Mga Baruganan sa Pagpangalagad
Ang Pagpangalagad Mao ang Pagtan-aw sa Uban sama sa Pagtan-aw sa Manluluwas Kanila
Si Jesus migahin sa kadaghanan sa Iyang panahon uban niadtong gikonsiderar nga lahi; Iyang nakita ang ilang balaang potensyal.
Detalye gikan sa Christ and the Rich Young Ruler [Si Kristo ug ang Adunahan nga Batan-ong Magmamando], ni Heinrich Hofmann
Sa atong mga paningkamot nga mangalagad sama sa Manluluwas, tingali hangyoon kita sa pagpangalagad sa usa ka tawo nga lahi kanato. Naghatag kini kanato og oportunidad sa pagkat-on ug pagtubo.
Ang kultura, edukasyon, kaliwatan, ekonomikanhon, edad, mga kinaiya kaniadto o karon, o uban pang mga kalainan makapasayon sa paghukom sa usa ka tawo bisan kon wala pa gani kita makaila kanila. Kini nga paghukom nang daan bisan wala masayud sa saktong sitwasyon maoy usa ka dakong bahin sa pagkamapihigon [prejudice], ug ang Manluluwas mipasidaan batok niini (tan-awa sa 1 Samuel 16:7; Juan 7:24).
Mahimo ba nga ibaliwala nato ang mga kalainan ug tan-awon ang uban sama sa pagtan-aw sa Manluluwas kanila? Unsaon man nato sa pagkat-on nga mohigugma sa uban kon si kinsa sila karon ug si kinsa sila nga mamahimo?
Pagsud-ong ug Paghigugma
Ang Biblia nagsaysay og pamilyar nga istorya mahitungod sa batan-ong tawo nga adunahan kinsa nangutana unsaon sa pagkaangkon og kinabuhing dayon: “Ug si Jesus, sa nagsud-ong siya kaniya, nahigugma kaniya ug miingon kaniya, Kulang kag usa ka butang; lumakaw ka, ibaligya ang imong katigayonan ug ang halin ihatag ngadto sa mga kabus, ug makabaton kag bahandi didto sa langit, ug unya umanhi ka ug sumunod ka kanako” (Marcos 10:21).
Sa dihang si Elder S. Mark Palmer sa Seventy nagtuon niini nga kasulatan pipila ka tuig ang milabay, usa ka bag-ong bahin sa istorya kalit nga nahimong mahinungdanon kaniya.
“‘Ug si Jesus, sa nagsud-ong siya kaniya, nahigugma kaniya.’
“Sa akong pagkadungog niining mga pulong, naghunahuna ko sa atong Ginoo nga mihunong ug nagsud-ong niining batan-on. Nagsud-ong—nagpasabut nga pagtan-aw nga midulot sa iyang kalag, nakamatngon sa iyang kamaayo ug usab sa iyang potensyal, ingon man nasabtan ang iyang kinadak-ang panginahanglan.
“Dayon ang yanong mga pulong—si Jesus nahigugma kaniya. Mibati Siya og bug-at nga gugma ug kalooy alang niining maayong batan-on, ug tungod niini nga gugma ug nunot niini nga gugma, si Jesus naghangyo pa gani kaniya. Akong nahunahuna kon unsay gibati niining batan-on nga mapuno sa ingon nga gugma gani samtang gihangyo sa pagbuhat og lisud kaayong butang sama sa pagbaligya sa tanan niyang gipanag-iya ug ihatag kini ngadto sa mga kabus. …
“[Nangutana ko sa akong kaugalingon] ‘Unsaon nga mapuno ko sa Kristohanong gugma aron ang [uban] mobati sa gugma sa Dios pinaagi nako ug magtinguha sa pagbag-o?’ Unsaon nako sa pagsud-ong [sa mga indibidwal libut kanako] nga sama sa Ginoo nga nagsud-ong sa batan-ong adunahan, magtan-aw nila kon kinsa gayud sila ug kinsa sila sa umaabut, kay sa unsay ilang gibuhat o unsay wala nila gibuhat? Unsaon nako nga mas mahisama sa Manluluwas?”1
Pagkat-on sa Pagtan-aw sa Uban
Ang pagkat-on sa pagtan-aw sa uban sama sa pagtan-aw sa Manluluwas kanila nagdala og daghang mga ganti. Ania ang pipila ka mga sugyot nga makatabang samtang maningkamot kita padulong niini nga tumong.
-
Ila-ilaha Sila
Paningkamot nga makaila sa mga tawo lapas sa mabaw nga mga detalye. Hibaloi nga ang pagtukod og mga relasyon nagkinahanglan og panahon ug kinasingkasing nga paningkamot. (Tan-awa ang Agosto 2018 nga artikulo sa Mga Baruganan sa Pagpangalagad nga “Pagtukod og Makahuluganong mga Relasyon” alang sa tabang.) -
Susiha ang Inyong Kaugalingon
Bantayi ang mga paghukom nga tingali gituyo o wala tuyoa ninyong nahimo. Timan-i ang mga pangagpas nga inyong gihimo mahitungod sa uban ug paningkamot nga makasabut nganong ingon niana ang inyong gibati ngadto kanila. -
Ayaw Paghimo og Paghukom
Hibaloi nga ang mga kahimtang dili maoy ilhanan sa bili sa usa ka tawo. Ibutang ang inyong kaugalingon sa ilang lugar ug ikonsiderar kon unsay gusto ninyo nga tan-awon kamo sa usa ka tawo kon anaa kamo sa sama nga mga kahimtang. Ang pagpahimulag sa mga pagpili ug kinaiya sa usa ka tawo gikan sa ilang tiunay nga bili ug balaang potensyal makatabang kanato sa pagtan-aw kanila sama sa pagtan-aw sa Manluluwas kanila. -
Pag-ampo nga Mahigugma Kanila
Pag-ampo kanunay alang kanila nga inyong hinganlan ug alang sa pailub sa pagpalambo og tinuod nga panaghigalaay. Hunahuna sa mainampoong paagi ang inyong pagserbisyo. Aduna bay kalainan tali sa unsay inyong gibuhat ug unsa gayud ang ilang gikinahanglan?
Detalye gikan sa Woman Healed [Ang Babaye Naayo], ni J. Kirk Richards
Gigahin ni Jesus ang Iyang panahon uban sa mga tawo nga gikan sa daghang lain-laing sitwasyon sa kinabuhi: adunahan, kabus, mga magmamando, ug ordinaryo nga mga tawo. Kanunay Siya nga biktima sa sayop nga paghukom sa uban sa dihang mitan-aw sila Kaniya ug sa Iyang tataw nga kakabus o dili importante nga mga kahimtang. “Sa diha nga ato na siya nga makita, walay katahum aron ato nga tinguhaon siya. … Siya gibiay-biay, ug siya wala nato mahala” (Isaias 53:2–3).
Kristohanong Panan-aw
Usa ka sister ang mipaambit niini nga istorya nga nakat-on sa pagtan-aw sa usa ka silingan gamit ang Kristohanon nga mga mata:
“Si Julia (ang ngalan giusab) nagpuyo duol kanako ug daw walay higala. Kanunay siyang makita nga naglagot ug nasuko. Bisan pa niana, nakahukom ko nga makighigala kaniya. Dili lamang usa ka kaswal nga lumalabay nga higala, apan usa ka tinuod nga higala. Nakigsulti ako kaniya sa matag higayon nga makita nako siya ug mipakita og interes sa bisan unsay iyang gibuhat. Sa hinay-hinay, nakamugna ko og higot sa panaghigalaay uban kaniya, nga nakadala og kalipay sa akong kasingkasing.
“Usa ka adlaw, nakahukom ko nga mobisita ni Julia ug mangutana kaniya mahitungod sa iyang desisyon nga dili motambong sa simbahan.
“Akong nahibaloan nga wala siyay pamilya o mga paryente sa duol. Ang iyang bugtong nga igsoon, usa ka lalaki nga nagpuyo sa layo, makigsulti kaniya kausa lamang sa usa ka tuig pinaagi sa telepono. Samtang naminaw ko nga iyang gisaysay ang iyang kayugot, kalagot, ug kasagmuyo sa iyang pamilya ug sa Simbahan, usa ka dili ikalimud nga pagbati sa kalooy ug gugma alang niini nga sister ang kusog nga miabut kanako. Akong gibati ang iyang kasakit ug mga kasagmuyo. Nakaamgo ko unsa ka magul-anon ang iyang kinabuhi. Mora og nakadungog ko og hilum nga mga pulong sa akong luyo: ‘Gimahal usab nako siya. Mahala ug respetuhi siya.’
“Milingkod ko ug naminaw hangtud nga wala na siyay masulti. Mibati ko og gugma ug kalooy alang kaniya. Usa kini ka sister nga wala gayud mahibalo sukad kon unsay sama nga higugmaon. Sa kalit lang mas nasabtan nako siya pag-ayo. Gipasalamatan nako siya nga mitugot siya nga mobisita ko kaniya, ug gibinlan nako siya og gakus sa akong pagbiya ug sa akong gugma ug pagtahud alang kaniya. Dili gayud niya mahibaloan kon unsa ko kaapektado niya niana nga pagbisita. Ang Langitnong Amahan mibukas sa akong mga mata ug mitudlo kanako nga aduna akoy kapasidad sa paghigugma uban sa dugang nga kalooy. Determinado ko sa akong tinguha dili lamang nga mahimong iyang higala apan usab iyang pamilya.”
Usa ka sagradong butang nga dapiton nga mahimong parte sa kinabuhi sa usa ka tawo. Uban sa pag-ampo, pailub, ug tabang gikan sa Espiritu, makakat-on kita sa pagbuhat niini gamit ang mas Kristohanong panan-aw.