Mga Bulak ug Pinansyal nga Seguridad

Ni Mechel Wall

Ang tagsulat nagpuyo sa Arkansas, USA.

Ang Ginoo mipadako sa akong kapasidad, mipalambo sa akong mga abilidad, ug mihimo kanako nga sobra pa kaayo kay sa akong mahimo sa akong kaugalingon.

Imahe

overturned tractor

Paghulagway pinaagi ni David Green

Ang kamatuoran nga wala gayud ako makagradwar sa kolehiyo kanunay nga nakahasol kanako. Nasayud ko nga kon adunay bisan unsa nga mahitabo sa akong bana, dili ako andam sa pinansyal nga paagi sa pagsangkap sa among pamilya.

Dayon ang wala damha nahitabo. Nakadawat ko og makapakurat, makausab sa kinabuhi nga tawag sa telepono.

“Tawagi ang 911!” misinggit ang akong bana nga nataranta. “Naipit ko ilawom sa traktora!”

Nanawag ko og tabang ug dayon dali kaayong nakaabut sa luna nga iyang gihawanan, nalabyan ang taas nga linya sa mga sakyanang pang-emerhensiya diha sa graba nga dalan padulong sa among yuta sa Pea Ridge, Arkansas, USA. Buhi si Barry, apan naipit gayud siya sa ilawom sa makina sa traktora nga natuwad.

Migamit og hydraulic nga mga himan sa pagluwas, ang mga trabahante nga pang-emerhensya mipataas sa traktora ug mibira ni Barry. Ang iyang mga bitiis, nga nabasa sa krudo, morag nabali sa pipila ka mga dapit. Gidali siyag dala ngadto sa trauma center, diin nakadawat siya og panalangin sa pagkapari sa wala pa ma-X-ray ang iyang mga bitiis.

Nahingangha kami nga walay bisan usa ka bukog nga nabali, apan ang luyo sa usa sa mga bitiis ni Barry grabeng napaso tungod sa krudo. Ang angol sa pagkaipit miresulta usab sa pagsaka sa toxin sa iyang mga kidney. Nameligro ang iyang kinabuhi.

Human si Barry migahin og lima ka makahadlok nga mga adlaw sa ospital, ang gitas-on sa iyang toxin misugod sa pag-ubos. Misunod ang mga bulan sa pag-ilis sa mga bandahe, mga pagtarung sa panit, mga pag-opera, ug hyperbaric oxygen therapy. Sa dihang gibati niya nga naulian na, mipadayon si Barry sa iyang trabaho sa pagpang-ahente gikan sa panimalay.

“Walay Modawat Nako sa Trabaho”

Kini nga kasinatian nakapaamgo kanamo nga gikinahanglan ang mga kausaban. Samtang akong gigahin ang misunod nga pipila ka tuig sa pagpamalandong sa unsay akong mabuhat kon mawala si Barry kanako, miboluntaryo ko og trabaho, mitambong og mga workshop, ug mi-apply sa pipila ka part-time nga mga trabaho. Apan wala akoy kahanas nga mapuslan sa trabaho, ug walay modawat nako sa trabaho.

Nagpuyo kami sa umahan, nga adunay tugwayanan alang sa pipila ka mga hayop, busa misugod ko sa pagsiksik sa pagpang-uma isip panginabuhian. Usa ka adlaw nakahunahuna ko og usa ka ideya: mga bulak. Human magsiksik sa pagpang-uma og mga bulak, nakahukom ko nga sulayan kini. Miadto ko sa usa ka komperensya alang sa mga tigpananom og mga bulak ug nangandam nga mobalhin gikan sa tugwayanan ngadto sa han-ay nga mga tanom. Dayon, pagka-Nobyembre 2016, miapil ko og klase sa Self-Reliance Services mahitungod sa pagsugod ug pagpalambo sa akong kaugalingong negosyo.

Among Kaugalingong Tindahan sa mga Bulak

Ang 12 ka semana nga kurso mao gayud ang akong gikinahanglan. Ako adunay sukaranang plano sa negosyo ug daghang makalingaw nga mga ideya, apan kulang ako sa organisasyon. Adunay mga ideya nga gisugyot diha sa klase nga wala nako mahunahunai kaniadto. Akong gigamit ang matag ideya. Samtang mitrabaho ako nianang unang tuig sa pagpananom ug pagpamaligya og mga bulak, ang mga sugyot ug mga baruganan nga akong nakat-unan sa klase napuslan:

Nakakaplag ko og loan sa negosyo nga ubos og patong.
Akong gipalapdan ang akong gipamaligyaan sa paglakip sa mga merkado sa mga mag-uuma ug mga tindahan sa mga bulak.
Mipasiugda ko og pipila ka mga kalihokan sa among umahan isip pagpalapad sa akong mga serbisyo.

Sa ulahing bahin sa 2017, human sa akong unang tuig sa pagpanguma, nakaamgo ko nga ang pagpamaligya ngadto sa mga tindahan sa mga bulak magkinahanglan og dakong panahon. “Unsa kaha kon mag-abli ko og akong kaugalingong tindahan sa mga bulak?” Naghunahuna ko. Ang lokal nga tindahan sa mga bulak nanira, ug ang gambalay [building] ngil-ad na tan-awon. Mao nga ang akong bana ug ako mipalit niini, miayo niini, ug nangabli og tindahan sa mga bulak nga namaligya usab og mga arte ug maayong pagkagama nga lokal nga mga butang [local crafts]. Agig dugang, misugod ko og negosyo nga magpaabang og tanom ug magdesinyo og pangsulod nga dekorasyon gamit ang mga tanom.

Akong gipamaligya ang akong mga bulak pinaagi sa among tindahan ug sa mga tindahan og kape, gagmay nga mga tindahan, ug sa usa ka kiosk sa lokal nga airport. Matag adlaw, akong anihon ang unsay akong gikinahanglan.

Nagpakabana ang Ginoo

Aduna akoy pagpamatuod nga ang Ginoo nagpakabana sa akong negosyo. Mitabang siya kanako nga makamugna og pinansyal nga seguridad alang sa akong kaugalingon ug part-time nga trabaho alang sa pipila ka mga babaye kinsa gustong motrabaho sa pailin-ilin nga mga oras ug sa mga estudyante nga nagtrabaho samtang nag-eskwela. Usa sa among mga anak nga babaye maoy nagdumala sa umahan sa mga bulak, ug duha sa among mga anak nga lalaki mao ang motrabaho sa kadaghanan sa mga buluhaton sa umahan, lakip ang pagtabang sa pagtukod og usa ka luyonganan [greenhouse]. Si Barry motabang magabii ug sa mga tapos sa semana, maoy tig-alsa sa bug-at nga mga alsahunon.

Kaming tanan nagsuporta sa usag usa ug nagtambayayong. Usa kini ka panalangin alang sa tanan nga naapil. Padayon kon nga saku apan adunay panahon gihapon alang sa akong pamilya, mga calling sa Simbahan, mga katungdanan sa pagpangalagad, ug boluntaryo nga trabaho.

Ang pagtrabaho gikan sa panahon nga motanom ko og binhi o similya hangtud na sa pagpresentar og bulak ngadto sa usa ka kustomer nakahatag kanako og dakong pagbati sa kalampusan. Wala akoy pagduha-duha nga ang Ginoo mipalambo sa akong mga abilidad ug mihimo kanako nga sobra pa kaayo kay sa akong mahimo sa akong kaugalingon.