Mga Martir ug ang Akong Pagpamatuod
Sunju Kim Muir
Maryland, USA
Paghulagway pinaagi ni Allen Garns
Madudahon ko sa dihang gitudloan ko sa mga misyonaryo mahitungod ni Joseph Smith ug sa Basahon ni Mormon. Ang akong unang hunahuna mao nga si Joseph Smith, sama sa daghan pa nga gitawag og “mga propeta,” tingali mipagawas og dili tinuod nga libro sa kalibutan nga nagtinguha nga mahimong adunahan, bantugan, o bayanihon.
Wala akoy intensyon nga mobasa sa Basahon ni Mormon. Apan paglabay sa panahon ang pagkahigala sa mga misyonaryo ug ang ilang kadasig sa ebanghelyo mipadako sa akong kakuryuso sa ilang mensahe.
Samtang gibasa nako ang mga bersikulo nga gihatag sa mga misyonaryo kanako diha sa Basahon ni Mormon, akong nakit-an ang pagdapit ni Moroni nga mangutana sa Dios nga kinasingkasing, adunay tinuod nga katuyoan, ug hugot nga pagtuo diha kang Kristo kon ang Basahon ni Mormon tinuod (tan-awa sa Moroni 10:4–5). Naghunahuna ko, “Kinsang tawhana, nga nasayud nga ang libro peke, maisugong mohagit kanato sa pagpangutana sa Dios uban sa tinuod nga katuyoan ug sinseridad kon ang Basahon ni Mormon tinuod?”
Dayon usa ka adlaw ang mga misyonaryo mipasabut nga si Joseph Smith ug ang iyang igsoon, si Hyrum, gipatay tungod sa ilang pagpamatuod. Sa kalit lang, nakahunahuna ko nga dili gayud siguro nila ihatag ang ilang kaugalingong kinabuhi alang sa usa ka butang nga nasayud sila nga dili tinuod. Nianang higayona, usa ka mainit nga pagbati, sama sa nagdilaab nga kalayo, ang mikatap kanako. Usa kini ka pagsaksi sa Balaang Espiritu nga nagmatuod sa akong kasingkasing nga si Joseph Smith usa ka tinuod nga propeta. Tungod niini nga saksi, nabunyagan ug nakumpirmahan ko.
Napahinumduman ko niini nga kasinatian paglabay sa 25 ka tuig sa dihang mibasa ko og usa ka pakigpulong ni Elder Jeffrey R. Holland sa Korum sa Napulog Duha ka mga Apostoles. Sa iyang pakigpulong, si Elder Holland nangutana kon, nianang kritikal nga gutlo sa ilang pagkamartir, si Joseph ug Hyrum mopadayon ba sa pagbugal-bugal atubangan sa Dios pinaagi sa pagpahimutang sa ilang mga kinabuhi, sa ilang dungog, ug sa ilang mahangturong kaluwasan sa usa ka libro nga nasayud sila nga dili tinuod.
“Sila dili gayud mobuhat niana!” Miingon si Elder Holland. “Andam silang mamatay kay sa ilimod ang balaanong gigikanan sa mahangturong kamatuoran sa Basahon ni Mormon.”1
Ang mga pulong ni Elder Holland resonable kaayo kanako ug dugang nga milig-on sa akong pagpamatuod ni Propeta Joseph Smith ug sa gahum sa Basahon ni Mormon.
Mapasalamaton ko alang ni Propeta Joseph Smith. Gipagawas niya ang Basahon ni Mormon ug andam nga mihatag sa iyang kinabuhi aron mahimong saksi ni Jesukristo. Pinaagi sa Basahon ni Mormon, akong nasayran ang pagkaanaa sa Dios ug ang Iyang gugma alang kanako.