Ang mga Panginahanglan sa Navy—ug sa Among Pamilya

Ni Brian Morrill

Ang tagsulat nagpuyo sa Virginia, USA.

Nagtuo kami nga perpekto na ang among plano alang sa pag-angkon og mga anak, apan nangausab kini sa dihang dunay kakulian nga dili namo kapugngan.

Ang pagplano sa pamilya siguro dili sayon alang sa kadaghanan sa mga managtiayon. Kanunayng dunay liboan ka mga butang nga angayng ikonsiderar ug minilyon ka mga panghitabo sa kinabuhi. Bisan og kon sa imong hunahuna aduna kay maayo nga plano, usa ka gamayng butang nga moabut ug makaguba sa tanan.

Kami usa ka pamilya sa militar. Anaa ko sa U.S. Navy, ug ang tanang butang nga among buhaton gibase sa “mga panginahanglan sa Navy.” Moadto mi kon asa kami paadtoon sa Navy kon kini mosulti nga kami moadto didto. Mga duha ka tuig ang milabay, ang akong asawa, si Shanna, ug ako nakaangkon sa among unang anak nga babaye si Isabelle. Samtang usa kadto ka dakong kahigayunan, sukad anaa pa ko sa flight school, maayo ra ang among kinabuhi. Pagkahuman sa usa katuig nga natawo si Isabelle, gibati namo nga panahon na nga mopuno og laing anak. Sa dili madugay mahuman nako sa flight school ug madistino sa akong unang squadron.

Nahibaloan dayon namo nga madistino dayon ko sulod sa pito ka mga bulan. Busa nakahimo kami og perpekto nga plano. Madistino ko ug unya among sulayan ug magmabdos inig balik dayon nako. Makahatag kana kanamo og bal-ang [spacing] nga among gusto alang sa among mga anak, pun-an pa nga adunay maayo kaayo nga higayon nga taud-taud ko nga anaa sa panimalay. Nag-ampo kami mahitungod niini ug mibati nga mao kini ang direksyon nga among padulngan.

Usa ka Lunes sa buntag nasuta nako “ang panginahanglan sa Navy” nausab ug mabalhin ko ngadto sa laing squadron, ang pagbiyahe hapit sunod-sunod sulod sa usa ka tuig ug dayon madistino og laing pito ka mga bulan human niana. Ang among plano nausab sa ingon lang niana, ug wala mi makahibalo unsay buhaton. Naghunahuna gihapon si Shanna nga unsay among giplanohan maoy labing maayo lang gihapon alang kanamo, apan padayon ko nga nagsulti kaniya nga dili kini mahimo sa akong iskedyul. Kinahanglan mi nga maghulat hangtud nga makabalik ko gikan sa pagkadistino, ug ang among mga anak mas molayo ang gintang kay sa among gusto.

Maayo gani kay si Shanna misalig nga ang tanang butang mahinayon kon mopakita lang gayud mi og gamayng pagtuo. Ako siyang gisultihan nga uyon ra ko niana, apan akong gisiguro nga masayud siya nga kon mohukom kami nga magmagdos sumala sa giplano, madistino ko sa dili madugay, ug siya manganak nga wala ko. Dili lang kana, wala ko niinang higayuna aron makatabang uban ni Isabelle. Nakahibalo ko nga lig-on ang akong asawa, apan wala koy ideya kon unsa ka lig-on.

Mihukom mi nga ipadayon ang among plano, ug napanalanginan mi nga nakapanamkon dayon. Wala ko sa pagmabdos ni Shanna sulod sa labing minus unom ka bulan. Sa dihang pito na siya ka bulan nga nagmabdos, mibiya ko, wala hibaw-i kanus-a mabalik hangtud ang bata mo-lima o mo-unom na ka bulan.

Usa ka adlaw sa hapit nang manganak ni Shanna, na-iskedyul ko og sayo sa buntag nga flight nga sa ngadto-ngadto gikansilar, mao nga mibalik ko sa pagkatulog. Pipila ka oras ang milabay, ang akong labaw nga opisyal, mipatawag nako aron mo-report ngadto sa iyang buhatan diha-diha dayon. Sa dihang didto nako, gipakita ko niya sa email gikan ni Shanna nga nag-ingon nga nagbati na siya ug moadto sa ospital. Maayo gani nga adunay maayong hunahuna si Shanna sa pagpadala og email ngadto niya ug kanako tungod kay mas dali niyang madawat ang mga email kay kanako. Ang opisyal misulti nako nga makagamit ko sa iyang telepono, ug nakaistorya nako si Shanna atol sa iyang pagbati, nga mas dali ug mas hanoy ra ang paggawas niining bataa kay ni Isabelle. Gidala kini ni Shanna sama sa usa ka kampyon, nag-inusara ug walay kahadlok diha sa lawak nga paanakan. Natawo si Alexis nga walay apan. Kon wala pa unta makansila ang flight o wala makapadala si Shanna og email sa akong labaw nga opisyal, wala unta nako maabti ang tibuok panghitabo ug wala madungog ang unang paghilak ni Alexis.

Wala madugay among nahibaloan nga makapauli ko alang sa pipila ka semana nga pagbiya sa trabaho [leave]. Kaming duha nalipay nga makita si Alexis og mas sayo kay sa gilauman. Nindot kaayo ang pagkanaog sa eroplano ug makita nga ang akong pamilya mitubo.

Si Shanna og ako nakat-on og bililhon nga leksyon mahitungod sa hugot nga pagtuo ug pagtugyan sa mga panghitabo diha sa mga kamot sa Ginoo. Nagplano kami og usa ka plano nga among gibati nga maoy labing maayo alang sa among pamilya ug sa among sitwasyon. Nausab ang dagan sa mga butang nga kami walay pagkontrolar, apan si Shanna nagtudlo kanako nga kon kita mobati og kumpirmasyon sa Espiritu Santo nga ang usa ka plano husto, kinahanglan amo kining ipadayon. Ang kinahanglan lang natong buhaton mao ang pagplano uban sa Ginoo ug mopakita og hugot nga pagtuo. Wala kini nahitabo sumala sa among gilauman, apan ang Ginoo nakapahitabo niini pinaagi sa paghatag og daghang “malumo nga kalooy” (tan-awa sa 1 Nephi 1:20).