amahan ugma damlag.

Nakasabot ba ang mga bata nga imong gitudloan nganong mianhi si Jesukristo sa yuta? Paggahin og panahon sa pagpamalandong kon unsay nabuhat sa Manluluwas alang kanimo sa personal nga paagi ug unsaon nimo pagtabang ang mga bata nga makasabot kon unsay Iyang nabuhat alang kanila.

Posible nga mga Kalihokan

• Pagdala sa klase og pinutos nga regalo o kahon nga dunay hulagway ni Jesukristo sa sulod. Butangi kini og tag nga adunay “Juan 3:16” nga nakasulat niini, ug sultihi ang mga bata nga usa kini ka timailhan kon unsa ang gasa. Basaha ang Juan 3:16 uban sa mga bata, ug dapita sila sa pagtag-an kon unsa ang gasa ug ablihi kini. Nganong gipadala sa Dios kanato ang Iyang Anak?

• Tabangi ang mga bata sa paghuman niini nga kapahayag: “Si Jesukristo mianhi sa yuta aron .” Dayon ipakita ang mga hulagway nga may kalabotan sa maulaong sakripisyo, kamatayon, ug Pagkabanhaw sa Manluluwas (tan-awa sa Libro sa mga Hulagway sa Ebanghelyo, mga nu. 56–59), ug daklit nga isaysay ang mahitungod niini nga mga panghitabo. Mahimo usab kamong mokanta og awit kon nganong mianhi si Jesus sa yuta, sama sa “Mipadala sa Bugtong Anak” (Songbook sa mga Bata, 20–21). Ipakigbahin ang imong pagpamatuod ni Jesukristo ug kon unsay Iyang nabuhat alang kanimo.

pagtudlo nga icon

Itudlo ang Doktrina: Mas Magulang nga mga Bata

Mateo 1:18–25; 2:1–12; Lucas 1:26–38; 2:1–20

Si Jesukristo mianhi sa yuta isip usa ka masuso.

Unsaon nimo pagtabang ang mga bata nga makatutok kang Jesukristo panahon sa Pasko?

Posible nga mga Kalihokan

• Dapita ang usa sa mga bata sa pagbasa mahitungod sa pipila sa mga panghitabo kalabot sa pagkatawo sa Manluluwas (tan-awa sa Mateo 1:18–25; 2:1–12; Lucas 1:26–38; 2:1–20). Hangyoa ang ubang mga bata nga magpuli-puli sa pagdrowing og mga hulagway diha sa pisara sa unsay gihulagway sa mga kasulatan. Unsa ang gitudlo kanato niini nga mga istorya mahitungod ni Jesukristo?

• Dapita ang mga bata sa pagsulat diha sa pipila ka piraso nga papel sa mga butang nga ilang mahimo nga makatabang kanila nga makatutok sa Manluluwas atol sa panahon sa Pasko. Dapita sila sa pagpaambit sa unsay ilang gisulat. Awhaga ang mga bata sa pagdala sa mga piraso sa papel ngadto sa panimalay ug buhaton ang mga sugyot nga ilang gisulat diha sa mga piraso uban sa ilang mga pamilya.

• Kantaha ang mga awit sa Pasko mahitungod sa Manluluwas (tan-awa sa Songbook sa mga Bata, 20–32; Mga Himno, mga nu. 120–130), ug dapita ang mga bata sa pagpaambit og paborito nga linya o pulongan gikan sa mga awit.

Juan 3:16

Gihimong posible ni Jesukristo nga makapuyo ako pag-usab uban sa Langitnong Amahan ugma damlag.

Unsaon nimo pagtabang ang mga bata sa pagrebyo sa unsay ilang nakat-onan niini nga tuig ug sa pagsabot nganong nagkinahanglan sila ni Jesukristo sa ilang kinabuhi?

Posible nga mga Kalihokan

• Sulati ang usa ka piraso sa papel og Kinsa si Jesukristo? ug sa laing papel Nganong mianhi Siya sa yuta? ug ipapilit kini sa lainlaing bungbong sa lawak klasehanan. Dapita ang matag bata sa pagbasa og usa sa mosunod nga mga kasulatan: Mateo 16:15–16; Juan 3:16; 1 Nephi 10:4; Mosiah 3:8; Alma 7:10–13; 3 Nephi 27:14–15. Hangyoa ang mga bata sa pagpangita og mga tubag, diha sa mga kasulatan nga ilang basahon, sa duha ka pangutana diha sa mga bungbong. Dapita sila sa pagsulat sa ilang mga tubag ug ipapilit kini sa bungbong tupad sa tukma nga pangutana. Unsaon man nato sa pagpakita sa atong pasalamat alang sa unsay nahimo ni Jesukristo alang kanato?

• Dapita ang mga bata sa paglista diha sa pisara sa tanang ngalan o titulo ni Jesus nga ilang mahunahunaan (tan-awa sa Giya ngadto sa mga Kasulatan, “Jesukristo”). Unsa ang gitudlo kanato niini nga mga ngalan mahitungod ni Jesukristo ug sa Iyang misyon? Nganong gikinahanglan man nato si Jesukristo sa atong kinabuhi?

pagkat-on nga icon

Awhaga ang Pagkat-on diha sa Panimalay

Awhaga ang mga bata sa pagpangita og labing menos usa ka paagi sa pagserbisyo sa laing tawo o mas magpaduol kang Jesukristo niini nga Pasko.

Pagpalambo sa Atong Pagtudlo

Dapita ang mga bata sa pagpakigbahin sa unsay ilang nakat-onan. Ang mga bata mahimong adunay gamhanan nga impluwensiya alang sa kaayohan diha sa ilang mga pamilya. Awhaga ang mga bata nga imong gitudloan sa pagpaambit ngadto sa ilang mga pamilya og usa ka butang nga ilang nakat-onan sa Primary. (Tan-awa sa Pagtudlo sumala sa Pamaagi sa Manluluwas, 30.)

pahina sa kalihokan: si Jesukristo mianhi sa yuta isip usa ka masuso