Ang Perpekto nga Plano

Kanus-a man ang katapusang higayon nga napakyas ang imong mga plano? Sa miaging semana? Ang akoa napakyas. Bisan unsa pa ka perpekto sa atong mga plano, ang wala damhang mga kausaban sa atong kinabuhi mora og mahitabo sa tanan. Wala gayud ako magplano nga kaupat makuhaan og gisabak tali sa akong duha ka mga anak, apan nahitabo kana. Kon ang mainampoong hinimo nga mga plano mosurprisa kanato sa wala damha nga mga paagi—o dili gayud molampus—unsa man ang atong buhaton? Niini nga isyu, ang batan-ong mga hamtong gikan sa lain-laing kahimtang mopaambit og mga tubag nga ilang nakaplagan alang niini nga pangutana sa dihang ang ilang plano sa pamilya wala mahitabo sumala sa giplano.

Alang kanako ug sa akong bana, ang makuhaan sa gisabak nakapausab sa among mga plano ug nakapaguol pag-ayo (tan-awa sa pahina 44). Alang ni Katherine ug sa iyang bana, ang paghashas sa mga opinyon sa katilingban aron sa pagpangita sa tingog sa Ginoo nahimong babag sa ilang dalan (tan-awa sa pahina 48).

Sa dugang nga pang-digital lamang nga mga artikulo, gipaambit ni Christina ang iyang mga kahadlok ug pagpanuko mahitungod sa pagkahimong inahan, ug gidetalye ni Brian kon sa unsang paagi ang gisangon nga buluhaton sa kasundalohan hapit motapos sa mga plano niya ug sa iyang asawa. Si Katie, usa ka young single adult, mihatag og panabut sa mahangturong kinaiya sa atong pagkatawo isip mga ginikanan.

Naghulat man kamo og mga anak nga mopanalangin sa inyong panimalay, dugangan ang gidaghanon sa mga anak kay sa orihinal ninyong giplano, o naghulat lamang nga maminyo, usa ka butang ang sigurado: Ang Langitnong Amahan adunay perpekto nga plano, ug kanunay Siya nga naggiya ug nagsuporta kanato sa personal, tinagsa-tagsa nga mga paagi samtang nagtinguha kita nga mapahiangay ang atong kabubut-on sa Iyang kabubut-on.

Bisan unsa pa man ang resulta, ang yano lamang nga pagpaningkamot nga makadala og mga anak nganhi sa kalibutan mopanalangin kanato og mas lawom nga panglantaw sa talagsaong plano sa Langitnong Amahan alang sa kalipay. Bisan asa man kamo karon sa inyong paningkamot sa pag-ugmad og pamilya, samtang inyong basahon ang among mga istorya, kinasingkasing akong nanghinaut nga ang Espiritu Santo mogiya kaninyo ngadto sa mga hunahuna o mga tubag nga makatabang kaninyo sa inyong dalan.

Malipayong pagbasa!

Marianne von Bracht

Labing Maayo nga Tambag …

Ang batan-ong mga hamtong mipaambit sa labing maayong tambag nga ilang nadawat sukad mahitungod sa pagkaangkon og mga anak:

“Sa dihang naminyo kami, usa ka talagsaong magtutudlo miingon nga usa kini ka desisyon tali kanimo, sa imong kapikas, ug sa Ginoo. Mipasidaan siya kanamo nga kasagaran ang mga tawo moingon nga kini tali sa bana ug asawa apan dili iapil ang Ginoo. Ang pagpaapil sa Ginoo sa among mga desisyon mipanalangin kanamo labaw pa sa akong masulti.”

—Bonnie Cornick, Idaho, USA

“Ayaw paghulat sa ‘hingpit nga panahon’ aron makabaton og mga anak—maghulat kamo niana sa hangtud.”

—Annie Hall, Queensland, Australia

“Ayaw kabalaka sa unsay gisulti sa uban! Kana tali ra kanimo ug sa imong kapikas ug sa Langitnong Amahan.”

—Kulani Walters, Auckland, New Zealand

Unsa ang labing maayo nga tambag nga imong nadawat sukad mahitungod sa pagbuntog sa kalisdanan? Ipadala kanamo ang imong tubag diha sa liahona.lds.org hangtud sa Hunyo 30, 2019.