Ang Among 30 ka Tuig nga Panaw padulong sa Templo

Francisco W. Fierro

Lima, Peru

Paghulagway pinaagi ni Carl Wiens

Pipila ka bulan human sa akong bunyag, ang akong manghud nga si Oswaldo, mipasakop sa laing simbahan ug aktibong miapil sa kongregasyon niini. Apan gusto nakong masayran ni Oswaldo ang unsay akong nasayran nga tinuod. Ilabi na, gusto nakong makonektar siya ngadto sa mga pulong sa mga propeta.

Matag bulan, kon madawat na nako ang Liahona nga magasin, ako kining ipaambit kang Oswaldo. Akong gisugyot nga ang pipila sa mga hilisgutan diha sa magasin makatabang kaniya nga makapangandam alang sa mga miting sa iyang simbahan. Nalipay ko sa dihang iyang gidawat ang akong sugyot. Hinoon, milabay ang daghang katuigan ug naguol ko nga makita nga ang akong igsoon dili modawat sa gipahiuli nga ebanghelyo ni Jesukristo.

Usa ka buntag, misulti si Oswaldo sa among pamilya nga nagplano siyang mobiya sa among panimalay sa Ecuador ug moadto sa Switzerland. Midawat siya og usa ka panalangin gikan kanako sa adlaw nga mibiya siya. Usa kadto ka emosyonal nga higayon alang kanako tungod kay ang Espiritu mihunghong sa akong kasingkasing nga kini nga panaw mopaduol ni Oswaldo ngadto sa Manluluwas ug sa Iyang Simbahan.

Sa Switzerland, nahimamat ni Oswaldo ang mga misyonaryo ug sa katapusan midapit kanila ngadto sa iyang panimalay. Sa kadugayan nakaestablisar siya og suod nga pakighigala kanila. Apan gisultihan ko niya nga kon ang mga misyonaryo maghisgot mahitungod sa bunyag, dili na siya modawat kanila. Hunahunaa ang akong kasurprisa ug kalipay sa dihang nakadawat ko og email gikan niya nga nagsulti kanako nga magpabunyag siya. Nagpasakop ko sa Simbahan niadtong 1981. Si Oswaldo nabunyagan paglabay sa 20 ka tuig, niadtong Mayo 2001. Iyang nadawat ang iyang tuga [endowment] niadtong Hulyo 2002, ug nasilyo siya sa iyang asawa niadtong Pebrero 2003.

Sa dihang mibalik si Oswaldo sa Ecuador, mihatag siya sa iyang pagpamatuod diha sa sakrament miting. Uban sa nagluha nga mga mata, miingon siya, “Gipaambit sa akong igsoon ang mga pulong sa mga propeta ngari kanako. Kini nga mga pulong midasig kanako samtang nangandam ko alang sa mga miting sa simbahan nga akong gitambongan kaniadto, ug daghang mga tawo ang nahatagan og kaayohan niini nga paagi. Ang mga pulong sa mga propeta miusab sa akong kinabuhi. Pinaagi niini, akong nasayran nga ang ebanghelyo ni Jesukristo anaa na usab sa yuta sa kahingpitan niini, uban sa gahum ug awtoridad.”

Niadtong Pebrero 2011, si Oswaldo ug ako nasilyo ngadto sa among mga ginikanan sa Guayaquil Ecuador Temple. Ang mga pulong sa mga propeta mipanalangin sa among pamilya sa kahangturan.