Nagkat-on Ba Kamo og Bag-o Kada Adlaw?

Kini nga artikulo orihinal nga gimantala diha sa Self-Reliance Services Blog.

Pagbansay sa inyong utok pinaagi sa pagkat-on og bag-ong mga butang nga maayo alang sa kahimsog sa inyong pangisip.

Kon kamo makalingkawas sa inyong naandan nga buluhaton ug magkat-on og bag-ong butang, sama kini sa paggamit sa usa ka kaunoran nga wala na ninyo magamit sulod sa dugayng panahon. Samtang kini malisud tingali sa sinugdanan, samtang kamo magpraktis sa pagkat-on og bag-ong butang kada adlaw, magkamaayo kamo niini, ang inyong utok mausab sa inadlaw adlaw nga hagit, mahimo kamong mas masaligon sa kaugalingon uban sa matag katumanan, ug, labawng importante, ang pagkat-on mas makalingaw!

Unsay inyong nakat-unan dili sama ka importante sa proseso mismo. Ug gamit ang mga laptop ug cell phone ug tanang impormasyon nga anaa ra sa inyong tudlo, mas mosayon pa gayud. Aduna pa man gani mga apps nga magpadala ninyo og “new things to learn [bag-ong mga butang nga makat-onan]” matag adlaw.

Ug dili na kinahanglan nga mopahigayon og usa ka detalyado nga pagpangita diha sa Google o mobasa sa tibuok nga mga artikulo sa Wikipedia. Ang paghimo sa inyong utok nga makapadayon sa usa ka bag-ong direksyon sa kada adlaw mahimong ingon ra ka sayon sa pagbasa og usa ka libro, pagmemorya og mubo nga balak, o pagkat-on og usa ka bag-ong resipe. O makahimo ka og usa ka butang nga dugay mahuman: magkat-on unsaon paggamit og instrumento, magmaster og usa ka bag-ong sport o bag-ong paugnat sa kusog o ehersisyo, o mobiyahe ngadto sa bag-ong mga dapit ug mobisita sa mga lokal nga mga lumulupyo.

Busa aniay pipila ka mga benepisyo sa pagtukmod sa inyong kaugalingon sa pagkat-on og bag-ong mga butang:

Mabatokan ang kalaay.
Mahimong mas makalingaw ug mao nga mas lingaw nga ika-istorya.
Makaangkon kamo og bag-ong mga higala (tungod sa ika 2 nga punto sa ibabaw).
Makakat-on kamo og kahanas sa pagdumala sa panahon.
Makapakita kamo og maayong ehemplo alang sa inyong mga anak—makita nila kon unsa ka lingaw ang makat-on og bag-ong mga butang.

Ania kitang tanan sa yuta alang sa personal nga paglambo. Kon makat-on kita unsaon sa pagkat-on mousbaw ang kapaspason diin kita motubo. Makapalambo kini sa atong kahingkod sa pangisip, ang atong abilidad sa pagpabilin sa mga gimbuhaton, ug ang atong pagpailub sa uban.

Daghan kaayo ang mga rason sa pagkat-on og bag-ong butang sa kada adlaw. Usa ka dako nga rason naggikan ni Alex Blackwell, kinsa miingon nga ang pagkat-on og bag-ong butang matag adlaw “makatabang kaninyo nga makita ang bili sa inyong palibut. Usahay usa ka gamay nga panglantaw ang gikinahanglan lang tingali nato aron makabaton og usa ka dakong pagdayeg ug pagbati sa bili sa mga butang sa atong palibut”(“The Benefits of Trying New Things,” Everyday Inspiration, Beliefnet, Mar. 2014).

Ang lisud nga bahin sa pagkatinuod mao ang pagsugod, busa aniay paagi aron makasugod: Pangutana sa nagpangidaron og upat ka tuig kon unsa ang ilang nakita. Sa tinud-anay, pangutana lang. Tingali motan-aw sila ninyo, tingali motan-aw sila sa palibut, tingali motan-aw sila sa ibabaw diha sa langit o moduko sa yuta. I-Google ang bisan unsa nga makuryuso ang bata sa iyang nakita. Pagkat-on sa tanang butang kutob sa inyong mahimo mahitungod sa usa ka butang. Sama pananglit, kon ang bata mosulti og mga dahon sa usa ka kahoy, sutaa unsang kahoy kini, unsa kadak-a kini nga motubo, ug diin kini naggikan. Malingaw kamo sa pagpanuki-duki sa palibut, ug ang inyong mga utok makagusto niini.

Karon kuhaa ang sama nga baruganan ug gamita kini ngadto sa inyong espiritwal nga kinabuhi. Kon mobasa kamo sa mga kasulatan, hunong og pangutan-a ang inyong kaugalingon, “Unsa man gayud ang gipasabut niana?” Sunda ang mga pakisayran. Pamalandungi ang kahulugan. Pag-ampo aron makasabut. Kon kita mohunong ug motugot nga ang atong mga utok mokalma, mao kana ang higayon nga ang Espiritu magtudlo kanato, kasagaran sa gamay nga mga paagi, pagtulun-an human sa laing pagtulun-an.

Samtang ang inyong hunahuna ug espiritu molambo sa matag adlaw, inyong masuta ang inyong kaugalingon nga mas malipayon ug mas mabungahon.