Timbayaa si Halim!
Ang tagsulat nagpuyo sa Idaho, USA.
“Nakadawat kamo nga walay bayad, busa panghatag kamo nga walay bayad” (Mateo 10:8).
Sa eskwelahan nianang buntaga, nakabantay si Marcus og bag-ong batang lalaki nga misulod sa lawak-klasehanan.
“Maayong buntag sa tanan,” miingon si Mrs. Becker samtang nanghilum ang tanan. “Mao kini si Halim. Bag-o siya sa atong eskwelahan. Gani, bag-o siya sa atong nasud.”
Nagsige og tan-aw sa salog si Halim samtang miingon siya og hello. Naghunahuna si Marcus nga morag lahi paminawon ang iyang tingog. Mipadayon sa pagsulti si Mrs. Becker.
“Nalipay kaayo kita nga ania siya dinhi ug nga mahimo siyang parte sa atong klase. Hinaut nga kitang tanan makatabang kaniya nga mobati nga gihangup.”
Samtang gipakita ni Mrs. Becker kang Halim asa molingkod, nakahunahuna si Marcus sa kakulba nga iyang bation kon kinahanglan siyang mobalhin ngadto sa usa ka bag-ong nasud ug bag-ong eskwelahan.
Human sa ilang snack sa buntag, gisultihan ni Mrs. Becker ang tanan nga aduna siyay surprisa alang kanila. Tul-id kaayo nga milingkod si Marcus aron makakita siya kon unsa ang iyang gikuha gikan sa iyang bag. Gagmay kini nga mga balde. Misugod siya sa pagpasa niini ngadto sa tanan sa klase.
“Ang matag usa kanato adunay mahanduraw nga balde sulod kanato,” miingon siya samtang mitunol siya kang Marcus og yellow nga balde. “Masudlan sa mga tawo ang atong balde kon mobuhat sila og maayo alang kanato. Ug masudlan nato ang mga balde sa uban pinaagi sa pagminaayo ngadto kanila. Sama pananglit, kon mogakos kaninyo ang inyong mama, gisudlan niya ang inyong balde. Kon duna kamoy isulti nga maayo ngadto sa usa ka tawo, gisudlan ninyo ang ilang balde.”
Mitan-aw si Marcus sa iyang labing suod nga higala, si Caleb. Yellow usab ang iyang balde!
“Karong semanaha, atong ibutang sa atong mga lamesa kini nga mga balde aron makahimo kita og maayo nga mga sulat alang sa usag usa,” miingon si Mrs. Becker. Mipilo siya og gamay nga piraso sa papel ug gibutang kini sa usa ka balde. “Ug makatabang kana kanato nga mahinumdom sa mahanduraw nga mga balde nga anaa sa sulod sa tanan. Gusto nato nga magmabination aron kita mga tigsulod og mga balde.”
Mikuha si Marcus og usa ka piraso sa papel ug naghunahuna sa mga butang nga iyang masulat ngadto ni Caleb, sama sa kamaayo niya sa mga dula. Apan mitan-aw dayon siya kang Halim. Medyo nagbako ang iyang abaga, nga daw masulub-on siya.
Naghunahuna si Marcus kon duna bay suod nga higala si Halim didto sa iyang kanhi gipuy-an. Lisud tingali ang manamilit ug makahahadlok nga mobalhin og layo kaayo.
Gitan-aw ni Marcus ang blangko nga piraso sa papel diha sa iyang lamesa. Aduna siyay ideya, dayon misulat siya,
“Minahal nga Halim,
Gihangup ka namo sa among eskwelahan. Kon gusto nimo, mahimo kitang magdula panahon sa recess. Mahimo ko nimong higala. Ug sigurado ko nga si Caleb mahimo usab nimong higala.
Gikan ni Marcus.”
Dayon mainampingon niyang gipilo ang papel ug gihulog kini diha sa balde ni Halim. Mipahiyum si Halim. Mibati si Marcus og kainit ug kalipay sa kaugalingon. Ganahan siyang mahimong tigpuno og balde!