Batan-ong mga Hamtong [Young Adults]
Napanalanginan pinaagi sa Pagkaangkon og mga Anak
Ang tagsulat nagpuyo sa Managua, Nicaragua.
Ang mga tawo nangutana kanamo tungod sa pagkaangkon og dugang nga mga anak, apan pinaagi sa among mga anak, mas maayo namong nasabtan ang gugma sa Langitnong Amahan ug napalambo ang among balaang potensyal.
Paghulagway pinaagi ni Tausha Coates
Mao ni ang inyong katapusang anak?” Sa dihang mabdos ko sa akong ikatulong anak, aduna nay duha ka mga bata ubos sa edad nga lima ka tuig, ang mga tawo kasagaran daw adunay opinyon mahitungod sa akong mga anak. “Mao kini ang imong katapusang anak?” “Dili kaha paspas ra kaayo mo?” “Unsa man ang imong buhaton sa tulo ka mga bata?” mao ang mga pangutana nga kasagaran nakong madunggan. Bisan tuod masabtan ra kini, tungod kay ang mga tawo sa akong nasud kasagaran adunay usa o duha lamang ka mga anak tungod sa isyu sa ekonomiya, ang wala masayri sa mga tawo mao nga sa dihang ang akong bana ug ako nag-date pa, among gihisgutan kon pila ka mga anak ang among gusto ug kanus-a kami manganak. Ang pagplano sa pamilya mao ang usa ka importante ug seryuso nga desisyon alang kanamo, busa kinahanglan kaming duha ang mobuhat niini, kanunay nga nagtinguha sa giya sa Dios. Naminaw kami sa Espiritu kay sa mga tingog niadtong naglibut kanamo, ug napanalanginan kami pinaagi sa pagkaangkon og mga anak.
Sa dihang ang Ginoo mihimo og pakigsaad kang Abraham, misaad Siya kaniya og daghan nga kaliwatan (tan-awa sa Genesis 17:5–6; 22:17). Gikan niana nga tudling sa kasulatan, atong masabtan nga alang sa atong Langitnong Amahan, ang pagkaangkon og mga anak maoy usa sa labing mahinungdanon nga mga panalangin nga atong madawat. Pinaagi sa atong kaliwatan, mas maayo natong masabtan ang gugma sa atong Langitnong Amahan, ug atong mapalambo ang atong balaan ug mahangturong potensyal. Kon kamo adunay mga anak, wala lamang kamo motabang niadtong mga espiritu nga anaa sa premortal nga kinabuhi nga moanhi sa yuta ug makaangkon og lawas, apan aduna usab kamoy kahigayunan sa pagtudlo kanila sa ebanghelyo. Nagtuo ko nga pipila lang ka butang sa kinabuhi ang mas maayong makaandam kanato alang sa kinabuhing dayon kay sa pagkaangkon og mga anak. Diha sa atong mga pamilya nga labing maayo kitang makakat-on sa paggamit sa mga kinaiya sa Ginoo. Karon nga ako usa na ka mama, napahinumduman ko matag adlaw kon unsa kaimportante nga magpabiling duol sa akong Langitnong Amahan. Kanunay ko nga nag-ampo, nangayo og giya, kalig-on, ug pailub ug nagpasalamat Kaniya sa daghang mga panalangin nga miuban sa pagkaangkon og mga anak.
Ang pagkaginikanan usa ka makapausab sa kinabuhi nga kasinatian nga puno sa pipila ka mga hagit apan daghang mga kalipay. Matag higayon nga maminaw ko sa akong kinamagulangang anak nga babaye nga mokanta og awit sa Primary, o motan-aw sa akong dos anyos nga anak nga lalaki nga naningkamot sa pagpiyong sa iyang mga mata panahon sa among pag-ampo sa pamilya, o kon magkugos ko sa akong nahikatulog nga masuso nga lalaki, akong mabati ang akong kasingkasing nga napuno sa dili mahulagway nga kalipay. Ang atong mga anak mao ang nagdasig kanato aron mopadayon sa paglahutay hangtud sa katapusan, bisan unsa pa ka daghan ang mga hagit nga atong giatubang sa kinabuhi. Mapasalamaton gayud ako sa akong Langitnong Amahan tungod sa paghatag nako og oportunidad nga mahimong inahan sa akong mga anak.
Nasayud ako nga ang atong Langitnong Amahan nahigugma kanato. Akong gibati ang Iyang gugma atol niadtong matam-is nga gamayng mga higayon nga puno sa tinuod nga mahangturong kalipay ingon man sa panahon sa mga pagsulay. Iyang gipadala ang Iyang Anak, si Jesukristo, aron ipakita kanato ang dalan balik ngadto sa atong langitnong panimalay. Gimahal nako ang akong pamilya, ug nasayud ako nga ang mga pamilya mahimong mag-uban sa kahangturan.