Hingpit nga Gugma, ni Del Parson

Nobyembre 27–Disyembre 3

1–3 Juan; Judas

“Ang Dios Gugma”

Ang Mga Sulat ni Juan ug ni Judas nagtudlo mahitungod sa gugma ug kahayag sa Langitnong Amahan. Samtang magtuon ka niini nga semana, pamalandongi nganong ang mga bata nga imong gitudloan nagkinahanglan sa Iyang kahayag ug gugma diha sa ilang kinabuhi. Hinumdomi ang pagkonsiderar sa tanang kalihokan nga gisugyot niini nga latid, dili lang kadtong gisulat alang sa grupo sa edad nga imong gitudloan.

Dapita ang Pagpaambit

Dapita ang mga bata sa pagpaambit kon sa unsang paagi sila mibati sa gugma sa Langitnong Amahan ug ni Jesus o sa ilang hunahuna ngano nga ang Langitnong Amahan ug si Jesus sama sa usa ka kahayag ngari kanato.

Itudlo ang Doktrina: Mas Gagmay nga mga Bata

1 Juan 1:5–7; 2:8–11

Ang pagsunod ni Jesus naghatag og kahayag sa akong kinabuhi.

Si Juan misulat mahitungod sa kahayag aron sa pagtudlo mahitungod sa impluwensiya sa Langitnong Amahan ug ni Jesus sa atong kinabuhi. Hunahunaa kon unsaon nimo pagtabang ang mga bata nga makakat-on mahitungod sa kahayag nga Ilang gitanyag.

Posible nga mga Kalihokan

• Hangyoa ang mga bata sa pagngalan og mga butang nga naghatag og kahayag. Hisgoti ngadto nila ang mahitungod sa mga benepisyo sa kahayag, sama sa pagtabang sa mga tanom nga motubo, pagtugot kanato nga makakita, ug paghatag og kainit. Aron makasabot kon sa unsang paagi nga si Jesus naghatag kanato og kahayag, mahimo silang magpuli-puli sa pagpasiga og kahayag nganha sa usa ka hulagway ni Jesukristo samtang moingon sila, “Ang Dios kahayag” (1 Juan 1:5). Pagpamatuod nga ang Langitnong Amahan ug si Jesukristo makahatag og kahayag sa atong kinabuhi kon maningkamot kita nga mosunod sa unsay Ilang gisulti.

• Dapita ang mga bata nga magpuli-puli sa paggunit og hulagway sa usa ka bombilya o kandila. Samtang gunitan sa matag bata ang hulagway, tabangi siya nga maghunahuna og usa ka paagi nga atong madala ang kahayag ni Jesukristo sa atong kinabuhi.

1 Juan 4:10–11, 20–21

Akong mapakita ang akong gugma sa Dios kon mopakita ako og gugma alang sa uban.

Tabangi ang mga bata nga makakita sa koneksiyon tali sa gugma nga ilang gibati alang sa Langitnong Amahan ug sa gugma nga ilang gipakita sa Iyang mga anak.

Posible nga mga Kalihokan

• Basaha ang 1 Juan 4:11 ngadto sa mga bata, ug kantaha ang usa ka awit mahitungod sa gugma sa Dios, sama sa “Gihigugma Ako sa Langitnong Amahan” (Songbook sa mga Bata, 16). Paghangyo og pipila ka bata sa pagpaambit kon sa unsang paagi nga nahibalo sila nga ang Langitnong Amahan nahigugma kanila. Human sa matag tubag, dapita ang mga bata sa paggakos sa ilang kaugalingon ug sa pag-ingon, “Ang Dios gugma, ug ang Dios nahigugma kanako.”

• Basaha ang 1 Juan 4:21 ngadto sa mga bata. Dapita sila sa pagpaambit o sa pagdrama-drama og lainlaing paagi nga makapakita sila og gugma ngadto sa usa ka higala, sama sa paggakos o paghimo og kard. Unsa ang bation sa atong mga higala niining mga butanga? Unsa ang bation sa Langitnong Amahan kon maghimo kita og mabinationg mga butang alang sa uban?

1 Juan 2:3–5; 5:3

Akong mapakita ang akong gugma sa Dios kon mosunod ako sa Iyang mga sugo.

Si Juan mitudlo nga “dili lisod tumanon ang … mga sugo” sa Dios (1 Juan 5:3). Hinuon, ang pagsunod sa mga sugo usa ka paagi sa pagpadayag og gugma alang Kaniya.

Posible nga mga Kalihokan

• Basaha ang 1 Juan 5:3, ug hangyoa ang mga bata sa pagpaminaw kon unsa ang gisulti niini nga bersikulo kon sa unsang paagi nga atong mapakita nga nahigugma kita sa Dios. Dapita ang mga bata sa pagngalan og daghang sugo kutob sa ilang mahimo. Unsa ang atong bation kon motuman kita sa mga sugo sa Langitnong Amahan?

• Dapita ang mga bata sa pagdrowing og hulagway nga nagpakita og usa ka paagi nga sila makapakita sa Langitnong Amahan nga sila nahigugma Kaniya. Pananglitan, mahimo silang modrowing og hulagway sa ilang kaugalingon nga nagtuman sa usa sa mga sugo.

• Kantaha og dungan ang usa ka awit mahitungod sa pagkamasulundon, sama sa “Pilia ang Matar[o]ng nga Paagi” (Songbook sa mga Bata, 82). Unsa ang atong bation kon motuman kita?

Itudlo ang Doktrina: Mas Magulang nga mga Bata

1 Juan 2:8–11; 4:7–8, 20–21

Akong mapakita ang akong gugma sa Dios kon mopakita ako og gugma alang sa uban.

Unsaon nimo pagtabang ang mga bata nga makasabot nga ang paghigugma sa Dios naglakip sa paghigugma niadtong naglibot kanato—bisan sa mga tawo nga tingali lahi kay kanato o lisod higugmaon?

Posible nga mga Kalihokan

• Hangyoa ang mga bata sa paghanduraw nga usa ka bag-ong tawo nagsugod sa pagtambong sa ilang eskwelahan o ward ug wala pay nailhan nga bisan usa didto. Unsa kaha ang bation niini nga tawo? Dapita ang usa ka bata nga mobasa sa 1 Juan 4:7–8. Unsa man ang gisugyot niini nga bersikulo kon unsaon nato sa pagtagad niini nga tawo? Pagpaambit og susama nga mga sitwasyon, o hangyoa ang mga bata sa paghunahuna og mga sitwasyon diin aduna tingali silay mga oportunidad sa pagpakita og gugma.

• Hangyoa ang mga bata sa pagbasa sa 1 Juan 4:7–8, 20–21, ug dapita ang matag usa kanila sa pagsulat og usa ka kapahayag aron sa pag-summarize sa unsay ilang gihunahuna nga mao ang labing importante nga leksiyon niini nga mga bersikulo. Human sila mopaambit sa ilang mga kapahayag, pagpaambit og istorya gikan sa imong kinabuhi o gikan sa Higala o Liahona nga magasin nga gibati nimo nga naghulagway sa unsay gitudlo niini nga mga bersikulo (tan-awa, sama pananglit ang, “Timbayaa si Halim!,” Liahona, Hunyo 2019, H18–H19). Dapita ang mga bata sa pagpaambit sa ilang kaugalingon nga mga ehemplo. Sa unsang paagi nga kita makapakita og gugma alang niadtong naglibot kanato?

1 Juan 2:3–6; 4:17–18; 5:2–5

Akong mapakita ang akong gugma sa Dios kon mosunod ako sa Iyang mga sugo.

Ang pagtuman sa mga sugo mahimong mas sayon kon makasabot kita sa mga kamatuoran nga gitudlo diha sa 1 Juan 5:3. Unsaon nimo pagtabang ang mga bata nga makakita sa mga sugo dili isip mga palas-anon apan isip mga oportunidad sa pagpahayag sa ilang gugma sa Dios?

Posible nga mga Kalihokan

• Dapita ang mga bata sa paglista diha sa pisara sa mga paagi nga makapakita sila sa Dios nga sila nahigugma Kaniya. Dayon basaha og dungan ang 1 Juan 2:5–6; 5:2–5 alang sa dugang nga mga ideya. Sa unsang paagi ang pagtuman sa mga sugo nagpakita nga kita nahigugma sa Langitnong Amahan?

Ang pagtuman sa mga sugo sa Dios makatabang kanato nga mabuntog ang kalibotan.

• Basaha ang 1 Juan 4:17, ug ipasabot sa mga bata nga ang “may pagsalig unya sa adlaw sa paghukom” nagpasabot sa pagbaton og pagsalig ug kalinaw kon mobarog sila atubangan sa Dios aron pagahukman. Unsa ang gitudlo niini nga bersikulo nga kinahanglan natong buhaton aron makabaton niini nga pagsalig? Unsa ang pipila ka butang nga atong mahimo karon aron mahimong masaligon atubangan sa Dios?

Judas 1:18–22

Mahimo akong magmatinud-anon bisan kon ang uban mobugalbugal kanako.

Tungod kay kita mga disipulo ni Jesukristo, usahay ang uban magbugalbugal kanato tungod sa atong mga gituohan o sa paagi nga kita nagpakabuhi. Kini nga mga bersikulo naglangkob sa tambag ni Judas kon unsaon nga magpabiling matinud-anon sa ingon nga mga sitwasyon.

Posible nga mga Kalihokan

• Hangyoa ang mga bata sa pagpaambit og mga higayon sa dihang ang uban nagbugalbugal kanila o sa usa ka tawo nga ilang kaila tungod kay gibuhat nila ang unsay husto. Dapita ang mga bata sa pagbasa sa Judas 1:18–22 ug sa pagpangita kon unsaon nato nga magpabiling matinud-anon kon kita biaybiayon o bugalbugalan. Isulat kon unsay ilang nakit-an diha sa pisara, ug hisgoti ang mga paagi nga makasunod sila niini nga tambag.

• I-summarize ang damgo ni Lehi (tan-awa sa 1 Nephi 8:1–35), nga mohangyo sa pipila ka bata sa pagbasa sa mga bersikulo gikan sa 1 Nephi 8:26–28, 33. Hisgoti kon sa unsang paagi nga ang mga tawo diha sa dako ug lapad nga gambalay susama sa mga mayubiton nga gihisgotan ni Judas. Unsay atong mabuhat aron dili maimpluwensiyahan niadtong nagbugalbugal kanato o wala mouyon sa unsay atong gituohan? (tan-awa sa 1 Nephi 8:30, 33).

Awhaga ang Pagkat-on diha sa Panimalay

Awhaga ang mga bata sa paghimo og plano nga mobuhat og usa ka butang aron sa pagpaambit sa ilang kahayag ngadto sa ilang mga pamilya.

Pagpalambo sa Atong Pagtudlo

Ang mga bata lihokan [active]. Usahay mahimong bation nimo nga ang enerhiya sa mga bata makabalda sa pagkat-on. Apan magamit nimo ang ilang aktibo nga mga kinaiya pinaagi sa pagdapit kanila sa pagdrama-drama, pagdrowing, o sa pagkanta mahitungod sa usa ka baroganan sa ebanghelyo. (Tan-awa sa Pagtudlo sumala sa Pamaagi sa Manluluwas, 25–26.)