Mapasalamaton alang sa mga Ginikanan

Ni Presidente Russell M. Nelson

Kinuha gikan sa “Pagpadayag alang sa Simbahan, Pagpadayag alang sa Atong mga Kinabuhi,” Abril 2018 nga kinatibuk-ang komperensya.

Ang tanan sa walo nakong mga apohan sa tuhod mipasakop sa Simbahan sa Europa. Matinud-anon kaayo sila sa Simbahan. Human niana, ang pipila sa akong mga katigulangan wala mopadayon sa pagsunod sa ebanghelyo. Tungod niini, ang akong mga ginikanan dili kaayo moadto sa simbahan sa dihang bata pa ko.

Gimahal nako ang akong mga ginikanan. Gitudloan ko nila og importante kaayo nga mga leksyon. Mapasalamaton kaayo ko nila tungod sa among malipayon nga panimalay. Apan bisan sa bata pa, nahibalo ko nga naay kulang sa akong kinabuhi tungod kay dili kaayo moadto sa simbahan ang among pamilya. Usa ka adlaw misakay ko og sakyanan padulong sa usa ka bookstore aron mangita og libro mahitungod sa Simbahan. Ganahan ko nga magkat-on mahitungod sa ebanghelyo.

Sa dihang nakakat-on ko mahitungod sa Pulong sa Kaalam, nakaamgo ko nga ang akong mga ginikanan wala magsunod sa paagi nga gitudlo niini kanato nga magpakabuhi. Apan gusto nako nga mosunod sila! Busa usa ka adlaw, gipangbuak nako sa sementong salog ang matag botelya sa alkohol diha sa akong panimalay! Nagtuo ko nga silutan ko sa akong amahan, apan wala siyay gisulti nga bisan unsa kanako mahitungod niini.

Sa nagkadako na ko, mipadayon ko sa pagkat-on mahitungod sa ebanghelyo. Misugod ko sa pagsabut sa matahum nga plano sa Langitnong Amahan. Nabunyagan ko sa dihang 16 anyos na ko. Panahon sa Pasko, kanunay akong mosulti sa akong kaugalingon, “Dili na ko gusto og regalo sa Pasko! Gusto lang ko nga masilyo ngadto sa akong mga ginikanan sa templo.” Naghulat ko og daghang mga katuigan aron matinuod kana nga damgo. Sa dihang sobra na sa 80 anyos ang akong mga ginikanan, sa katapusan nasilyo kami isip pamilya! Dako kaayo ang akong gibati nga kalipay niadtong adlawa. Matag adlaw, mobati gihapon ko og kalipay nga nasilyo silang duha ug nga nasilyo ako ngadto kanila.

Koloranan nga Pahina

“Ibubo ang inyong kasingkasing ngadto sa inyong Langitnong Amahan. Dangop Kaniya alang sa mga tubag ug alang sa kahupayan.” —Presidente Russell M. Nelson